ၵူၼ်းၼုမ်ႇတႆး ပၼ်ႇရူတ်ႉထိပ်ႇ တႄႇၵဵင်းမႆႇ ပၼ်ႇလဵပ်ႈသိုင်ႇမိူင်းၶမ်း 35 ဝဵင်းယဝ်ႉသေ ႁွတ်ႈထိုင်မိူင်းၼေႇပျီႇတေႃႇ ယူႇတီႈၽူႈတႅၼ်းသ ၽႃးပႃႇတီႇႁူဝ်သိူဝ် ႁူမ်ၸူမ်းႁပ်ႉတွၼ်ႈ ဝႃႈၼႆ။
ဝၼ်းတီႈ 06/03/2019 ယၢမ်းၵၢင်ၶမ်ႈ ယူႇတီႇၽူႈတႅၼ်းသၽႃးပႃႇတီႇႁူဝ်သိူဝ် SNLD ႁူမ်ႈၵၼ် ႁူမ်ႈၸူမ်းႁပ်ႉတွၼ်ႈ ၵူၼ်းၼုမ်ႇတႆး 4 ၵေႃႉ ဢၼ်လုၵ်ႉတီႈတိူင်းပႃႇၵိူဝ်သေ ပၼ်ႇႁွတ်ႈထိုင်ၼေႇပျီႇတေႃႇ ဝႃႈၼႆ။
ၸၢႆးဢွၼ်ႇၶိူဝ်း ၵေႃႉပၼ်ႇရူတ်ႉထိပ်ႇ လၢတ်ႈတီႈၽူႈတွႆႇႁွၵ်ႈဝႃႈ “ တေႃႈလဵဝ် ႁဝ်းၶႃႈ ပၼ်ႇမႃးႁွတ်ႈထိုင်တီႈ ၼေႇပျီႇ တေႃႇယဝ်ႉ။ မိူဝ်ႈၽုၵ်ႈႁဝ်းၶႃႈတေပၼ်ႇၵႂႃႇတၢင်း ပၵၢၼ်ႇ(ပုဂံ) ယဝ်ႉၵေႃႈ တေသိုပ်ႇၵႂႃႇတၢင်း ဝဵင်းလိူဝ်ႇသေ ၶိုၼ်ႈ ၵႂႃႇတၢင်းဝဵင်းပၢင်ႇဢူႈလူင် လိူဝ်ၼၼ်ႉ ၶဝ်ႈၵႂႃႇၶိုၼ်းတၢင်းမိူင်းတႆးပွတ်းႁွင်ႇၶႃႈယဝ်ႉ” ဝႃႈၼႆ။
သိုပ်ႇလၢတ်ႈဝႃႈ “ မိူဝ်ႈဝႃး ႁဝ်းႁွတ်ႈၽႅဝ်တီႈၼေႇပျီႇတေႃႇၼႆႉ ၶမ်ႈပႅတ်ႈဢိတ်းၼိုင်ႈၶႃႈ ယွၼ်ႉရူတ်ႉထိပ်ႇႁဝ်း မႃးၵွႆ ၸွမ်းတၢင်း။ ယဝ်ႉၵေႃႈ ယိၼ်းၸူမ်းၶွပ်ႈၸႂ်ထိုင် ဢူၺ်းၵေႃႉဢူၺ်းသေႈလႄႈ ပီႈၼွင်ႉႁဝ်းၶႃႈ ၵူႈၵေႃႉ ပၼ် ဢဵၼ် ပၼ်ႁႅင်းႁဝ်းၶႃႈသေဢမ်ႇၵႃး ႁပ်ႉလဵင်ႉလူႁဝ်းၶႃႈ။ ဢိၵ်ႇပႃး ၽူႈတႅၼ်းပႃႇတီႇတႆးႁဝ်းၶႃႈ” ဝႃႈၼႆ။
ၸၢႆးဢွၼ်ႇၶိူဝ်းတင်း ၸၢႆးသႅင်ႁၢၼ် သွင်ပီႈၼွင်ႉၼႆႉ တႄႇပၼ်ႇရူတ်ႉထိပ်ႇ လုၵ်ႉၵဵင်းမႆႇ ၸိုင်ႈထႆးပၼ်ႇဢွၵ်ႇမႃး မိူဝ်ႈၼႂ်းလိူၼ်ၵျႅၼ်ႊၼိဝ်ႊရီႊ ဝၼ်းတီႈ 13 တေႃႈလဵဝ်ၶၢဝ်းတၢင်းပၼ်ႇရူတ်ႉထိပ်ႇၼႆႉ ၸမ်ႁွတ်ႈ 2 လိူၼ်ယဝ်ႉ ၸၢႆးထဵင်ႇလိၼ်း လုၵ်ႉလၢင်းၶိူဝ်းသေၶဝ်ႈႁူမ်ႈၸွမ်း၊ ၸၢႆးဝုၼ်းၵႅဝ်ႈသမ်ႉ လုၵ်ႉတႃႈၵုင်ႈသေၶဝ်ႈႁူမ်ႈပၼ်ႇၸွမ်းမႃး။
ၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈ ၶဵတ်ႇလိူၵ်ႈတင်ႈမၢႆ 3 ၸႄႈတွၼ်ႈလႃႈသဵဝ်ႈ လၢတ်ႈတီႈ ၽူႈတွႆႇႁွၵ်ႈ ဝႃႈ “ယူႇတီႈႁဝ်းၶႃႈ ၽူႈတႅၼ်းၵမ်ႈၼမ်ၵေႃႈ ဢွၼ်ၵၼ်ႁူမ်ၸူမ်းႁပ်ႉတွၼ်ႈသေ ဢဝ်ၵုင်ႇ ဢဝ်မုၼ် ၵူၼ်းၼုမ်ႇတႆး ႁဝ်း မီးႁႅင်းၸႂ် တႃႇတေသၢင်ႈႁၼ်လီၵႂႃႇမိူဝ်းၼႃႈ ဢဝ်လွင်ႈၵၢၼ်ဢဵၼ်ႁႅင်းသေ ပူၵ်းပွင်ၵႂႃႇ ႁႂ်းပေႃးပဵၼ်ၵူၼ်းၶိူင်ႇ ၵူၼ်းၵတ်ႉ ၵူၼ်းၶႅၼ်ႇၵႂႃႇ။ ယဝ်ႉၵေႃႈ လီယွင်ႈယေႃးထႅင်ႈၶေႃႈၼိုင်ႈတႄႉ ၶဝ်ယိူင်းဢၢၼ်း ၵႅတ်ႇၶႄႁႄႉၵင်ႈ သၽႃႇဝ သိင်ႇဝႅတ်ႉလွမ်ႉ လိူဝ်ၼၼ်ႉၵေႃႈ လႆႈႁၼ်ပႃးထႅင်ႈၶေႃႈယိူင်းဢၢၼ်းၶဝ် ထႅင်ႈလၢႆလၢႆလွင်ႈ” ဝႃႈၼႆ။
သိုပ်ႇလၢတ်ႈဝႃႈ လိူဝ်သေၼၼ်ႉဢမ်ႇၵႃး တေႁူမ်ႈမိုဝ်းၵၼ်တင်းၵူၼ်းၼုမ်ႇပွတ်းႁွင်ႇသေ တေမိူဝ်းႁဵတ်းၶႅမ်ႊပိင်ႊ လွင်ႈၵိုတ်းယိုဝ်းလႄႈ ပၼ်ႇရူတ်ႉထိပ်ႇပၼ်ႁႅင်းၸႂ်ၵူၼ်းပၢႆႈၽေးၼႆ လွင်ႈၼႆႉ ပဵၼ်ယိူင်းဢၢၼ်းလီတႄႉတႄႉၶႃႈ” ဝႃႈၼႆ။
ၸၢႆးဢွၼ်ႇၶိူဝ်း လၢတ်ႈဝႃႈ “ တေႃႈလဵဝ် ႁဝ်းၶႃႈ ႁူမ်ႈၵၼ်ပၼ်ႇရူတ်ႉထိပ်ႇ တင်းမူတ်း မီး 4 ၵေႃႉ။ ႁဝ်းၶႃႈ သွင်ပီႈၼွင်ႉ သေ ႁူမ်ႈလူၺ်ႈ ပီႈထဵင်ႇလိၼ်းလႄႈ ၸၢႆးဝုၼ်းၵႅဝ်ႈၶႃႈ။ မိူဝ်ႈၼႆႉ ယၢမ်းၵၢင်ၼႂ် ယွၼ်ႉၵၢၼ်ၶိုၵ်ႉၶၵ်ႉၶဝ်ႈမႃးသေ ပီႈၸၢႆး ဝုၼ်းၵႅဝ်ႈတႄႉ လႆႈပွၵ်ႈမိူဝ်းၶိုၼ်းတႃႈၵုင်းယဝ်ႉ။ ၵိုတ်းႁဝ်း 3 ၵေႃႉၵူၺ်းၶႃႈ” ဝႃႈၼႆ။
“ၶႃႈႁဝ်းဝူၼ်ႉဝႆႉထႅင်ႈလွင်ႈၼိုင်ႈတႄႉ ႁဝ်းၶႃႈ ၶႂ်ႈပၼ်ႇရူတ်ႉထိပ်ႇပၼ်ႁႅင်းၸႂ်ၵူၼ်းပၢႆႈၽေးသိုၵ်းႁဝ်းသေဢမ်ႇၵႃး လိူဝ် ၼၼ်ႉ ၶႂ်ႈႁပ်ႉလူႇၶၢမ်ႇတၢင်းၸွႆႈထႅမ် ပီႈၼွင်ႉၵူၼ်းမိူင်းႁဝ်းၶႃႈဢေႃႈ။ ၵူၺ်းၵႃႈ ပေႃးဢဝ်ႁဝ်းသၢမ်ၵေႃႉ ႁဵတ်းၵႂႃႇတႄႉ တေဢမ်ႇလႅပ်ႈပဵၼ်ႁႅင်းယႂ်ႇ။ ယွၼ်ႉဝႃႈ သင်မီးပီႈၼွင်ႉႁဝ်း ၵမ်ႉထႅမ်မႃး ၶဝ်ႈၼမ်ႉတၢင်းၵိၼ် ၼမ်ႉမၼ်း ၶွင်ၵိၼ် ၶွင် ယႅမ်ႉၸိူဝ်းၼၼ်ႉ ႁဝ်းၶႃႈ ဢမ်ႇမီးၵႃးတၢင်ႇလႄႈ သမ်ႉပဵၼ်ရူတ်ႉထိပ်ႇၵူၺ်းၼႆ လွင်ႈၼႆႉၵေႃႈ ပဵၼ်ဢၼ်ယၢပ်ႇႁဝ်းၶႃႈ ဢၼ်ၼိုင်ႈၶႃႈ” ဝႃႈၼႆ။
“ ထႅင်ႈလွင်ႈၼိုင်ႈၵေႃႈ သင်မီးၵူၼ်းၼုမ်ႇတႆးႁဝ်း ပွတ်းႁွင်ႇ ႁူမ်ႈႁဝ်းၶႃႈ ပၼ်ႇရူတ်ႉထိပ်ႇပဵၼ်တီႈမၢႆတွင်း ဢၼ်ဝႃႈ ပၼ်ႇရူတ်ႉထိပ်ႇပၼ်ႁႅင်းၸႂ်ၵူၼ်းပၢႆႈၽေးသေ လူႇၶၢမ်ႇတႃႇၸွႆႈၵူၼ်းပၢႆႈၽေးသိုၵ်းႁဝ်းၶႃႈ ၵူႈဝဵင်းဝဵင်းၸိုင် ယိုင်ႈၶႅၼ်းၶႅမ်ႉၶႃႈယဝ်ႉ။ ပေႃးဢဝ်ႁဝ်းၶႃႈ 3 ၵေႃႉပၼ်ႇတႄႉ တေလႆႈဝႃႈ ဢဵၼ်ႁႅင်းႁဝ်းၶႃႈ တိုၵ်ႉဢေႇယူႇလွင်ႈ ႁူမ်ႇလူမ်ႈၵေႃႈမီးဢေႇ” ဝႃႈၼႆ။
ယိူင်းဢၢၼ်း ၼုမ်ႇတႆး ပၼ်ႇရူတ်ႉထိပ်ႇ 3 ၵေႃႉၼႆႉ ၶႂ်ႈဢၢၼ်းႁဵတ်း ပၼ်ႇရူတ်ႉထိပ်ႇပၼ်ႁႅင်းၸႂ်ၵူၼ်းပၢႆႈၽေးသိုၵ်း ၸိုင်ႈတႆးပွတ်းႁွင်ႇသေဢမ်ႇၵႃး ၶႂ်ႈယွၼ်းႁပ်ႉလူႇၶၢမ်ႇတီႈပီႈၼွင်ႉၵူၼ်းမိူင်းသေ တႃႇဢဝ်မိူဝ်းၵမ်ႉထႅမ်ပၼ်ၵူၼ်းပၢႆႈ ၽေးတီႈသီႇပေႃႉ ဝႃႈၼႆ။
ၸၢႆးဢွၼ်ႇၶိူဝ်း လၢတ်ႈဝႃႈ “ ၶႃႈၵေႃႈ ၵပ်းသိုပ်ႇၵႂႃႇတၢင်းၵူၼ်းၼုမ်ႇႁဝ်း ပွတ်းႁွင်ႇဝႆႉယူႇၶႃႈ သင်ဝႃႈ ၵူၼ်းၼုမ်ႇႁဝ်း ပွတ်းႁွင်ႇ တူၼ်ႈတၼ်း ႁဝ်းၶႃႈ တေတႄႇၽႅၼ်ၵၢၼ်ပၼ်ႇရူတ်ႉထိပ်ႇ ႁပ်ႉငိုၼ်းၸွႆႈထႅမ်ၵူၼ်းၺႃးၽေးသိုၵ်း၊ ၶႂ်ႈတႄႇ တီႈၸႄႈဝဵင်းၼမ်ႉၶမ်းၵႂႃႇ။ ပေႃးယဝ်ႉၵႂႃႇတၢင်း မူႇၸေႊ သႅၼ်ဝီ၊ ၵူတ်ႉၶၢႆ လႃႈသဵဝ်ႈ ယဝ်ႉၵေႃႈ ၶဝ်ႈၵႂႃႇတၢင်းသီႇပေႃႉ သေ ၶူဝ်းၶွင်ဢၼ်ႁဝ်းၶႃႈ လႆႈ လူႇၶၢမ်ႇမႃးၼၼ်ႉ တေၵမ်ႉထႅမ်ပၼ်တီႈၵူၼ်းပၢႆႈၽေးတီႈသီႇပေႃႉၶႃႈ” ဝႃႈၼႆ။
ၸၢႆးဝၼ်းလႅင်းၶမ်း လၢတ်ႈဝႃႈ “ ၶႃႈၶႂ်ႈပၼ်တၢင်းႁၼ်ထိုင်ဝႃႈ ဢမ်ႇၵွမ်ႉၵႃႈ ႁဵတ်းၵၢၼ်မိူင်း ၵူၼ်းၶီႇရူတ်ႉထိပ်ႇပၼ်ႇ လဵပ်ႈမိူင်းၵေႃႈ ႁဵတ်းၵၢၼ်မိူင်းလႆႈယူႇ ႁဵတ်းႁႂ်ႈပိူၼ်ႈယွင်ႈယေႃး၊ ႁူႉၸၵ်းၸိူဝ်ႉၶိူဝ်းတႆး။ ပိူၼ်ႈႁဵတ်းလႆႈၵေႃႈ ၸိူဝ်းၶိူဝ်း တႆးႁဝ်းၵေႃႈႁဵတ်းလႆႈၼႆ ၶီႇရူတ်ႉထိပ်ႇသေ ပၼ်ႇမိူင်းလၢႆလၢႆဝဵင်းသေ ႁဵတ်းႁႂ်ႈပိူၼ်ႈပေႃးႁူႉၸၵ်းသေ ႁဵတ်းႁႂ်ႈၵူၼ်း ၼုမ်ႇတႆးႁဝ်း မေႃႁၵ်ႉၸိူဝ်ႉၶိူဝ်းတႆးႁဝ်းမႃးထႅင်ႈ” ဝႃႈၼႆ။
ၶၢဝ်းတၢင်းၵူၼ်းၼုမ်ႇတႆး ဢၼ်ပၼ်ႇရူတ်ႉထိပ်ႉၵႂႃႇသမ်ႉ တႄႇဢဝ်ၵဵင်းမႆႇ ၸိုင်ႈထႆး ပၼ်ႇႁွတ်ႈထိုင် တႃႈၶီႈလဵၵ်း၊ တႃႈလိူဝ်ႇ၊ မိူင်းၽျၢၵ်ႈ၊ ၵဵင်းတုင်၊ မိူင်းသၢတ်ႇ၊ မိူင်းတူၼ် ၼႂ်းၸိုင်ႈတႆးပွတ်းဢွၵ်ႇၶူင်း။ လိူဝ်ၼၼ်ႉ ပၼ်ႇၵႂႃႇတၢင်းမိူင်း ပၼ်ႇ၊ မိူင်းၼၢႆး၊ လၢင်းၶိူဝ်း၊ ၵဵင်းတွင်း၊ မွၵ်ႇမႆႇ၊ ၶူဝ်လမ်၊ ၼမ်ႉၸၢင်၊ ပၢင်လူင်၊ လွႆလႅမ်၊ တူၼ်ႈတီး၊ ယွင်ႁူၺ်ႈ၊ ပၢင်လွင်း ၸိုင်ႈတႆးပွတ်းၸၢၼ်း။ သိုပ်ႇလူင်းၵႂႃႇတၢင်းၸႄႈမိူင်းယၢင်းလႅင်၊ ၸႄႈမိူင်းမွၼ်း၊ တႃႈၵုင်ႈ ယဝ်ႉၵေႃႈ ၶိုၼ်ႈ မႃးတၢင်းၼေႇပျီႇတေႃႇ။ လိူဝ်ၼၼ်ႉ တေသိုပ်ႇၵႂႃႇတၢင်း ပၵၢၼ်ႇ၊ ဝဵင်းလိူဝ်ႇ၊ ပၢင်ဢူႈလူင်ယဝ်ႉ ၽႅၼ်ၵၢၼ်မိူဝ်းၵႂႃႇ တၢင်းမိူင်းလူင်၊ မိူင်းမိတ်ႈ၊ မၢၼ်ႈပဵင်း၊ ဝဵင်းၼမ်ႉၶမ်းသေ ၶဝ်ႈၶိုၼ်းၵွၼ်ၵၢင်ၸိုင်ႈတႆး သိုပ်ႇၸူးပွတ်းဢွၵ်ႇၶူင်း၊ ယိူင်း ထိုင်မိူင်းလူၺ် မိူင်းလႃး ၸိူဝ်းၼႆႉလူးၵွၼ်ႇ ဝႃႈၼႆ။
