ၵူၼ်းဝၢၼ်ႈ 100 ပၢႆ ၼႂ်းဢိူင်ႇၼႃးမၢၵ်ႇၶေႃ ဢွၼ်ၵၼ်ပၢႆႈမႃးသွၼ်ႈထႅင်ႈ တီႈဝတ်ႉၼႃးမၢၵ်ႇၶေႃ ဝဵင်းသီႇပေႃႉ ယွၼ်ႉ ငဝ်းလၢႆးပၢင်တိုၵ်းၼႂ်းပိုၼ်ႉတီႈ ပႆႇမီးလွင်ႈၼိမ်သဝ်း တိုၵ်ႉၶဵင်ႈၶႅင်ၵၢၼ်သိုၵ်းၵၼ်ဝႆႉယူႇ ဝႃႈၼႆ။

ဝၼ်းတီႈ 12/12/2018 ၵူၼ်းဝၢၼ်ႈႁူမ်ႈ၊ ဝၢၼ်ႈၼႂ်းလူင်လႄႈ ဝၢၼ်ႈၶၢႆးႁဵဝ်း ႁူဝ်ၵူၼ်း 100 ပၢႆ ဢွၼ်ၵၼ် ပၢႆႈမႃးသွၼ်ႈဝႆႉ တီႈဝတ်ႉၼႃးမၢၵ်ႇၶေႃ ၼႂ်းဢိူင်ႇၼႃးမၢၵ်ႇၶေႃႈ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ယွၼ်ႉသိုၵ်းမၢၼ်ႈ တိုၵ်ႉမီးလွင်ႈ ႁၢင်ႈၵၢင်မၢၵ်ႇၸွမ်းႁိမ်းႁွမ်း ဝတ်ႉမုၼ်ၸဝ်ႈလႄႈ ဝၢၼ်ႈၵူၼ်းယူႇ ဝႃႈၼႆ။

ၵူၼ်းပၢႆႈၽေးသိုၵ်း ဢၼ်ႁွတ်ႈၽႅဝ်ဝႆႉတီႈ ၼႃးမၢၵ်ႇၶေႃ လၢတ်ႈတီႈၽူႈတွႆႇႁွၵ်ႈဝႃႈ “ လႆႈႁၼ်သိုၵ်းမၢၼ်ႈႁၢင်ႈၵၢင် မၢၵ်ႇဝႆႉ ၸွမ်းႁိမ်းႁွမ်းဝတ်ႉ/ ၵျွင်း ဝၢၼ်ႈႁူမ်ႈ တူဝ်ၶဝ်သမ်ႉ ပႂ်ႉဝႆႉ ႁဝ်းၶႃႈ ၵူၼ်းဝၢၼ်ႈၵူဝ်ပဵၼ်ပၢင်တိုၵ်းသေ ၼႅတ်ႈ ဢွၼ်ၵၼ်ပၢႆႈဢွၵ်ႇမႃးၶႃႈ။ ထိုင်မႃးယၢမ်းၵၢင်ၶမ်ႈသမ်ႉ သိုၵ်းမၢၼ်ႈ ၶိုၼ်းဢွၵ်ႇဝၢၼ်ႈႁူမ်ႈသေ ၵႂႃႇတၢင်းဝၢၼ်ႈၼႂ်းလူင် သိုၵ်းၶူဝ်းၶဵဝ်သမ်ႉ ၶဝ်ႈမိူဝ်းၼႂ်းဝၢၼ်ႈႁူမ်ႈ ႁဵတ်းၼၼ်။ သိုၵ်းမၢၼ်ႈ ဢၼ်မႃးယင်ႉတီႈဝၢၼ်ႈႁူမ်ႈၼၼ်ႉ ၵမ်ႈၼမ် ပဵၼ်ၵူၼ်းထဝ်ႈ” ဝႃႈၼႆ။

သိုပ်ႇလၢတ်ႈဝႃႈ “ တေႃႈလဵဝ် သိုၵ်းၶူဝ်းလၢႆးသမ်ႉ ယူႇဝႆႉၾၢႆႇတူၵ်းၼမ်ႉတူႈဝႆႉ။ သိုၵ်းမၢၼ်ႈ တင်း ၶူဝ်းၶဵဝ်သမ်ႉ မီးၾၢႆႇ ၼႆႉ ၼမ်ႉတူႈ၊ ပၢင်တိုၵ်းတႄႉ လႅပ်ႈတေပဵၼ်ထႅင်ႈယၢဝ်းယူႇၶႃႈယူဝ်ႉ တူၺ်းငဝ်းလၢႆးမၼ်းတႄႉ။ သိုၵ်းၸိူဝ်းၼႆႉ ပေႃး လူဝ်ႇသင် ယွၼ်းၵူၼ်းမိူင်း ဢမ်ႇဝႃႈသိုၵ်းၸုမ်းလႂ် ၸဵမ်ၶဝ်ႈ ၸဵမ်ၽၵ်း ဢၼ်ၶဝ်လူဝ်ႇ ႁဝ်းၶႃႈၵူၼ်းဝၢၼ်ႈ လႆႈမႅင်ႇ၊ လႆႈပၼ် တႃႇတေၵႅတ်ႇၶႄပၼ်ၵူၼ်းမိူင်းတႄႉတႄႉဢမ်ႇမီးၸုမ်းလႂ်။ ပူႇၵၢင်ႉပူႇၵႄႇ မၢင်ဝၢၼ်ႈ ပေႃးၶႂ်ႈယွမ်းၵၢၼ်ႉ ယဝ်ႉ မၼ်းသုၵ်ႉသၵ်ႉၸွမ်း သိုၵ်းသိူဝ်ၼႅၼ်ႇၼႃႇ။ ၶဝ်ၼႄးဝႃႈ ပဵၼ်ၸႂ်ၸုမ်းၼၼ်ႉ ၸုမ်းၼႆႉ ႁဵတ်းၼၼ် ၶဝ်ဢမ်ႇ ႁူႉလေႃႇ ဝႃႈၵူၼ်းဝၢၼ်ႈ ယူႇယၢပ်ႇၵိၼ်းၸႂ်တၢၼ်ႇႁိုဝ်ဢၼ်ဝႃႈၼၼ်ႉ” ဝႃႈၼႆ။

တေႃႈလဵဝ် ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉတီႈဝတ်ႉၼႃးမၢၵ်ႇၶေႃသမ်ႉ ၵူၼ်းဝၢၼ်ႈႁူဝ်ၼႃး လင်ႁိူၼ်း 125 လင်၊ ၸၢႆး 126 ၵေႃႉ၊ ယိင်း 267 ၵေႃႉ။ ဝၢၼ်ႈၼႂ်းလူင် လင်ႁိူၼ်း 10 လင်၊ ၸၢႆး 10 ၵေႃႉ၊ ယိင်း 25 ၵေႃႉ၊ ဝၢၼ်ႈတႃႈလူင် လင် ႁိူၼ်း 1 လင်၊ ၸၢႆး 1 ၵေႃႉ၊ ယိင်း 3 ၵေႃႉ။ ဝၢၼ်ႈတူၼ်ႈၵႅင်း လင်ႁိူၼ်း 1 လင်၊ ၸၢႆး 2 ၵေႃႉ၊ ယိင်း 2 ၵေႃႉ၊ ဝၢၼ်ႈႁူမ်ႈ လင်ႁိူၼ်း 33 လင်၊ ၸၢႆး 30 ၵေႃႉ၊ ယိင်း 57 ၵေႃႉ။ ဝၢၼ်ႈၶၢႆးႁဵဝ်း လင်ႁိူၼ်း 1 လင်၊ ၸၢႆး 1 ၵေႃႉ၊ ယိင်း 2 ၵေႃႉ တင်း မူတ်းႁူမ်ႈၵၼ် ႁူဝ်ၵူၼ်း မီး 526 ၵေႃႉ ဝႃႈၼႆ။

ၵူၼ်းပၢႆႈၽေးသိုၵ်း တီႈဝတ်ႉဝၢၼ်ႈၸၢၼ်း တင်း ဝတ်ႉမၢၼ်ႈသၢင်း ႁူဝ်ၵူၼ်း 500 ပၢႆ ၸိူဝ်းပဵၼ်ၵူၼ်းထဝ်ႈတင်းလုၵ်ႈ ဢွၼ်ႇတႄႉ တိုၵ်ႉယူႇဝႆႉတီႈဝတ်ႉယူႇ ၸိူဝ်းပဵၼ်ၵူၼ်းၶၢဝ်ႉ ၵူၼ်းၼုမ်ႇ ဢွၼ်ၵၼ်ပွၵ်ႈမိူဝ်း ႁဵတ်းၵၢၼ် ၵၼ်ၶိုၼ်းၵမ်ႈ ၽွင်ႈယဝ်ႉ ဝႃႈၼႆ။

ၼၢႆးမူဝ်း ၵူၼ်းဝၢၼ်ႈမႂ်ႇပဵင်းမူင်ႈ ၵူၼ်းပၢႆႈၽေးသိုၵ်းတီႈဝတ်ႉမၢၼ်ႈသၢင်းၼၼ်ႉ လၢတ်ႈဝႃႈ “ ဢၼ်ၵိုတ်းဝႆႉတီႈၵျွင်း ၼႆႉၵမ်ႈၼမ် ပဵၼ်ၵူၼ်းၶၢဝ်ႉလႄႈ ၵူၼ်းၼုမ်ႇၶႃႈ ဢၼ်ပွၵ်ႈ မိူဝ်းၼၼ်ႉ ယွၼ်ႉမႆႈၸႂ် သူၼ်ၶဝ်ႈၵၢပ်ႇၶႃႈဢေႃႈ၊ မၢင်ၵေႃႉ ပႆႇလႆႈၵၢၼ်ႉၶဝ်ႈၵၢပ်ႇၵေႃႈမီး။ ၵူၺ်းၵႃႈ ဢၼ်ၶဝ် ပွၵ်ႈမိူဝ်း ၼၼ်ႉၵေႃႈ ၶဝ်တူၺ်းငဝ်းလၢႆးမၼ်းၶႃႈဢေႃႈ သင်ဝႃႈ ငဝ်း လၢႆးဢမ်ႇပေႃးလီၼႆၵေႃႈ ၶိုၼ်းပွၵ်ႈမႃးၼွၼ်းတီႈဝတ်ႉၶိုၼ်း သင်ဝႃႈ ငဝ်းလၢႆးလီၼႆၵေႃႈ ဢွၼ်ၵၼ်ၼွၼ်းတီႈထဵင် ႁဵတ်းၼၼ်ၶႃႈ” ဝႃႈၼႆ။

တၢင်းပွတ်းဢိူင်ႇၼႃးမၢၵ်ႇၶေႃၼႆႉ မီးသိုၵ်းဢၼ်တူင်ႉၼိုင်ၵႂႃႇမႃးယူႇယၢမ်းလဵဝ် သိုၵ်းလူင်ပွင်ၸိုင်ႈမၢၼ်ႈ၊ သိုၵ်းၶူဝ်း ၶဵဝ်လႄႈ သိုၵ်းၶူဝ်းလၢႆး ၸိူဝ်းၼႆႉ။