ၼႂ်းတူင်ႇတၢင်ႇပိုၼ်ႉတီႈ SSPP တင်း RCSS ၶဵင်ႈၶႅင်ၵၢၼ်သိုၵ်းတေႃႇၵၼ် ၶဝ်ႈႁိမ်ပိုၼ်ႉတီႈၵၼ်ၼၼ်ႉ ၵူၼ်းမိူင်း သီႇပေႃႉ ၼပ်ႉႁဵင် လႆႈပၢႆႈၽေးသိုၵ်းသေဢမ်ႇၵႃး ႁူင်းႁဵၼ်းၸၼ်ႉငဝ်ႈ လႆႈပိၵ်းႁပ်းဝႆႉ 7 လင် ဝႃႈၼႆ။
ဝၼ်းတီႈ 07/01/2019 ယူႇတီႈ ၾၢႆႇပၢႆးပၺ်ၺႃ ၸႄႈဝဵင်းသီႇပေႃႉ လူင်းပိုၼ်ႉတီႈသေ ပူင်သွၼ်ပၼ် လိၵ်ႈလုၵ်ႈဢွၼ်ႇ ႁဵၼ်း ၸိူဝ်းပၢႆႈၽေးသိုၵ်း မႃးသွၼ်ႈဝႆႉတီႈဝတ်ႉၼႃးမၢၵ်ႇၶေႃ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။ ႁူင်းႁဵၼ်းဢၼ် လႆႈဢိုတ်းႁပ်းၵႂႃႇမီး 7 လင်၊ လုၵ်ႈႁဵၼ်း 431 ၵေႃႉ၊ ၶူးသွၼ် 22 ၵေႃႉ။ ပဵၼ်ႁူင်းႁဵၼ်းၼႂ်းဢိူင်ႇၼမ်ႉယၢင်း၊ ၼႃးမၢၵ်ႇ ၶေႃ၊ ၸႄႈၶၢၼ် တင်းၵုင်းသေႃႉ။
ၸၢႆးလၢဝ်သႅင် ၽူႈၼမ်းၼႂ်း ပႃႇတီႇႁူဝ်သိူဝ် ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝႃး ပဵၼ်ဝၼ်းၸၼ် ဝၼ်းပိုတ်ႇႁူင်းႁဵၼ်းလႄႈ လုၵ်ႈဢွၼ်ႇႁဝ်း ဢၼ်ပၢႆႈၽေးသိုၵ်းမႃးၼၼ်ႉ ဢမ်ႇၶႂ်ႈႁႂ်ႈၶဝ်ၶၢတ်ႇၵၢၼ်ႁဵၼ်း ယူႇတီႈၽူႈ တႅၼ်းသၽႃးပႃႇတီႇႁဝ်း လႆႈၸွႆႈၶပ်ႉၶိုင်ပၼ်သေ ယူႇတီႈၾၢႆႇပၢႆးပၺ်ၺႃ ၸႄႈဝဵင်းသီႇပေႃႉ ၸင်ႇလူင်းပိုၼ်ႉတီႈပူင် သွၼ်ပၼ်ၵႂႃႇ တီႈၵူၼ်းပၢႆႈၽေးသိုၵ်း ၸွမ်းဝတ်ႉဝႃး” ဝႃႈၼႆ။
လုၵ်ႈဢွၼ်ႇႁဵၼ်း ဢၼ်ၶိုၼ်ႈႁဵၼ်းတီႈဝတ်ႉၼႃးမၢၵ်ႇၶေႃ ႁူင်းႁဵၼ်းၸၼ်ႉငဝ်ႈ(အမကကျောင်း) ဝၢၼ်ႈႁူဝ်ၼႃး၊ ၼႂ်းလူင်၊ တႃႈလူင်၊ ဝၢၼ်ႈႁူၵ်းလႄႈ တူၼ်ႈၵႅင်း။ လုၵ်ႈႁဵၼ်းၸၼ်ႉငဝ်ႈ တင်းမူတ်း 20 ၵေႃႉ၊ ၸၼ်ႉၼိုင်ႈ 27 ၵေႃႉ၊ ၸၼ်ႉသွင် 17 ၵေႃႉ၊ ၸၼ်ႉသၢမ် 17 ၵေႃႉ၊ ၸၼ်ႉသီႇ 10 ၵေႃႉ ႁူမ်ႈၵၼ် တင်းမူတ်း 91 ၵေႃႉ။ ၶူးပူင်သွၼ်သမ်ႉ 18 ၵေႃႉ ဝႃႈၼႆ။
သိုၵ်း RCSS တင်း SSPP ပဵၼ်ပၢင်တိုၵ်းၵၼ်သေ ၵူၼ်းမိူင်းဢၼ်ပၢႆႈၽေးသိုၵ်းဢွၵ်ႇမႃးသမ်ႉ ၵူၼ်းဝၢၼ်ႈၵဵတ်းၽူၼ်၊ ဝၢၼ်ႈၼွင်ၵေႃႈ၊ ဝၢၼ်ႈတူၼ်ႈၵႅင်း၊ ဝၢၼ်ႈပၢင် ၼိဝ်ႉ၊ ဝၢၼ်ႈၼႃးၵၢင်၊ ဝၢၼ်ႈၶၢႆးႁဵဝ်း၊ ဝၢၼ်ႈၽၵ်းႁိ၊ ဝၢၼ်ႈလူင်ဝၢႆ၊ ဝၢၼ်ႈ ပၢင်ၸဝ်ႈမိူင်း၊ ဝၢၼ်ႈၼႂ်းလူင်၊ ဝၢၼ်ႈႁူဝ်ၼႃး၊ ဝၢၼ်ႈႁုင်း၊ ဝၢၼ်ႈတႃႈလူင်၊ ဝၢၼ်ႈၼမ်ႉမေႃႇလူင်၊ ဝၢၼ်ႈၼႃးသၢင်းလႄႈ ဝၢၼ်ႈပၢင်ႁၢႆး။ သဵၼ်ႈသၢႆမၢႆတေႃႇထိုင် ဝၼ်းတီႈ 07/01/2019 တင်းမူတ်း မီး 1,931 ၵေႃႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ