ၵူၼ်းပၢႆႈၽေးသိုၵ်း တီႈသီႇပေႃႉ လႆႈပၢႆႈယၢၼ်ႁိူၼ်းယေး ၽၢၵ်ႇလိူၼ်ပၢႆယဝ်ႉၵေႃႈ ယွၼ်ႉငဝ်းလၢႆးၼႂ်းပိုၼ်ႉတီႈ ပႆႇၼိမ်သဝ်းလႄႈ ဢၼ်ၵိုတ်းၶၢင်ႉဝႆႉတီႈဝတ်ႉဝႃးၽႃသိူဝ်ႇတိုၵ်ႉမီးယူႇ 600 ပၢႆ။
ဝၼ်းတီႈ 13/01/2019 ယၢမ်းၵၢင်ၶမ်ႈ 8 မူင်း ၵေႃပွင်ၵၢၼ်ၸွႆႈထႅမ် ၵူၼ်းပၢႆႈၽေးသိုၵ်း လႆႈႁုပ်ႈသဵၼ်ႈမၢႆ တင်းမူတ်း ၵူၼ်းပၢႆႈၽေးဢၼ်ၵိုတ်းဝႆႉ တီႈဝတ်ႉၼႃးမၢၵ်ႇၶေႃ၊ ဝတ်ႉပၢင်ၼိဝ်ႉလႄႈ ႁူင်းႁေႃတူၼ်ႈၵႃႈ တင်းမူတ်း ႁူဝ်ၵူၼ်းမီး 639 ၵေႃႉ ဝႃႈၼႆ။
ၽူႈၸွႆႈထႅမ်ၵူၼ်းပၢႆႈၽေးသိုၵ်း တီႈဝတ်ႉၼႃးမၢၵ်ႇၶေႃ လၢတ်ႈတီႈၽူႈတွႆႇႁွၵ်ႈဝႃႈ “ တေႃႈလဵဝ် ၵူၼ်းပၢႆႈၽေးသိုၵ်း တီႈၼႃးမၢၵ်ႇၶေႃႁဝ်းၶႃႈတႄႉ မီး 560 ၵေႃႉၶႃႈ။ ယွၼ်ႉဝႃႈ မၢင်ၵေႃႉ ပွၵ်ႈမိူဝ်းႁဵတ်းၵၢၼ်သေ ၵၢင်ၶမ်ႈသမ်ႉ ပွၵ်ႈမႃး ၼွၼ်းတီႈဝတ်ႉၶိုၼ်းၵေႃႈမီး။ မၢင်ၵေႃႉ ပွၵ်ႈမိူဝ်းသေ တူၺ်းငဝ်းလၢႆး သင်ဢမ်ႇပေႃးလီၼႆ ၶိုၼ်းဢွၼ်ၵၼ်ပွၵ်ႈ မႃးတီႈဝတ်ႉႁဵတ်းၼၼ်ၵေႃႈမီး” ဝႃႈၼႆ။
ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉတီႈဝတ်ႉၼႃးမၢၵ်ႇၶေႃ လၢတ်ႈတီႈၽူႈတွႆႇႁွၵ်ႈဝႃႈ “ ၵၢၼ်ၵေႃႈ ဢမ်ႇလႆႈႁဵတ်း၊ ၶူဝ်းၼႂ်းႁိူၼ်း ၼႂ်းသူၼ်ၵေႃႈ ပွႆႇပႅတ်ႈဝႆႉသေ ပၢႆႈဢွၵ်ႇမႃး။ ပၢင်တိုၵ်းၵေႃႈ ဢမ်ႇယဝ်ႉဢမ်ႇဝၢႆး ၊ ဢမ်ႇၸႂ်ႈၽႂ် သမ်ႉ ပဵၼ်ႁဝ်းၼင်ႇၵၼ်ၵူၺ်း ယိုဝ်း ၵၼ်၊ ၶဵင်ႈၶႅင်တေႃႇၵၼ်။ ဢၼ်လႆႈယၢပ်ႇၽိုတ်ႇတႄႉ ပဵၼ်ၵူၼ်းဝၢၼ်ႈၵူၼ်းမိူင်း။ မိူဝ်ႈၶမ်ႈဝႃး တီႈႁိမ်း ဝၢၼ်ႈၵုင်းသေႃႉ တိုၵ်ႉလႆႈငိၼ်းသဵင်ၵွင်ႈတႅၵ်ႇထႅင်ႈယူႇ”ဝႃႈၼႆ။
လွင်ႈသိုၵ်းတႆး 2 တပ်ႉၸုမ်း ပဵၼ်ပၼ်ႁႃ ပၢင်တိုၵ်းၵၼ်၊ ၶဵင်ႈၶႅင်တေႃႇၵၼ်မႃးၸိူင်ႉၼႆ ႁဵတ်းႁႂ်ႈၵူၼ်းဝၢၼ်ႈ၊ ၵူၼ်းမိူင်း ထူပ်းလွင်ႈယၢပ်ႇၽိုတ်ႇ၊ ၵိၼ်းၸႂ်၊ လႆႈဢွၼ်ၵၼ်ပၢႆႈယၢၼ်ႁိူၼ်းယေးလႄႈ လႆႈပွႆႇၽႃႈပႅတ်ႈၵၢၼ်ငၢၼ်း ဝႃႈၼႆ။
မိူဝ်ႈဝၼ်းတီႈ 10/01/2019 ၵူၼ်းဝၢၼ်ႈ 14 ဝၢၼ်ႈ ႁူဝ်ၵူၼ်း 4,688 ၵေႃႉ ၼႂ်းဢိူင်ႇၼႃးမၢၵ်ႇၶေႃ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ႁူမ်ႈၵၼ် လူင်းလၢႆးမိုဝ်း သူင်ႇထိုင်ၽူႈတႅၼ်းသၽႃးပႃႇတီႇႁူဝ်သိူဝ် SNLD ၸႄႈဝဵင်းသီႇပေႃႉသေ ႁႂ်ႈသိုပ်ႇယိုၼ်ႈပၼ် တီႈၸွမ်သိုၵ်းလူင် ယွတ်ႈသိုၵ်း ႁူဝ်ပဝ်ႈ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/ SSA လႄႈ ၸွမ်သိုၵ်းလူင် ပၢင်ႇၾႃႉ ႁူဝ်ပဝ်ႈ ပႃႇတီႇမႂ်ႇသုင် ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ႁႂ်ႈသွင်ၸုမ်း ၸဵဝ်းႁူပ်ႉဢုပ်ႇဢူဝ်းငူပ်ႉငီႉၵၼ်၊ ႁႂ်ႈၵိုတ်းပၢင်တိုၵ်းတေႃႇၵၼ်လႄႈ ႁႂ်ႈၵူၼ်းမိူင်းလႆႈၸွႆႈၵမ်ႉထႅမ်ပၼ် ၸုမ်းလဵဝ် တီႈ လဵဝ် ဝႃႈၼႆ။
တေႃႈလဵဝ် ၵူၼ်းပၢႆႈၽေးဢၼ်ၵိုတ်းၶၢင်ႉဝႆႉ ပႆႇပဵၼ်ပွၵ်ႈၶိုၼ်းႁိူၼ်းယေးၽႂ်မၼ်းသမ်ႉ တီႈဝတ်ႉၼႃးမၢၵ်ႇၶေႃ ႁူဝ်ၵူၼ်း 560 ၵေႃႉ ပဵၼ်ၵူၼ်းဝၢၼ်ႈၼႂ်းလူင်၊ တူၼ်ႈၵႅင်း၊ ႁူဝ်ၼႃး၊ မၢၼ်ႈတူင်ႈ၊ တႃႈလူင်၊ ၵဵတ်းၽူၼ်။ တီႈဝတ်ႉပၢင်ၼိဝ်ႉသမ်ႉ ႁူဝ်ၵူၼ်း 13 ၵေႃႉ ပဵၼ်ၵူၼ်းဝၢၼ်ႈပၢင်ႇႁႆႈ။ တီႈႁူင်းႁေႃ တူၼ်ႈၵႃႈသမ်ႉ ႁူဝ်ၵူၼ်း 66 ၵေႃႉ ပဵၼ်ၵူၼ်းဝၢၼ်ႈတူၼ်ႈၵႅင်း လႄႈ ဝၢၼ်ႈတႃႈလူင် ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ