သိုၵ်းပူတ်းပွႆႇၸိူဝ်ႉၸၢတ်ႈပဢူဝ်း PNLO တင်း ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ပိုတ်း ယိုဝ်း ၵၼ်ႁၢဝ်ႈႁႅင်း တီႈၼႂ်းဢိူင်ႇၼႃးမွၼ် ၸႄႈဝဵင်းမိူင်းပၼ်ႇ။

ဝၼ်းတီႈ 09/01/2019 ယၢမ်းဝၢႆးဝၼ်း 2 မူင်းပၢႆၼၼ်ႉ PNLO ဢဝ်ဢဵၼ်ႁႅင်းသိုၵ်း ၶဝ်ႈလေႃႇယိုဝ်း တပ်ႉသိုၵ်းတႆး RCSS တီႈႁိမ်းဝၢၼ်ႈပၢင်မီ ၼႂ်းဢိူင်ႇၼႃးမွၼ် ၸႄႈဝဵင်းမိူင်းပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈတႆး ပွတ်းၸၢၼ်း။ သွင်ၾၢႆႇလႆႈပဵၼ်ပၢင်တိုၵ်းၵၼ် ႁၢဝ်ႈႁႅင်း ဝႃႈၼႆ။

ၵူၼ်းမိူင်းပၼ်ႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ပဵၼ်ပၢင်တိုၵ်း ၵၼ် ၶႃႈ။ မိူဝ်ႈဝႃးတႄႉ ၶႂ်ႈဝႃႈပဵၼ် ၵၼ်ႁိုင် မွၵ်ႈ 45 မိၼိတ်ႉၼႆႉၶႃႈ။ မိူဝ်ႈၼႆႉတႄႉ သဵင်ၵွင်ႈယဵၼ်ဝႆႉ။ ပေႃးယူႇတီႈႁဝ်းၶႃႈ ထတ်းသၢင်တႄႉ ယူႇတီႈသိုၵ်း မၢၼ်ႈၵမ်ၸိူၵ်ႈမၼ်းဝႆႉတၢင်းလင်ၵူၺ်း ႁဵတ်းႁႂ်ႈႁဝ်းၸၢဝ်းၶိူဝ်းၼင်ႇၵၼ် ၽိတ်းၵၼ်။ သၢင်ႈႁႂ်ႈႁဝ်းၸၢဝ်း ၶိူဝ်းတေႃႇ ၵၼ် မီးႁွႆးၸတ်ႉတေႃႇၵၼ်။ လိူဝ်ၼၼ်ႉ ပေႃးတူၺ်းၼႃႈတီႈသိုၵ်းတူင်ႉၼိုင်ယူႇၸိုင် တပ်ႉသိုၵ်းပဢူဝ်းၼႆႉ ၼႃႈတီႈ ၶဝ် မီးဝႆႉၾၢႆႇတၢင်းတူၵ်းပွၼ်။ ႁဵတ်းသင်ၶဝ်သမ်ႉ ၶၢမ်ႈလႅၼ်လိၼ်မႃးတၢင်းၼႆႉ တီႈ တႄႉမၼ်း ပေႃးထတ်းသၢင် တူၺ်းလိုၵ်ႉလိုၵ်ႉၸိုင် တပ်ႉသိုၵ်းမၢၼ်ႈႁွင်ႉ ၶဝ်မႃးၵေႃႈ ပဵၼ်လႆႈ” ဝႃႈၼႆ။

တေႃႈလဵဝ် ၵူၼ်းမိူင်းပၼ်ႇ ၼႂ်းဢိူင်ႇၼႃးမွၼ် လႆႈဢွၼ်ၵၼ်ပၢႆႈၽေးသိုၵ်းဢွၵ်ႇမႃး ၼပ်ႉႁူဝ်ပၢၵ်ႇ မၢင်ဝၢၼ်ႈ ပၢႆႈလူင်း ၸူးၾင်ႇၶူင်း တၢင်းပွတ်းဢွၵ်ႇ။ မၢင်ဝၢၼ်ႈပၢႆႈၸူး တၢင်းပွတ်းလၢင်းၶိူဝ်းၵေႃႈမီး။ မၢင်ၵေႃႉ ပၢႆႈၵႂႃႇယူႇၸွမ်းႁိူၼ်းပီႈ ၼွင်ႉ ၸွမ်းၼႂ်းဝဵင်းမိူင်းပၼ်ႇၵေႃႈမီး၊ မၢင်ၵေႃႉ ဢၢင်ႈပၢႆႈၶဝ်ႈၼႂ်းမိူင်းထႆးၵေႃႈမီး ဝႃႈၼႆ။

ၵူၼ်းပၢႆႈၽေးသိုၵ်း ဢၼ်ႁွတ်ႈၽႅဝ် တီႈဝတ်ႉဝႃႇသူဝ်ႇ (လၢင်းၶိူဝ်း) ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ ပဵၼ် ၵူၼ်းဝၢၼ်ႈလူင်ၶဵဝ် ဢွၼ်ၵၼ်ပၢႆႈလူင်းမႃး ႁူဝ်ၵူၼ်းတေမီး 70 ပၢႆ။ ၵူၺ်းၵႃႈ သမ်ႉပႃးလုၵ်ႈဢွၼ်ႇႁဵၼ်းၼမ်လႄႈ ယူႇ တီႈၸဝ်ႈၸၢင်းႁဝ်းၶႃႈ လႆႈဢွၼ်ၵၼ်ဢဝ်လုၵ်ႈဢွၼ်ႇ ၵႂႃႇဝႆႉတီႈၵျွင်းပရႁိတ မၢၵ်ႇၵႅင်းမူၼ်း ဝႆႉၸူဝ်ႈၶၢဝ်း၊ ယွၼ်ႉဝႃႈ ဢမ်ႇၶႂ်ႈႁႂ်ႈၶဝ်လႆႈၶၢတ်ႇၵၢၼ်ႁဵၼ်း။ လိူဝ်ၼၼ်ႉ လႆႈငိၼ်းဝႃႈ ဢၼ်ပၢႆႈလူင်းၸူး ၾင်ႇၶူင်း တၢင်းပွတ်းဢွၵ်ႇၶူင်းၵေႃႈ မီးၼပ်ႉႁူဝ်ပၢၵ်ႇ ၸိူဝ်းၶဝ် ၵမ်ႈၼမ် ပဵၼ်ပီႈၼွင်ႉၵူၼ်း ဝၢၼ်ႈမႆႉပူၵ်ႇ” ဝႃႈၼႆ။

ၸဝ်ႈၶူးတိလေႃးၵ ၵျွင်းဝၢၼ်ႈမႂ်ႇ ဝၢၼ်ႈလူင်ၶဵဝ် လၢတ်ႈတီႈၽူႈတွႆႇႁွၵ်ႈဝႃႈ “ သိုၵ်းတၢင်းလႂ်ၵေႃႈ ႁဝ်းၶႃႈလႆႈၵူဝ်လႆႈၸွႆႈ ဢမ်ႇဝႃႈ သိုၵ်းပဢူဝ်း၊ သိုၵ်းမၢၼ်ႈလႄႈ သိုၵ်းတႆး။ ဢၼ်ႁဝ်းၸဝ်ႈၶဝ် လႆႈပၢႆႈဢွၵ်ႇမႃးၼႆႉ ၵွပ်ႈဝႃႈ ၵူၼ်းႁဵတ်းၵၢၼ်/ ႁၢပ်ႇ ၵၢၼ်လူင်ပွင်ၸိုင်ႈၵေႃႈ ဢမ်ႇႁတ်းယူႇ။ ၾၢႆႇၼိုင်ႈတၢင်းၼိုင်ႈၵေႃႈ ၼိုင်ႈၵေႃႉလၢတ်ႈၼိုင်ႈတၢင်းသေ ႁဝ်းၸဝ်ႈ မႆႈၸႂ်ၵူဝ်ပဵၼ်ပၢင်တိုၵ်းလႄႈ ၸင်ႇဢွၼ်ၵၼ်ပၢႆႈဢွၵ်ႇမႃး” ဝႃႈၼႆ။

တၢင်းပွတ်းဢိူင်ႇၼႃးမွၼ် ၸႄႈဝဵင်းမိူင်းပၼ်ႇၼႆႉ မီးတပ်ႉသိုၵ်း လူင်ပွင်ၸိုင်ႈမၢၼ်ႈ၊ သိုၵ်းပဢူဝ်း PNLO လႄႈ သိုၵ်းတႆး RCSS တူင်ႉၼိုင်ၵႂႃႇမႃး။

သိုၵ်း RCSS တင်းသိုၵ်း PNLO ၶဵင်ႈၶႅင်ၵၢၼ်သိုၵ်းၵၼ်မႃး တင်ႈတႄႇပၢႆပီ 2018။ ယွၼ်ႉပၼ်ႁႃၼႆႉသေ ၵျွင်းမုၼ် ၸဝ်ႈတႆးၵေႃႈၺႃးၽဝ်၊ ၵျွင်းမုၼ်ၸဝ်ႈပဢူဝ်းၵေႃႈၺႃးၽဝ်။ ၵူၼ်းမိူင်းလႆႈယူႇယၢပ်ႇဝႆႉတင်းသွင်ၾၢႆႇ ဝႃႈၼႆ။