ပၢင်ပွႆးသူင်ႇသင်ႇပီၵဝ်ႇ ႁပ်ႉတွၼ်ႈပီမႂ်ႇတႆး 2117 ၼီႈ တီႈဝဵင်းႁူဝ်မိူင်း လႅၼ်လိၼ်တႆး – ထႆး ၸတ်းႁဵတ်းပႃးပၢင်တေႃႇလွင်း မီးၵူၼ်းၶဝ်ႈႁူမ်ႈ ၵိုၼ်းၶွၼ်ႈ ။

ႁၢင်လိူၼ်ၼူဝ်ႊဝႅမ်ႊပိူဝ်ႊ 2022 ၼႆႉ တီႈဝဵင်းႁူဝ်မိူင်း ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း ၼႃႈတီႈၵုမ်းၵမ် ပျီႇတူႉ ၸိတ်ႉ S3 တူဝ် ဢၼ်မႁႃႇၵျႃႇ ဢွၼ်ႁူဝ်ဝႆႉၼၼ်ႉ ၸတ်းပၢင်ပွႆးႁူမ်ၸူမ်းႁပ်ႉတွၼ်ႈပီမႂ်ႇတႆး 2117 ၼီႈ။ ပၼ်ၶႂၢင်ႉ ၸတ်း ပႃးပၢင်တေႃႇလွင်းယႂ်ႇလူင်   မီးပႃးၸၢတ်ႈသႅင်းတႆး ပၢၼ်ၵဝ်ႇ ၸိူဝ်းၼႆႉလူးၵွၼ်ႇဝႃႈၼႆ။

ၵူၼ်းဝဵင်းႁူဝ်မိူင်း လၢတ်ႈတီႈၽူႈတွႆႇႁွၵ်ႈဝႃႈ – “မၼ်းပဵၼ် ပိုၼ်ႉတီႈၶွင်သိုၵ်းပျီႇတူႉၸိတ်ႉ S3 တူဝ်ၵုမ်းၵမ်ၼႃႇ ၼေႃ။ ၵွၼ်ႇတေပဵၼ်ပွႆးပီမႂ်ႇတႆးၼႆႉ ၶဝ်ဢဝ်ၸၢတ်ႈတႆးၼွင်မွၼ် မႃးၵႃႈ ဢွၼ်တၢင်း ။ ထိုင်မႃးပွႆးပီမႂ်ႇတႆးယဝ်ႉ ဢဝ်တိုဝ်ႉ တၢင်းၼႆႉသေ ပိုတ်ႇပႃးပၢင်တေႃႇလွင်းမႃး။ ၵူၼ်းၵႂႃႇတေႃႇလဵၼ်ႈ   ၵိုၼ်းၼမ်တႄႉၶႃႈ ဢမ်ႇဝႃႈၵၢင်ဝၼ်းၵၢင်ၶမ်ႈ။ ပၢင်တေႃႇလွင်းၵေႃႈ မီးၸေးၼႃႇၶႃႈ။ ယွၼ်ႉပဵၼ်ၼႂ်းပိုၼ်ႉတီႈၶဝ် ထၢင်ႇႁၢင်ႁဵတ်းထၢင်ႇႁၢင်ပိုတ်ႇၼၼ်ႉၶႃႈယဝ်ႉ။ လႆႈငိၼ်းဝႆႉ တႄႉ တေၸတ်းႁဵတ်းတႃႇၶၢဝ်းတၢင်း ၼိုင်ႈလိူၼ် တႄႇဢဝ်လိူၼ်ၸဵင်မႂ်ႇ တေႃႇထိုင် လိူၼ်ၵမ်မႂ်ႇၼႆၶႃႈဢေႃႈ”- ဝႃႈၼႆ။

ဢိင်ၼိူဝ် လွင်ႈပၢင်ပွႆးၾိင်ႈႁိတ်ႈႁွႆးတႆး ၵိုၵ်းပိုၼ်းမႃး ပီယၢဝ်းၶၢဝ်းႁိုင်ၼႆႉသေ ယူႇတီႈ ၵူၼ်းမိူင်းပိုၼ်ႉတီႈတႄႉ ႁၼ်ထိုင်ဝႃႈ ဢမ်ႇၵိုင်ႇလီ ဢဝ်တိုဝ်ႉတၢင်းပွႆးၼႆႉသေ ၸတ်းႁဵတ်းပႃးပၢင်တေႃႇလွင်း။

“ယူႇတီႈႁဝ်းၶႃႈ ၵူၼ်းမိူင်းတႄႉ ဢမ်ႇႁၼ်လီၶႃႈ ႁဵတ်းသင်လႄႈဝႃႈၸိူင်ႉၼႆ ယွၼ်ႉမၼ်းပဵၼ်ပွႆးၾိင်ႈငႄႈၾိင်ႈထုင်း ႁဝ်း ဢၼ်မီးမႃးၸဵမ်မိူဝ်ႈပၢၼ်ပူႇမွၼ်ႇႁဝ်းၶႃႈလႄႈ ၵူၺ်းၵႃႈ သမ်ႉဢဝ်တိုဝ်ႉတၢင်းလွင်ႈပွႆးလၢမ်းၼႆႉသေ ၸတ်းႁဵတ်းပႃးပၢင် တေႃႇလွင်းၸိူင်ႉၼႆၼႆႉ ဢမ်ႇၵိုင်ႇလီပဵၼ်သေဢိတ်းၶႃႈ”- ၵူၼ်းပိုၼ်ႉတီႈ ဝဵင်းႁူဝ်မိူင်း သိုပ်ႇလၢတ်ႈၼင်ႇၼႆ။

ၵဵဝ်ႇၵပ်းလွင်ႈၼႆႉ ၵူၼ်းမိူင်းပိုၼ်ႉတီႈတႄႉ မႆႈၸႂ်မီးမႃးပၼ်ႁႃ ၼႃႈႁိူၼ်းလူႉ၊ ၽူႈလၵ်ႉၵူၼ်းၸူၼ် တေလိူင်ႇၼမ်လႄႈ လွင်ႈ ႁူမ်ႇလူမ်ႈ ၵူၼ်းမိူင်း ၸိူဝ်းၼႆႉၵေႃႈ တေဢမ်ႇမီး ဝႃႈၼႆ။

ၽူႈယိင်း ၼႂ်းပိုၼ်ႉတီႈ ဝဵင်းႁူဝ်မိူင်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“ပေႃးမီးပၢင်တေႃႇလွင်းမႃးယဝ်ႉၼႆ မၼ်းႁဵတ်းႁႂ်ႈ ၵူၼ်းၵႂႃႇတေႃႇလွင်းၼႆႉ မီးပၼ်ႁႃမႃးၼမ် ၵမ်းလိုၼ်းမႃး ၼႃႈႁိူၼ်းၵေႃႈ ၽိတ်းမေႃးၵၼ် ၽူႈလၵ်ႉၵူၼ်းၸူၼ်ၵေႃႈ ၼမ်မႃး။ ပေႃးပဵၼ်ၸိူင်ႉၼႆမႃး ဢမ်ႇမီးၽႂ်ဢဝ်ပုၼ်ႈၽွၼ်း ႁဵတ်းႁႂ်ႈဢၵျၢင်ႉတၢင်းယၢမ်ႈၵူၼ်းၵေႃႈတေလူႉ ပေႃးပဵၼ်လႆႈတႄႉ ဢမ်ႇ ထုၵ်ႇလီႁဵတ်းၶႃႈ”- ဝႃႈၼႆ။

လွင်ႈၼႆႉ ၾၢႆႇတၢင်းၽူႈတွႆႇႁွၵ်ႈ တိတ်းတေႃႇၸူးတၢင်းၸုမ်း S3 တူဝ် တႃႇတွင်ႈထၢမ်လွင်ႈၼႆႉၵေႃႈ တိတ်းတေႃႇဢမ်ႇလႆႈ။ 

ၼွၵ်ႈလိူဝ်ၼၼ်ႉ ပွႆးႁပ်ႉတွၼ်ႈပီမႂ်ႇတႆး တီႈဝၢၼ်ႈၵုင်းသႃႇ ဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇၵေႃႈ မီးပႃးပၢင်တေႃႇလွင်း ၵူၼ်း မိူင်း ဢမ်ႇႁၢၼ်ႉၸႂ် ပွႆးၾိင်ႈႁိတ်ႈႁွႆးတႆးၼႆႉ ဢမ်ႇၵိုင်ႇလီၸတ်းႁဵတ်းပႃး ပၢင်တေႃႇလွင်း ဝႃႈၼႆ။

ပၢင်ပွႆးႁူမ်ၸူမ်းႁပ်ႉတွၼ်ႈပီမႂ်ႇတႆး 2117 ၼီႈ တီႈဝဵင်းၵျွၵ်ႉမႄးၼႆႉ ၸတ်းႁဵတ်း တင်ႈတႄႇဝၼ်းတီႈ 24-28/11/2022 တႃႇ ၶၢဝ်းတၢင်း 5 ဝၼ်း။ တႃႇတေပဵၼ်မႃးပွႆးပီမႂ်ႇတႆးၼႆႉ ယူႇတီႈၵေႃလိၵ်ႈလၢႆးလႄႈ ၾိင်ႈငႄႈတႆး ၸႄႈဝဵင်းပၼ်ၶႂၢင်ႉၸတ်းႁဵတ်း သေတႃႉ ၵူၺ်းၵႃႈ လွင်ႈပိုတ်ႇပၢင်တေႃႇလွင်းၼႆႉတႄႉ ဢမ်ႇလႆႈပၼ်ၶႂၢင်ႉၸတ်း။ လိူဝ်ၼၼ်ႉ ႁူဝ်ပဝ်ႈ ၵေႃလိၵ်ႈလၢႆးဝႃႈ လွင်ႈ ပၢင်တေႃႇလွင်းၼႆႉ ႁဵတ်းႁႂ်ႈတၢင်းယၢမ်ႈၵူၼ်းၼုမ်ႇလူႉလႄႈ ဢမ်ႇထုၵ်ႇလီမီးၼႆ ထႅင်ႈလူးၵွၼ်ႇ။

ပၢင်တေႃႇလွင်း တီႈဝၢၼ်ႈၵုင်းသႃႇၼႆႉ ယူႇတီႈဢူးဝိၼ်းထုၼ်း ဝၢၼ်ႈတွင်ၼဝ်ႈ ဢွၼ်ႁူဝ်ပိုတ်ႇ မၼ်းၸၢႆးၼႆႉ ၶဝ်ႈၸူး ႁွင်ႈ ၵၢၼ်လူင်ပွင်ၸိုင်ႈမၢၼ်ႈ ဢိၵ်ႇပႃး ၸုမ်းယိပ်းၵွင်ႈၵၢင်ႇၼႂ်းပိုၼ်ႉတီႈသေ သႂၢင်းၶွၼ်ႇပိုတ်ႇပၢင်တေႃႇလွင်းယႂ်ႇလူင် ၵူၼ်းပိုၼ်ႉ တီႈၵေႃႉၼိုင်ႈ လၢတ်ႈၼင်ႇၼႆ။

ၼႂ်းမိူင်းတႆးၼႆႉ ၸူဝ်ႈသိုၵ်းမၢၼ်ႈယိုတ်းမိူင်းမႃးၼႆႉ ပၢင်တေႃႇလွင်းၶႂ်ႈဝႃႈမီးၵူႈတီႈၵူႈဝဵင်း။ ပဵၼ်သိုၵ်းမၢၼ်ႈပလိၵ်ႈမၢၼ်ႈ ၸဝ်ႈၸႄႈဝဵင်းၶဝ်ႁူမ်ႈမိုဝ်းၵၼ်တင်းၸဝ်ႈငိုၼ်းသႃးသေပၼ်ၶႂၢင်ႉပိုတ်ႇပၢင်လွင်း ။ ၾၢႆႇၼိုင်ႈၵၢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႈလႄႈၵူၼ်းမိူင်းမုင်ႈမွင်းၶႂ်ႈလႆႈငိုၼ်းသေဢွၼ်ၵၼ်ၵႂႃႇလဵၼ်ႈ။ ႁဵတ်းႁႂ်ႈၽူႈလၵ်ႉၵူၼ်းၸူၼ်လိူင်ႇၼမ် ။ၵူၼ်းမိူင်းဢမ်ႇမီးလွင်ႈႁူမ်ႇလူမ်ႈ။ မၢင်တီႈယင်းပၢႆဝႃႈတႃႇငိုၼ်းၶဝ်ႈဝတ်ႉၶဝ်ႈဝႃးၼႆသေဢမ်ႇပၼ်ဢွၵ်ႇၶၢဝ်ႇၵေႃႈမီးတင်းၼမ်။

ယွၼ်ႉပိူဝ်ႈပၢင်တေႃႇလွင်းသေ တီႈဝဵင်းၵျွၵ်ႉမႄးၼႆႉ လုၵ်ႈၶႃႈႁႅမ်ပေႃႈတၢႆၵေႃႈယၢမ်းမီးမႃးယဝ်ႉ။