ၵူၼ်းပၢႆႈၽေးသိုၵ်းဢၼ်မႃးသွၼ်ႈယူႇဝႆႉတီႈဝတ်ႉပုပ်ႉပႃႇရူင်ႇ ၸႄႈဝဵင်းၼမ်ႉတူႈ 50 ပၢႆ ပႆႇၸၢင်ႈပွၵ်ႈ ယွၼ်ႉသဵၼ်ႈ တႃႈ သၢႆတၢင်း တႃႇတေပွၵ်ႈႁိူၼ်းတိုၵ်ႉယၢပ်ႇၽိုတ်ႇ ဝႃႈၼႆ။
ပေႃးထိုင်မႃး ဝၼ်းတီႈ 11/01/2019 ယၢမ်းၵၢင်ၼႂ် ယူႇတီႈၵေႃၵမ်ၵၢၼ် ၸုမ်းၸွႆႈထႅမ်ၵူၼ်းပၢႆႈၽေးသိုၵ်း ၼႂ်းၸႄႈ ဝဵင်းၼမ်ႉတူႈ တေႁၢင်ႈႁႅၼ်း သူင်ႇၵူၼ်းပၢႆႈၽေးသိုၵ်း ႁူဝ်ၵူၼ်း 55 ၵေႃႉ ဢၼ်ၵိုတ်းဝႆႉတီႈဝတ်ႉပုပ်ႉပႃႇရူင်ႇ ၸႄႈဝဵင်း ၼမ်ႉတူႈ ပွၵ်ႈၶိုၼ်းႁိူၼ်းယေးၽႂ်မၼ်းၶိုၼ်း။ မိူဝ်ႈလဵဝ် ယွၼ်ႉဝႃႈ သဵၼ်ႈ တႃႈသၢႆတၢင်း ဢၼ်တေၵႂႃႇသူင်ႇ ပီႈၼွင်ႉ ၵူၼ်းဝၢၼ်ႈဝႃႈၼၼ်ႉ ယၢပ်ႇၽိုတ်ႇ ဢမ်ႇၸၢင်ႈၵႂႃႇသူင်ႇႁွတ်ႈထိုင်တီႈလႆႈ လႄႈ ပႆႇပဵၼ်ပွၵ်ႈ ဝႃႈၼႆ။
လုင်းၸၢႆးပႃႉၺၢၼ်ႇ ၵႅမ်ၵေႃၵမ်ၵၢၼ် ၸုမ်းၸွႆႈထႅမ်ၵူၼ်းပၢႆႈၽေးသိုၵ်း ၸႄႈဝဵင်းၼမ်ႉတူႈ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၽုၵ်ႈ ႁဝ်းၶႃႈ တေဢွၼ်ၵၼ်မိူဝ်းသူင်ႇၵူၼ်းပၢႆႈၽေးႁဝ်းၶႃႈယဝ်ႉ။ ပၢင်တိုၵ်းတႄႉဢမ်ႇပဵၼ် ယဵၼ်ၵႂႃႇယဝ်ႉၶႃႈ။ ယွၼ်ႉဝႃႈ ၾူၼ်တူၵ်းထပ်းၵၼ်လၢႆလၢႆဝၼ်းသေ ႁဵတ်းႁႂ်ႈသဵၼ်ႈတႃႈသၢႆ တၢင်းဢၼ်တေၵႂႃႇသူင်ႇ ပီႈၼွင်ႉၵူၼ်းပၢႆႈ ၽေးႁဝ်း တီႈဝၢၼ်ႈဝႃႈၼၼ်ႉ ပဵၼ်ဢၼ်ယၢပ်ႇၽိုတ်ႇသေ ယွၼ်ႉသဵၼ်ႈတၢင်းလိၼ်လႄႈ တေႃႈလဵဝ် သဵၼ်ႈတၢင်း ၼၼ်ႉ ပဵၼ်ၵူမ်ႇပဵၼ်ဢုင်ဝႆႉ ၵႃးတေၵႂႃႇသူင်ႇၶဝ် ဢမ်ႇၸၢင်ႈၵႂႃႇလႄႈ ပႂ်ႉထႅင်ႈဝၼ်းၼိုင်ႈ။ ႁႂ်ႈသဵၼ်ႈတၢင်းႁႅင်ႈဢိတ်း ၼိုင်ႈဢွၼ်ႇ” ဝႃႈၼႆ။
ဝၼ်းတီႈ 10/01/2019 ယၢမ်းဝၢႆးဝၼ်း 1 မူင်း ယူႇတီႈၾၢႆႇၸုမ်ၶႂႆႇၶႃပႄလႅင် တင်း ၸဝ်ႈၼႃႈတီႈမၢၼ်ႈၶဝ် တေမႃး ပၼ်ပိုၼ်ႉႁူႉ ၵဵဝ်ႇၵပ်းလူၺ်ႈမၢၵ်ႇမႅင်း။ ယွၼ်ႉဝႃႈ သင်ပီႈၼွင်ႉၵူၼ်းပၢႆႈၽေးႁဝ်း ပွၵ်ႈမိူဝ်းယူႇတီႈၸွမ်းဝၢၼ်ႈ ၸွမ်း ၶူင်ႇ၊ ယဵပ်ႇၺႃးမၢၵ်ႇ၊ ထူပ်းၺႃးမၢၵ်ႇၸိုင် တေလႆႈႁဵတ်းႁိုဝ် ၵႅတ်ႇၶႄႁႄႉၵင်ႈၵၼ် ၸဵမ်ၸိူဝ်းၼႆႉ” ဝႃႈၼႆ။
မိူဝ်ႈႁၢင်လိူၼ် ၻီႊသႅမ်ႊၿိူဝ်ႊ 2018 တင်း ႁူဝ်လိူၼ်ၵျႅၼ်ႊၼိဝ်ႊရီႊ 2019 ၼႆႉမႃး ယွၼ်ႉသိုၵ်းဢူၺ်းလီ ပွတ်းႁွင်ႇ တင်း သိုၵ်း RCSS ပဵၼ်ပၢင်တိုၵ်းၵၼ် ႁိမ်းဝၢၼ်ႈၸၢမ် – မိူင်းမူႉသေ ၵူၼ်းဝၢၼ်ႈၼႃးငူး၊ ဝၢၼ်ႈၼႃးႁၢင်း၊ ဝၢၼ်ႈၼွင် ဢေႃႈ၊ ဝၢၼ်ႈၼႃးၵႅင်းလႄႈ ဝၢၼ်ႈဝႃႈ လႆႈဢွၼ်ၵၼ်ပၢႆႈဢွၵ်ႇမႃး ႁူဝ်ၵူၼ်း 400 ပၢႆ ၸိူဝ်းၶဝ်တႄႉ ၶိုၼ်းပွၵ်ႈမိူဝ်းဝၢၼ်ႈ ၽႂ်မၼ်း ပူၼ်ႉမႃး 2-3 ဝၼ်းၼႆႉယဝ်ႉ” ဝႃႈၼႆ။
တၢင်းပွတ်းၸႄႈဝဵင်းၼမ်ႉတူႈၼႆႉ ၸုမ်းယိပ်းၵွင်ႈၵၢင်ႇ ဢၼ်တူင်ႉၼိုင်ၵႂႃႇမႃးယူႇတႃႇသေႇမီး တပ်ႉသိုၵ်း လူင်ပွင်ၸိုင်ႈ မၢၼ်ႈ၊ ၸုမ်းဢူၺ်းလီပွတ်းႁွင်ႇတင်း သိုၵ်း RCSS ၸဵမ်ၸိူဝ်းၼႆႉ။
မိူဝ်ႈဝၼ်းတီႈ 21 လိူၼ်ၻီႊသႅမ်ႊၿိူဝ်ႊ 2018 ၼၼ်ႉ တပ်ႉသိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇ ၵိုတ်းတိုၵ်းၾၢႆႇလဵဝ် ၶၢဝ်းတၢင်း 4 လိူၼ် (21/12/2018 – 30/04/2019) ၼႂ်းၶေႃႈပိုၼ်ၽၢဝ်ႇၼၼ်ႉ ယင်းၾၢင်ႉတိူၼ်ဝႃႈ ၸုမ်းၸၢဝ်းၶိူဝ်း ယိပ်းၵွင်ႈၵၢင်ႇၵေႃႈ ႁႂ်ႈၵုမ်းၵမ် ၵူၼ်းၽႂ်ၵူၼ်းမၼ်း၊ သင်ၸႂ်ႉဢဵၼ်ႁႅင်းတေႃႇၵၼ် တေဢမ်ႇပွႆႇဝႆႉ၊ ၾၢႆႇသိုၵ်းတပ်ႉမ တေႃႇမၢၼ်ႈ တေၵႂၢတ်ႇလၢင်ႉၵႂႃႇ ဝႃႈၼႆဝႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ