သင်ၶၸဝ်ႈ တင်း တၵ်ႉၵႃႇသတ်ႉထႃး ၼႂ်းၸႄႈဝဵင်းၵဵင်းတုင် ၽွမ်ႉသဵင်ပဵင်းပၢၵ်ႇၵၼ်သေ ယုၵ်ႉဢဝ်ၸဝ်ႈ တူၼ်ၶူး ၼၼ်ႇတမေႇထႃႇ ၽူႈၵွၼ်းတိူၵ်ႈသွၼ်လိၵ်ႈထမ်ႇမေႃးတယ ၶိုၼ်ႈပဵၼ်ၽူႈၼင်ႈဝတ်ႉဝိႁၢရ်ထမ်ႇ မေႃးတယ (ၵျွင်းမိူင်းၼၢႆး) ပုတ်ႈတႅၼ်းတီႈ ၸဝ်ႈတူၼ်ၶူးလူင် ၽတ်ႉတၼ်တဢႃၸေယ ဢၽိထၸမႁႃရတ်ႉထၵုရု ဢၼ်လႆႈ ၶဝ်ႈသူၼ် မၢၵ်ႇႁၢၵ်ႈၶမ်းၵႂႃႇၼၼ်ႉ ဝႃႈၼႆ။

ဝၼ်းတီႈ 15/12/2017 ယၢမ်းၵၢင်ၼႂ် 9 မူင်း ထိုင် 11 မူင်း ၵၢင်ဝၼ်း မုၵ်ႉၸုမ်းငဝ်ႈငုၼ်းလူင်သင်ၶၸိုင်ႈတႆး (ပွတ်းဢွၵ်ႇ) ႁူမ်ႈလူၺ်ႈ ပူႇသႅၼ်ထဝ်ႈၵႄႇၵေႃးပၵ ၵေႃမၵၢၼ် ၵူၼ်းဝၢၼ်ႈၵူၼ်းသူၼ် တၵ်ႉၵႃႇသတ်ႉထႃး ႁူဝ်ဝတ်ႉဝိႁၢရ်ထမ်ႇ မေႃးတယ ဢိၵ်ႇပႃးလူၺ်ႈ တၵ်ႉၵႃႇသတ်ႉထႃး တီႈၸမ်/ၵႆ ၽွမ်ႉသဵင်ပဵင်းပၢၵ်ႇလႆႈၸႂ်ၵၼ်သေ ယုၵ်ႉဢဝ် ၸဝ်ႈတူၼ်ၶူးၼၼ်ႇတမေႇထႃႇ ၶိုၼ်ႈပဵၼ်ၽူႈၼင်ႈဝတ်ႉဝိႁၢရ်မိူင်းၼၢႆး တိူၵ်ႈသွၼ်လိၵ်ႈထမ်ႇမေႃးတယ။ ဢွင်ႈတီႈပၢင်ပွႆးထၢပ်ႈၵၢမ်ႇယေႃးမုၼ်လႄႈ ဢၢပ်ႈၵျွင်း/ဝတ်ႉသမ်ႉ ၸတ်းႁဵတ်းတီႈတိူၵ်ႈသွၼ်လိၵ်ႈလူင် ထမ်ႇမေႃး တယ ၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း ဝႃႈၼႆ။

ၸဝ်ႈၶူးၵုလိသ ဝတ်ႉၵၢတ်ႇတဝ်ႇ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ဝၢႆးၸဝ်ႈတူၼ်ၶူးလူင်ႁဝ်း ဢႃၸေယ ၶဝ်ႈ သူၼ်မၢၵ်ႇႁၢၵ်ႈၶမ်းၵႂႃႇယဝ်ႉၼၼ်ႉ ၸိူဝ်းႁဝ်းၸုမ်းသင်ၶၸဝ်ႈ တင်း တၵ်ႉၵႃႇသတ်ႉထႃး ဢုပ်ႇၵုမ်ၵၼ် လႆႈၸႂ်တူၵ်း လူင်း ၽွမ်ႉသဵင်ပဵင်းပၢၵ်ႇၵၼ်သေ ၸင်ႇယုၵ်ႉဢဝ် ၸဝ်ႈၶူးလူင်ႁဝ်းၶႃႈ ၼၼ်ႇတမေႇထႃႇ ၶိုၼ်ႈပဵၼ်ၸဝ်ႈတူၼ် ၽူႈၼင်ႈဝတ်ႉဝိႁၢရ်မိူင်းၼၢႆး တိူၵ်ႈသွၼ်လိၵ်ႈထမ်ႇမေႃးတယ ယဝ်ႉၵေႃႈ ႁႂ်ႈပဵၼ်ၽူႈဢွၼ်ႁူဝ်ၼမ်းၼႃႈ တိူၵ်ႈသွၼ်လိၵ်ႈလူင်ထမ်မေႃးတယၵႂႃႇ ဝၼ်းတႃမိူဝ်းၼႃႈၼႆလႄႈ ႁဝ်းၶႃႈတင်းမူတ်း ၸင်ႇဢွၼ်ၵၼ်ထၢပ်ႈၵၢမ်ႇ ယေႃးမုၼ်လႄႈ ဢၢပ်ႈၵျွင်းပၼ် ၸဝ်ႈႁဝ်းၶႃႈၵႂႃႇ” ဝႃႈၼႆ။

ၸဝ်ႈတူၼ်ၶူးလူင် ဝိၸေယ ၽူႈၵွၼ်းပၢႆး(ၵႅင်းၶျူၵ်ႉ) ငဝ်ႈငုၼ်းမုၵ်ႉၸုမ်းသင်ၶတႆး ပွတ်းဢွၵ်ႇ လူင်းလၢႆးမိုဝ်း မွပ်ႈပၼ် ၸဝ်ႈတူၼ်ၶူး ၼၼ်ႇတမေႇထႃႇ ယုၵ်ႉယွင်ႈ ၶိုၼ်ႈပဵၼ်ၽူႈၼင်ႈဝတ်ႉ/ၵွၼ်းဝတ်ႉ တိူၵ်ႈသွၼ်လိၵ်ႈ ထမ်ႇမေႃးတယ ဝတ်ႉဝိႁၢရ်မိူင်းၼၢႆး ၸႄႈဝဵင်းၵဵင်းတုင် ပဵၼ်တၢင်းၵၢၼ်” ဝႃႈၼႆ။

ပိုၼ်းၵႅပ်ႈ ၸဝ်ႈၶူးၼၼ်ႇတမေႇထႃႇ –

ၸိုဝ်ႈ – ၸဝ်ႈၶူးၼၼ်ႇတမေႇထႃႇ၊

ၸိုဝ်ႈမိူဝ်ႈလဵၵ်ႉ – ၸၢႆးလူင်းတိပ်ႉ၊

ပီၵိူတ်ႇ – ဝၼ်းတီႈ 19/09/1960 ပီၵေႃးၸႃႇ 1322 ၶု လိူၼ်သိပ်းလပ်း၊

ၸႃတိတီႈၵိူတ်ႇ- ဝၢၼ်ႈၶႃး၊

တီႈယူႇ – ဝၢၼ်ႈပူင် ဢိူင်ႇဝတ်ႉသၢဝ်း ၸႄႈဝဵင်းၵဵင်းတုင်၊

ၸိုဝ်ႈပေႃႈမႄႈ – လုင်းသႅင်-ပႃႈၶွင်ႇ၊

ပီႈၼွင်ႉ – မီးပီႈၼွင်ႉႁူမ်ႈတွင်ႉၵၼ် (5) ၵေႃႉ၊ ၸဝ်ႈပဵၼ်ၵေႃႉတီႈ (4)၊

ၶိုၼ်ႈပဵၼ်ၸဝ်ႈသၢင်ႇ – မိူဝ်ႈပီ 1970 လိူၼ်ဢေႊပရိူဝ်ႊ တီႈဝတ်ႉဝၢၼ်ႈပူင်ႇ ဢိူင်ႇဝတ်ႉသၢဝ်း ဝဵင်းၵဵင်းတုင်။

ၶိုၼ်ႈပဵၼ်ၸၢင်း – မိူဝ်ႈပီ 1980 လိူၼ်မေႊ တီႈဝတ်ႉထမ်ႇမေႃးတယ ဝဵင်းၵဵင်းတုင်။

ပီ 1972 ဢွၵ်ႇႁဵၼ်းႁႃတၢင်းႁူႉ တမ်ႈတီႈ ဝတ်ႉဝၢၼ်ႈပူင်ႇ၊ ဝတ်ႉလၢႆႇၵၢင်ႇ၊ ဝတ်ႉၵၢတ်ႇတဝ်ႇ၊ တိူၵ်ႈသွၼ်လိၵ်ႈလူင် ထမ်ႇမေႃးတယ ၵဵင်းတုင်၊ ၵၢၼ်ႇၵျီး ယွင်ႁူၺ်ႈ၊ တိူၵ်ႈသွၼ်လိၵ်ႈပႃလိတႅၵ်ႉၵသူဝ်ႇ မၢၼ်ႇတႅင်ႇလႄႈ ဢိၵ်ႇထႅင်ႈ လၢႆလၢႆတီႈ။ ယဝ်ႉၸၼ်ႉႁဵၼ်း ပထမၵျီး ၼႂ်းမိူင်းမၢၼ်ႈ။

ပီ 1993 သိုပ်ႇၵႂႃႇႁဵၼ်းလိၵ်ႈထႅင်ႈ တီႈမိူင်းသီႇႁူဝ်ႇ/ သီႇရိလင်းၵႃ မိူင်းဢိၼ်းတီးယိူဝ်း လႆႈႁပ်ႉၸုမ်ႈၶူး B.A (Bachelar Of Arts) and M.A (Master Of Arts) ၸဵမ်ၸိူဝ်းၼႆႉ။

ၶၢဝ်းတၢင်းပိုၼ်ၽႄႈၼႃႈၵၢၼ်သႃသၼႃ ၼႂ်းမိူင်း/ ၼွၵ်ႈမိူင်း – တႄႇဢဝ် ပီ 1998-2017 ၶၢဝ်းတၢင်း 19 ပီ တေႃႇထိုင်ယၢမ်းလဵဝ်။

ၶၢဝ်းတၢင်းပိုၼ်ၽႄႈၼႃႈၵၢၼ်ၼွၵ်ႈမိူင်းသမ်ႉ – မိူင်းဢမေႊရိၵၼ်ႊ၊ မိူင်းၾရင်ႇသိတ်ႇ၊ ၵျိူဝ်ႊမၼ်ႊ၊ ဢီႊတလီႊ၊ မိူင်းဢေႃႊသတြေႊလီႊယိူဝ်ႊ၊ မိူင်းသဝိတ်သိူဝ်လႅၼ်ႊ၊ မိူင်းသပဵၼ်ႇ၊ မိူင်းၵူဝ်းရီးယိူဝ်းၸၢၼ်း၊ သိင်ႊၵပူဝ်ႊ၊ ႁွင်ႊၵွင်ႊ၊ ထၢႆႇဝၼ်ႇ၊ မၵႃႊဢူဝ်ႊ၊ ၼိဝ်ႊသီႊလႅၼ်ႊ၊ မိူင်းဢိၼ်ႊၻီႊယိူဝ်ႊလႄႈ ဢိၵ်ႇထႅင်ႈလၢႆလၢႆမိူင်း။

တေႃႈလဵဝ် ႁပ်ႉပုၼ်ႈၽွၼ်း ပဵၼ်ၽူႈၵွၼ်းတိူၵ်ႈသွၼ်လိၵ်ႈလူင် ထမ်ႇမေႃးတယ(ဝတ်ႉဝိႁၢရ်မိူင်းၼၢႆး) သေဢမ်ႇၵႃး ၶိုၼ်ႈပဵၼ်ၽူႈၼင်ႈဝတ်ႉဝိႁၢရ်မိူင်းၼၢႆး။ လိူဝ်ၼၼ်ႉ ပဵၼ်ၽူႈၵမ်ႉပၢႆး ငဝ်ႈငုၼ်းမုၵ်ႉၸုမ်းသင်ၶတႆး ပွတ်းဢွၵ်ႇၶူင်း ၸဵမ်ၸိူဝ်းၼႆႉ ဝႃႈၼႆ။

လႅင်ႇၶၢဝ်ႇ လႅတ်ႇၼုမ်ႇ မင်းရၢႆး (ၵဵင်းတုင်)