ပေႃးထိုင်မႃး ဝၼ်းတီႈ 7 လိူၼ်ၾႅပ်ႊၿိူဝ်ႊရီႊ ၼႂ်းၸိုင်ႈတႆးပွတ်းႁွင်ႇ၊ ပွတ်းၸၢၼ်းလႄႈ ပွတ်းဢွၵ်ႇၶူင်း လၢႆလၢႆတီႈ တေၸတ်းႁဵတ်း ပၢင်ၵႅဝ်ႈ ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈတဵမ် 72 ပီ။

ဝၼ်းတီႈ 10/01/2019 ၵူၼ်းမိူင်းသီႇပေႃႉ၊ ပႃႇတီႇၵၢၼ်မိူင်းလႄႈ ၸုမ်းတူင်ႉၼိုင်တူင်ႇဝူင်းၵူၼ်း ၼႂ်းၸႄႈဝဵင်းသီႇပေႃႉ ဢုပ်ႇဢူဝ်းၵၼ် တွၼ်ႈတႃႇတေၸတ်းႁဵတ်း ပၢင်ၵႅဝ်ႈ ၼႂ်းဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈတဵမ် 72 ပီ တီႈဝတ်ႉၽူဝ်း တေႃႇ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။

ၸၢႆးလၢဝ်သႅင် ၽူႈၼမ်းၼႂ်း ပႃႇတီႇႁူဝ်သိူဝ် ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ ပီၼႆႉ ႁဝ်းၶႃႈ ဢုပ်ႇဢူဝ်း ၵၼ် တေၸတ်းႁဵတ်းပၢင်ၵႅဝ်ႈၵူၺ်းၶႃႈ။ ပၢင်ပွႆးတႄႉ တေဢမ်ႇႁဵတ်းယဝ်ႉ ယွၼ်ႉဝႃႈ ၼႂ်းၸႄႈဝဵင်းႁဝ်းၶႃႈၼႆႉ မီးပၢင် တိုၵ်းသိုၵ်းသိူဝ် ၵူၼ်းပၢႆႈၽေးသိုၵ်းၵေႃႈမီးလႄႈ ႁဝ်းၶႃႈ တေဢမ်ႇၸတ်းႁဵတ်း ပၢင်ပွႆးယဝ်ႉၶႃႈ ပေႃးႁဵတ်းၵေႃႈ တေ ဢမ်ႇၶႅမ်ႉ” ဝႃႈၼႆ။

ပၢင်ၵႅဝ်ႈၼႆႉ ႁၢင်ႈႁႅၼ်းဝႆႉ တေမွၵ်ႇၼိုင်ႈဝၢၼ်ႈလႂ် 5 ၵေႃႉ။ ႁွင်ႈၵၢၼ်ၾၢႆႇလူင်ပွင်ၸိုင်ႈ၊ ၸုမ်းယိပ်းၵွင်ႈၵၢင်ႇသိုၵ်းတႆး 2 ၸုမ်းလႄႈ ပႃးတင်းသိုၵ်းပျီႇတူႉၸိတ်ႉ လၢမ်းၶၢတ်ႈဝႆႉ ႁူဝ်ၵူၼ်း တေၶဝ်ႈႁူမ်ႈ ဢမ်ႇယွမ်း 1,000 ၵေႃႉ ဝႃႈၼႆ။

တီႈၸႄႈဝဵင်းသီႇပေႃႉၼႆႉ တေၸတ်းႁဵတ်းပၢင်ၵႅဝ်ႈ ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈတဵမ် 72 ပီ ၼႂ်းဝၼ်းတီႈ 07/02/ 2019 တီႈႁူင်းႁေႃ ၸႄႈဝဵင်းသီႇပေႃႉ ၶၢဝ်းယၢမ်းၵၢင်ၼႂ် 8 မူင်း ထိုင် 10 မူင်း ဝႃႈၼႆ။

လိူဝ်ၼၼ်ႉ ၼႂ်းၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်းၵေႃႈ တေၸတ်းႁဵတ်းပၢင်ၵႅဝ်ႈ ၼႂ်းဝၼ်းၸိူဝ်ႉၸၢတ်ႈၸိုင်ႈ တႆး ၶွပ်ႈတဵမ် 72 ပီ ၶိုၵ်ႉယႂ်ႇ ဝႃႈၼႆ။

လုင်းၸၢႆးသၢမ်တိပ်ႉသိူဝ် ၵႅမ်ႁူဝ်ပဝ်ႈ ၸုမ်းၶူၼ်ႉၶႂႃႉၶူဝ်းၶွင်ၵဝ်ႇ ပိုၼ်းမိူင်းၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ လႆႈႁဵတ်းပၢင်ၵုမ်ၵၼ်ၵႂႃႇ မိူဝ်ႈဝၼ်းဢႃးတိတ်ႉပူၼ်ႉမႃးၼႆႉသေ လႆႈဢုပ်ႇၵုမ်ၵၼ် တူၵ်းလူင်းၵၼ်ဝႃႈ တေၸတ်းႁဵတ်း ပၢင်ၵႅဝ်ႈ ၼႂ်းဝၼ်းၸိူဝ်ႉၸၢတ်ႈၸိုင်ႈတႆး။ ၵူၺ်းၵႃႈ ဢွင်ႈတီႈမၼ်းတႄႉ တေၸတ်းတီႈလႂ် ဢၼ်ဝႃႈၼၼ်ႉ ပႆႇတႅပ်း တတ်းၵၼ် တေဢၢၼ်းၸတ်းတႃႇ 3 ဝၼ်း ဝႃႈဝႆႉၼင်ႇၼႆ တေၸတ်းဝၼ်းတီႈ 6 ထိုင် 8 ” ဝႃႈၼႆ။

မိူၼ်ၼင်ႇ ၼႂ်းၸႄႈဝဵင်းၼမ်ႉၶမ်းၵေႃႈ ယူႇတီႈၵူၼ်းမိူင်းသေ တေႁူမ်ႈၵၼ်ၸတ်းႁဵတ်းပၢင်ပွႆး ၼႂ်းဝၼ်းၸိူဝ်ႉၸၢတ်ႈ ၸိုင်ႈတႆးၶိုၵ်ႉယႂ်ႇလူင်။ ၼွၵ်ႈလိူဝ်ၼၼ်ႉ တီႈငဝ်ႈၸိုင်ႈလွႆတႆးလႅင်း၊ ငဝ်ႈငုၼ်းဝၢၼ်ႈႁႆးၵေႃႈ တေၸတ်းႁဵတ်း ၶိုၵ်ႉယႂ်ႇ လူင် မိူၼ်ၵၼ် ဝႃႈၼႆ။