တီႈဢိူင်ႇၼွင်လႅင် ဝဵင်းပၢင်လူင် ၸတ်းႁဵတ်း ဝၼ်းသူင်သိူဝ်း လုၵ်ႈဢွၼ်ႇ ပွၵ်ႈၵမ်း 3 မီးလုၵ်ႈဢွၼ်ႇၶဝ်ႈႁူမ်ႈ 3 ႁဵင်ပၢႆ ဝႃႈၼႆ။

ဝၼ်းတီႈ 15-16/01/2019 ယၢမ်းၵၢင်ၼႂ် 9 မူင်း မေႃသွၼ်ႁူင်းႁဵၼ်း လႄႈ ၽူႈယႂ်ႇၵူၼ်းလူင် ၼႂ်းပိုၼ်ႉတီႈ ဢွၼ်ႁူဝ် ၸတ်းႁဵတ်း ဝၼ်းသူင်သိူဝ်းလုၵ်ႈဢွၼ်ႇ တီႈဝၢၼ်ႈၼွင်လႅင်၊ ဢိူင်ႇၼွင်လႅင် ဝဵင်းပၢင်လူင် ၸႄႈတွၼ်ႈလွႆလႅမ် ၸိုင်ႈ တႆးပွတ်းၸၢၼ်း ဝႃႈၼႆ။

ၸၢႆးၽိူဝ်ယွတ်ႈ ၾၢႆႇႁၢင်ႈႁႅၼ်းပၢင်ပွႆး လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ “ယိူင်းဢၢၼ်းဢၼ်လႆႈၸတ်းႁဵတ်းဝၼ်းလုၵ်ႈ ဢွၼ်ႇၼႆႉ ၶႂ်ႈႁႂ်ႈလုၵ်ႈဢွၼ်ႇ ႁတ်းၼႄလွင်ႈၼမ်ႉၵတ်ႉတၢင်းႁတ်းႁၢၼ်တူဝ်ၸဝ်ႈၵဝ်ႇ/ၶႂ်ႈႁႂ်ႈ မေႃသွၼ်လႄႈ ပေႃႈမႄႈ လုၵ်ႈႁဵၼ်း မႃးႁူပ်ႉႁူႉၸၵ်း မိုတ်ႈၵိုဝ်းၸမ်ၸႂ်ၵၼ်/ၶႂ်ႈႁႂ်ႈလုၵ်ႈႁဵၼ်းလႄႈပေႃႈမႄႈဢိၵ်ႇတင်းမေႃသွၼ်ၶဝ် ႁူႉထိုင် ထွတ်ႈမျၢတ်ႈ 4 ယိူင်ႈ ၸိူဝ်းၼႆႉ ပၢင်သူင်သိူဝ်း ဝၼ်းလုၵ်ႈဢွၼ်ႇၼႆႉ ၸတ်းႁဵတ်းမႃး ၶၢဝ်းတၢင်း 3 ပီ ယဝ်ႉ။ ႁဝ်းၶႃႈ ဢဝ်ပိူင်ဝၼ်းလုၵ်ႈဢွၼ်ႇတီႈမိူင်းထႆး ၼႂ်းဝၼ်းတီႈ 12 လိူၼ်ၵျႅၼ်ႊၼိဝ်ႊရီႊ ၼၼ်ႉ သေၸတ်းႁဵတ်း မႃး” ဝႃႈၼႆ။

ဝၼ်းသူင်သိူဝ်းလုၵ်ႈဢွၼ်ႇ ပွၵ်ႈၼႆႉ မီးၽူႈယႂ်ႇၵူၼ်းလူင် မႃးမွၵ်ႇလၢတ်ႈၶေႃႈၵႂၢမ်း လႄႈ ဢိၵ်ႇတင်းပေႃႈ မႄႈလုၵ်ႈ ဢွၼ်ႇ ၶဝ်ၸိူဝ်းၼႆႉ မိူၼ်ၼင်ႇ ႁူဝ်ပဝ်ႈၵေႃလိၵ်ႈလၢႆးၾိင်ႈငႄႈတႆး ဝဵင်းပၢင်လူင်၊ ၽူႈတႅၼ်းသၽႃးၸႄႈမိူင်း ၸႄႈတွၼ်ႈလွႆလႅမ်၊ ၸုမ်းၵူၼ်းၼုမ်ႇ TYO၊ လုၵ်ႈႁဵၼ်းၸၼ်ႉၸွမ် ဝဵင်းပၢင်လူင်ဢိၵ်ႇတင်း လုၵ်ႈႁဵၼ်း ၼႂ်းလူင်ပွင်ၸိုင်ႈ လႄႈ လုၵ်ႈႁဵၼ်း ႁူင်းႁဵၼ်း ၸိူဝ်ႉၸၢတ်ႈ ပီႈၼွင်ႉတီႈၸမ်တီႈၵႆ ၶဝ်ၸိူဝ်းၼႆႉ မႃးၶဝ်ႈႁူမ်ႈ တင်းၼမ်လၢႆ ဝႃႈၼႆ။

ၼႂ်းဝၼ်းလုၵ်ႈဢွၼ်ႇပွၵ်ႈၼႆႉ မီးပႃးပၢင်လဵၼ်ႈၵဵမ်း ႁႂ်ႈမီးလွင်ႈတူင်ႉၼိုင် တႃႇလုၵ်ႈဢွၼ်ႇ၊ မီးပၢင်လႅၼ်ႈၶေႉၵၼ်၊ ၶဵင်ႇ ၵၼ်ၵိၼ်ၶဝ်ႈမုၼ်း၊ တႆႇႁၢဝ်းပေႃႉမွၼ်လႄႈ သူၼ်ၶဵမ် ၸဵမ်ၸိူဝ်းၼႆႉ။

လိူဝ်ၼၼ်ႉ လၢႆတီႈ ဢၼ်မီးၼႂ်းတီႈတပ်ႉသိုၵ်း RCSS ၵုမ်းၵမ်ၼၼ်ႉ ဢွၼ်ၵၼ်ၸတ်းႁဵတ်း ဝၼ်းသူင်သိူဝ်းလုၵ်ႈဢွၼ်ႇမႃး။ မိူၼ်ၼင်ႇ တီႈငဝ်ႈၸိုင်ႈလွႆတႆးလႅင်း ၵေႃႈၸတ်းႁဵတ်းမႃး ၵူႈပီ ဝႃႈၼႆ။