SSPP/SSA ဢွၵ်ႇၶေႃႈပိုၼ်ၽၢဝ်ႇဝႃႈ တေႁႃလၢႆးတၢင်းတႃႇဢုပ်ႇဢူဝ်း RCSS ၸွမ်းၼင်ႇၵၢင်ႇၸႂ်ၵူၼ်းမိူင်း 4,000 ပၢႆ တုၵ်းယွၼ်းမႃး ဝႃႈၼႆ။
ဝၼ်းတီႈ 18/01/2019 ယူႇတီႈငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ဢွၵ်ႇၶေႃႈပိုၼ်ၽၢဝ်ႇ ၵဵဝ်ႇလူၺ်ႈလွင်ႈၶဵင်ႈၶႅင်ၼႂ်းၵႄႈတပ်ႉသိုၵ်းတႆး 2 ၸုမ်း လႄႈ လွင်ႈမႆႈၸႂ် သင်ၶၸဝ်ႈ၊ ၵူၼ်းမိူင်းလႄႈ ပႃႇတီႇပၢႆးမိူင်း ၸဵမ်ၸိူဝ်းၼၼ်ႉ။
ၵူၼ်းဝၢၼ်ႈၼႂ်းဢိူင်ႇၼႃးမၢၵ်ႇၶေႃ တင်း ဢိူင်ႇၼွင်ၵေႃႈ ႁူဝ်ၵူၼ်း 4,400 ပၢႆၼၼ်ႉ ႁူမ်ႈၵၼ်သေ လူင်းလၢႆးမိုဝ်း မိူဝ်ႈ ဝၼ်းတီႈ 10/01/2019 တႃႇတုၵ်းယွၼ်းထိုင် တပ်ႉသိုၵ်းတႆး 2 ၸုမ်း ႁႂ်ႈဢုပ်ႇဢူဝ်းငူပ်ႉငီႉၵႄႈၶႆၵၼ်ၵႂႃႇၼႆလႄႈ ၵဵဝ်ႇ လူၺ်ႈလွင်ႈၼႆႉ ယူႇတီႈ တၢင်း SSPP/ SSA ဢွၵ်ႇဝႆႉဝႃႈ “ ယူႇတီႈငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈ တႆး တိုၼ်းဝႆႉၼမ်ႉၼၵ်းသေ တေသိုပ်ႇ ၶတ်းၸႂ်ႁႃလွၵ်းလၢႆးႁဵတ်းသၢင်ႈၸွမ်းၵႂႃႇယူႇ” ဝႃႈၼႆ။
ၵဵဝ်ႇၵပ်းလွင်ႈၼႆႉသေ ၾၢႆႇတၢင်းၸုမ်းၶၢဝ်ႇၽူႈတွႆႇႁွၵ်ႈ ၶတ်းၸႂ်ၵပ်းသိုပ်ႇတိတ်းတေႃႇၸူး RCSS/SSA ၵေႃႈတိတ်း တေႃႇဢမ်ႇလႆႈ။ ၵူၺ်းၵႃႈ ၽူႈၶၢၼ်ပၢၵ်ႇ RCSS/SSA လၢတ်ႈတီႈၸုမ်းၶၢဝ်ႇ Irrawaddy ဝႃႈ “ၵဵဝ်ႇၵပ်းလွင်ႈၼႆႉ ဢမ်ႇ မီးလွင်ႈတေ လၢတ်ႈလၢၵ်ႇလၢႆးသင်” ဝႃႈၼႆ။
ၸဝ်ႈႁၢၼ် ၸၢႆးတၢၼ်းဢွင်ႇ ၽူႈၶၢၼ်ပၢၵ်ႇ SSPP/SSA လၢတ်ႈတီႈၽူႈတွႆႇႁွၵ်ႈဝႃႈ “ လွင်ႈၶွင်ႉၶမ် ၼႂ်းၵႄႈႁဝ်းသွင်မူႇ/ သွင်ၸုမ်းၼႆႉ ပိူင်လူင်မၼ်း – မိူၼ်ၼင်ႇ 1) ႁႂ်ႈမီးလွင်ႈပိၼ်ႇပၢႆႇယုမ်ႇယမ်ႁၼ်လီမၵ်းမၼ်ႈၵၼ်၊ 2) ယႃႇႁႂ်ႈပူၼ်ႉပႅၼ် ယဵပ်ႇယမ်ႈပေႉၵိၼ်ၵၼ် လွင်ႈလႆႈပူၼ်ႉပႅၼ်ယဵပ်ႇယမ်ႈပေႉၵိၼ်ၵၼ်ၼၼ်ႉ ႁႂ်ႈၶိုၼ်းထွႆႁူၼ်ပၼ်၊ 3) ႁႂ်ႈမီးလွင်ႈသိုဝ်ႈ ယူဝ်းတႅၵ်ႇလႅင်း တေႃႇၵၼ်သေ ႁူမ်ႈၵၼ်ၵေႃႇသၢင်ႈလႆႈလွင်ႈၽွမ်ႉႁူမ်ႈၸိုင်ႈတႆးၵႂႃႇ။ တၢင်း SSPP/ SSA ႁဝ်းၶႃႈတႄႉ တုၵ်းယွၼ်းတၢင်ႇၼႄမႃး လၢႆပွၵ်ႈလၢႆၵမ်းယဝ်ႉ လွင်ႈၼႆႉ” ဝႃႈၼႆ။
ဢိင်ၼိူဝ်လွင်ႈသိုၵ်း ပွတ်းႁွင်ႇတင်း ပွတ်းၸၢၼ်း ပဵၼ်ပၼ်ႁႃ လွင်ႈႁိမ်ၼႃႈတီႈၵၼ်သေ ၵူၼ်းမိူင်းၼႂ်းမိူင်းတႆး ပွတ်း ႁွင်ႇ လၢႆလၢႆၸႄႈဝဵင်း ၼပ်ႉႁူဝ်ႁဵင် လႆႈဢွၼ်ၵၼ်ပၢႆႈယၢၼ်ႁိူၼ်းယေးၽႂ်မၼ်း တေႃႇထိုင်ယၢမ်းလဵဝ် ပႆႇၸၢင်ႈပွၵ်ႈ ၶိုၼ်းၵေႃႈမီး။
ၼႂ်းလိၵ်ႈပိုၼ်ၽၢဝ်ႇၼၼ်ႉ SSPP/SSA တိုၵ်းသူၼ်းပႃး ၵူၼ်းမိူင်းဢၼ်လႆႈပၢႆႈၽေးသိုၵ်းၼၼ်ႉ ႁႂ်ႈဢွၼ်ၵၼ်ပွၵ်ႈမႃး ယူႇ သဝ်းႁဵတ်းသၢင်ႈ ၵၢၼ်ငၢၼ်းၽႂ်မၼ်းၶိုၼ်း။ ႁူင်းႁဵၼ်း ဢၼ်လႆႈဢိုတ်းဝႆႉၸူဝ်ႈၶၢဝ်းၸိူဝ်းၼၼ်ႉၵေႃႈ ႁႂ်ႈဢွၼ်ၵၼ် ၶိုၼ်းပိုတ်ႇသွၼ်ၶိုၼ်းသေၵမ်း ဝႃႈၼႆ။
