Thursday, March 28, 2024

ၵူၼ်းဝၢၼ်ႈလိၼ်လမ် ၸႄႈဝဵင်းလွၵ်ႉၸွၵ်ႇ ထူပ်းႁၼ် ၵွၵ်းႁူဝ်လုၵ်ႈဢွၼ်ႇ တီႈၼႂ်းသူၼ်ႁႆႈ

Must read

ၵူၼ်းဝၢၼ်ႈလိၼ်လမ် ၸႄႈဝဵင်းလွၵ်ႉၸွၵ်ႇ ထူပ်းႁၼ်ၵွၵ်းႁူဝ်လုၵ်ႈဢွၼ်ႇ တီႈၼႂ်းသူၼ်ႁႆႈ လၢမ်းၶၢတ်ႈဝႃႈ ပဵၼ်ႁူဝ် လုၵ်ႈဢွၼ်ႇ ဢၼ်ႁၢႆၵႂႃႇ မိူဝ်ႈႁၢင်လိူၼ်ၻီႊသႅမ်ႊၿိူဝ်ႊ 2018 ၼၼ်ႉ ဝႃႈၼႆ။

Photo by – ၸၢႆးဢွင်ႇ/ ၸၢႆးဢွၼ်ႇ ဢႃယု 2 ၶူပ်ႇ ဢၼ်ႁၢႆၵႂႃႇ

ဝၼ်းတီႈ 06/01/2019 ယၢမ်းၵၢင်ၼႂ် မွၵ်ႈ 7 မူင်း လုင်းသေႃးပေႇ ထူပ်းႁၼ် ၵွၵ်းႁူဝ်လုၵ်ႈဢွၼ်ႇ တီႈႁိမ်းၼႂ်းသုမ်ႉထဵင် သူၼ်မၼ်းၸၢႆး တၢင်းၾၢႆႇႁွင်ႇသုမ်ႉထဵင် တီႈဝၢၼ်ႈလိၼ်လမ် ဢိူင်ႇလိၼ်လမ် ၸႄႈဝဵင်းလွၵ်ႉၸွၵ်ႇ ၸႄႈတွၼ်ႈတူၼ်ႈ တီး ၸိုင်ႈတႆး ပွတ်းၸၢၼ်း။

- Subscription -

ၸၢႆးဢွင်ႇ ၽူႈပွင်ၵၢၼ် ၼႂ်းၵေႃလိၵ်ႈလၢႆးလႄႈ ၾိင်ႈငႄႈတႆး ၸႄႈဝဵင်းလွၵ်ႉၸွၵ်ႇ လၢတ်ႈတီႈၽူႈတွႆႇႁွၵ်ႈဝႃႈ “ ဝၼ်း ၼၼ်ႉ ယၢမ်းၵၢင်ၼႂ် မွၵ်ႈ 7 မူင်း လုင်းသေႃးပေႇ ၼင်ႇတီႈသုမ်ႉထဵင်တီႈၼႂ်းသူၼ်မၼ်းသေ ႁၼ်မႃ ၵၢပ်ႈၵွၵ်းႁူဝ်မႃး ၵမ်းၼႆႉ လုင်းသေႃးပေႇသမ်ႉ လူင်းၵႂႃႇတူၺ်း လႆႈထူပ်းႁၼ် ပဵၼ်ၵွၵ်းႁူဝ်လုၵ်ႈဢွၼ်ႇ။ လုင်းသေႃးပေႇၼႅတ်ႈ ၵပ်း ၾူၼ်းလၢတ်ႈမႃးတီႈၽူႈယႂ်ႇၵူၼ်း လူင်ဝၢၼ်ႈသေ ႁဝ်းၶႃႈၵေႃႈ ဢွၼ်ၵၼ်ၵႂႃႇတူၺ်း။ ၵွၵ်းႁူဝ်ၼၼ်ႉ ပဵၼ်ၵွၵ်းႁူဝ် လုၵ်ႈဢွၼ်ႇ ဢၼ်ႁၢႆၵႂႃႇမိူဝ်ႈဝၼ်းတီႈ 22/12/2018 ၼၼ်ႉႁႃႉ ဢမ်ႇၸႂ်ႈႁႃႉ ဢၼ်ဝႃႈၼၼ်ႉ ပႆႇယိုၼ်ယၼ်လႆႈ။ ၵူၺ်း ၵႃႈ ႁၼ်ၵွၵ်းႁူဝ်သေတႃႉ တူဝ်သမ်ႉ ပႆႇႁၼ် ၵဵဝ်ႇလူၺ်ႈလွင်ႈၼႆႉ ႁဝ်းၶႃႈၵူၼ်းဝၢၼ်ႈ တိုၵ်ႉဢွၼ်ၵၼ်ၵူတ်ႇထတ်း သွၵ်ႈ တဝ်ႁႃတူဝ် ၸွမ်းၼႂ်းသူၼ်ၼၼ်ႉယူႇ” ဝႃႈၼႆ။

တေႃႈလဵဝ် ယူႇတီႈၾၢႆႇၸဝ်ႈၼႃႈတီႈပလိၵ်ႈလႄႈ ပေႃႈမႄႈလုၵ်ႈဢွၼ်ႇ ၵေႃႉဢၼ်ႁၢႆတူဝ်ၵႂႃႇမိူဝ်ႈ ဝၼ်းတီႈ 22 လိူၼ် ပူၼ်ႉၼၼ်ႉ လႆႈဢဝ်ၵွၵ်းႁူဝ်ဢၼ်ထူပ်းႁၼ်ၼၼ်ႉသေ ၵႂႃႇၵူတ်ႇထတ်း တီႈႁူင်းယႃလူင်ၸႄႈဝဵင်းတူၼ်ႈတီး ဝႆႉယဝ်ႉ ဝႃႈၼႆ။

ၸၢႆးဢွင်ႇ သိုပ်ႇလၢတ်ႈဝႃႈ “တေႃႈလဵဝ်တႄႉ လႆႈဢဝ်ၵွၵ်းႁူဝ်ၼၼ်ႉ ၵႂႃႇၵူတ်ႇထတ်းတူၺ်းတီႈႁူင်းယႃလူင်ၸႄႈဝဵင်း တူၼ်ႈတီးဝႆႉယဝ်ႉ။ ၵူတ်ႇထတ်းတူၺ်း ႁႂ်ႈပေႃးႁူႉ လႆႈဝႃႈ ပဵၼ်ၵွၵ်းႁူဝ်လုၵ်ႈဢွၼ်ႇ ဢၼ်ႁၢႆတူဝ်ၵႂႃႇမိူဝ်ႈဝၼ်းတီႈ 22 ၼၼ်ႉတႄႉယဝ်ႉႁႃႉ ဢၼ်ဝႃႈၼၼ်ႉ။ ယူႇတီႈၶႃႈႁဝ်းထၢင်ႇတႄႉ တီႈၵွၵ်းႁူဝ်လုၵ်ႈဢွၼ်ႇၼၼ်ႉ လႅပ်ႈတေပဵၼ် ၵူၼ်း ႁဵတ်းႁၢႆႉၵူၺ်းယဝ်ႉ။ တီႈၶေႃးလုၵ်ႈဢွၼ်ႇၼၼ်ႉ မိူၼ်ပဵၼ်ႁွႆးၽႃႉမိတ်ႈတႅပ်းဝႆႉ။ ပေႃးပဵၼ်တူဝ်သတ်း ၶူပ်းတၢႆတႄႉ တေပဵၼ်ထႅင်ႈမဵဝ်းၼိုင်ႈ” ဝႃႈၼႆ။

မိူဝ်ႈဝၼ်းတီႈ 22/12/2018 ယၢမ်းဝၢႆးဝၼ်း 2 မူင်းၼၼ်ႉ လုၵ်ႈဢွၼ်ႇ ၸိုဝ်ႈႁွင်ႉ ၸၢႆးဢွၼ်ႇ ဢႃယု 2 ၶူပ်ႇ ပဵၼ်လုၵ်ႈ ၸၢႆး ၸၢႆးသၢင်ႇၶမ်းလႄႈ ၼၢင်းသႅင် ႁၢႆတူဝ်ၵႂႃႇ တီႈၼႂ်းသူၼ်ႁႆႈ ဝၢၼ်ႈလိၼ်လမ် ဢိူင်ႇလိၼ်လမ် ၸႄႈဝဵင်းလွၵ်ႉၸွၵ်ႇ တေႃႇထိုင်ယၢမ်းလဵဝ် ဢမ်ႇႁူႉဝႃႈႁၢႆၵႂႃႇတၢင်းလႂ် ပဵၼ်ယွၼ်ႉသင်။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း