ၶူင်းၵၢၼ်ဢၼ်တေသၢင်ႈသဵၼ်ႈတၢင်းရူတ်ႉၾႆး(မီးရထား) မူႇၸေႊ – ဝဵင်းလိူဝ်ႇ(မၼ်းတလေး) ၼၼ်ႉ တိုၵ်ႉလူင်းၵဵပ်းၶေႃႈ မုလ်းၼႂ်းပိုၼ်ႉတီႈ တေၸႂ်ႉၶၢဝ်းယၢမ်း 10 ဝၼ်းပၢႆ။

ၵၢၼ်လူင်းပိုၼ်ႉတီႈၵဵပ်းၶေႃႈမုလ်း EIA ၼႆႉ တႄႇလူင်းၵဵပ်း ဝၼ်းတီႈ 25 လိူၼ်ၵျုၼ်ႊ ထိုင် ဝၼ်းတီႈ 2 လိူၼ်ၵျုႊလၢႆႊ ပီ 2019 ဢွင်ႈတီႈဢၼ်လူင်းၵဵပ်းၶေႃႈမုလ်းသမ်ႉ မိူၼ်ၼင်ႇ ဝဵင်းလိူဝ်ႇ၊ ၼွင်ၶဵဝ်၊ ၵျွၵ်ႉမႄး၊ လႃႈသဵဝ်ႈ၊ သႅၼ်ဝီလႄႈ မူႇၸေႊ ၸိူဝ်းၼႆႉ။

ၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈၶဵတ်ႇလိူၵ်ႈတင်ႈမၢႆ 3 ၸႄႈတွၼ်ႈလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းမိူင်းပိုၼ်ႉတီႈ ၸၢဝ်းၶိူဝ်းႁဝ်းၶႃႈယူႇသဝ်းၼႆႉ ၵမ်ႈပႃႈၼမ် ဢမ်ႇလႆႈႁူႉၸွမ်းလွင်ႈသင်။ လိူဝ်ၼၼ်ႉ ပဵၼ်ဢၼ်လွမ် လီမႆႈၸႂ်ဝႆႉ။ ယဝ်ႉၵေႃႈ ၵၢၼ်ၵႃႉၵၢၼ်ၶၢႆဢမ်ႇပဵၼ်၊ သူၼ်ႁႆႈၼႃးၽႂ် တေတိူဝ်ႉတီႈလႂ် ၺႃးတီႈလႂ် ဢၼ်ဝႃႈၼၼ်ႉၵေႃႈ ၵူၼ်းမိူင်းႁဝ်း လွမ်မႆႈၸႂ်ၵၼ်ဝႆႉယူႇ။ ငိၼ်းဝႃႈတႄႉ သင်တုမ်ႉၺႃး၊ တိူဝ်ႉၺႃးၵေႃႈတေသၢႆႈတႅၼ်းယူႇသေတႃႉၵေႃႈ ယွၼ်ႉ ပိူဝ်ႈ ပၵ်းပိူင်မၼ်းမီးဝႆႉ လွင်ႈလိၼ်ႁႆႈသူၼ်ၼႃး လွင်ႈလိၼ်ပဝ်ႇ၊ လိၼ်ႁၢမ်းၸိူဝ်းၼႆႉလႄႈ ၵူၼ်းမိူင်းတေယၢပ်ႇၽိုတ်ႇ။ ၵမ်းၼႆႉ ဢၼ်ႁဝ်းၶႃႈ ၵူၼ်းမိူင်းႁဵတ်းၼၼ်ႉ ပဵၼ်လိၼ်သင် ႁဝ်းဢမ်ႇႁူႉၶႃႈလူး ဢမ်ႇၸႂ်ႈၶႃႈႁႃႉ” ဝႃႈၼႆ။

သိုပ်ႇလၢတ်ႈဝႃႈ “ ပေႃးဝႃႈ လိၼ်ဢၼ်ႁဝ်းႁဵတ်းဝႆႉၼၼ်ႉ ဢမ်ႇၶဝ်ႈတၢင်းၵၢၼ် ပဵၼ်လိၼ်ႁႆႈလိၼ်ၼႃးၼႆၸိုင် မၼ်းတေ ၵႂႃႇၶဝ်ႈၼႂ်းလိၼ်ပဝ်ႇ၊ လိၼ်ႁၢမ်း၊ လိၼ်လိူင်းပေႃးၼႆ တေဢမ်ႇလႆႈၵႃႈသၢႆႈတႅၼ်းမၼ်း လွင်ႈၸိူင်ႉၼႆ ပဵၼ်ဢၼ်လီမႆႈ ၸႂ်တႄႉ။ ၶႂ်ႈႁႂ်ႈၶဝ်လူင်းထူပ်းပေႃႈမႄႈၵူၼ်းမိူင်းၵႂၢင်ႈၵႂၢင်ႈၶႂၢင်ၶႂၢင် ၵဵပ်းၶေႃႈၵၢင်ၸႂ် ပေႃႈမႄႈၵူၼ်းမိူင်း ဢွၼ်တၢင်းၵွၼ်ႇ ပေႃးၵူၼ်းမိူင်းယၢပ်ႇၽိုတ်ႇ ဢမ်ႇၽွမ်ႉၸွမ်းၸိုင် ၽႅၼ်ၵၢၼ်ၼႆႉ မၼ်းၵိုင်ႇလီၵိုတ်းယင်ႉ၊ မၼ်းၵိုင်ႇလီဝူၼ်ႉထႅင်ႈတၢင်ႇ လၢႆး ယႃႇပေႁႂ်ႈတုမ်ႉတိူဝ်ႉပေႃႈမႄႈၵူၼ်းမိူင်း” ဝႃႈၼႆ။

ဢူးထေးလၢႆႇ ၵႅမ်ၽူႈၸတ်းၵၢၼ် ၵူႈလွင်ႈလွင်ႈၶူင်းၵၢၼ်ရူတ်ႉၾႆးမိူင်းမၢၼ်ႈလၢတ်ႈဝႃႈ “ လွင်ႈၶူင်းၵၢၼ် ၵဵပ်းၶေႃႈမုလ်းၼႆႉ တေပၼ်ၾၢင်ႉ/ ပၼ်တၢင်းႁူႉၵူၼ်းမိူင်း။ တေမၢတ်ႈမၢႆဢဝ်ၶေႃႈၵၢင်ၸႂ်ၵူၼ်းမိူင်း။ တေလူင်းႁူပ်ႉထူပ်းၵူၼ်းမိူင်း/ ၵူၼ်း ပိုၼ်ႉ တေသပ်းလႅင်းလၢတ်ႈၼႄတႅၵ်ႇလႅင်း။ ၸွမ်းၼင်ႇၵၢင်ၸႂ်ၵူၼ်းမိူင်းမီးၼၼ်ႉ တေဢဝ်တၢင်ႇထိုင် တီႈလုမ်းၸွမ် ၸိုင်ႈ၊ ယူႇတီႈၼၼ်ႈသေ ၸင်ႇတေတမ်းဝၢင်းလူင်းမႃးဝႃႈ တေႁဵတ်း၊ ဢမ်ႇႁဵတ်း” ဝႃႈၼႆ။

သဵၼ်ႈတၢင်းရူတ်းၾႆး ဢၼ်တေၵေႃႇသၢင်ႈႁဵတ်း မူႇၸေႊ – ဝဵင်းလိူဝ်ႇယၢဝ်း 267 လၵ်း။ တေႁေႃႈၼိုင်ႈၸူဝ်ႈမူင်း 100 လၵ်း။ ဝဵင်းလိူဝ်ႇ – မူႇၸေႊၼႆႉ တေၸႂ်ႉၶၢဝ်းယၢမ်းႁိုင် 3 ၸူဝ်ႈမူင်း ဝႃႈၼႆ။

သင်ဝႃႈ သဵၼ်ႈတၢင်းရူတ်ႉၾႆးၼႆႉ သၢင်ႈယဝ်ႉယႃႇၸိုင် သင်ၶၢမ်ႈၵႂႃႇတၢင်းၾင်ႇမိူင်းၶႄႇၼၼ်ႉ သဵၼ်ႈတၢင်းၼႆႉ တေၵၢႆႇ ၸူးၵႂႃႇ တၢင်းမိူင်းမၢဝ်း- ၶဝ်ႈထိုင်ဝဵင်းပိူၺ်ႇၵျိင်း ၸိူဝ်းၼႆႉ။ သဵၼ်ႈတၢင်းရူတ်ႉၾႆး မူႇၸေႊ – ဝဵင်းလိူဝ်ႇၼႆႉ ယူႇတီႈမိူင်းၶႄႇ တေဢဝ်ပုၼ်ႈၽွၼ်း သေ ႁဵတ်းသၢင်ႈမူတ်း ဝႃႈၼႆ။