Friday, March 29, 2024

ၵူၼ်းမိူင်းသီႇပေႃႉ ႁိမ်း 5,000 လူင်းလၢႆးမိုဝ်း/ တုၵ်းယွၼ်းသိုၵ်းတႆး 2 ၸုမ်း ဢုပ်ႇဢူဝ်းၵၼ်

Must read

ၵူၼ်းမိူင်းဢိူင်ႇၼႃးမၢၵ်ႇၶေႃ ၸႄႈဝဵင်းသီႇပေႃႉ ဢွၼ်ၵၼ်တႅမ်ႈၸိုဝ်ႈလူင်းလၢႆးမိုဝ်း ယိုၼ်ႈလိၵ်ႈယွၼ်းမဵတ်ႉ တႃႇထိုင် ႁူဝ်ပဝ်ႈတပ်ႉသိုၵ်းၸိုင်ႈတႆး 2 ၸုမ်း ႁႂ်ႈႁူပ်ႉဢုပ်ႇဢူဝ်းငူပ်ႉငီႉၵၼ်လႄႈ ႁႂ်ႈၵိုတ်းပၢင်တိုၵ်း ဢၼ်ပဵၼ်ယူႇၼႂ်းပိုၼ်ႉတီႈ ၸိူဝ်းၼႆႉ။

Photo by – SHAN/ ၵူၼ်းပၢႆႈၽေးသိုၵ်း တီႈဝတ်ႉၼႃးမၢၵ်ႇၶေႃ ၸႄႈဝဵင်းသီႇပေႃႉ

မိူဝ်ႈၼႆႉ ဝၼ်းတီႈ 10/01/2019 ၵူၼ်းဝၢၼ်ႈ 14 ဝၢၼ်ႈ ႁူဝ်ၵူၼ်း 4,688 ၵေႃႉ ၼႂ်းဢိူင်ႇၼႃးမၢၵ်ႇၶေႃ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ႁူမ်ႈၵၼ် လူင်းလၢႆးမိုဝ်း သူင်ႇထိုင်ၽူႈတႅၼ်းသၽႃးပႃႇတီႇႁူဝ်သိူဝ် SNLD ၸႄႈဝဵင်းသီႇပေႃႉသေ ႁႂ်ႈသိုပ်ႇယိုၼ်ႈပၼ် တီႈၸွမ်သိုၵ်းလူင် ယွတ်ႈသိုၵ်း ႁူဝ်ပဝ်ႈ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/ SSA လႄႈ ၸွမ်သိုၵ်းလူင် ပၢင်ႇၾႃႉ ႁူဝ်ပဝ်ႈ ပႃႇတီႇမႂ်ႇသုင် ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ႁႂ်ႈသွင်ၸုမ်း ၸဵဝ်းႁူပ်ႉဢုပ်ႇဢူဝ်းငူပ်ႉငီႉၵၼ်၊ ႁႂ်ႈၵိုတ်းပၢင်တိုၵ်းတေႃႇၵၼ်လႄႈ ႁႂ်ႈၵူၼ်းမိူင်းလႆႈၸွႆႈၵမ်ႉထႅမ်ပၼ် ၸုမ်းလဵဝ် တီႈ လဵဝ် ၸဵမ်ၸိူဝ်းၼႆႉ။

- Subscription -

ၼၢင်းလၢဝ်ၶမ်း ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉတီႈဝတ်ႉၼႃးမၢၵ်ႇၶေႃလႄႈ ၽူႈဢွၼ်တူင်ႉၼိုင် ၵဵပ်းသဵၼ်ႈ ၸိုဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ၵူၼ်းၼႂ်းဢိူင်ႇၼႃးမၢၵ်ႇၶေႃ ႁဝ်းၶႃႈၼႆႉ လႆႈႁၢပ်ႇထၢမ်းပၼ် ပဵၼ် 3 တီႈ၊ တၢင်းပွတ်း ႁွင်ႇၵေႃႈလႆႈပၼ်၊ တၢင်းပွတ်းၸၢၼ်းၵေႃႈလႆႈပၼ်၊ တၢင်းသိုၵ်းၵူၼ်းမိူင်းပျီႇတူႉၸိတ်ႉ တၢင်းမိူင်းၶိူဝ်းၵေႃႈ ႁဝ်းလႆႈ ပၼ်။ ယွၼ်ႉၼၼ်လႄႈ ႁႂ်ႈၶဝ်ဢုပ်ႇဢူဝ်းၵၼ်လီလီသေ ႁႂ်ႈႁဝ်းလႆႈပၼ်ဢၼ်လဵဝ် တီႈ လဵဝ် ယွၼ်ႉဝႃႈ ဢၼ်လႆႈပၼ် ယူႇလၢႆလၢႆၸုမ်း လၢႆလၢႆတီႈၸိူဝ်းၼႆႉ။ မၼ်းၼၵ်း လိူဝ်ၸႂ်ၵူၼ်းမိူင်းၼႃႇၶႃႈ လိူဝ်သေ ၼၼ်ႉ လႆႈပၼ်ၶဝ်ႈၵိၼ်သေ ဢမ်ႇၵႃး လႆႈပၼ်ပႃးၵူၼ်းထႅင်ႈလူးၵွၼ်ႇ။ ထႅင်ႈလွင်ႈၼိုင်ႈသမ်ႉ တေႃႈလဵဝ် ပဵၼ်ၶၢဝ်း ဢဝ်မၢၵ်ႇၶဝ်ႈတဝ်ႈၼမ်ႉလႄႈ ႁႂ်ႈၵူၼ်းမိူင်းႁဝ်းၶႃႈ ႁႂ်ႈလႆႈဢဝ်မၢၵ်ႇၶဝ်ႈတဝ်ႈၼမ်ႉလီလီ ။ ပဵၼ်သိုၵ်း တႆးၼင်ႇၵၼ် လႄႈ ဢမ်ႇၶႂ်ႈႁႂ်ႈပဵၼ်ပၢင်တိုၵ်း ၵၼ်။ ႁႂ်ႈၵိုတ်းယင်ႉပၢင်တိုၵ်းပၼ်ၽႂ်းၽႂ်းသေၵမ်း။ ႁႂ်ႈၽူႈဢွၼ်ႁူဝ်တင်းသွင် ၾၢႆႇၸဵဝ်းဢုပ်ႇ ဢူဝ်းငူပ်ႉငီႉၵၼ်လႆႈ ၽႂ်းၽႂ်းသေၵမ်း၊ ႁႂ်ႈႁၼ်ထိုင် ၸႂ်ၵူၼ်းမိူင်းၽွင်ႈၼႆသေ ၸင်ႇလႆႈယွၼ်းမဵတ်ႉတႃႇ ထိုင်ၸိူင်ႉၼႆၶႃႈ” ဝႃႈၼႆ။

ၵူၼ်းဝၢၼ်ႈၼႂ်းဢိူင်ႇၼႃးမၢၵ်ႇၶေႃ ဢၼ်လႆႈလူင်းလၢႆးမိုဝ်းသေ တုၵ်းယွၼ်းမဵတ်ႉတႃႇထိုင် တပ်ႉသိုၵ်းတႆး 2 တပ်ႉ ၸုမ်းၼၼ်ႉ ၵူၼ်းဝၢၼ်ႈတႃႈလူင် 367 ၵေႃႉ၊ ၵူၼ်းဝၢၼ်ႈၼႂ်းလူင် 153 ၵေႃႉ၊ ၵူၼ်းဝၢၼ်ႈႁူဝ်ၼႃး 534 ၵေႃႉ၊ ၵူၼ်း ဝၢၼ်ႈတူၼ်ႈၵႅင်း 450 ၵေႃႉ၊ ဝၢၼ်ႈၵဵတ်းၽူၼ် 217 ၵေႃႉ၊ ဝၢၼ်ႈႁူမ်ႈ 100 ၵေႃႉ၊ ဝၢၼ်ႈပၢင်ႇ 200 ၵေႃႉ၊ ဝၢၼ်ႈၼႃးမၢၵ်ႇ ၶေႃ 1,194 ၵေႃႉ၊ ၽၵ်းႁီႉ 221 ၵေႃႉ၊ ပုင်းထုၼ် 197 ၵေႃႉ၊ ၵုင်းသေႃႉ 191 ၵေႃႉ၊ ၶၢႆးႁဵဝ်း 510 ၵေႃႉ၊ ပၢင်ႇႁႆႈ 180 ၵေႃႉ လႄႈ ၵွင်းႁၵ်ႉ 174 ၵေႃႉ တင်းမူတ်း 4,688 ၵေႃႉ ဝႃႈၼႆ။

ၼၢင်းလၢဝ်ၶမ်း သိုပ်ႇလၢတ်ႈဝႃႈ “ ယူႇတီႈၽူႈတႅၼ်းႁဝ်းၶႃႈ တီႈသီႇပေႃႉ တေတၢင်ႇထိုင် တီႈႁူဝ်ပဝ်ႈ တပ်ႉသိုၵ်းတႆး တင်း 2 တပ်ႉၸုမ်းၼႆၼၼ်ႉ တေတၢင်ႇမိူဝ်ႈလႂ် ဢၼ်ဝႃႈၼၼ်ႉ တေႃႈလဵဝ် တိုၵ်ႉၶပ်းၶိုင်ႁၢင်ႈႁႅၼ်းယူႇၶႃႈ။ ယွၼ်းႁႂ်ႈ ၵိုတ်း ပၢင်သိုၵ်းတႆးတေႃႇတႆး တိုၵ်းၵၼ်။ ႁႂ်ႈတူၺ်းထိုင်ပေႃႈမႄႈ ၵူၼ်းမိူင်းယႂ်ႇယႂ်ႇၼမ် ၼမ်သေၵမ်းၶႃႈ” ဝႃႈၼႆ။

တႄႇဢဝ် ႁူဝ်ပီ 2019 ၼႆႉၼႃး သိုၵ်းတႆး ပွတ်းၸၢၼ်း တင်း ပွတ်းႁွင်ႇ ပဵၼ်ပၢင်တိုၵ်းၵၼ်မႃးၶိူဝ်းယႂ်းသေ ၵူၼ်းဝၢၼ်ႈ ၼႂ်းၸႄႈဝဵင်းသီႇပေႃႉ ႁူဝ်ၵူၼ်းၼပ်ႉႁဵင် လႆႈဢွၼ်ၵၼ်ပၢႆႈၽေးသိုၵ်းမႃးသွၼ်ႈဝႆႉယူႇၸွမ်းဝတ်ႉဝႃး။ ဢိင်ၼိူဝ် လွင်ႈ ပဵၼ်ပၼ်ႁႃ ပၢင်တိုၵ်းသိုၵ်းသိူဝ်ၼႆႉသေ ၵူၼ်းဝၢၼ်ႈ ၼႂ်းဢိူင်ႇၼႃးမၢၵ်ႇၶေႃ လႆႈပၢႆႈၽေးသိုၵ်း ဢမ်ႇယွမ်း 5 ပွၵ်ႈယဝ်ႉ ဝႃႈၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း