ပႃႇတီႇႁူဝ်သိူဝ် SNLD လူင်းပိုၼ်ႉတီႈ ႁူပ်ႉထူပ်းၵူၼ်းမိူင်း ပၼ်ပိုၼ်ႉႁူႉ လွင်ႈပၵ်းပိူင်တီႈလိၼ် လႄႈ ၵဵပ်းသဵၼ်ႈၵၢင် ၸႂ် ၵူၼ်းမိူင်း လၢႆးမိုဝ်း ဢၼ်ဢမ်ႇႁၼ်လီ လွင်ႈပၵ်းပိူင်တီႈလိၼ် ဢၼ်လူင်ပွင်ၸိုင်ႈ ႁဵတ်းဢွၵ်ႇမႃးၼၼ်ႉ ဝႃႈၼႆ။

ယူႇတီႈငဝ်ႈငုၼ်းပႃႇတီႇႁူဝ်သိူဝ်သေ ပၼ်ပုၼ်ႈၽွၼ်း ၽူႈတႅၼ်းသၽႃးလႄႈ ၽူႈပွင်ၵၢၼ်ၼႂ်းပႃႇတီႇ ၸွမ်းၸႄႈဝဵင်း ၽႂ်မၼ်း ႁႂ်ႈလူင်းပိုၼ်ႉတီႈႁူပ်ႉထူပ်းသပ်းလႅင်း ပၼ်ပိုၼ်ႉႁူႉ ၵဵဝ်ႇလူၺ်ႈလွင်ႈပၵ်းပိူင်လိၼ်ပဝ်ႇ၊ လိၼ်ႁၢမ်း၊ လိၼ်လိူင်း ပၼ်ၵူၼ်းမိူင်းၼႂ်းၸိုင်ႈတႆး ပွတ်းဢွၵ်ႇ၊ ပွတ်းၸၢၼ်း လႄႈ ပွတ်းႁွင်ႇ တႃႇၶၢဝ်းတၢင်း 2 လိူၼ် ဝႃႈၼႆ။

ၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈ ပႃႇတီႇႁူဝ်သိူဝ် ၶဵတ်ႇလိူၵ်ႈတင်ႈမၢႆ 3 ၸႄႈတွၼ်ႈလႃႈသဵဝ်ႈ လၢတ်ႈ တီႈၽူႈတွႆႇႁွၵ်ႈဝႃႈ “ ပၵ်းပိူင် တီႈလိၼ်ပဝ်ႇ၊ လိၼ်ႁၢမ်း၊ လိၼ်လိူင်း ၼႆႉသမ်ႉ ပေႃးၵူၼ်းမိူင်းႁဝ်းၶႃႈတၢင်ႇယွၼ်းတီႈ လိၼ် ပဵၼ်တၢင်းၵၢၼ်သမ်ႉတေ လႆႈသင်၊ ပေႃးဢမ်ႇတၢင်ႇသမ်ႉတေသုမ်း၊ ပေႃးႁဝ်းဢမ်ႇတၢင်ႇ ၼႂ်းၶၢဝ်းတၢင်း 6 လိူၼ် သမ်ႉတေၽိတ်း တေတူၵ်းၶွၵ်ႈ ၶၢဝ်းတၢင်း 2 ပီ၊ 5 ပီ ယဝ်ႉၵေႃႈ ငိုၼ်း 5 သႅၼ်၊ 10 သႅၼ် မၼ်းပဵၼ်တႃႇၸဝ်ႈ ႁႆႈၸဝ်ႈၼႃးဢမ်ႇလီသေဢၼ်။ ၵွပ်ႈပိူဝ်ႈၸိူင်ႉၼၼ်လႄႈ တေႁဵတ်းႁိုဝ်ၼႆသေ ၸင်ႇလူင်းၵဵပ်းပႃးသၢႆမၢႆ လၢႆးမိုဝ်း ဢၼ်သၢၼ်ၶတ်း။ ယဝ်ႉၵေႃႈ ႁႃလၢႆးတၢင်း တႃႇတေၵႄႈလိတ်ႈပၼ်ႁႃ။ ပေႃးပဵၼ်မႃး တေႁဵတ်းႁိုဝ် ႁႃတၢင်းဢွၵ်ႇ ၸဝ်ႈႁႆႈၸဝ်ႈၼႃးၵူၼ်းမိူင်း ႁဝ်းလီဢွၼ်ၵၼ် တူင်ႉၼိုင် ႁူႉဝႆႉလွၵ်းလၢႆး ယွၼ်ႉဝႃႈ တေႃႈလဵဝ်ၼႆႉ ၼႂ်းမိူင်း တႆးႁဝ်း ပၼ်ႁႃလူင်ထႅင်ႈဢၼ်ၼိုင်ႈၵေႃႈ ၶဝ်ႈမႃး တၢင်းရူတ်ႉၾႆး ပေႃးပဵၼ်သင်မႃးသေလွင်ႈလွင်ႈ ၵူၼ်းမိူင်းႁဝ်း တေႁဵတ်းႁိုဝ် သၢၼ်ၶတ်း” ဝႃႈၼႆ။

ပႃႇတီႇႁူဝ်သိူဝ် လူင်းပိုၼ်ႉတီႈသပ်းလႅင်းပၼ်ပိုၼ်ႉႁူႉ ၸဝ်ႈႁႆႈၸဝ်ႈၼႃႈယဝ်ႉသေ ဢမ်ႇၵႃး လႆႈဢုပ်ႇၵုမ် ၵၼ်ပႃးတႃႇ ႁႃတၢင်းဢွၵ်ႇ ဢၼ်လႆႈႁူပ်ႉထူပ်း လွင်ႈယၢပ်ႇၽိုတ်ႇဝႆႉ ၸဵမ်မိူဝ်ႈၼၼ်ႉ ဝႃႈၼႆ။

ၸၢႆးဝၼ်းလႅင်းၶမ်း လၢတ်ႈဝႃႈ “ ထႅင်ႈလွင်ႈၼိုင်ႈ ဢၼ်ႁဝ်းၶႃႈ လူင်းပိုၼ်ႉတီႈၼႆႉ ပိူင်ယႂ်ႇမၼ်း လူင်းၵဵပ်းတၢင်းႁၼ် ထိုင်၊ ၵဵပ်းၵၢင်ၸႂ်လွင်ႈၵူၼ်းမိူင်း သၢၼ်ၶတ်း ပၵ်းပိူင်လိၼ်ပဝ်ႇ၊ လိၼ်ႁၢမ်း၊ လိၼ်လိူင်း ၼႆႉၵမ်းသိုဝ်ႈၼၼ်ႉယဝ်ႉ၊ ႁဝ်းၶႃႈ တေဢွၼ်ၵၼ်ၵဵပ်းသေ တၢင်ႇထိုင်ငဝ်ႈငုၼ်း ယူႇတီႈငဝ်ႈငုၼ်းသေ တေႁႃလၢႆးတၢင်း တၢင်ႇၵႂႃႇတီႈ လူင်ပွင် ၸိုင်ႈ တႃႇႁႂ်ႈၶဝ်ပေႃးတေၶိုၼ်းမႄးပၵ်းပိူင်တီႈလိၼ်ၼႆႉၶိုၼ်း” ဝႃႈၼႆ။

ပၵ်းပိူင်တီလိၼ်ပဝ်ႇ လိၼ်ႁၢမ်း လိၼ်လိူင်းၼႆႉ ယူႇတီႈလူင်ပွင်ၸိုင်ႈမိူင်းႁူမ်ႈတုမ် မၵ်းမၼ်ႈ မိူဝ်ႈဝၼ်းတီႈ 11/09/ 2018 ထိုင်မႃး ဝၼ်းတီႈ 30/10/2018 သမ်ႉ လူင်ပွင်ၸိုင်ႈပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်မႃး။

လွင်ႈမၢႆမီႈတီႈလိၼ် 2018 ဢွၵ်ႇမႂ်ႇၼႆႉ ယူႇတီႈတၢင်းၾၢႆႇလူင်ပွင်ၸိုင်ႈ ပိုၼ်ၽၢဝ်ႇဝႆႉ ၼႂ်းၶၢဝ်းတၢင်း 6 လိူၼ် ႁႂ်ႈဢွၼ် ၵၼ်ၵႂႃႇတၢင်ႇႁႂ်ႈယဝ်ႉ ဝႃႈၼႆ။