ထႆး – မၢၼ်ႈႁူပ့်ထူပ်းဢုပ်ႇၵုမ်ၵၼ် တႃႇႁူမ်ႈၵၼ်ၵႄႈလိတ်ႈ ပၼ်ႁႃၵၢၼ်ၶၢတ်ႇၵူၼ်းႁဵတ်းၵၢၼ်လႄႈ တႃႇတူၺ်းလွမ်ႁႅင်းၵၢၼ် ၸွမ်းၼင်ႇပၵ်းပိူင်လုမ်ႈၾႃ့မီး။
ဝၼ်းတီႈ 18 – 19/01/2019 ႁွင်ႈၵၢၼ်ၾၢႆႇႁႅင်းၵၢၼ်ထႆးလႄႈ ၾၢႆႇႁႅင်းၵၢၼ်မိူင်းႁူမ်ႈတုမ်မၢၼ်ႈ ၊ ၾၢႆႇၵူတ်ႇ ထတ်းၵူၼ်းၶဝ်ႈမိူင်း (လဝၵ) ႁူပ့်ထူပ်းဢုပ်ႇဢူဝ်းၵၼ် တီႈၼေႇပျီႇတေႃႇ မိူင်းမၢၼ်ႈ ။
ၼႂ်းပၢင်ၼၼ့်ဢုပ်ႇဢူဝ်းၵၼ် လၢႆလွင်ႈမိူၼ်ၼင်ႇ ႁႂ်ႈႁႅင်းၵၢၼ်လႃႈၼမ့်ႁဵတ်းၵၢၼ်ၸွမ်းပိူင် MOU၊ ၵၢၼ်ဢဝ်ႁႅင်း ၵၢၼ်ယၢၼ်မိူင်းၶဝ်ႈမိူင်းထႆးၸွမ်းၼင်ႇမၢႆမီႈ၊ ၵူတ်ႇထတ်းပၢႆးယူႇလီႁႅင်းၵၢၼ် ၵွၼ်ႇၶဝ်ႈႁဵတ်းၵၢၼ်မိူင်းထႆး၊ ၵူတ်ႇထတ်းၶွမ်ႊပၼီႊ ဢၼ်ပူၼ့်ပႅၼ်သုၼ်ႇလႆႈႁႅင်းၵၢၼ်၊ ၶဵင်ႈၶႅင်ၵူတ်ႇ ထတ်းပေႃႈလဵင့်ၼၢႆးၸၢင်ႈလႄႈ ၼၢႆးၼႃႈဢၼ် ဢမ်ႇၸွမ်းမၢႆမီႈ၊ ၵႄႈပၼ်ႁႃၵူၼ်းႁဵတ်း ၵၢၼ်ဢၼ် ဢမ်ႇႁဵတ်းၸွမ်းၼင်ႇၶၢဝ်းယၢမ်းဢၼ်မၵ်းမၼ်ႈဝႆ့ၸဵမ်ၸိူဝ်း ၼႆ့။
ၸၢႆးပိူင်း ၸဝ်ႈၼႃႈတီႈၾၢႆႇမၢႆမီႈၵဝ့်ငဝ်ႈပူၵ်းပွင်သုၼ်ႇလႆႈၵူၼ်း HRDF လၢတ်ႈတီႈၸုမ်းၶၢဝ်ႇၽူႈတွႆႇ ႁွၵ်ႈဝႃႈ – “ မိူဝ်ႈလဵဝ်ၼႆ့ ၼႃႈၵၢၼ်တမ်ႇငႃႈ(လႃႈၼမ့်)လႄႈ ၵၢၼ်ၵေႃႇသၢင်ႈၼႆ့ ႁႃၵူၼ်းႁဵတ်းၵၢၼ်ယၢပ်ႇ မႃးဢေႃႈ ယွၼ့်ဝႃႈႁႅင်းၵၢၼ်ၸိူဝ်းၼႆ့ ပေႃးမီးပၺ်ၺႃလႅတ်းသႅဝ်းမႃးယဝ့်ၵေႃႈ ႁႃႁဵတ်းၵၢၼ်ႁင်းၵူၺ်း ယွၼ့်ဝႃႈၽႂ်ၵေႃႈဢမ်ႇၶႂ်ႈပဵၼ်လုၵ်ႈၼွင့်ပိူၼ်ႈလႄႈ ႁဵတ်းၵၢၼ်ၼၵ်းၼႃတေႃႇၸူဝ်ႈ။ ၵွပ်ႈၼၼ်လႄႈ ႁဵတ်းႁႂ်ႈပေႃႈလဵင့်လႄႈ ၶွမ်ႊပၼီႊၶဝ်ႁူပ့်တၢင်းယၢပ်ႇ ၶၢတ်ႇၵူၼ်းႁဵတ်းၵၢၼ်” ဝႃႈၼႆ။
တီႈၼႂ်းမိူင်းၸိုင်ႈထႆးၼႆႉ မီးၵူၼ်းၼွၵ်ႈမိူင်းဢွၼ်ၵၼ်မႃးဢႅဝ်ႇယဵမ်ႈတင်းၼမ်တင်းလၢႆလႄႈ မီးႁႅင်းၵၢၼ်ယၢၼ်မိူင်း ဢၼ်လုၵ်ႉမႃးတၢင်းမိူင်းလၢဝ်း၊ ၵမ်ႊပူႊၶျႃႊလႄႈ မိူင်းႁူမ်ႈတုမ်မၢၼ်ႈ မႃးႁဵတ်းၵၢၼ်ၼပ်ႉဢၢၼ်ႇႁူဝ်လၢၼ့် ၊ လူင်ပွင်ၸိုင်ႈထႆးၶတ်းၸႂ်ႁႃလၢႆးတၢင်းၵႄႈ လိတ်ႈပၼ်ႁႃ ၵၢၼ်ၶၢတ်ႇၵူၼ်းႁဵတ်းၵၢၼ်လႄႈ ႁႂ်ႈႁႅင်းၵၢၼ်ထုၵ်ႇမႅၼ်ႈၸွမ်းၼင်ႇပၵ်းပိူင်မၢႆမီႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ