ပလိၵ်ႈၾၢႆႇယႃႈမဝ်းၵမ် တီႉလႆႈယႃႈၵႃႈၶၼ် ၼပ်ႉမိုၼ်ႇလၢၼ်ႉ ၼႂ်းၸိုင်ႈတႆးပွတ်းၸၢၼ်း

ႁွင်ႈၵၢၼ်ၾၢႆႇယႃႈမဝ်းၵမ် ပိုၼ်ၽၢဝ်ႇဝႃႈ တီႉလႆႈယႃႈဢႆႉသ် တႃႇၶၼ်ငိုၼ်း 150,000 သႅၼ်ပျႃး တီႈၸႄႈဝဵင်းၵုၼ်ႁဵင် ၸိုင်ႈတႆးပွတ်းၸၢၼ်း။

ဝၼ်းတီႈ 15/01/2019 ယၢမ်းၵၢင်ၼႂ် ပလိၵ်ႈၾၢႆႇၽဵဝ်ႈမူၺ်ႉယႃႈမဝ်းၵမ် တပ်ႉမၢႆ 27 လွႆလႅမ် လႆႈႁပ်ႉငိၼ်းၶၢဝ်ႇသေ ပႂ်ႉၵူတ်ႇထတ်း တီႈၶူဝ်တႃႈၵေႃႈ (ၼမ်ႉၶူင်း) တီႉလႆႈယႃႈမဝ်းၵမ် ၼႂ်းရူတ်ႉၵႃးလမ်းၼိုင်ႈ ဝႃႈၼႆ။

“ ၵႃးၼႆႉ လုၵ်ႉတၢင်းမိူင်းပဵင်းမႃး တေၵႂႃႇတၢင်းၵုၼ်ႁဵင် လႆႈၵူတ်ႇထတ်းႁၼ်မႅၼ်ႈတီႈၶူဝ်တႃႈၵေႃႈ။ ပဵၼ်ယႃႈဢႆႉသ် (ICE) ၼမ်ႉၼၵ်း တေမီး 600 ၵီႊလူဝ်ႊ(မႅၼ်ႈငိုၼ်း 150,000 သႅၼ်ပျႃး) ယဝ်ႉၵေႃႈ ၾူၼ်းၼိုင်ႈလုၵ်ႈ” ပိုၼ်ၽၢဝ်ႇဝႆႉၼင်ႇၼႆ။

ယူႇတီႈၾၢႆႇၸဝ်ႈၼႃႈတီႈ လႆႈၵူတ်ႇထတ်းႁူႉဝႃႈ ပဵၼ်ၵႃးပွၵ်ႉမၢၵ်ႇၵႃႇႁူဝ်ၶမ်း ၸႄႈဝဵင်းတႃႈၶီႈလဵၵ်း ၵူၼ်းႁေႃႈ ၵႃးသမ်ႉ ၸိုဝ်ႈႁွင်ႉ မိၼ်ႉဢွင်ႇ။ ၸဝ်ႈၵႃးပဵၼ်ၽႂ်၊ ၸဝ်ႈၶွင်ယႃႈပဵၼ်ၽႂ် ၼႆတႄႉ ယင်းပႆႇပိုၼ်ၽၢဝ်ႇပႃး။ ၵဵဝ်ႇၵပ်းလွင်ႈၼႆႉ ယူႇ တီႈ ႁူင်းပလိၵ်ႈၵႃလိ လႆႈပိုတ်ႇဢမူႉၶၻီႊ ဢဝ်လိူင်ႈလၢဝ်းဝႆႉ ဝႃႈၼႆ။

ပၢၼ်လူင်ပွင်ၸိုင်ႈၵူၼ်းမိူင်းၼႆႉ ဢၼ်တီႉလႆႈယႃႈမဝ်းၵမ်ၵႃႈၶၼ်ယႂ်ႇလူင်ၼၼ်ႉ လူင်ပွင်ၸိုင်ႈပိုၼ်ၽၢဝ်ႇဝႃႈ ဢမ်ႇမီး ၸဝ်ႈၶွင် လွၼ်ႉလွၼ်ႉလႄႈ ၸုမ်းပၵ်းတႃပႂ်ႉတူၺ်းပၼ်ႁႃၵူႈမိူင်းမိူင်း ICG တိုၵ်းသူၼ်းလုမ်ႈၾႃႉႁႂ်ႈၵူတ်ႇထတ်း၊ ဢဝ်လိူင်ႈတပ်ႉသိုၵ်း လူင်ပွင်ၸိုင်ႈမၢၼ်ႈ ဢၼ်လပ်းႁူလပ်းတႃပွႆႇပၼ်ၵႃႉၶၢႆယႃႈမဝ်းၵမ်လွတ်ႈလႅဝ်း ဝႃႈၼႆ။