ဢိင်ၼိူဝ် ၸုမ်းယိပ်းၵွင်ႈၵၢင်ႇၼႂ်းပိုၼ်ႉတီႈၶဵင်ႈၶႅင်ၵၢၼ်သိုၵ်းတေႃႇၵၼ်သေ ၵူၼ်းမိူင်းၼႂ်းဢိူင်ႇၼႃးမွၼ် ၸႄႈဝဵင်း မိူင်းပၼ်ႇ ဢွၼ်ၵၼ်ပၢႆႈၽေးသိုၵ်း ၵႂႃႇသၢမ်ပႃႈသၢမ်ၾၢႆႇၼၼ်ႉ ယူႇတီႈတိူင်းသိုၵ်းၶူဝ်လမ် ၸီႉသင်ႇ ႁႂ်ႈၵူၼ်းဝၢၼ်ႈ ဢွၼ်ၵၼ်ပွၵ်ႈမိူဝ်းၶိုၼ်းၼႃးမွၼ် ဝႃႈၼႆ။
မိူဝ်ႈၼႆႉ ဝၼ်းတီႈ 14/01/2019 ယၢမ်းၵၢင်ဝၼ်း 12 မူင်း ၵူၼ်းပၢႆႈၽေးသိုၵ်း ဢၼ်ဢွၼ်ၵၼ်ၵႂႃႇသွၼ်ႈဝႆႉတီႈဝဵင်း လၢင်းၶိူဝ်း ႁူဝ်ၵူၼ်း 70 ပၢႆၼၼ်ႉ ၶိုၼ်းဢွၼ်ၵၼ်ပွၵ်ႈၶိုၼ်း တီႈဢိူင်ႇၼႃးမွၼ် ၸႄႈဝဵင်းမိူင်းပၼ်ႇ ၸိုင်ႈတႆးပွတ်း ၸၢၼ်း ဝႃႈၼႆ။
ၵူၼ်းမိူင်းပၼ်ႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ လႆႈႁၼ်ၵႃးသိုၵ်းမၢၼ်ႈ တၢင်ႇမႃး ၵူၼ်းပၢႆႈၽေးသိုၵ်း လုၵ်ႉ လၢင်းၶိူဝ်းမႃး 7 လမ်း။ ယၢမ်းၵၢင်ဝၼ်း 12 မူင်းၼႆႉ တပ်ႉသိုၵ်းမၢၼ်ႈ မိူင်းပၼ်ႇ လဵင်ႉၶဝ်ႈဝၼ်းသေ ပေႃး ထိုင်မႃး ယၢမ်းဝၢႆး ဝၼ်း 3 မူင်းသမ်ႉ တေသူင်ႇပွၵ်ႈမိူဝ်းၶိုၼ်းတၢင်းဢိူင်ႇၼႃးမွၼ်။ လွင်ႈဢၼ်ၵူၼ်းမိူင်းပွၵ်ႈမႃးၶိုၼ်း ၼႆႉ လႆႈငိၼ်းဝႃႈ ယူႇတီႈၸွမ်ႁၢၼ် တၢၼ်းလႅင်ႇ ၽူႈၵွၼ်းတိူင်းသိုၵ်းၶူဝ်လမ် ၸီႉသင်ႇႁႂ်ႈဢွၼ်ၵၼ်ပွၵ်ႈမႃး” ဝႃႈၼႆ။
ၼႂ်းပွတ်းဢိူင်ႇၼႃးမွၼ် ၸႄႈဝဵင်းမိူင်းပၼ်ႇၼႆႉ ယွၼ်ႉသိုၵ်း ပဢူဝ်း PNLO တင်း သိုၵ်း RCSS ပဵၼ်ပၢင်တိုၵ်းၵၼ်၊ ၶဵင်ႈၶႅင်ၵၢၼ်သိုၵ်းတေႃႇၵၼ်သေ ၵူၼ်းမိူင်းၼႂ်းဢိူင်ႇၼႃးမွၼ် လႆႈဢွၼ်ၵၼ်ပၢႆႈၽေးသိုၵ်း မၢင်ဝၢၼ်ႈ၊ မၢင် ၵေႃႉ လႆႈပၢႆႈလူင်းၸူး ၾင်ႇၶူင်း တၢင်းပွတ်းဢွၵ်ႇ၊ မၢင်ၵေႃႉ ပၢႆႈၵႂႃႇသွၼ်ႈတၢင်း လၢင်းၶိူဝ်း၊ မၢင်ၵေႃႉ ပၢႆႈလူင်းၸူး ဝဵင်း မိူင်းပၼ်ႇ ဝႃႈၼႆ။
ၵူၼ်းမိူင်းပၼ်ႇ သိုပ်ႇလၢတ်ႈထႅင်ႈဝႃႈ “ ပီႈၼွင်ႉၵူၼ်းဝၢၼ်ႈမႆႉပူၵ်ႇ/ပၢင်ပီႉ ဢၼ်ပၢႆႈၵႂႃႇတၢင်းဢွၵ်ႇၶူင်း/ ၾင်ႇၶူင်း ၼၼ်ႉ ပႆႇႁၼ်ပွၵ်ႈမႃး လႆႈငိၼ်းဝႃႈ ထႅင်ႈ 2 ဝၼ်းၵွၼ်ႇ ၸင်ႇၽႅဝ်ႁွတ်ႈမႃးၼႆဝႃႇ ယဝ်ႉၵေႃႈ တေပွၵ်ႈမႃးတၢင်း တႃႈသၢင်းၼႆ လႆႈငိၼ်းႁူႉဝႆႉ ၼင်ႇၼႆ” ဝႃႈၼႆ။
ၵူၼ်းပၢႆႈၽေးသိုၵ်း ဢၼ်ပၢႆႈႁွတ်ႈၽႅဝ်တီႈလၢင်းၶိူဝ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းမိူင်းႁဝ်း ဢၼ်လႆႈ ပၢႆႈၵႂႃႇတၢင်းပွတ်းဢွၵ်ႇၶူင်း ဢၼ်ဝႃႉၶဝ်ႁပ်ႉတူၺ်းလူလွမ်ပၼ်ၼၼ်ႉ တေမီးႁူဝ်ၵူၼ်း မွၵ်ႈ 500 ၵေႃႉ။ ဢၼ်ပၢႆႈမႃး တၢင်းလၢင်းၶိူဝ်းသမ်ႉ 70 ပၢႆ။ ဢၼ်ပၢႆႈလူင်းဝဵင်းမိူင်းပၼ်ႇသမ်ႉ မီးၵႃႈႁိုဝ်တႄႉတႄႉ ဢၼ်ဝႃႈၼၼ်ႉ ဢမ်ႇလႆႈႁူႉ။ ၵူၺ်းၵႃႈ လႆႈႁူႉတႄႉ ဢၼ်ပၢႆႈလူင်းတၢင်းဝဵင်းမိူင်းပၼ်ႇၼၼ်ႉ ၵမ်ႈၼမ် ဢွၼ်ၵၼ်ပၢႆႈၶဝ်ႈမိူင်းထႆး။ ၵမ်ႈၼမ် ၵူၼ်းပၢႆႈၽေးသိုၵ်း ဢၼ်ပၢႆႈဢွၵ်ႇမႃးၼႆႉ ႁဝ်းၶႃႈ ဢမ်ႇပေႃးၶႂ်ႈပွၵ်ႈမိူဝ်းၶႃႈယဝ်ႉ ၵူဝ်လႆႈႁဵတ်းသိုၵ်းပျီႇတူႉၸိတ်ႉ” ဝႃႈၼႆ။
သိုၵ်း RCSS တင်းသိုၵ်း PNLO ၶဵင်ႈၶႅင်ၵၢၼ်သိုၵ်းၵၼ်မႃး တင်ႈတႄႇပၢႆပီ 2018။ ယွၼ်ႉပၼ်ႁႃၼႆႉသေ ၵျွင်းမုၼ် ၸဝ်ႈတႆးၵေႃႈၺႃးၽဝ်၊ ၵျွင်းမုၼ်ၸဝ်ႈပဢူဝ်းၵေႃႈၺႃးၽဝ်။ ၵူၼ်းမိူင်းလႆႈယူႇယၢပ်ႇဝႆႉတင်းသွင်ၾၢႆႇ ဝႃႈၼႆ။
