ႁႅင်းၵၢၼ်မိူင်းႁူမ်ႈတုမ် ၸိူဝ်းၵႂႃႇႁဵတ်းၵၢၼ် မိူင်းၶႄႇ ပဵၼ်တၢင်းၵၢၼ်ၼၼ်ႉ ၺႃးပလိၵ်ႈၶႄႇ တီႉၺွပ်း ပေႃႉထုပ်ႉ ယဵတ်ႈၶွၵ်ႈသေ သူင်ႇပွၵ်ႈမႃးတၢင်းမူႇၸေႊ။

ဝၼ်းတီႈ 12/4/2020 ပလိၵ်ႈၶႄႇ ဢဝ် ႁႅင်းၵၢၼ်မိူင်းႁူမ်ႈတုမ် 26 ၵေႃႉ ဢၼ်တီႉဝႆႉ တီႈမိူင်းမၢဝ်းလႄႈ ၸေႊၵဝ်ႇၼၼ်ႉ သူင်ႇပၼ်ၶိုၼ်း ၾင်ႇမိူင်းႁူမ်ႈတုမ် တၢင်းသဵၼ်ႈတႃႈႁိူဝ်း။ ဢမ်ႇမွပ်ႈပၼ်တီႈၸဝ်ႈၼႃႈတီႈပဵၼ်တၢင်းၵၢၼ် ဝႃႈၼႆ။

ၵဵဝ်ႇလူၺ်ႈလွင်ႈၼႆႉ ယူႇတီႈၸုမ်းၸွႆႈထႅမ် ၵရုၼႃႇ မူႇၸေႊ လႆႈၵႂႃႇႁပ်ႉဢဝ်မႃး ဝႃႈၼႆ။

ဢူးတွင်းထုၼ်း ၸုမ်း ၵရုၼႃႇ မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ တင်းမူတ်း ထုၵ်ႇသူင်ႇပွၵ်ႈမႃး 26 ၵေႃႉ ပဵၼ်ႁႅင်းၵၢၼ် ၸိူဝ်းယိပ်းပပ်ႉသီလႅင် ပဵၼ်တၢင်းၵၢၼ်မူတ်း ။ ၼႂ်းၼၼ်ႉ ပႃးတင်းၵူၼ်းၸပ်းတွင်ႉပႃးၽွင်ႈ။ ၸိူဝ်းၶဝ်လၢတ်ႈဝႃႈ ပလိၵ်ႈၶႄႇ ပေႃႉထုပ်ႉ ပိတ်ႉပၢပ်းၶဝ်။ ယင်းပၢႆယိုတ်းဝႆႉပပ်ႉၶၢမ်ႈမိူင်း(သီလႅင်) ၶဝ်သေ ဢမ်ႇလဵင်ႉၶဝ်ႈၼမ်ႉတၢင်းၵိၼ်ၶဝ်သင်ၼႆလူးၵွၼ်ႇ” ဝႃႈၼႆ။

ႁႅင်းၵၢၼ် မိူင်းႁူမ်ႈတုမ် 26 ၵေႃႉ ဢမ်ႇလႆႈထုၵ်ႇသူင်ႇၶဝ်ႈမႃးတၢင်းမူႇၸေႊ ပဵၼ်တၢင်းၵၢၼ်ၼၼ်ႉ လႆႈထုၵ်ႇယဵတ်ႈၶွၵ်ႈတီႈ ၸေႊၵဝ်ႇ မၢင်ၵေႃႈလႆႈတူၵ်းၶွၵ်ႈ မွၵ်ႈ 1 ဝူင်ႈၵေႃႈမီး၊ 3 ဝၼ်းၵေႃႈမီး၊ 1 ဝၼ်းၵေႃႈမီး ဝႃႈၼႆ။

ဢူးတွင်းထုၼ်း လၢတ်ႈဝႃႈ “ မိူဝ်ႈၽွင်းၶဝ်တူၵ်းၶွၵ်ႈၼၼ်ႉ ပလိၵ်ႈၶႄႇဢမ်ႇလဵင်ႉၶဝ်ႈၶဝ်။ ပေႃးပဵၼ်ၵူၼ်းၶႄႇၶဝ်တႄႉ ၶဝ်လဵင်ႉ။ ယဝ်ႉၵေႃႈ ပေႃႉထုပ်ႉၶဝ်ႁၢဝ်ႈႁႅင်း။ ၼၢင်းယိင်းပႃးတွင်ႉၵေႃႈၺႃးထုပ်ႉ။ ၾၢႆႇၼိုင်ႈၵေႃႈ ႁႅင်းၵၢၼ်ၸိူဝ်းၼႆႉ ၶဝ်ႈၵႂႃႇႁဵတ်းၵၢၼ် ပဵၼ်တၢင်းၵၢၼ် ၶဝ်ၸိူဝ်းၼၼ်ႉ ထုၵ်ႇလီ သူင်ႇပွၵ်ႈၶဝ်ႈမႃး တၢင်းၽၵ်းတူမိူင်း ပဵၼ်တၢင်းၵၢၼ်ယူႇ လွင်ႈသူင်ႇမႃးတၢင်းတႃႈႁိူဝ်းၼႆႉ မၼ်းဢမ်ႇထုၵ်ႇလီပဵၼ်” ဝႃႈၼႆ။

ႁႅင်းၵၢၼ်မိူင်းႁူမ်ႈတုမ် 26 ၵေႃႉၼႆႉ ယူႇတီႈၸဝ်ႈၼႃႈတီႈ မိူင်းမူႇၸေႊၵဵပ်းသဵၼ်ႈသၢႆ တီႈယူႇၶဝ် ၵူတ်ႇထတ်းပၼ်ပၢႆးယူႇလီၶဝ်သေ ပွႆႇပွၵ်ႈမိူဝ်းဝၢၼ်ႈမိူင်းၽႂ်မၼ်းၶိုၼ်းယဝ်ႉ။ သင်ႇလၢတ်ႈႁႂ်ႈမိူဝ်းၵုမ်းတူဝ်ယူႇႁိူၼ်းၽႂ်ႁိူၼ်းမၼ်း ဝႃႈၼႆ။

တၢင်းပဵၼ်ၶူဝ်ႊဝိတ်ႉ 19 ၼႆႉ တႄႇပဵၼ်မႃး မိူင်းဝူႊႁၢၼ် ၸိုင်ႈမိူင်းၶႄႇမႃးဢွၼ်တၢင်းသေ မိူဝ်ႈၽွင်းၼၼ်ႉ ၽၵ်းတူမိူင်းလႅၼ်လိၼ်တႆး – ၶႄႇၼႆႉ ဢမ်ႇသင်ႇဢိုတ်း။ တေႃႈလဵဝ် တီႈမိူင်းႁူမ်ႈတုမ် မီးၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ 19 ၼႆႉၼမ်မႃးယဝ်ႉလႄႈ ၸဝ်ႈၼႃႈတီႈၾၢႆႇၶႄႇၵေႃႈသင်ႇပိၵ်ႉ/ဢိုတ်း ၽၵ်းတူမိူင်းလႅၼ်လိၼ် တႆး – ၶႄႇ ၵမ်းလဵဝ် တင်ႈတႄႇ ဝၼ်းတီႈ 1/4/2020 မႃး ။

ၸၢႆးၸၢႆး ၵူၼ်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ မိူၼ်ၶဝ်ၶႂ်ႈလိုပ်ႈၵူၼ်းတၢင်းမိူင်းႁူမ်ႈတုမ် ဢၼ်ယူႇဝႆႉတၢင်း ၾင်ႇမိူင်းၶႄႇၼၼ်ႉ ပွၵ်ႈမႃးၵေႃႈၸႂ်ႈ။ ၶဝ်ႁဵတ်းတေႃႇ ၵူၼ်းမိူင်းႁဝ်းၼႆႉ ႁၢင်ႈၸႃႉတႄႉၶႃႈ။ ပွၵ်ႈၼႆႉၵေႃႈ ႁႅင်းၵၢၼ် ၸိူဝ်းၼၼ်ႉ ၵေႃႈ ၶဝ်သူင်ႇမႃးတၢင်းတႃႈႁိူဝ်းၵူၺ်း ၶဝ်ၶႂ်ႈႁဵတ်းၸိူင်ႉႁိုဝ်ႁဵတ်းတေႃႇၵူၼ်းမိူင်းႁူမ်ႈတုမ်ႁဝ်း။ ၶဝ်ဢမ်ႇဝႆႉလွင်ႈယႂ်ႇသင်” ဝႃႈၼႆ။

ၼွၵ်ႈလိူဝ်ၼၼ်ႉ ၵႃးတၢင်ႇၵုၼ်ႇ ဢၼ်လုၵ်ႉတၢင်းမိူင်းႁူမ်ႈတုမ် တေႃႉသူင်ႇၶဝ်ႈၵႂႃႇတၢင်းမိူင်းၶႄႇၼၼ်ႉၵေႃႈ ယူႇတီႈ တၢင်းၾင်ႇ မိူင်းၶႄႇ ဢမ်ႇပၼ်ၵူၼ်းႁေႃႈၵႃးလႄႈ ၵူၼ်းၸွမ်းၵႃးၶဝ်ႈၵႂႃႇၸွမ်း တၢင်းၾင်ႇမိူင်းၶႄႇ။ သူင်ႇၵူၼ်းမိူင်းၶႄႇမႃးႁပ်ႉဢဝ်ရူတ်ႉၵႃးၵုၼ်ႇၶဝ်ႈၵႂႃႇၵႃႉၶၢႆပၼ်လႄႈ ႁဵတ်းႁႂ်ႈ ၸဝ်ႈၵုၼ်ႇ ၸဝ်ႈၵႃးႁူပ်ႉတၢင်းယၢပ်ႇၽိုတ်ႇ ။