တၢင်းပဵၼ်ဢႆၶေႃးၸဵပ်းၽႄႈၸပ်းလုၵ်ႈဢွၼ်ႇဢႃယု 15 ပီ လူင်းတႂ်ႈ လူႉတၢႆၵေႃႈမီး ဝႃႈၼႆ။
တၢင်းပဵၼ်ဢႆၶေႃးၸဵပ်းၼႆႉ တႄႇပဵၼ်မႃး မိူဝ်ႈလိူၼ်ဢွၵ်ႊထူဝ်ႊၿိူဝ်ႊ 2018 လိူင်ႇၽႄႈၼႂ်းမိူင်းတႆး ပွတ်းႁွင်ႇ တင်း ပွတ်းၸၢၼ်း ၵူၼ်းမိူင်းၼႂ်းပိုၼ်ႉတီႈဢွၼ်ၵၼ်ၸပ်းတၢင်းပဵၼ်ဢႆ၊ ၶေႃးၸဵပ်း၊ သူပ်းၸဵပ်း လုၵ်ႈဢွၼ်ႇဢၼ် လႆႈၸပ်း တၢင်းပဵၼ်သေ ထိုင်တီႈလူႉတၢႆၵႂႃႇၵေႃႈမီး။
ၻွၵ်ႊတိူဝ်ႊၼၼ်ႇတႃႇဝုၼ်ႇ ၽူႈၵွၼ်းႁူင်းယႃ ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ တၢင်းပဵၼ်ၼႆႉ တႄႇ ၽႄႈမႃး မိူဝ်ႈလိူၼ်ဢွၵ်ႊထိူဝ်ႊၿိူဝ်ႊ 2018။ ၵူၼ်းမိူင်းဢၼ်လႆႈတိတ်းၸပ်းတၢင်းပဵၼ်ၼႆႉသေႁွတ်ႈမႃးႁူင်းယႃ မီး 11 ၵေႃႉ။ ၼႂ်းၼၼ်ႉ ဢၼ်ၵူတ်ႇထတ်းႁၼ်မႅၼ်ႈၸိူဝ်ႉမႅင်း(ပႅၵ်ႊထီႊရီႊယိူဝ်ႊ) မီး 5 ၵေႃႉ။ လုၵ်ႈဢွၼ်ႇ ဢႃယု 15 ပီ လူင်းတႂ်ႈ လႆႈလူႉတၢႆၵႂႃႇ 2 ၵေႃႉယဝ်ႉ” ဝႃႈၼႆ။
တေႃႈလဵဝ် ၼႂ်းၸႄႈဝဵင်းသီႇပေႃႉတႄႉ ဢမ်ႇပႆႇႁၼ် ၵူၼ်းၸပ်းတၢင်းပဵၼ်ဢၢႆၶေႃးၸဵပ်းၼႆႉ။ ဢၼ်ႁွတ်ႈထိုင်မႃး တီႈႁူင်းယႃသီႇပေႃႉတႄႉပဵၼ်ၵူၼ်းမိူင်းၵိုင်တင်းၼမ်ႉတူႈ ဝႃႈၼႆ။
ၻွၵ်ႊတိူဝ်ႊၼၼ်ႇတႃႇဝုၼ်ႇ လၢတ်ႈဝႃႈ “ဢၼ်မႃးၼႄမေႃယႃတႄႉ ၵူၼ်းၼမ်ႉ တူႈၵေႃႉၼိုင်ႈလႄႈ ၵူၼ်းမိူင်းၵိုင် ၵေႃႉၼိုင်ႈ။ ၵူၼ်းမိူင်းၵိုင်တႄႉ ႁဝ်းၶႃႈ လႆႈသိုပ်ႇသူင်ႇၵႂႃႇယူတ်း ယႃတီႈႁူင်း ယႃဝဵင်းလိူဝ်ႇသေ ထိုင်ပွတ်းတၢင်းၵူၺ်း လႆႈလူႉသဵင်ႈပႅတ်ႈ” ဝႃႈၼႆ။
တေႃႈလဵဝ် တွၼ်ႈတႃႇတေႁႄႉၵင်ႈလႆႈတၢင်းပဵၼ်ဢႆၶေႃးၸဵပ်းၼႆႉ ယူႇတီႈၾၢႆႇမေႃယႃၶဝ် လႆႈလူင်းပိုၼ်ႉတီႈသေ သမ်းၶဵမ်ႁႄႉၵင်ႈ(ကာကွယ်ဆေး) ပၼ်ၼႂ်းၸိုင်ႈတႆးပွတ်းၸၢၼ်းလႄႈ တၢင်းဝဵင်းၼမ်ႉလၼ်ႈ ၸိူဝ်းၼႆႉမႃး။
ၻွၵ်ႊတိူဝ်ႊၼၼ်ႇတႃႇဝုၼ်ႇ လၢတ်ႈဝႃႈ “ တၢင်းပဵၼ်ဢႆၶေႃးၸဵပ်းၼႆႉ မၼ်းပဵၼ်ၸိူဝ်ႉမႅင်း(ပႅၵ်ႊထီႊရီႊယိူဝ်ႊ) ဢၼ် ၼိုင်ႈ။ မၼ်းတေၸၢင်ႈၸပ်းၵၼ်လႆႈ ၸွမ်းလူမ်းထူၺ်ႈၸႂ် ၸၢင်ႈပဵၼ်ၽေးထိုင်သၢႆၸႂ်။ တၢင်းပဵၼ်ၼႆႉ မၼ်းဢမ်ႇ လိူၵ်ႈ ဢႃယု/ ဢသၢၵ်ႈသင်။ ဢၼ်လီလိူဝ်ပိူၼ်ႈ တီႈသုတ်းတႄႉ လူဝ်ႇလႆႈသမ်းယႃႁႄႉၵင်ႈၼၼ်ႉယဝ်ႉ” ဝႃႈၼႆ။
ၾၢင်ႁၢင်ႈတၢင်းပဵၼ်ဢႆၶေႃးၸဵပ်းၼႆႉ တေပဵၼ်ဢႆ၊ ပဵၼ်ၶေႃးၸဵပ်း၊ လူမ်းမႆႈၶိုၼ်ႈ တေမီးပုၼ်းပူၵ်ႇဢွၵ်ႇမႃး။ ၵိၼ်ဢမ်ႇ ဝၢၼ်၊ ၸႂ်ဢမ်ႇလီ ၸဵမ်ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ