ဢိင်ၼိူဝ်ငဝ်းလၢႆးၼႂ်းပိုၼ်ႉတီႈ သုၵ်ႉယုင်ႈ၊ ၶဵင်ႈၶႅင်ၵၢၼ်သိုၵ်းၵၼ်သေ ၵူၼ်းဝၢၼ်ႈၼႂ်းဢိူင်ႇၼႃးမွၼ် မိူင်းပၼ်ႇ ၵူဝ် ပဵၼ်ပၢင်တိုၵ်း လႄႈ ဢွၼ်ၵၼ်ပၢႆႈဢွၵ်ႇၵႂႃႇသွၼ်ႈ တီႈတၢင်းပွတ်းဢွၵ်ႇၶူင်း 300 ပၢႆၼၼ်ႉ သိုၵ်းမၢၼ်ႈလႄႈ သိုၵ်းဝႃႉ သူင်ႇပွၵ်ႈႁိူၼ်းၶိုၼ်း ဝၼ်းမိူဝ်ႈၼႆႉ ဝႃႈၼႆ။
မိူဝ်ႈၼႆႉ ဝၼ်းတီႈ 18/01/2019 ယၢမ်းၵၢင်ၼႂ် မွၵ်ႈ 9:45 မူင်း ၸဝ်ႈသိုၵ်းလူင် ဢွင်ႇသေႃႇထူၺ်း ပိဝ်ႇႁႃႇလၢင်းၶိူဝ်း ၶပ်းၶိုင်ရူတ်ႉၵႃးသိုၵ်းမၢၼ်ႈ ၵႂႃႇႁပ်ႉဢဝ် ၵူၼ်းပၢႆႈၽေးသိုၵ်း ၵူၼ်းဝၢၼ်ႈမႆႉပူၵ်ႇ/ ပၢင်ပီႉ ႁူဝ်ၵူၼ်း 309 ၵေႃႉ တီႈၶူဝ် တႃႈသၢင်း ၾင်ႇၶူင်းသေ သူင်ႇထိုင် ဢိူင်ႇၼႃးမွၼ် ၼႂ်းၸႄႈဝဵင်းမိူင်းပၼ်ႇၶိုၼ်း။
ၵူၼ်းမိူင်းပၼ်ႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၶမ်ႈဝႃး ယၢမ်းဝၢႆးဝၼ်း 2:20 မူင်း ၵူၼ်းပၢႆႈၽေးသိုၵ်း 309 ၵေႃႉ လုၵ်ႉမိူင်းတူၼ် မႃးၼွၼ်းၼႂ်းတပ်ႉမၢၼ်ႈ 294 တႃႈသၢင်း။ မိူဝ်ႈၼႆႉ ယၢမ်းၵၢင်ၼႂ် 9:45 မူင်း ၸင်ႇလုၵ်ႉ တီႈတပ်ႉ ၼၼ်ႉဢွၵ်ႇမႃး လုၵ်ႉတီႈၶူဝ်တႃႈသၢင်းမႃး မိူင်းပၼ်ႇ ၵႃး 12 လမ်း။ လုၵ်ႉမိူင်းပၼ်ႇသေၵႂႃႇၼႃးမွၼ်သမ်ႉ ရူတ်ႉၵႃး ႁပ်ႉသူင်ႇပၼ် 24 လမ်း။ ၼႂ်းၵႃး 24 လမ်းၼၼ်ႉ ၵႃးသိုၵ်းမၢၼ်ႈ 6 လမ်း လိူဝ်ၼၼ်ႉ ပဵၼ်ၵႃးၵူၼ်းမိူင်း။ သိုၵ်းမၢၼ်ႈ ပၼ်ၵႃႈၸၢင်ႈ ၼိုင်ႈလမ်းလႂ် 170,000 ပျႃး” ဝႃႈၼႆ။
ၵူၼ်းပၢႆႈၽေး 309 ၼႆႉ လုၵ်ႉၼႂ်းၼႃႈလိၼ်ဝႃႉ ပွတ်းႁူၺ်ႈဢေႃႈ ၼႃးၵွင်းမူး လႅၼ်လိၼ်တႆး – ထႆးမႃး။ ဝၼ်းတီႈ 17/01/2019 ဝႃႉသူင်ႇထိုင်မိူင်းတူၼ်သေ သိုၵ်းမၢၼ်ႈတေႃႉသူင်ႇပၼ်ထိုင်တႃႈသၢင်း။ ဢၼ်လုၵ်ႉပွတ်းလၢင်းၶိူဝ်း မႃးသမ်ႉ ထိုင်ႁိူၼ်းၶိုၼ်းမိူဝ်ႈဝၼ်းတီႈ 14/01/2019။
ၵဵဝ်ႇၵပ်းလွင်ႈၼႆႉ ၵူၼ်းမိူင်းပၼ်ႇ သိုပ်ႇလၢတ်ႈဝႃႈ- “ၵူၼ်းပၢႆႈၽေးသိုၵ်း 309 ၵေႃႉတႄႉ တေဢၢၼ်းသူင်ႇႁွတ်ႈထိုင် မိူဝ်ႈၼႆႉတင်းသဵင်ႈ။ လႆႈငိၼ်းဝႃႈ ယူႇ တီႈ သိုၵ်းမၢၼ်ႈ ၵမ်ႉထႅမ်ပၼ် ၶဝ်ႈသၢၼ် တႃႇၵူၼ်းပၢႆႈၽေး 100 ထူင်” ဝႃႈၼႆ။
ၵူၼ်းဝၢၼ်ႈမႆႉပူၵ်ႇ/ ပၢင်ပီႉ ၼႂ်းဢိူင်ႇၼႃးမွၼ် ဢၼ်လႆႈပၢႆႈၵႂႃႇသွၼ်ႈတၢင်းပွတ်းဢွၵ်ႇၼၼ်ႉ ယွၼ်ႉ သိုၵ်း ၸုမ်းယိပ်း ၵွင်ႈၵင်ႇ တေၵဵပ်းသိုၵ်းမႂ်ႇၼႆသေ ၵူၼ်းဝၢၼ်ႈဢမ်ႇၽွမ်ႉ ၵူဝ်လႆႈႁဵတ်းသိုၵ်း၊ ယဝ်ႉၵေႃႈ ၵူဝ် ပဵၼ် ပၢင်တိုၵ်းၼႆသေ ၼႅတ်ႈဢွၼ်ၵၼ်ဢွၵ်ႇပၢႆႈ မိူဝ်ႈဝၼ်းတီႈ 01-02/01/2019 ဝႃႈၼႆ။
မိူဝ်ႈဝၼ်းတီႈ 14/01/2019 ၼၼ်ႉၵေႃႈ ၵူၼ်းမိူင်းၼႃးမွၼ် ဢၼ်ပၢႆႈၵႂႃႇသွၼ်ႈတီႈလၢင်းၶိူဝ်းႁူဝ်ၵူၼ်း 75 ၵေႃႉၼၼ်ႉ ၶိုၼ်းဢွၼ်ၵၼ်ပွၵ်ႈမႃး ႁိူၼ်းယေးၽႂ်မၼ်းယဝ်ႉ ဝႃႈၼႆ။
တၢင်းပွတ်းတွၼ်ႈဢိူင်ႇၼႃးမွၼ် ၸႄႈဝဵင်းမိူင်းပၼ်ႇၼႆႉ ယွၼ်ႉဝႃႈ သိုၵ်း PNLO တင်း RCSS ပဵၼ်ပၼ်ႁႃၵၼ် ၶဵင်ႈ ၶႅင်ပိုတ်းယိုဝ်းၵၼ်မႃးမိူဝ်ႈပၢႆပီ 2018 ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ