Friday, March 29, 2024

သင်မီးလွင်ႈၵဵပ်းၵႃႈၶၢမ်ႈၶူဝ် တီႈတႃႈၵေႃႈ (ၼမ်ႉၶူင်း) ၸိုင် တေဢဝ်လိူင်ႈ

Must read

ၶူဝ်တႃႈၵေႃႈ(ၼမ်ႉၶူင်း) ဢၼ်ၵၢႆႇၸူးၵၼ် မိူင်းတႆးပွတ်းဢွၵ်ႇတင်း ပွတ်းၸၢၼ်းၼၼ်ႉ သင်မီး ၵၢၼ်ၵဵပ်းငိုၼ်းရူတ်ႉ ၵႃး ၶၢမ်ႈၵႂႃႇမႃးၸိုင် တေဢဝ်လိူင်ႈ ၽွင်းလူင်ၾၢႆႇလႅၼ်လိၼ်လႄႈ ႁူမ်ႇလူမ်ႈလၢတ်ႈ။

Photo by – SHAN/ ၶူဝ်တႃႈၵေႃႈ(ၼမ်ႉၶူင်း)

မိူဝ်ႈဝၼ်းတီႈ 13/02/2019 ၼၼ်ႉ ယူႇတီႈဢူးတၢၼ်းထၢႆႉ ၽူႈတႅၼ်းသၽႃးၸႄႈမိူင်းၶဵတ်ႇလိူၵ်ႈတင်ႈ မၢႆ 2 ၸႄႈဝဵင်း ၵၢတ်ႇလေႃႉ တွင်ႈထၢမ်ၼႂ်းပၢင်ၵုမ်သၽႃးၸႄႈမိူင်းတႆး ဢၼ်ၸတ်းႁဵတ်းတီႈလုမ်းသၽႃးမိူင်းတႆး ၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်းၼၼ်ႉ တွင်ႈထၢမ် ၵဵဝ်ႇလူၺ်ႈလွင်ႈၵဵပ်းငိုၼ်းတီႈရူတ်ႉၵႃး ဢၼ်ၶၢမ်ႈၵႂႃႇမႃး တီႈၶူဝ်တႃႈၵေႃႈ (ၼမ်ႉၶူင်း) ၼၼ်ႉ ၵဵပ်းယွၼ်ႉသင် ၵွပ်ႈသင်လႄႈၵဵပ်း ၸဵမ်ၸိူဝ်းၼႆႉ။

- Subscription -

ဢူးတၢၼ်းထၢႆႉ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 2 ၸႄႈဝဵင်းၵၢတ်ႇလေႃႉ တွင်ႈထၢမ်ဝႃႈ “ တီႈၶူဝ်တႃႈ ၵေႃႈ(ၼမ်ႉၶူင်း) ၼၼ်ႉ မီးႁွင်ႈၵၢၼ်လူင်ပွင်ၸိုင်ႈ ၵဵပ်းငိုၼ်းတီႈရူတ်ႉၵႃး ဢၼ်ၶၢမ်ႈၵႂႃႇမႃး ၸိူဝ်းၼၼ်ႉ လွင်ႈၵဵပ်း ၼၼ်ႉ ၵဵပ်းတွၼ်ႈတႃႇၽႂ်။ လွင်ႈၵဵပ်းငိုၼ်းၼၼ်ႉ လူင်ပွင်ၸိုင်ႈၸႄႈမိူင်းပၼ်ၶႂၢင်ႉၵဵပ်းႁႃႉ၊ ဢမ်ႇပၼ်ၵဵပ်း။ လွင်ႈၵဵပ်း ငိုၼ်းၼၼ်ႉ မီးလွင်ႈၽဵင်ႇပဵင်းတႃႇလူင်ပွင်ၸိုင်ႈၸႄႈမိူင်းယူႇႁႃႉ။ ယဝ်ႉၵေႃႈ ဢဝ်ၶၢဝ်းယၢမ်းၸိူင်ႉႁိုဝ်သေ မၵ်းမၼ်ႈ ပၼ် ၶႂၢင်ႉၶၢမ်ႈၵႂႃႇမႃး” ဝႃႈၼႆ။

ၸဝ်ႈသိုၵ်းလူင် လႃႉဢူး ၽွင်းလူင်ၾၢႆႇလႅၼ်လိၼ်လႄႈ ႁူမ်ႇလူမ်ႈ ၸႄႈမိူင်းတႆး တွပ်ႇလၢတ်ႈၼႂ်းသၽႃးဝႃႈ “ တီႈၶူဝ် တႃႈၵေႃႈ (ၼမ်ႉၶူင်း) ဢၼ်ၵၢႆႇၸူးမိူင်းတႆးပွတ်းဢွၵ်ႇတင်း ပွတ်းၸၢၼ်းၼၼ်ႉ ဢမ်ႇဝႃႈၵႃး၊ ရူတ်ႉၶိူင်ႈၶၢမ်ႈၵႂႃႇမႃး ၼၼ်ႉ ၸဵမ်ႁွင်ႈၵၢၼ်လူင်ပွင်ၸိုင်ႈ၊ တပ်ႉသိုၵ်း ဢၼ်ပႂ်ႉတီႈၶူဝ်ၼၼ်ႉ တေဢမ်ႇလႆႈၵဵပ်းငိုၼ်းၶွၼ်ႇသင် လွင်ႈၼႆႉ လႆႈၸီႉသင်ႇၵႂႃႇႁွင်ႈၵၢၼ်ၽူႈမီးပုၼ်ႈၽွၼ်းဝႆႉယဝ်ႉ။ သင်မီးလွင်ႈၵဵပ်းငိုၼ်းတီႈရူတ်ႉၵႃးၶၢမ်ႈၵႂႃႇမႃးၸိုင် ၸွမ်းၼင်ႇ ပၵ်းပိူင်၊ မၢႆမီႈမီးၼၼ်ႉ တေပၼ်တူတ်ႈတၢမ်ႇ/ ဢဝ်လိူင်ႈလၢဝ်းၵႂႃႇ” ဝႃႈၼႆ။

တီႈၶူဝ်တႃႈၵေႃႈ(ၼမ်ႉၶူင်း) ၼၼ်ႉ ပိုတ်ႇဝႆႉ လၢၼ်ႇ/ၵဵတ်ႉၵူတ်ႇထတ်း မိူၼ်ၼင်ႇ ၾၢႆႇပလိၵ်ႈမၢၼ်ႈ၊ ၾၢႆႇႁူမ်ႇလူမ်ႈ သိုၵ်း၊ ပလိၵ်ႈၾၢႆႇရႃႇၸဝတ်ႈ(မှုခင်းရဲတပ်ဖွဲ့)၊ ပလိၵ်ႈၾၢႆႇၸွပ်ႇၶၢဝ်ႇ၊ ႁွင်ႈၵၢၼ်ၾၢႆႇၵူတ်ႇထတ်းၶိုၵ်ႉတွၼ်း၊ ႁွင်ႈၵၢၼ် ၾၢႆႇပႃႇမႆႉ၊ ပလိၵ်ႈၾၢႆႇယႃႈမဝ်းၵမ်လႄႈ ပလိၵ်ႈၾၢႆႇၵၢၼ်ၵႃႉၶၢႆၵူၼ်း ၸဵမ်ၸိူဝ်းၼႆႉ။

မိူဝ်ႈပီ 2016 လိူၼ်မၢတ်ႊၶျ် ဝၼ်းတီႈ 31 ၼၼ်ႉ ယူႇတီႈလူင်ပွင်ၸိုင်ႈမႂ်ႇ ၶိုၼ်ႈမႃးသေ ၵၢၼ်ၵဵပ်းငိုၼ်း ၶွၼ်ႇၵႂႃႇမႃး ၸွမ်းလၢၼ်ႇ/ ၵဵတ်ႉၸိူဝ်းၼၼ်ႉ ႁႂ်ႈလူတ်းယွၼ်ႇလူင်း တေဢမ်ႇလႆႈၵဵပ်းငိုၼ်းသင် ယူႇတီႈႁွင်ႈၵၢၼ်ၾၢႆႇၵေႃႇသၢင်ႈ ၸီႉ သင်ႇလူင်း တီႈၶူဝ်တႃႈၵေႃႈၼၼ်ႉ တေဢမ်ႇ ၵဵပ်းငိုၼ်းရူတ်ႉၵႃး ၶၢမ်ႈၵႂႃႇမႃးသင် ဝႃႈၼႆ။

Photo by – SHAN/ ၶူဝ်တႃႈၵေႃႈ(ၼမ်ႉၶူင်း)

ၸၢႆးဢွင်ႇ ၸဝ်ႈၵႃးတႃႈၶီႈလဵၵ်း – တူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ လႆႈလူင်းၸႅင်ႈ တီႈၶူဝ်တႃႈၵေႃႈၼႆႉ တင်းသွင်ၾၢႆႇၶႃႈယဝ်ႉ။ ၵႂႃႇၵေႃႈၸႅင်ႈမႃးၵေႃႈၸႅင်ႈ ၾၢႆႇပုၼ်ႉ၊ ၾၢႆႇၼႆႉ သဵင်ႈၶၢဝ်းယၢမ်းၼႃႇ။ လႆႈၸႅင်ႈၼႄ ၼႂ်းၵႃး ၼၼ်ႉ ၵူၼ်းၶီႇမႃးလၢႆၵေႃႉ၊ မၢႆရူတ်ႉ/ ၵႃး။ ယဝ်ႉၵေႃႈ မၢင်ပွၵ်ႈမႃး ၵူတ်ႇထတ်းၶူဝ်းပႃးၵေႃႈမီးပႃး။ ၵမ်ႈၼမ် ဢၼ်ၶဝ် ၵူတ်ႇထတ်းၶူဝ်းတႄႉ ၶဝ်တေၵူတ်ႇထတ်းၵႃးတၢင်ႇၵုၼ်ႇ။ ၼိုင်ႈတီႈလႂ် ႁဝ်းၶႃႈလႆႈပၼ်ငိုၼ်း 1,000 ပျႃး၊ မၢင်တီႈလႆႈ ပၼ် 2,000 ပျႃး။ ပေႃးမေႃလၢတ်ႈၵေႃႈ ဢမ်ႇလႆႈပၼ်ၼမ်။ သင်ဝႃႈ ဢမ်ႇမီးလွင်ႈၵဵပ်းငိုၼ်းၸိုင်ၵေႃႈၸူမ်း။ ၶၢဝ်းယၢမ်း ၵေႃႈ တေဢမ်ႇလႆႈသဵင်ႈ။ ၵႂႃႇငၢႆႈမႃးဝႆးထႅင်ႈ” ဝႃႈၼႆ။

ၶူဝ်တႃႈၵေႃႈၼႆႉ မီးၼႂ်းၵိင်ႇၽႄၸႄႈဝဵင်းၵႃလီႉ ၸႄႈဝဵင်းၵုၼ်ႁဵင် ပဵၼ်ၶူဝ်ၵၢႆႇၸူး မိူင်းတႆးပွတ်းၸၢၼ်းလႄႈ ပွတ်း ဢွၵ်ႇၶူင်း ဝႃႈၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း