ၵၢၼ်ၽွမ်ႉႁူမ်ႈလမ်ႇလွင်ႈ တႃႇမိူင်းတႆးၵႃႈႁိုဝ်

ရၢင်းဝလ်းတီႈ 1 ၽူႈၵတ်ႉၶႅၼ်ႇတႅမ်ႈပွင်ႈၵႂၢမ်း မၢႆတွင်း “ၶူးသႅင်ၸိုၼ်ႈ သၶႁ လူႉၶွႆႈၶွပ်ႈတဵမ် 13 ပီ”

တႃႇတႆးတေလႆႈၽွမ်ႉႁူမ်ႈၵၼ်ၼၼ်ႉ လမ်ႇလွင်ႈတႃႇမိူင်းတႆးတႄႉတႄႉယဝ်ႉ။လွင်ႈဝႃႈ မၼ်းထိုင်ၶၢဝ်းယၢမ်းလူဝ်ႇၽွမ်ႉႁူမ်ႈၵၼ်ယဝ်ႉၼႆ တပ်ႉသိုၵ်းတႆးၵေႃႈလီ ၊ ပႃႇတီႇတႆးၵေႃႈလီ ၊တူင်ႇဝူင်းတႆးၵေႃႈလီ ယူႇတီႈပဵၼ်တႆးၵေႃႉၼိုင်ႈ ၊ၸုမ်းၼိုင်ႈသေ တေလႆႈမုင်ႈႁၼ်ငဝ်းလၢႆးဝၢၼ်ႈမိူင်းႁဝ်း သုၵ်ႉယုင်ႈဢူၼ်ၵဝ်း မိပ်ႇငႅၼ်းမႃးၵူႈၾၢႆႇၾၢႆႇ ပိူၼ်ႈလူလၢႆပေႉၵိၼ်ႁဝ်း ၊ တဵၵ်းတဵင်ႁဝ်း ထိုင်တီႈပိူၼ်ႈပေႃးဢမ်ႇႁၼ်ထိုင် “ တႆး ” ၼႆၼၼ်ႉယဝ်ႉ ။

ငဝ်းလၢႆးမိူဝ်ႈလဵဝ်ၼႆႉ သင်ဢဝ်တၢင်းဝူၼ်ႉမၢၵ်ႇတႃၽူႈႁၵ်ႉၸၢတ်ႈၵေႃႉၼိုင်ႈတူၺ်းၼႆ တႃႇတႆးတေယူႇလွတ်ႈၼႂ်းဝၼ်းၼႃႈၼၼ်ႉ လိူဝ်သေၽွမ်ႉႁူမ်ႈၵၼ်ယဝ်ႉ ၵႅတ်ႇၶႄတူၺ်းထိုင်လုမ်းလႃး ၸိူဝ်ႉၸၢတ်ႈ ၊ ဝၢၼ်ႈမိူင်း ၊ ၽႅၼ်ႇလိၼ်ႁဝ်းၼၼ်ႉ လႅပ်ႈတေဢမ်ႇမီးသဵၼ်ႈတၢင်းဢၼ်လႂ်လႆႈထႅင်ႈ။

မိူဝ်ႈလဵဝ်ၼႆႉ ၵွပ်ႈႁဝ်းၵုမ်ႇၸႅၵ်ႇၽႄၵၼ် ယူႇၽႂ်ယူႇမၼ်း ဢမ်ႇဝႃႈပႃႇတီႇ ၸဵမ်တပ်ႉသိုၵ်းၸိူဝ်းၼႆႉ လွင်ႈဝႃႈ ပေႃႈမႄႈၵူၼ်းမိူင်းတႆးထူပ်းတၢင်းယၢပ်ႇၽိုတ်ႇၵႃႈႁိုဝ် ၊ ၶဝ်တေမုင်ႈမွင်းတီႈပိုင်ႈဢိင် ဢၼ်မီးလွင်ႈဢုၼ်ႇၸႂ်ၵႃႈႁိုဝ် ၊ သိုၵ်းၸၢဝ်းၶိူဝ်းပိူၼ်ႈမႃးပေႉၵိၼ်ၶဝ်ၵႃႈႁိုဝ် တႄႇဢဝ်ၼႂ်းပီ 1962  မၢၼ်ႈ ယိုတ်းဢႃႇၼႃႇၸဝ်ႈၾႃႉမႃး ၊ ဢဝ်ၸဝ်ႈၾႃႉတႆးတၢႆ    ဢမ်ႇႁူႉပဵၼ်ၵႃႈႁိုဝ် တႆးလႆႈတုၵ်ႉၶယၢပ်ႇၽိုတ်ႇပၢၼ်တႅပ်းသီႇတႅပ်းၼၼ်ႉလႄႈသင် ၼႂ်းပီ 2022 ၼၼ်ႉ သိုၵ်းမၢၼ်ႈသိုပ်ႇယိပ်းၵမ်ဢႃႇၼႃႇထႅင်ႈ ႁၢၼ်ႉတေႃႇထိုင်ၼႂ်းႁၢင်ပီ 2023 ၼၼ်ႉ ၸုမ်းသိုၵ်းလုၵ်ႉၽိုၼ်ႉၶဝ် လႆႈတႄႇပၢင်ယၼ်ႇသိုၵ်း 1027 သေ လုၵ်ႉၽိုၼ်ႉသိုၵ်းမၢၼ်ႈမႃး ဢဝ်ပေႉလၢႆလၢႆၸႄႈဝဵင်းၼႂ်းမိူင်းတႆး ။ ၼၼ်ႉၵေႃႈ တႆးလႆႈၶၢမ်ႇတၢမ်ႇသိုၵ်းသိူဝ် လႆႈလူႉသၢႆၸႂ်ၵႂႃႇၵေႃႈမီးတင်းၼမ် ။ သိုၵ်းၸၢဝ်းၶိူဝ်းၶဝ်ယႃႉပႅတ်ႈပၢႆႉလိၵ်ႈတၢင်းၶဝ်ႈဝဵင်း ဢၼ်ပႃးလိၵ်ႈတႆးမႃးယူႇယဝ်ႉ။

ပၢင်တိုၵ်းၼႂ်းမိူင်းၵေႃႈ ၵိူတ်ႇၶိုၼ်ႈဢမ်ႇယဝ်ႉဢမ်ႇဝၢႆး ဝိႁၢၼ်ႇၵၢၼ်ႇၵျွင်း ၶူဝ်းၶွင်ၵဝ်ႇၵႄႇတႆးႁဝ်း လႆႈလူႉသုမ်းၵႂႃႇ ၵေႃႈမီးတင်းၼမ်  ၸိူဝ်းၼႆႉသင်တေမႃးထတ်းတူၺ်းလီလီၸိုင် ၵွပ်ႈတႆးဢမ်ႇၽွမ်ႉၵၼ်လႄႈပိူၼ်ႈဢမ်ႇၼပ်ႉယမ်တႆး ပိူၼ်ႈႁဵတ်းတီႈတႆးၵႃႈပွင်ႇၵႃႈပဵၼ်။

လုၵ်ႉဢဝ်ၼႆႉၵႂႃႇ သင်တႆးတိုၵ်ႉတေယူႇၽႂ်ယူႇမၼ်း ဢမ်ႇၽွမ်ႉႁူမ်ႈၵၼ်သေ ၼင်ႈတူၺ်းဝႆႉယူႇလၢႆလၢႆ မိူၼ်ၼင်ႇ မိူဝ်ႈပူၼ်ႉမႃးၼၼ်ႉတႄႉ တီႈယူႇတႆးၼႆႉ ယူဝ်ၶေးတေပဵၼ်ၶွင်ပိူၼ်ႈၵႂႃႇယဝ်ႉ။ပိူၼ်ႈၼၼ်ႉ ဢမ်ႇမီးၽႅၼ်ႇလိၼ် ပိူၼ်ႈယင်းၽွမ်ႉႁူမ်ႈၵၼ်သေ တိုၵ်းတေႃးသၢၼ်ၶတ်းဢႃႇၼႃႇသိုၵ်းမၢၼ်ႈ တႃႇတေမီးၸႄႈဝဵင်း/ ၸႄႈမိူင်းႁင်းၶေႃ ၊ ပိူၼ်ႈတေၶႂ်ႈမႃးယႃႉၸႅၵ်ႇဢဝ်ၽႅၼ်ႇလိၼ်ၶွင်ႁဝ်း ႁႂ်ႈပဵၼ်ၶွင်ပိူၼ်ႈၵႂႃႇ။ တႆးႁဝ်းသမ်ႉ မီးၽႅၼ်ႇလိၼ်တီႈယူႇတီႈသဝ်း ၸဵမ်မိူဝ်ႈပၢၼ်ၵွၼ်ႇတိုၼ်းၵိုၵ်းပိုၼ်းမႃးယဝ်ႉလႄႈ ႁဝ်းလူဝ်ႇႁႃလၢႆးတၢင်းတႃႇတေၽွမ်ႉႁူမ်ႈၵၼ်သေ ဢဝ်ၶိုၼ်း သုၼ်ႇလႆႈ သုၼ်ႇပဵၼ်ၶွင်ႁဝ်းၵူၺ်း။ တႃႇတေၽွမ်ႉႁူမ်ႈၵၼ်ၼၼ်ႉ ယူႇတီႈၵေႃႉၼိုင်ႈလႄႈၵေႃႉၼိုင်ႈၵေႃႈလီ ၸုမ်းၼိုင်ႈလႄႈၸုမ်းၼိုင်ႈၵေႃႈလီ တေလႆႈၵႆႉၵႆႉၶဝ်ႈဢွၵ်ႇႁႃၵၼ် ၊ ဢုပ်ႇဢူဝ်းၵၼ် ၊ သၢင်ႈလွင်ႈယုမ်ႇၸႂ်ၵၼ် ၊ လႅၵ်ႈလၢႆႈတၢင်းႁူႉၵၼ်ၸိူဝ်းၼႆႉ မၼ်းပဵၼ်ႁႅင်းတႃႇတေၽွမ်ႉႁူမ်ႈၵၼ်ၼၼ်ႉယဝ်ႉ။

ပေႃးမႃးတူၺ်းၶိုၼ်း ပၢၼ်ၶုၼ်လိတ်ႉသဝီႇၶဝ် မိူဝ်ႈယၢမ်းပုတ်ႉထၸဝ်ႈယင်းမီးၼႂ်းမိူင်းၵူၼ်းယူႇ တီႈမိူင်းဝေႇသႃႇလီႇၼၼ်ႉ ၶုၼ်လိတ်ႉသဝီႇၶဝ်ႁဵတ်းႁိုဝ်ၵႅတ်ႇၶႄၽႅၼ်ႇလိၼ်ဝၢၼ်ႈမိူင်း ၊ ႁဵတ်းႁိုဝ်သေ ပူၵ်းပွင်ဝၢၼ်ႈမိူင်းၶဝ်ၶိုၼ်ႈယႂ်ႇမႂ်ႇသုင်ၼႆၼၼ်ႉ တေလႆႈႁၼ်ဝႆႉၶဝ်တိုဝ်းၵမ်ထမ်း “ဢပရိႁႃၼိယ 7 ပိူင်” ဢၼ်ဝႃႈၼၼ်ႉယဝ်ႉ။

“ဢပရိႁႃၼိယ ထမ်း” ဢၼ်ႁဵတ်းႁႂ်ႈဝၢၼ်ႈမိူင်းၶိုၼ်ႈယႂ်ႇ 7 ပိူင်ၼၼ်ႉ –

1- ၵႆႉၵႆႉမီးလွင်ႈဢုပ်ႇၵုမ်ၵၼ်

2-  ၼႃႈၵၢၼ်ဢၼ်ထုၵ်ႇလီႁဵတ်းသၢင်ႈၼၼ်ႉ ႁူမ်ႈၵၼ်ႁဵတ်းသၢင်ႈ

3-  ၼပ်ႉယမ်ၾိင်ႈထုင်း – ဢမ်ႇလူလၢႆၾိင်ႈထုင်း

4- ၼပ်ႉယမ်ႁူဝ်ၼႃႈ ၽူႈႁူႉယႂ်ႇႁၼ်ၼမ်ၶဝ်ၸဝ်ႈ

5-  ဢမ်ႇလူလၢႆပေႉၵိၼ်ၼၢင်းယိင်း ၵေႃႉမီးႁႅင်းဢူၼ်ႈဢွၼ်ႇ

6-  ၵႆႉၵႆႉသူင်ႇမႅတ်ႉတႃႇပၼ်ၽီၶဝ်

7-  ႁပ်ႉတွၼ်ႈၽူႈမီးသိၼ်ထမ်း

1.  ၵႆႉၵႆႉမီးလွင်ႈဢုပ်ႇၵၼ်  ဢၼ်ဝႃႈၼၼ်ႉ – ဢုပ်ႇၵုမ်ၵၼ် တႃႇလၢတ်ႈၼႄၵၼ် ပၼ်တၢင်းႁၼ်ထိုင်ၵၼ် လွင်ႈတႃႇတေၵႄႈၶႆပၼ်ႁႃ ၵေႃႉလႂ် ၊ ၸုမ်းလႂ်မီးပၼ်ႁႃမႃးၵေႃႈယဝ်ႉ ႁူမ်ႈၵၼ်ၵႄႈၶႆၵႂႃႇ။

•  ၼႃႈၵၢၼ်ဢၼ်ထုၵ်ႇလီႁဵတ်းသၢင်ႈ ႁူမ်ႈၵၼ်ႁဵတ်းသၢင်ႈ ဢၼ်ဝႃႈၼၼ်ႉ မီးၵၢၼ်သင်မႃးၵေႃႈယဝ်ႉ ၽွမ်ႉႁူမ်ႈၵၼ်ႁဵတ်း ဢမ်ႇလိင်ႉဢမ်ႇလေႇ ဢမ်ႇတွပ်ႇဢမ်ႇထဵင် ဢွမ်ႇလွမ်ႈၽွမ်ႉသဵင်ပဵင်းပၢၵ်ႇၵၼ်သေ ႁဵတ်းသၢင်ႈယဝ်ႉ။

• ၼပ်ႉယမ်ၾိင်ႈထုင်း ဢမ်ႇလူလၢႆၾိင်ႈထုင်း ဢၼ်ဝႃႈၼၼ်ႉ ၾိင်ႈထုင်းဢၼ်ဢမ်ႇယၢမ်ႈမီးမႃးၵေႃႈ ဢမ်ႇတႄႇဢမ်ႇတင်ႈထုင်းမႂ်ႇ ၾိင်းထုင်းၵဝ်ႇၵဝ်ႇဢၼ်မီးဝႆႉၵေႃႈ ဢမ်ႇပၼ်လူႉႁၢႆဝၢႆးဝွတ်ႇသေ ဢွၼ်ၵၼ်ႁၵ်ႉသႃပႂ်ႉပႃး ႁႂ်ႈႁိူဝ်ႈႁိူင်းပိူင်းသႂ်ၵႂႃႇဝၼ်းတႃမိူဝ်းၼႃႈ။

• ၼပ်ႉယမ်ႁူဝ်ၼႃႈ ၽူႈႁူႉယႂ်ႇႁၼ်ၼမ်ၶဝ်ၸဝ်ႈ ဢၼ်ဝႃႈၼၼ်ႉ ၼပ်ႉယမ်တီႈၼိူဝ်ၽြႃး ၊ တြႃး ၊ သင်ၶႃႇ ၊ သြႃႇ ၊ပေႃႈ ၊ မႄႈ  ၽူႈႁူႉယႂ်ႇႁၼ်ၼမ်ၶဝ်ၸဝ်ႈ ၽူႈမီးသိၼ်ထမ်း ၊ ၽူႈမီးပၼ်ႇၺႃႇၶဝ်ၸဝ်ႈၼၼ်ႉယဝ်ႉ။

• ဢမ်ႇလူလၢႆပေႉၵိၼ်ၼၢင်းယိင်း ၵေႃႉမီးႁႅင်းဢူၼ်ႈဢွၼ်ႇ ဢၼ်ဝႃႈၼၼ်ႉ လွင်ႈလူလၢႆမိပ်ႇငႅၼ်း တဵၵ်းတဵင်ပေႉၵိၼ်ၼၢင်းယိင်းၼၼ်ႉ ၸဝ်ႈၵဝ်ႇၵေႃႈတိုၼ်းဢမ်ႇႁဵတ်းလႃးလႃး ပိူၼ်ႈတၢင်ႇၵေႃႉၵေႃႈ တိုၼ်းဢမ်ႇပၼ်ႁဵတ်းလႃးလႃး  ၽႂ်ပူၼ်ႉပႅၼ်ၵေႃႈ ဢဝ်တၢင်းၽိတ်းၼၵ်းၼၵ်းၼႃၼႃၵႂႃႇယူႇယဝ်ႉ။

• ၵႆႉၵႆႉသူင်ႇမႅတ်ႉတႃႇပၼ်ၽီၶဝ် ဢၼ်ဝႃႈၼၼ်ႉ ၸဝ်ႈဝၢၼ်ႈၸဝ်ႈမိူင်း ဢၼ်ၵႅတ်ႇၶႄပႂ်ႉပႃး ဝၢၼ်ႈမိူင်းတိူင်းၵႃးၼၼ်ႉၵေႃႈ ဢွၼ်ၵၼ်ပူႇၸေႃႇ သူင်ႇမႅတ်ႉတႃႇပၼ်ၽီၶဝ်ယူႇယဝ်ႉ။

•  ႁပ်ႉတွၼ်ႈၽူႈမီးသိလ်ထမ်း ဢၼ်ဝႃႈၼၼ်ႉ ၽြႃးပဵၼ်ၸဝ်ႈ ၊ ရႁၢၼ်းတႃႇ ၊ သင်ႇၶၸဝ်ႈ မီးသိလ်မီးထမ်း ဢၼ်မီးတၢင်ႇဝၢၼ်ႈတၢင်ႇမိူင်းၼၼ်ႉၵေႃႈ ပၢင်းႁွင်ႉမႃးသေ ပူႇၸေႃႇဝႆႈသႃပိုင်ႈဢိင်ၵိူဝ်းလီၼပ်ႉယမ် ၊ ဢၼ်မီးဝႆႉၼႂ်းဝၢၼ်ႈၼႂ်းမိူင်းၵေႃႈ ဢွၼ်ၵၼ်ပူႇၸေႃႇဝႆႈသႃ ၵမ်ႉထႅမ်ပၼ်ၶဝ်ၸဝ်ႈ တဵမ်တဵမ်ထူၼ်ႈထူၼ်ႈယဝ်ႉ။

ၶုၼ်လိတ်ႉသဝီႇၶဝ်ၼႆႉ ယုမ်ႇယမ်ႁဵတ်းသၢင်ႈၸွမ်း ဢပရိႁႃၼိယတြႃး  (7)ပိူင် ၼၼ်ႉသေ ဝႆႉၸႂ်မႅတ်ႉတႃႇၼိူဝ် သတ်ႉတဝႃႇတင်းလၢႆ မိူၼ်ၼင်ႇလုၵ်ႈလၢင်းၵၢင်တဝ်ႈၸဝ်ႈၵဝ်ႇသေ ဢုပ်ႉဝၢၼ်ႈပွင်မိူင်း ႁိူဝ်ႈႁိူင်းၶိုၼ်ႈယႂ်ႇမႂ်ႇသုင်မႃး ၶဝ်ဢမ်ႇပွႆႇပိုၼ်ႉပွႆႇပႅတ်ႈလူၵ်ႈလေႃးၵလူင် ၵူၼ်းဝၢၼ်ႈၵူၼ်းမိူင်းၶဝ်၊ ႁဵတ်းႁႂ်ႈၶႃႈဝၢၼ်ႈၵူၼ်းမိူင်း မီးတၢင်းႁၢၼ်ႉၸႂ်သေ ယူႇသဝ်းၵႂႃႇမူၼ်ႈမူၼ်ႈသိူဝ်းသိူဝ်း ဢမ်ႇမီးၽူႈၶဵၼ်ၸုမ်းလႂ် ဢဝ်ဢွင်ႇပေႉၶဝ်လႆႈ ၶဝ်တိုၼ်းၽွမ်ႉၽဵင်ႇၵၼ်၊ ဢုပ်ႇဢူဝ်းၵၼ်၊ ၵႄႈၶႆပၼ်ႁႃ၊ ၼပ်ႉယမ်ၵၼ်၊ ပၼ်သုၼ်ႇလႆႈ ၼၢင်းယိင်းၶဝ်၊ ထွမ်ႇသူပ်းဢဝ်ၵႂၢမ်း ၽူႈမီးတၢင်းႁူႉယႂ်ႇ တၢင်းႁၼ်ၼမ်ၶဝ်ၸဝ်ႈၸိူဝ်းၼႆႉယဝ်ႉ။

ၵႃႈၵွၼ်ႇပူၼ်ႉမႃး ယွၼ်ႉႁဝ်းဢမ်ႇတိုဝ်းၵမ်ၸွမ်းထမ်း လွင်ႈဢမ်ႇယူပ်ႈယွမ်း(7)ပိူင် ဢၼ်ဝႃႈၼၼ်ႉႁိုဝ်? ဢမ်ႇၼၼ်ၵေႃႈ ႁဝ်းလူင်လိုမ်းမၼ်းဝႆႉ?။ ၵူၺ်းၵႃႈ ပဵၼ်ႁိုဝ်ၵေႃႈယဝ်ႉ ယွၼ်ႉထမ်း 7 ပိူင်ၼႆႉ ၵွပ်ႈမၼ်း ၸၢင်ႈႁဵတ်းႁႂ်ႈဝၢၼ်ႈမိူင်းၶိုၼ်ႈယႂ်ႇလႄႈ ထုၵ်ႇလီတိုဝ်းၵမ်သေ ႁဵတ်းသၢင်ႈၸွမ်းၵႂႃႇ ၶွၼ်ႈတုမ်ဢဵၼ်ႁႅင်း မိူၼ် ၼင်ႇ ႁႅင်းၸႂ်၊ ႁႅင်းတပ်ႉသိုၵ်း၊ ႁႅင်းၵူၼ်းမိူင်း၊ ႁႅင်းပၺ်ႇၺႃႇ၊ ႁႅင်းငိုၼ်း တႄႇၵႂႃႇ ပေႃးႁႅင်းၸိူဝ်းၼႆႉမႃးႁူမ်ႈ ၵၼ်ၵွၼ်ႇ ၸင်ႇတေပဵၼ်ႁႅင်းတႃႇႁဝ်းတေၽွမ်ႉၵၼ်ဢဝ်လွင်ႈလွတ်ႈလႅဝ်း ပူၵ်းပွင်ဝၢၼ်ႈမိူင်းႁဝ်းၶိုၼ်ႈယႂ်ႇၵႂႃႇ။

 တႃႇႁႅင်းၸိူဝ်းၼႆႉ ပေႃးတေမႃးၽွမ်ႉၵၼ်ၼၼ်ႉ မူႇၼိုင်ႈၸုမ်းၼိုင်ႈၵေႃႈလီ ၽူႈဢွၼ်ႁူဝ်ၼႂ်းမူႇၸုမ်းၵေႃႈလီ တေလႆႈၵႆႉၵႆႉဢုပ်ႇဢူဝ်းၵၼ်၊ လႅၵ်ႈလၢႆႈတၢင်းႁူႉၵၼ်၊ သၢင်ႈလွင်ႈယုမ်ႇယမ်ၵၼ်၊ ႁူမ်ႈၵၼ်ၵႄႈၶႆပၼ်ႁႃ၊ ႁူမ်ႈ ၵၼ်ႁႂ်ႈပဵၼ်ၼမ်ႉၼိုင်ႈၸႂ်လဵဝ်ၼႆတႄႉ လွင်ႈၶိုၼ်ႈယႂ်ႇမႂ်ႇသုင်ဢၼ်ဝႃႈၼၼ်ႉ မၼ်းတိုၼ်းတေပဵၼ်မႃးယူႇ ဢမ်ႇႁၢင်ႉယဝ်ႉ။ ထုင်းၵႂၢမ်းတႆးၵေႃႈမီးဝႆႉဝႃႈ “ႁူမ်ႈၵၼ်ၵိၼ်ၸင်ႇဝၢၼ် ႁူမ်ႈၵၼ်ႁၢမ်ၸင်ႇမဝ်”ၼႆၼၼ်ႉ တႃႇတႆးတေၽွမ်ႉႁူမ်ႈၵၼ်ၼၼ်ႉ မၼ်းလမ်ႇလွင်ႈတႄႉတႄႉ မၼ်းထိုင်ၶၢဝ်းယၢမ်းတႆးႁဝ်းလူဝ်ႇၽွမ်ႉၵၼ်ယဝ်ႉ ၼႆ ၶႂ်ႈတိုၵ်းသူၼ်းၼင်ႇၼႆသေ ယွၼ်းၶွတ်ႇယွတ်ႈတီႈၼႆႉၵွၼ်ႇ။

ၼပ်ႉယမ်ထိုင်တင်းသဵင်ႈသေ

ၸၢႆးၸိူင်းဢွၼ်ႇ(ၶႅၵ်ႇ) မိူင်းမိတ်ႈ

ပွင်ၵႂၢမ်း မၢႆတွင်း သၶႁ သဵင်ႈမုၼ်ၶွပ်ႈတဵမ် 13 ပီ