သိုၵ်းလူင်ပွင်ၸိုင်ႈမၢၼ်ႈ ဢၼ်ၵႂႃႇပၵ်းသဝ်း တူင်ႉၼိုင်တၢင်း မိူင်းယေႃ – မိူင်းၵႅတ်ႈ ၾၢႆႇဢွၵ်ႇ ဝဵင်းလႃႈသဵဝ်ႈၼၼ်ႉ ၶၢၼ်းၶျေႃးၵႃး၊ ၶျေႃးထူဝ်ႈ၊ ၶၢၼ်းမႆႉပူၵ်ႇ မႆႉၸိင် ႁႂ်ႈၵူၼ်းဝၢၼ်ႈသူင်ႇပၼ်ၶဝ်ၸႂ်ႉၵူႈဝၼ်း။
ဝၼ်းတီႈ 21/4/2020 မႃးၼႆႉ တပ်ႉသိုၵ်းလူင်ပွင်ၸိုင်ႈမၢၼ်ႈ တပ်ႉၶမယ 365 တႂ်ႈတပ်ႉမ 99 ဢၼ် ၵႂႃႇတူင်ႉၼိုင် ပၵ်းသဝ်းတၢင်းဢိူင်ႇမိူင်းၵႅတ်ႈ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇၼၼ်ႉ ၶၢၼ်း ၶျေႃးၵႃး/ထူဝ်ႈ/ရူတ်ႉၶိူင်ႈ ၵူၼ်းဝၢၼ်ႈ ၼႂ်းဢိူင်ႇမိူင်းၵႅတ်ႈ 4 လမ်း၊ ၸႂ်ႉတေႃႉတၢင်ႇၶူဝ်းၶွင် သူင်ႇၸူး တီႈတပ်ႉပၢင်သဝ်းၶဝ် တီႈဝၢၼ်ႈၶၢင် ပၢင်ႁႅဝ် ၼႂ်းၵႄႈ မိူင်းယေႃ – မိူင်းၵႅတ်ႈ။
သၢင်ႇၸၢႆးသၢမ် ၵူၼ်းမိူင်းၵႅတ်ႈ လၢတ်ႈတီႈၽူႈတွႆႇႁွၵ်ႈဝႃႈ- “ တႃႇၶဝ်ၸႂ်ႉ ၵူၼ်းဝၢၼ်ႈ လႆႈဢဝ်ရူတ်ႉ၊ ထူဝ်ႈ/ ရူတ်ႉၶိူင်ႈ မႃးပႂ်ႉတီႈဝတ်ႉလူင်မိူင်းၵႅတ်ႈၼႆႉၵူႈဝၼ်း ၸဝ်ႈၵႃး လမ်းၼိုင်ႈ ၶဝ်ၸႂ်ႉတၢင်ႇ ၶူဝ်းၶဝ် ၵႂႃႇပၢင်ႁႅဝ် ၸဵမ်မိူဝ်ႈဝၼ်းတီႈ 21/4/2020၊ ဝၼ်းတီႈ 23/4/2020 ၸင်ႇပွႆႇပၼ်ၶိုၼ်း ၸဵမ်ၵူၼ်းတင်းၵႃး”-ဝႃႈၼႆ။
တပ်ႉပၢင်ႁႅဝ် ၼႆႉ ၵူႈပွၵ်ႈ ပဵၼ်တပ်ႉၶၢင် ပျီႇတူႉၸိတ်ႉၶၢင် ၵွင်းၶႃး ပၵ်းသဝ်းတူင်ႉၼိုင်၊ တင်ႈတႄႇ သိုၵ်းလူင်ပွင် ၸိုင်ႈမၢၼ်ႈ ႁႃတၢင်းၽိတ်း ၶဝ်ႈယိုတ်း ႁူင်းႁုင်ယႃႈမဝ်းၵမ်တီႈငဝ်ႈငုၼ်း ၵွင်းၶႃး ၵူတ်ႉၶၢႆ မိူဝ်ႈႁၢင်ႈလိူၼ်ၾႅပ်ႊၿိဝ်ႊရီႊယဝ်ႉ တပ်ႉတီႈပၢင်ႁႅဝ်ၼႆႉၵေႃႈ သိုၵ်းမၢၼ်ႈပုတ်ႈပၵ်းယူႇသဝ်းမႃး တေႃႇထိုင်ဝၼ်းမိူဝ်ႈၼႆႉ။ ဢၼ်မႄးၵုမ်းလုမ်းလႃး လုၵ်းထႅင်ႉ လုၵ်းပဵမ်ႇ သုမ်ႉၶႃး ၸိူဝ်းၼႆႉ လူဝ်ႇသင်ၵေႃႈ ၶၢၼ်းဢဝ်တီႈၵူၼ်းဝၢၼ်ႈသဵင်ႈသဵင်ႈ။
ဢိင်ၼိူဝ်ၵူၼ်းမိူင်းၺႃးၸႂ်ႉၵိၼ်ႁႅင်းလၢႆၼႆႉသေ ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆးSHRF ၸၢႆးႁေႃသႅင် လၢတ်ႈဝႃႈ – ဢၼ်ၵူၼ်းမိူင်းႁဝ်းၺႃးယူႇၼႆႉ ပဵၼ်ပၼ်ႁႃၵၢၼ်မိူင်း ဢၼ်ယိုၼ်းယၢဝ်းမႃးႁိုင်၊ ပေႃးၾၢႆႇ သိုၵ်းမၢၼ်ႈ လူင်ပွင်ၸိုင်ႈမၢၼ်ႈ မီးၸႂ်ၽိူၵ်ႇၸိုၼ်ႈၶၢဝ်သႂ် ႁဵတ်းပၢင်ဢုပ်ႇဢူဝ်းၵၢၼ်မိူင်းၵႄႈလိတ်ႈ ပၼ်ႁႃၵွၼ်ႇ ၸင်ႇၵႄႈလိတ်ႈပၼ်ႁႃလႆႈ။ လၢႆးသိုၵ်းမၢၼ်ႈ ႁဵတ်းၼႆႉ ပေႃးဢဝ်ပိူင်သိုၵ်းလုမ်ႈၾႃႉဝႃႈ ၾၢႆႇသိုၵ်းမၢၼ်ႈ ပူၼ်ႉပႅၼ်မၢႆမီႈသိုၵ်းၶႃႈယဝ်ႉ – ဝႃႈၼႆ။
ဝၼ်းတီႈ 8/4/2020 ၵူၼ်းမိူင်းလႆႈသူင်ႇမႆႉပူၵ်ႇ 100 လႅမ်ႈ တၢင်းယၢဝ်း ဢမ်ႇလႆႈယွမ်း 5 ဝႃး၊ ဝၼ်းတီႈ 21/4/2020 လႆႈသူင်ႇထႅင်ႈ 100 လႅမ်ႈ။ မႆႉၸိင်ၵေႃႈ လႆႈသူင်ႇဝၢၼ်ႈလႂ် 10 လႅမ်ႈ။ ၸဵမ်မႆႉ ၸဵမ်ၶႃး ပႃးတွၵ်ႇ ၶၢၼ်းဢဝ်တီႈၵူၼ်းမိူင်းသဵင်ႈသဵင်ႈ ၵူၼ်းဝၢၼ်ႈလၢတ်ႈၼႄၼင်ႇၼႆ။
