ၵူၼ်းဝၢၼ်ႈၼႂ်းဢိူင်ႇၼႃးမွၼ် ၸႄႈဝဵင်းမိူင်းပၼ်ႇ ဢၼ်ပၢႆႈၽေးသိုၵ်းၵႂႃႇသွၼ်ႈဝႆႉ ပွတ်းဢွၵ်ႇၶူင်း မိူဝ်ႈႁူဝ်လိူၼ် ၵျႅၼ်ႊၼိဝ်ႊရီႊၼႆႉ ၸွမ်းၼင်ႇတိူင်းသိုၵ်းၶူဝ်လမ် ႁွင်ႉၶိုၼ်းလႄႈ ၸုမ်းသိုၵ်းဝႃႉ သူင်ႇမွပ်ႈပၼ်ၶိုၼ်းမိူင်းပၼ်ႇ ဝႃႈၼႆ။

မိူဝ်ႈၼႆႉ ဝၼ်းတီႈ 17/01/2019 ယၢမ်းၵၢင်ၼႂ် ၵူၼ်းပၢႆႈၽေးသိုၵ်း ႁူဝ်ၵူၼ်း 300 ပၢႆ ဢၼ်ၵႂႃႇသွၼ်ႈဝႆႉတီႈ တၢင်းမိူင်း တေႃႉ – မိူင်းထႃးၼၼ်ႉ ပွၵ်ႈမႃး ၵိၼ်ၶဝ်ႈဝၼ်းတီႈဝတ်ႉၵျွင်းၶမ်း ၸႄႈဝဵင်းမိူင်းတူၼ်သေ ၸင်ႇတေသိုပ်ႇပွၵ်ႈၶိုၼ်းမိူဝ်း မိူင်းပၼ်ႇ ဝႃႈၼႆ။

ၵူၼ်းမိူင်းပိုၼ်ႉတီႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ လႆႈငိၼ်းဝႃႈ ၵူၼ်းပၢႆႈၽေးသိုၵ်းႁဝ်းၶႃႈၼႆႉ တေလုၵ်ႉတၢင်း မိူင်းတေႃႉမိူင်းထႃးမႃး တေပွၵ်ႈမိူဝ်းတၢင်းၶူဝ်တႃႈသၢင်းသေသိုပ်ႇမိူဝ်းမိူင်းပၼ်ႇ။ ၵူၼ်းပၢႆႈၽေး သိုၵ်းတင်းမူတ်း မီး 310 ၵေႃႉ။ လႆႈငိၼ်းဝႃႈ ယူႇတီႈတိူင်းသိုၵ်းၶူဝ်လမ် ၸီႉသင်ႇႁႂ်ႈ ပွၵ်ႈၶိုၼ်းၸဵမ်မိူဝ်ႈဝူင်ႈပူၼ်ႉ”ဝႃႈၼႆ။

ၵူၼ်းပၢႆႈၽေးသိုၵ်း 300 ပၢႆ ၼႂ်းဢိူင်ႇၼႃးမွၼ် ၸႄႈဝဵင်းမိူင်းပၼ်ႇၼၼ်ႉ ယွၼ်ႉသိုၵ်းၸုမ်းယိပ်းၵွင်ႈၵၢင်ႇ ႁွင်ႉႁဵတ်း ပၢင်ၵုမ်သေ တေၵဵပ်းသိုၵ်းမႂ်ႇၼႆလႄႈ ၵူၼ်းဝၢၼ်ႈ ဢွၼ်ၵၼ်ၵူဝ်သေ ႁၢင်ႈႁႅၼ်းသွင်ႈပၢႆႈမႃးသွၼ်ႉဝႆႉတၢင်း ပွတ်းဢွၵ်ႇၶူင်း တၢင်းၼႃႈတီႈသိုၵ်းဝႃႉတူင်ႉၼိုင်ဝႆႉၼၼ်ႉ ယူႇတီႈၵူၼ်းသိုၵ်းဝႃႉ ႁပ်ႉတူၺ်းလူလွမ်ဝႆႉ ဝႃႈၼႆ။

သိုပ်ႇလၢတ်ႈဝႃႈ “လႆႈငိၼ်းဝႃႈတႄႉ ယူႇတီႈတပ်ႉသိုၵ်းမၢၼ်ႈ မိူင်းတူၼ် တေဢဝ်ပုၼ်ႈၽွၼ်းတၢင်ႇၵႃး မႃးသူင်ႇ တီႈၶူဝ်တႃႈသၢင်း။ ယဝ်ႉၵေႃႈ ယူႇတီႈသိုၵ်းမၢၼ်ႈ တၢင်းမိူင်းပၼ်ႇသမ်ႉ တေမႃးပႂ်ႉႁပ်ႉ တီႈၶူဝ်တႃႈသၢင်းၾင်ႇတူၵ်း သေ တေသိုပ်ႇသူင်ႇၵႂႃႇထိုင်တီႈၼႂ်းဢိူင်ႇၼႃးမွၼ်” ဝႃႈၼႆ။

ၵူၼ်းမိူင်းပၼ်ႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းပၢႆႈၽေးသိုၵ်း ဢၼ်တေပွၵ်ႈမႃးၼႆႉ ၵမ်ႈၼမ် ပဵၼ်ၵူၼ်း ၸၢဝ်းပဢူဝ်းတင်း လွႆ ပဵၼ်ၵူၼ်းဝၢၼ်ႈမႆႉပူၵ်ႇ/ ပၢင်ပီႉၶႃႈ။ လႆႈငိၼ်းဝႃႈ မိူဝ်ႈၵႆႈတႄႉ တိုၵ်ႉပူၼ်ႉၼႃးၵွင်းမူး မႃးၵူၺ်း ၼႆဝႃႇ။ ၸွင်ႇတေမႃးၽႅဝ်မိူင်းပၼ်ႇမိူဝ်ႈၼႆႉၵမ်းလဵဝ်ၵေႃႈ ဢမ်ႇႁူႉ” ဝႃႈၼႆ။

မိူဝ်ႈဝၼ်းတီႈ 14/01/2019 ၼၼ်ႉၵေႃႈ ၵူၼ်းမိူင်းၼႃးမွၼ် ဢၼ်ပၢႆႈၵႂႃႇသွၼ်ႈတီႈလၢင်းၶိူဝ်းႁူဝ်ၵူၼ်း 70 ပၢႆၼၼ်ႉ ၶိုၼ်းဢွၼ်ၵၼ်ပွၵ်ႈမႃး ႁိူၼ်းယေးၽႂ်မၼ်းယဝ်ႉ ဝႃႈၼႆ။

တၢင်းဢိူင်ႇၼႃးမွၼ် ၸႄႈဝဵင်းမိူင်းပၼ်ႇၼႆႉ မီးၸုမ်းယိပ်းၵွင်ႈၵၢင်ႇ တူင်ႉၼိုင်ၵႂႃႇမႃး မိူၼ်ၼင်ႇ တပ်ႉသိုၵ်းလူင်ပွင် ၸိုင်ႈမၢၼ်ႈ၊ တပ်ႉသိုၵ်း PNLO လႄႈ သိုၵ်း RCSS ဝႃႈၼႆ။ ယၢမ်းလဵဝ် လႆႈငိၼ်းဝႃႈ တပ်ႉသိုၵ်း PNLO ထွႆထွၼ်ယဝ်ႉ ဝႃႈၼႆသေတႃႉ တေႃႇထိုင်ဝၼ်းတီႈ 16/01/2019 ၼႆႉ ယင်းတိုၵ်ႉမီးယူႇၼႂ်းထုင်ႉမိူင်းပၼ်ႇ ဝႃႈၼႆ။

သိုၵ်း RCSS တင်းသိုၵ်း PNLO ၶဵင်ႈၶႅင်ၵၢၼ်သိုၵ်းၵၼ်မႃး တင်ႈတႄႇပၢႆပီ 2018။ ယွၼ်ႉပၼ်ႁႃၼႆႉသေ ၵျွင်းမုၼ် ၸဝ်ႈတႆးၵေႃႈၺႃးၽဝ်၊ ၵျွင်းမုၼ်ၸဝ်ႈပဢူဝ်းၵေႃႈၺႃးၽဝ်။ ၵူၼ်းမိူင်းလႆႈယူႇယၢပ်ႇဝႆႉတင်းသွင်ၾၢႆႇ ဝႃႈၼႆ။