ပီႈၼွင်ႉတႆး၊ ထႆး၊ မၢၼ်ႈဢိၵ်ႇလၢႆၸၢဝ်းၶိူဝ်း ဢွၼ်ၵၼ်ထွမ်ႇထမ်းတြႃး ဝႆႈသႃၸဝ်ႈၶူးဝႃးဝုၼ်းၸုမ်ႉ ၼႂ်းတိုဝ်ႉတၢင်းမဵတ်ႉတႃတြႃးတီႈၵဵင်းမႆႇ ၸိုင်ႈထႆး။
ဝၼ်းတီႈ 16/01/2019 ၸဝ်ႈပေႃႈသိလ်ထမ်းဝုၼ်းၸုမ်ႉ ယေႃးတူဝ်မဵတ်ႉတႃတြႃးတီႈၼႃႈလိၼ်သိုၵ်းမၢႆ 7 ဢိူင်ႇ ၻွၼ်းၵႅဝ်ႈ ၸႄႈဝဵင်းမႄႈရိမ်ႊ ၸႄႈတွၼ်ႈၵဵင်းမႆႇ ၸိုင်ႈထႆး ။ မီးပီႈၼွင်ႉတၵ်ႉၵႃသတ်ႉထႃးတႆး၊ ထႆး၊ မၢၼ်ႈလႄႈလၢႆလၢႆၸၢဝ်းၶိူဝ်း ဢၼ်ယူႇသဝ်းၼႂ်းဝဵင်းၵဵင်းမႆႇလႄႈ ႁိမ်းႁွမ်းၶဝ်ႈႁူမ်ႈ ၼပ်ႉႁူဝ်မိုၼ်ႇ။
ၸဝ်ႈသိလ်ထမ်းဝုၼ်းၸုမ်ႉ မဵတ်ႉတႃထမ်းဝႃႈ “ ၵူၼ်းႁဝ်းၼႆႉ တႃႇတေၵိူတ်ႇပဵၼ်ၵူၼ်းမႃးဢမ်ႇငၢႆႈ မိူဝ်ႈႁဝ်းၵိူတ်ႇမႃးယဝ်ႉၼၼ်ႉ ႁႂ်ႈႁူႉၵႃႈၶၼ်တူဝ်ၵဝ်ႇသေ ႁဵတ်းလီပၼ်တႃႇတူဝ်ၵဝ်ႇ တႃႇပီႈၼွင်ႉၸိူဝ်ႉၶိူဝ်းသေ ႁႂ်ႈမေႃႁၵ်ႉၵၼ်၊ ၸွႆႈၵၼ်၊ ၽွမ်ႉၵၼ်ႁႂ်ႈၸိူဝ်ႉၶိူဝ်းၸဝ်ႈၵဝ်ႇၶိုၼ်ႈယႂ်ႇ ၵတ်းယဵၼ်။ ပဵၼ်ၵူၼ်းၶိူဝ်းလဵဝ်ၵၼ်သေ ၽိတ်းမေႃးၵၼ်ၼႆႉယႃႇႁႂ်ႈလႆႈမီး မၼ်းဢမ်ႇၵျႃႉ။ ပီႈၼွင်ႉတႆးၸိူဝ်း ဢၼ်ၽၢတ်ႇယၢၼ်ႁိူၼ်းယေး မႃးႁဵတ်းၵၢၼ်ႁႃၵိၼ်လဵင်ႉတွင်ႉၼႂ်းမိူင်းထႆးၼႆႉၵေႃႈ ယႃႇလိုမ်းဝၢၼ်ႈလိုမ်းမိူင်းၸဝ်ႈၵဝ်ႇ ႁႂ်ႈဢွၼ်ၵၼ်ပွၵ်ႈၶိုၼ်းမိူဝ်းပူၵ်းပွင်ဝၢၼ်ႈၵိူတ်ႇမိူင်းၼွၼ်း ၸဝ်ႈၵဝ်ႇသေၵမ်း ” ဝႃႈၼႆ။
ၸဝ်ႈပေႃႈသိလ်ထမ်းဝုၼ်းၸုမ့်ၼႆႉ ဝၢႆးသေႁူပ်ႉထူပ်းတၵ်ႉၵႃႇသတ်ႉထႃးၼႂ်းၵဵင်းမႆႇယဝ်ႉ တေယေႃးတူဝ်ၵႂႃႇတီႈ မိူင်း ၵွၵ်ႇ ဝၢႆးၼၼ်ႉတေသိုပ်ႇၵႂႃႇႁူပ်ႉၶုၼ်ႁေႃၶမ်းၸိၵ်ႉမိ မိူင်းပူႊတၼ်ႊ ဝၢႆးသၢင်းၵျၢၼ်ႇ ၸင်ႇပွၵ်ႈမႃးမိူင်းတႆးသေ တိုဝ်းၵမ်ၽႃဝၼႃတႃႇၶၢဝ်းတၢင်း 3ပီ3လိူၼ် 3 ဝၼ်း တီႈထမ်ႈမိူင်းၵႅတ်ႇ ဢိူင်ႇမိူင်းၵႅတ်ႇ ၸႄႈဝဵင်းမိူင်းတူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇ။
