ၵူၼ်းၾင်ႇဝဵင်းမူႇၸေႊ ပႂ်ႉၶဝ်ႈၸေႊၵဝ်ႇၵိုၼ်းတဵမ် ၵူၼ်းမႃးၵိၼ်ၸၢင်ႈၶဝ်ႈထႅဝ်ၵေႃႈၼမ်

ၵူၼ်းမိူင်းၾင်ႇမိူင်းမူႇၸေႊ ၶဝ်ႈထႅဝ်ၵၼ်ပႂ်ႉၶၢမ်ႈလႅၼ်လိၼ် တႃႇၶဝ်ႈဝဵင်းၸေႊၵဝ်ႇ ယၢဝ်းယိူတ်ႈၵိုၼ်းတဵမ်ၵူႈဝၼ်း၊ ထိုင်တီႈမီးၵူၼ်းၵိၼ်ၸၢင်ႈၶဝ်ႈထႅဝ်၊ ၵမ်ႈၽွင်ႈဢဝ်တီႈယူႇဝႆႉတႃႇၶၢႆၶိုၼ်းၵေႃႈမီး ၵူၼ်းပိုၼ်ႉတီႈဢၼ်လူဝ်ႇၶဝ်ႈဢွၵ်ႇတႄႉတႄႉ ၼၼ်ႉယၢပ်ႇၽိုတ်ႇၵိၼ်းၸႂ်။

တင်ႈတႄႇ လူင်ပွင်ၸိုင်ႈၶႄႇ ပိုၼ်ၽၢဝ်ႇ ပိုတ်ႇၽၵ်းတူမိူင်း လႅၼ်လိၼ်တႆး – ၶႄႇ ပဵၼ်တၢင်းၵၢၼ်မႃး မိူဝ်ႈဝၼ်းတီႈ 8/1/2023 ၼၼ်ႉသေ ၵူၼ်းမိူင်းၶဝ်ႈဢွၵ်ႇမိူင်းၶႄႇ မီးၼမ်ၵူႈဝၼ်း။ တီႈၼႃႈ ၽၵ်းတူၸၢင်ႉၽိူၵ်ႇ (ဆင်ဖြူဂိတ်) လႄႈ ၽၵ်းတူႁေႃၶမ်းလူင် (ရွှေနန်းတော်ဂိတ်) ဝဵင်းမူႇၸေႊ လႅၼ်လိၼ်တႆး – ၶႄႇ မီးၵူၼ်းမႃးၶဝ်ႈထႅဝ်ဢဝ်တီႈယူႇဝႆႉ တႃႇပႂ်ႉၶၢႆပၼ်ၶိုၼ်းၵူၼ်းၸိူဝ်းမႃးတူၵ်းလိုၼ်းသေၶႂ်ႈလႆႈတီႈယူႇတၢင်းၼႃႈ တႃႇၸဵဝ်းလႆႈၶၢမ်ႈလႅၼ်လိၼ်ဝႆး ၸိူဝ်းၼၼ်ႉ-ဝႃႈၼႆ။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “တႃႇတေၶဝ်ႈမိူဝ်း ၸေႊၵဝ်ႇ မိူင်းၶႄႇၼၼ်ႉ ႁဝ်းၶႃႈ လႆႈလုၵ်ႉၵၢင်ၼႂ်  2-3 မူင်းၼႆႉသေ ၵႂႃႇၶဝ်ႈထႅဝ်ပႂ်ႉဝႆႉ။ ပေႃးဢမ်ႇၵႂႃႇမွၵ်ႈၶၢဝ်းၼၼ်ႉ ဢမ်ႇလႆႈတီႈယူႇ။ တေလႆႈၵႂႃႇယူႇတၢင်းလင် ၵႆၵႆပူၼ်ႉ ၶႃႈဢေႃႈ။ ထႅဝ်မၼ်းယၢဝ်းၼႃႇၶႃႈ။ ယွၼ်ႉမီးၵူၼ်းႁဵတ်းၵိၼ် ဢဝ်ရူတ်ႉထိပ်ႇ၊ ရူတ်ႉၶိူင်ႈၶဝ် ၸိူဝ်းၼႆႉ ၵႂႃႇၶဝ်ႈထႅဝ် ဢဝ်တီႈယူႇဝႆႉဢေႃႈ။သင်ဝႃႈ ႁဝ်းၶႃႈ ၵႂႃႇလႄႈ ဢမ်ႇလႆႈတီႈၸိုင် ၵႃႈလႆႈသိုဝ်ႉ ၶိုၼ်းတီႈၶဝ်ဢေႃႈ။ ပေႃးၶႂ်ႈလႆႈတီႈၸမ်ၽၵ်းတူၸိုင် လႆႈသိုဝ်ႉၼိုင်ႈတီႈ 2 – 3 မိုၼ်ႇပျႃး တေႃႇ ၵေႃႉ၊ ပေႃးဢမ်ႇၸမ်ဢမ်ႇၵႆ ၽၵ်းတူသမ်ႉ 15,000 ပျႃး။ သင်ဝႃႈ ၵႆၽၵ်းတူဢိတ်းၼိုင်ႈၸိုင် လႆႈသိုဝ်ႉ 10,000 ပျႃးၸိူဝ်းၼႆႉ”- ဝႃႈၼႆ။

ၸိူင်ႉၼႆလႄႈ ၵမ်ႈၽွင်ႈပေႃးလႆႈၵႂႃႇၼွၼ်းပႂ်ႉၶဝ်ႈထႅဝ် ၵေႃႈမီး။ ၵူၼ်းပိုၼ်ႉတီႈတႄႉ ၵႂႃႇၸေႊၵဝ်ႇ တႃႇသိုဝ်ႉၶူဝ်းၵုၼ်ႇယွႆႈ တႃႇမႃးၶၢႆၶိုၼ်း၊ ၸဵမ်ၶူဝ်းၵုၼ်ႇဢၼ်ဢွၵ်ႇမိူင်းၶႄႇလႄႈမိူင်းထႆး မိူၼ်ၼင်ႇ လႅၼ်းယႃႈ ၊ ပႃႁႅင်ႈ ၶူဝ်းၶွင်ၵိၼ်ယမ်ႉၸိူဝ်းၼႆႉ ။

မၢင်ၸိူဝ်း ပေႃးတၼ်းၸဝ်ႉ ၵႂႃႇလႆႈဢွင်ႈတီႈႁိမ်းၽၵ်းတူလႅၼ်လိၼ်ၸိုင် – ၼိုင်ႈဝၼ်းလႂ် တၼ်းၶဝ်ႈဢွၵ်ႇ မိူင်းၶႄႇ 2 ပွၵ်ႈ ၸိူဝ်း ၼႆႉၵေႃႈ မီး။

“ၵူၼ်းႁဵတ်းၵိၼ်ၼႆႉ မၼ်းၵေႃႈ လိူဝ်ၸႂ်ႁႅင်းၼႃႇၶႃႈဢေႃႈ။ တူဝ်ၶဝ် ဢမ်ႇၵႂႃႇပႂ်ႉ ဢဝ်ရူတ်ႉၶိူင်ႇ ရူတ်ႉထိပ်ႇ ၸိူဝ်းၼႆသေ ၵႂႃႇၶပ်ႉဝႆႉ။ ၼိုင်ႈၵေႃႉလႆႈပဵၼ် 2-3 တီႈ။ တႃႇၶၢႆၵိၼ် ဢွင်ႈတီႈဢၼ်ၶဝ်ၵႂႃႇဢဝ်ဝႆႉၼၼ်ႉ။ ဢမ်ႇၸၢင်ႈဝႃႈၵၼ်ယဝ်ႉ ၵၢၼ်ႁႃၵိၼ်ၽႂ် ၵၢၼ်ႁႃၵိၼ်မၼ်းၼႃႇၼေႃ။ ၵွပ်ႈသင်လႄႈ တၢင်းမိူင်းတႆးၼႆႉ လႆႈၶဝ်ႈထႅဝ်ယၢဝ်း ယွၼ်ႉဝႃႈ တီႈ ၵဵၵ်ႉၽၵ်းတူမိူင်းၶႄႇၼၼ်ႉ ၵေႃႈ ၶဝ်ၵူတ်ႇထတ်းႁႅင်း၊ ၶဝ်ၵူဝ်ပိူၼ်ႈဢဝ်ၶူဝ်းၶွင်ၽိတ်းမၢႆမီႈၶဝ်ႈၼႂ်းမိူင်းၶဝ်ယူဝ်ႉ။ တီႈ ၽၵ်းတူ မိူင်းတႆးၼႆႉတႄႉ မွင်းပၼ် ငိုၼ်း၊ တွၵ်ႇၸုမ်ႈၵေႃႈ ၵႂႃႇလႆႈယဝ်ႉ”- ၵူၼ်းပိုၼ်ႉတီႈ ဝဵင်းမူႇၸေႊ သိုပ်ႇလၢတ်ႈ ၼႄၼင်ႇၼႆ။

ဢိင်ၼိူဝ်မီးလွင်ႈဢဝ်ရူတ်ႉထိပ်ႇၶူဝ်းၶွင်မႃးတႅၼ်းတၢင်ၵူၼ်း ဢဝ်တီႈယူႇၶဝ်ႈထႅဝ်ဝႆႉယၢဝ်း ၵူၼ်းပိုၼ်ႉတီႈဢၼ်လူဝ်ႇၶဝ်ႈဢွၵ်ႇ ႁိပ်ႈၼႅတ်ႈတႄႉတႄႉၼၼ်ႉသမ်ႉ ပဵၼ်တၢင်းယၢပ်ႇၽိုတ်ႇလႄႈ မိူဝ်ႈ ဝၼ်းတီႈ 6/4/2023 ယၢမ်း ၵၢင်ၶိုၼ်း ၵူၼ်းမိူင်းပိုၼ်ႉတီႈ ၊ ပျီႇတူႉၸိတ်ႉ ဢိၵ်ႇပႃးတင်းသိုၵ်းမၢၼ်ႈၵမ်ႈၽွင်ႈ ၵႂႃႇၽဵဝ်ႈပႅတ်ႈရူတ်ႉထိပ်ႇ ရူတ်ႉၶိူင်ႈလႄႈၶူဝ်းၶွင်ၸိူဝ်းၶဝ်ႈထႅဝ်ဝႆႉၼၼ်ႉယူႇ ၵူၼ်းပိုၼ်ႉတီႈလၢတ်ႈၼင်ႇၼႆ။

ၽၵ်းတူလူင် လႅၼ်လိၼ်တႆး – ၶႄႇ ၼႆႉ ပိုတ်ႇယၢမ်းၵၢင်ၼႂ် 6:30 မူင်း တေႃႇထိုင် 8:00 မူင်းၵၢင်ၶမ်ႈ။ တီႈၽၵ်းတူၵၢတ်ႇၸၢင်ႉၽိူၵ်ႇၼၼ်ႉ ပၼ် ၵူၼ်း၊ ရူတ်ႉၶိူင်ႈလႄႈ ၵႃးဢွၼ်ႇ (သုၼ်ႇတူဝ်) ၶဝ်ႈဢွၵ်ႇၶၢမ်ႈလႅၼ်လိၼ်။ တီႈၽၵ်းတူလူင် (သူၺ်ႇၼၢၼ်းတေႃႇ) ၼၼ်ႉတႄႉ ၵူၼ်းၵူၺ်းၶဝ်ႈဢွၵ်ႇလႆႈ၊ ရူတ်ႉၵႃး ရူတ်ႉၶိူင်ႈ ဢမ်ႇပၼ်ၶဝ်ႈဢွၵ်ႇ ။

ယၢမ်းလဵဝ် သင်ၽႂ်ပႆႇမီးပပ်ႉလႅင် တႃႇၶဝ်ႈဢွၵ်ႇ ၸွမ်းလႅၼ်လိၼ်တႆး – ၶႄႇ ၼႆၸိုင် ပေႃးၵႂႃႇႁဵတ်းႁင်းၵူၺ်း 1 ၵေႃႉ လႆႈပၼ် 1 မိုၼ်ႇပျႃး။ ပေႃးၸၢင်ႈပိူၼ်ႈၵႂႃႇႁဵတ်းပၼ်သမ်ႉ 1 ၵေႃႉ လႆႈပၼ် 2-3 မိုၼ်ႇ ၼႆယဝ်ႉ။

ၽၵ်းတူလႅၼ်လိၼ်တႆး – ၶႄႇၼႆႉ ပိၵ်ႉဢိုတ်းမႃး ၶၢဝ်းတၢင်းၸမ် 3 ပီ တႄႇဢဝ် ဝၼ်းတီႈ 1/4/2020 တေႃႇထိုင် 8/1/2023 ၼႆႉ လူင်ပွင်ၸိုင်ႈၶႄႇ ပိုၼ်ၽၢဝ်ႇ ပိုတ်ႇၶိုၼ်းပဵၼ် တၢင်းၵၢၼ်။ ယွၼ်ႉတၢင်းပဵၼ်ၶူဝ်ႊဝိတ်ႉ 19 လမ်းႁႅင်း လႆႈပိၵ်ႉဢိုတ်းမႃး ၼႆယဝ်ႉ။