ဢိင်ၼိူဝ်ပၼ်ႁႃ လွင်ႈဝတ်းဝႂ်၊ ယူႇပူၼ်ႉၶၢဝ်းယၢမ်းမၵ်းတတ်းလႄႈ လွင်ႈတၢင်းသေဢၼ်ဢၼ် ပလိၵ်ႈထႆး တီႉၺွပ်း သူင်ႇႁႅင်းၵၢၼ် ဢၼ်ၽိတ်းမၢႆမီႈ ပွၵ်ႈတၢင်းလႅၼ်လိၼ်ထႆး – တႆး တၢင်းတႃႈၶီႈလဵၵ်း ၼႂ်းႁူဝ်လိူၼ်ၵျႅၼ်ႊၼိဝ်ႊရီႊ ၼႆႉမႃး မီးၵႂႃႇယဝ်ႉ 110 ၵေႃႉ။
ဝၼ်းတီႈ 15/01/2019 ယၢမ်းဝၢႆးဝၼ်း 2 မူင်း ပလိၵ်ႈထႆး သူင်ႇတူဝ်ႁႅင်းၵၢၼ်မွပ်ႈယိုၼ်ႈပၼ် ၸဝ်ႈၼႃႈတီႈပလိၵ်ႈ တၢင်းၾင်ႇတႃႈၶီႈလဵၵ်း ၸိုင်ႈတႆးပွတ်းဢွၵ်ႇ တီႈလႅၼ်လိၼ်ထႆး – တႆး ၽူႈၸၢႆး 13 ၵေႃႉ၊ ယိင်း 2 ၵေႃႉ ႁူမ်ႈၵၼ် 15 ၵေႃႉ ဝႃႈၼႆ။
သိုဝ်ႇၶၢဝ်ႇ Tachileik News Agency ဢွၵ်ႇဝႆႉဝႃႈ “ လုၵ်ႉတၢင်းၾင်ႇထႆး မႄႈသၢႆသေ သူင်ႇပွၵ်ႈမႃးတၢင်းတႃႈၶီႈလဵၵ်း တႄႇဢဝ် ဝၼ်းတီႈ 1 ထိုင် 15 လိူၼ်ၼႆႉ ႁႅင်းၵၢၼ် ဢၼ်ထုၵ်ႇသူင်ႇတူဝ်ပွၵ်ႈမႃး ၸၢႆး 70 ၵေႃႉ၊ ယိင်း 38 ၵေႃႉ၊ လုၵ်ႈဢွၼ်ႇ 2 ၵေႃႉ ႁူမ်ႈၵၼ် တင်းမူတ်း 110 ၵေႃႉ” ဝႃႈၼႆ။
ၵဵဝ်ႇလူၺ်ႈလွင်ႈ ၸဝ်ႈၼႃႈတီႈပလိၵ်ႈထႆး သူင်ႇမွပ်ႈယိုၼ်ႈတူဝ် ႁႅင်းၵၢၼ် ပၼ်တၢင်းၾင်ႇတႃႈၶီႈလဵၵ်းၼႆႉ ယူႇတီႈၾၢႆႇ ၸဝ်ႈၼႃႈတီႈတၢင်းၾင်ႇၼႆႉသေ ႁူမ်ႈၵၼ်ၵူတ်ႇထတ်း ႁႅင်းၵၢၼ် ၸိူဝ်းသူင်ႇပွၵ်ႈမႃး ၸွင်ႇၸႂ်ႉၵူၼ်းမိူင်းႁူမ်ႈတုမ် ယွၼ်ႉၵူဝ်ပႃး ၸွမ်းၵူၼ်းၼွၵ်ႈမိူင်း ဝႃႈၼႆ။
ၼႂ်းပီ 2018 တႄႇဢဝ် ဝၼ်းတီႈ 1 လိူၼ်ၵျႅၼ်ႊၼိဝ်ႊရီႊ မႃး ထိုင် လိူၼ်ၻီႊသႅမ်ႊၿိူဝ်ႊ ယူႇတီႈပလိၵ်ႈထႆး လႆႈသူင်ႇမွပ်ႈယိုၼ်ႈတူဝ်ႁႅင်းၵၢၼ် သူင်ႇပွၵ်ႈတၢင်းလႅၼ်လိၼ်ထႆး – တႆး တီႈၾင်ႇတႃႈၶီႈလဵၵ်း မီးၵႂႃႇတင်းမူတ်း ႁူဝ်ၵူၼ်းမွၵ်ႈ 1,200 ၵေႃႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ