ၵူၼ်းဝၢၼ်ႈလူင်ၶဵဝ် ႁူဝ်ၵူၼ်း 70 ပၢႆ လႆႈဢွၼ်ၵၼ်ငိူင်ႉပၢႆႈၽေးသိုၵ်း မႃးသွၼ်ႈဝႆႉတီႈလၢင်းၶိူဝ်း ယွၼ်ႉသိုၵ်း PNLO တင်း RCSS ၶဵင်ႈၶႅင်ၵၢၼ်သိုၵ်းတေႃႇၵၼ် ၼႂ်းပိုၼ်ႉတီႈ။
ဝၼ်းတီႈ 08/01/2019 ယၢမ်းၵၢင်ၶမ်ႈ ၵူၼ်းဝၢၼ်ႈလူင်ၶဵဝ် ၸႄႈဝဵင်းမိူင်းပၼ်ႇ ဢွၼ်ၵၼ်ပၢႆႈလူင်းလၢင်းၶိူဝ်းသွၼ်ႈ ဝႆႉတီႈဝတ်ႉ /ၵျွင်းဝႃႇသူဝ်ႇ ႁူဝ်ၵူၼ်း 41 ၵေႃႉ၊ တီႈဝတ်ႉပၢင်ဝွင် ႁူဝ်ၵူၼ်း 35 ၵေႃႉ။
ၵူၼ်းပၢႆႈၽေးသိုၵ်း ဝၢၼ်ႈလူင်ၶဵဝ် ဢၼ်ပၢႆႈႁွတ်ႈၽႅဝ်လၢင်းၶိူဝ်း လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ ဢွၼ်ၵၼ်ပၢႆႈ ဢွၵ်ႇမႃး ႁွတ်ႈထိုင်လၢင်းၶိူဝ်းၼႆႉ မီးႁူဝ်ၵူၼ်း 70 ပၢႆ ဢွၼ်ၵၼ်ပႆတၢင်းမႃးၵူၺ်းၶႃႈ။ ၵမ်ႈၽွင်ႈ မိူၼ်ၼင်ႇ ၵူၼ်းဝၢၼ်ႈ မႆႉပူၵ်ႉသမ်ႉ ပၢႆႈလူင်းၵႂႃႇတၢင်းၾင်ႇၶူင်း သိုၵ်းဝႃႉႁပ်ႉတူၺ်းထိုင်ဝႆႉၼၼ်ႉတႄႉ။ မိူၼ်ၼင်ႇ ဝၢၼ်ႈမႂ်ႇသမ်ႉ ပၢႆႈၵႂႃႇတၢင်း ၾၢႆႇလွင်ႉမၢၵ်ႇဢူဝ်း၊ ႁူၺ်ႈၽိုင်ႈ။ ၵမ်ႈၽွင်ႈလူင်းၶၢင်ႉဝႆႉတီႈႁိမ်းၾင်ႇၶူင်း၊ ၵမ်ႈၽွင်ႈမႃးၸွမ်းႁဝ်းၶႃႈ မႃးၶၢင်ႉဝႆႉၸွမ်း ႁိမ်းၼမ်ႉပၼ်ႇ၊ ၵုင်းလဝ်း၊ ပၢင်တဝိတ်ႉ ၸိူဝ်းၼႆႉၵေႃႈမီး ၵမ်ႈၽွင်ႈသမ်ႉဝႃႈ ၶႂ်ႈၵႂႃႇမိူင်းထႆး ၼႆၵေႃႈမီး” ဝႃႈၼႆ။
သိုပ်ႇလၢတ်ႈထႅင်ႈဝႃႈ “ ပိူင်လူင်ပဵၼ်ပၢႆးပၺ်ၺႃလုၵ်ႈဢွၼ်ႇ။ ယူႇၼႂ်းဝၢၼ်ႈသမ်ႉ လႆႈၵူဝ်သိုၵ်းလၢႆၸုမ်း၊ သိုၵ်းပဢူဝ်း ၵေႃႈလႆႈၵူဝ်၊ သိုၵ်းမၢၼ်ႈ၊ သိုၵ်းတႆး ၵေႃႈလႆႈၵူဝ်ၶႃႈယဝ်ႉ။ ဝၢႆးမႃးသိုၵ်းပဢူဝ်း(ၵူဝ်ႇယိၼ်ႇလေး)ၵေႃႈ ၶဝ်မႃးၸွႆႈထႅမ်ၵူၼ်းဝၢၼ်ႈၵူၺ်းၼႆသေ ပၵ်းတပ်ႉဢၼ်ၼိုင်ႈယဝ်ႉ ဢၼ်ၼိုင်ႈ ၶႂၢၵ်ႈတပ်ႉၶဝ်မႃးတိၵ်းတိၵ်းလႄႈ ၵမ်းၵမ်းပဵၼ်ပၢင်တိုၵ်းၵၼ်” ဝႃႈၼႆ။
လူင်ပွင်ၸိုင်ႈသမ်ႉ ႁွင်ႉဢဝ်ၶႃႈႁၢပ်ႇၵၢၼ်ၶုၼ်၊ ပၢႆးပၺ်ၺႃလႄႈ ပၢႆးယူႇလီ မိူဝ်းယူႇၼႂ်းဝဵင်းယဝ်ႉလႄႈ ထႅမ်ႁႅင်းၵူၼ်း ဝၢၼ်ႈဢမ်ႇၶႂ်ႈႁတ်းယူႇၼႂ်းဝၢၼ်ႈ။ သိုၵ်းမၢၼ်ႈၵေႃႈထွႆဢွၵ်ႇဝၢၼ်ႈသေဢမ်ႇၵႃး ဢၼ်ၵိုတ်းၼႂ်းဝၢၼ်ႈသမ်ႉ သင်ႇႁၢမ်ႈ ဢမ်ႇပၼ်ဢွၵ်ႇႁိူၼ်း(ယၢမ်းႁူဝ်ၶမ်ႈ) ဢမ်ႇပၼ်တႆႈၾႆးထၢတ်ႈ၊ ၾႆးတဵၼ်း ၸိူဝ်းၼႆႉ ထႅင်ႈလူးၵွၼ်ႇ။ ၵွပ်ႈၼႆ ႁဵတ်းႁႂ်ႈ ၵူၼ်းဝၢၼ်ႈဢမ်ႇႁတ်းယူႇသေ ဢွၼ်ၵၼ်ပၢႆႈယၢၼ်ႁိူၼ်းယေး ဝႃႈၼႆ။
ၸဝ်ႈသိုၵ်း ၸၢႆးဢူး ၽူႈၶၢၼ်ပၢၵ်ႇ RCSS တီႈလုမ်းၵပ်းသၢၼ် ဝဵင်းတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ “ ဢၼ်ဝႃႈ RCSS ၵဵပ်းသိုၵ်းမႂ်ႇ၊ လိုပ်ႈႁေႃႈၵူၼ်းမိူင်း/ ၵူၼ်းဝၢၼ်ႈ ဢၼ်ဝႃႈၼၼ်ႉ မၼ်းဢမ်ႇၸႂ်ႈ။ ၵွၼ်ႇသိုၵ်းပဢူဝ်း PNLO ပႆႇ မႃးၼၼ်ႉ ႁဝ်းၶႃႈ တူင်ႉၼိုင်ၵႂႃႇမႃးယူႇၸိူဝ်းၼၼ်ႉ။ ထိုင်ဝၢႆးလင်သိုၵ်းပဢူဝ်းၼႆႉၶိုၼ်ႈမႃး သိုၵ်းႁဝ်းၶႃႈ RCSS ၵေႃႈ ဢမ်ႇတူင်ႉၼိုင်တၢင်းပွတ်းတွၼ်ႈၼၼ်ႉယဝ်ႉ။ ဝၢႆးလင်ၼၼ်ႉမႃး ၶဝ်မႃးလေႃႇတိုၵ်းႁဝ်း။ ယဝ်ႉၵေႃႈ ၶဝ်ၵဵပ်းသိုၵ်းမႂ်ႇ။။ ပေႃးပဵၼ်ၼၢင်းယိင်းသမ်ႉ ႁႂ်ႈႁဵတ်းၶဝ်ႈၽၵ်းသေ ၵႂႃႇသူင်ႇပၼ်တီႈပၢင်သဝ်းၶဝ် ၸိူဝ်းၼႆႉ။ ယွၼ်ႉၼၼ်လႄႈ ၵူၼ်းဝၢၼ်ႈ ဢမ်ႇယွၼ်းႁဵတ်းသေ ဢွၼ်ၵၼ်ပၢႆႈဢွၵ်ႇမႃး” ဝႃႈၼႆ။
မိူဝ်ႈဝၼ်းတီႈ 04/01/2019 ၼႆႉ ယူႇတီႈတပ်ႉသိုၵ်း PNLO ဢွၵ်ႇလိၵ်ႈပိုၼ်ၽၢဝ်ႇဝႃႈ “ သိုၵ်း RCSS ႁွင်ႉၵူၼ်းဝၢၼ်ႈ ၼႂ်းဢိူင်ႇၼႃးမွၼ် မိူၼ်ၼင်ႇ လူင်ၶဵဝ်၊ မႆႉပူၵ်ႇလႄႈ ပၢင်ပီႉ ၵႂႃႇၶွၼ်ႈတုမ်ၵၼ်တီႈဝတ်ႉပၢင်မီသေ လွၵ်ႇငိူၵ်ႈၵူၼ်းဝၢၼ်ႈ သေ ၸႂ်ႉၵူၼ်းဝၢၼ်ႈၶၢႆႉပၢႆႈ” ဝႃႈၼႆ။
ၵဵဝ်ႇလူၺ်ႈၵူၼ်းမိူင်း ဢၼ်ပၢႆႈႁွတ်ႈၽႅဝ်တီႈလၢင်းၶိူဝ်းၼႆႉ လုၵ်ႉဢဝ်တီႈဝၢၼ်ႈလူင်ၶဵဝ် ၸႄႈဝဵင်းမိူင်းပၼ်ႇသေ လႆႈ ဢွၼ်ၵၼ်ပႆမႃး ၶၢဝ်းတၢင်းမွၵ်ႈ 3 ဝၼ်း ၸင်ႇႁွတ်ႈၽႅဝ် လၢင်းၶိူဝ်း။ မိူဝ်ႈၽွင်းပႆမႃးၼၼ်ႉ ၶၢမ်ႈတီႈလႂ် ၵိုတ်းလိူဝ်ၸွမ်း ၼႂ်းထိူၼ်ႇသေ ၼွၼ်းတီႈၼၼ်ႈ။ တေႃႈလဵဝ် ၵူၼ်းမိူင်းဢၼ်ၵိုတ်းၶၢင်ႉဝႆႉၸွမ်းၼႂ်းထိူၼ်ႇ ၵေႃႈယင်းတိုၵ်ႉမီးယူႇ ဝႃႈၼႆ။
သိုၵ်း RCSS တင်းသိုၵ်း PNLO ၶဵင်ႈၶႅင်ၵၢၼ်သိုၵ်းၵၼ်မႃး တင်ႈတႄႇပၢႆပီ 2018။ ယွၼ်ႉပၼ်ႁႃၼႆႉသေ ၵျွင်းမုၼ် ၸဝ်ႈတႆးၵေႃႈၺႃးၽဝ်၊ ၵျွင်းမုၼ်ၸဝ်ႈပဢူဝ်းၵေႃႈၺႃးၽဝ်။ ၵူၼ်းမိူင်းလႆႈယူႇယၢပ်ႇဝႆႉတင်းသွင်ၾၢႆႇ ဝႃႈၼႆ။
