ၸုမ်းတူင်ႇဝူင်းတႆး ၵဵင်းမႆႇ တေႁူမ်ႈၵၼ် ၸတ်းႁဵတ်းပၢင်ႁူမ်ၸူမ်းႁပ်ႉတွၼ်ႈ တုင်းထွမ်ႇ မဵတ်ႉတႃႇတမ်ႈတီႈၸဝ်ႈတူၼ်ၶူး Dr. တိုၼ်းတႆး ဝိသုတ်ႉထိၺႃ ၼ မႁႃသတ်ႉထမ်မၸေႃးတိၵထၸ တီႈဝတ်ႉပႃႇပဝ်ႈ ဝဵင်းၵဵင်းမႆႇ ၸိုင်ႈထႆး။

ဝၼ်းတီႈ 29/05/2019 ယၢမ်းၵၢင်ၶမ်ႈ 7 မူင်း ထိုင် 9 မူင်း ၸုမ်းတူင်ႉၼိုင်တူင်ႇဝူင်းတႆး၊ ပီႈၼွင်ႉတႆးလႄႈ ႁႅင်းၵၢၼ်ယၢၼ် မိူင်း ႁူမ်ႈၵၼ်သေ တေၸတ်းႁဵတ်းပၢင်ႁူမ်ၸူမ်း(တုင်းထွမ်ႇ လွၼ်ႉထမ်း တမ်ႈတီႈ ၸဝ်ႈတူၼ်ၶူး ၻွၵ်ႊတိူဝ်ႊ ၸဝ်ႈတိုၼ်း တႆး ဝိသုတ်ႉထိ ၺႃၼ မႁႃသတ်ႉထမ်မၸေႃးတိၵထၸ ဝတ်ႉလူင်ႁေႃၶမ်း မိူင်းမၢဝ်း (PhD. In Buddhism) ၼႂ်းတိုဝ်ႉ တၢင်းၸဝ်ႈလႆႈႁပ်ႉ ၸုမ်ႈၶူး (PhD. In Buddhist Studies) တီႈၸၼ်ႉၸွမ်မႁႃၸုလႃးလူင်းၵွၼ်း ဝင်းၼွႆႉ ဢယုတ်ႉထယႃး ၸိုင်ႈထႆး မွပ်ႈပၼ် ၼၼ်ႉ။ ပၢင်ႁူမ်ၸူမ်းယုၵ်ႉယွင်ႈၼႆႉ တေၸတ်းႁဵတ်းတီႈဝတ်ႉပႃႇပဝ်ႈ ၸႄႈဝဵင်းၵဵင်းမႆႇ ၸိုင်ႈထႆး။

ၼၢင်းၶမ်းဢိင်ႇ ၽူႈၶဝ်ႈပႃးၶပ်းၶိုင် ပၢင်ႁူမ်ၸူမ်းယုၵ်ႉယွင်ႈ တီႈဝတ်ႉပႃႇပဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၸဝ်ႈတူၼ်ၶူး တိုၼ်းတႆးႁဝ်းၶႃႈၼႆႉ မီးလွင်ႈႁဵတ်း တၢင်းသၢင်ႈၼႂ်းၵၢၼ်ၸိူဝ်ႉၶိူဝ်း၊ သႃသၼႃ၊ ၽႃသႃမႃးၼမ်လႄႈ လႆႈႁၼ်မၼ်း ၸဝ်ႈ လႆႈပိုၼ်ၽႄႈသႃသၼႃ တၢင်းပွတ်းထုင်ႉမၢဝ်း၊ မိူင်းၶႄႇ ၵေႃႈၼမ်၊ ၼႂ်းမိူင်းတႆး ၸိူဝ်းၼႆႉၵေႃႈၼမ်။ ယဝ်ႉၵေႃႈ မီးပၢင် တၢၼ်ႈၶႆႈပၼ်တၢင်းႁူႉ တၢင်းႁၼ်ၵေႃႈၼမ်။ မၼ်းၸဝ်ႈၵေႃႈ ပဵၼ်ၸဝ်ႈဢၼ်ၶတ်းၸႂ်လႄႈ ဢဝ်ၵုင်ႇဢဝ်မုၼ်ၸွမ်းတႄႉ ၶႃႈ။ ၼႂ်းပီႈၼွင်ႉၸိူဝ်ႉၶိူဝ်းတႆးႁဝ်း တႃႇတေလႆႈ ၸုမ်ႈၶူးၻွၵ်ႊတိူဝ်ႊ PhD ၾၢႆႇပုတ်ႉထသႃသၼႃၼႆႉၵေႃႈ ဢမ်ႇၸႂ်ႈငၢႆႈငၢႆႈ။ မၼ်းၸဝ်ႈၵေႃႈ လႆႈမႃးၵမ်းတီႈ 2 ယဝ်ႉ။ ၵမ်းတီႈၼိုင်ႈသမ်ႉ လႆႈတၢင်းမိူင်းဢိၼ်ႊၻီႊယိူဝ်ႊမႃး။ ၵမ်းတီႈသွင်ၼႆႉသမ်ႉ မႃးလႆႈတီႈၸၼ်ႉၸွမ်မႃးႁႃၸုလႃးလူင်းၵွၼ်း မိူင်းထႆးၼႆႉ။ ၵိုင်ႇလီယုၵ်ႉယွင်ႈဢဝ်ၵုင်ႇမုၼ်လႄႈ ၸင်ႇဢွၼ်ၵၼ်ၸတ်း ႁဵတ်းပၢင်ယုၵ်ႉယွင်ႈ” ဝႃႈၼႆ။

သိုပ်ႇလၢတ်ႈဝႃႈ “ ၶႂ်ႈႁႂ်ႈပီႈၼွင်ႉတႆးႁဝ်းၶႃႈၸိူဝ်းႁွတ်ႈၵဵင်းမႆႇၼႆႉ လႆႈႁူပ်ႉလႆႈႁၼ်ၸွမ်း လႆႈဝႆႈလႆႈသႃႇ လႆႈဢဝ်ၵုင်ႇမုၼ် ႁူမ်ၸူမ်းၸွမ်း ၸဝ်ႈႁဝ်း။ သမ်ႉထႅင်ႈဢၼ်ၼိုင်ႈၵေႃႈ လႆႈငိၼ်းၶၢဝ်ႇဝႃႈ မီးပီႈၼွင်ႉထုင်ႉမၢဝ်း၊ မိူင်းၶွၼ် တင်း မိူင်းၼိူဝ် ၵေႃႈ ပႃးမႃးၼမ်ၼႆလႄႈ ၼင်ႇႁိုဝ် ပီႈၼွင်ႉတင်းမိူင်းၼိူဝ် မိူင်းတႂ်ႈ၊ မိူင်းတႆး ႁဝ်းၼင်ႇၵၼ် ယူႇၵေႃႉတီႈၵေႃႉမိူင်းသေ တႃႉၵေႃႈ လႆႈမႃးႁူပ်ႉ ၺႃးၵၼ်ၸိူင်ႉၼႆၼႆၵေႃႈ ႁႂ်ႈပေႃးမီးလွင်ႈၸမ်ၸႂ်ၵၼ် ႁၵ်ႉပႅင်းမိုတ်ႈၵိုဝ်း ၵၼ်ၵႂႃႇမိူဝ်းၼႃႈၼႆသေ လႄႈ ၸင်ႇလႆႈၸတ်းႁဵတ်းပၢင်ၸိူင်ႉၼႆ” ဝႃႈၼႆ။

တွၼ်ႈၶပ်ႉမၢႆ ၼႂ်းဝၼ်းတီႈ 29 ပၢင်ႁူမ်ၸူမ်းယုၵ်ႉယွင်ႈ ၸဝ်ႈတူၼ်ၶူး တွၵ်ႊတိူဝ်ႊ ၸဝ်ႈတိုၼ်းတႆး တီႈဝတ်ႉပႃႇပဝ်ႈၼႆႉ ယၢမ်းတွၼ်ႈၵၢင်ၶမ်ႈ 7 မူင်း တေလူၼႄပိုၼ်းၵႅပ်ႈ ၸဝ်ႈတူၼ်ၶူး ၻွၵ်ႊတိူဝ်ႊၸဝ်ႈတိုၼ်းတႆး၊ ယဝ်ႉၵေႃႈ တၢင်တူဝ် ပီႈ ၼွင်ႉတႆး ၵဵင်းမႆႇ တေမွပ်ႈပၼ် ဝႂ်ႁူမ်ၸူမ်းယုၵ်ႉယွင်ႈၵုင်ႇ။ လိူဝ်ၼၼ်ႉ ႁပ်ႉထွမ်ႇၶေႃႈဢေႃးဝႃႇတ ၸဝ်ႈတူၼ်ၶူး ၻွၵ်ႊ တိူဝ်ႊ ၸဝ်ႈတိုၼ်းတႆးၵႂႃႇ ဝႃႈၼႆ။

မိူဝ်ႈဝၼ်းတီႈ 26/05/2019 ယၢမ်းဝၢႆးဝၼ်းၼၼ်ႉ လုၵ်ႈႁဵၼ်းသင်ၶတႆး ၸၼ်ႉၸွမ်ၼႂ်းမိူင်းၵွၵ်ႇ ၸိုင်ႈထႆး ဢွၼ်ႁူဝ်ၸတ်း ႁဵတ်းပၢင်ႁူမ်ၸူမ်း Dr. ၸဝ်ႈၶူးတိုၼ်းတႆး ဝိသုၻ်ꩪိၺႃꧣ၊ မႄႈဢွၵ်ႇၼၢင်းသူၺ်ႇမုင်ႇ လႄႈ မႄႈဢွၵ်ႇ ၼၢင်းမွၵ်ႇလၢဝ် သႅင် ဢၼ်လႆႈႁပ်ႉၸုမ်ႈၶူး တီႈၸၼ်ႉၸွမ်မႁႃၸုလႃး ဝင်းၼွႆႉ ဢယုတ်ႉထယႃး ၸိုင်ႈထႆး မွပ်ႈပၼ်ၼၼ်ႉ။ တီႈႁူင်းပၢင် ၵုမ်လူင် (Zone – A) ႁူင်းသွၼ်ႁဵၼ်း ၼႂ်းဝၢင်းၸၼ်ႉၸွမ် ဝင်းၼွႆႉ ဢယုတ်ႉထယႃး ၸိုင်ႈထႆး။

ၽူႈလႆႈႁပ်ႉၸုမ်ႈၶူး 3 ၵေႃႉၼႆႉ ၸဝ်ႈၶူးတိုၼ်းတႆး ဝိသုၻ်ꩪိၺႃꧣ လႆႈႁပ်ႉၸုမ်ႈၻွၵ်ႊတိူဝ်ႊ ၾၢႆႇပိုၼ်ၽႄႈ သႃသၼႃ ပုတ်ႉထၸဝ်ႈ (Honorary Degree Doctorate In Buddhist Studies)။ မႄႈဢွၵ်ႇၼၢင်းသူၺ်ႇမုင်ႇ လႆႈႁပ်ႉၸုမ်ႈၾၢႆႇ ပၢႆးၸႂ်ၼႂ်းပုတ်ႉထ (Honorary Doctorate Degree in Buddhist Psychology) လႄႈ မႄႈဢွၵ်ႇၼၢင်းမွၵ်ႇလၢဝ်သႅင်သမ်ႉ လႆႈႁပ်ႉၸုမ်ႈၶႅပ်းၶမ်း (Honorary Insigniar Awarded) ၸဵမ်ၸိူဝ်းၼႆႉ။