Friday, March 29, 2024

ၵူၼ်းလုၵ်ႉမိူင်းထႆးပွၵ်ႈမိူင်းတႆး ထၢင်ႇထိူမ် ၶူဝ်ႊဝိတ်ႉ မီး 2 ၵေႃႉ ထုၵ်ႇၵုမ်းဝႆႉတီႈတႃႈၶီႈလဵၵ်း

Must read

ႁႅင်းၵၢၼ်ယၢၼ်မိူင်း လုၵ်ႉမိူင်းထႆးပွၵ်ႈမိူင်းတႆးၼၼ်ႉ ၸဝ်ႈၼႃႈတီႈတႃႈၶီႈလဵၵ်းၵူတ်ႇထတ်းႁၼ်ၾၢင်ႁၢင်ႈမိူၼ်ၶူဝ်ႊဝိတ်ႉ 19 မီးသွင်ၵေႃႉလႄႈ ယၢမ်းလဵဝ်လႆႈယႅၵ်ႈတူဝ်ၶဝ်သေ ယူတ်းယႃပၼ်၊ ပႂ်ႉတူၺ်းငဝ်းလၢႆးဝႆႉယူႇ။

Photo by – Owner/ ႁူင်းယႃလူင် ၸႄႈဝဵင်းတႃႈၶီႈလဵၵ်း

ဝၼ်းတီႈ 6/4/2020 ႁႅင်းၵၢၼ်မိူင်းႁူမ်ႈတုမ် ဢၼ်လုၵ်ႉမိူင်းထႆးပွၵ်ႈၶိုၼ်းတၢင်းလႅၼ်လိၼ်မႄႈသၢႆ -တႃႈၶီႈလဵၵ်း။ ၸဝ်ႈ ၼႃႈတီႈသူင်ႇၶၢမ်ႈတီႈၶူဝ် မိုတ်ႈၵိုဝ်း မၢႆ 2 သေမႃးယူႇလိုဝ်ႈသဝ်းဝႆႉ တႃႇပႂ်ႉတူၺ်းၶူဝ်ႊဝိတ်ႉ 14 ဝၼ်း တီႈႁူမ်ႈယဵၼ်မူဝ်း ၵူၵ်ႉဝိပသၼႃႇ (မိုးကုက်ဝိပသာနာ ရိပ်သာ) ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း တင်းမူတ်း မီး 195 ၵေႃႉ။

- Subscription -

ၸဝ်ႈၼႃႈတီႈၵူတ်ႇထတ်းပၢႆးယူႇလီပၼ် ၼႂ်းၸိူဝ်းၶဝ်ၼၼ်ႉ ထူပ်းႁၼ် သွင်ၵေႃႉ ဢၼ်မိူၼ်ငဝ်းလၢႆးၶူဝ်ႊဝိတ်ႉ 19 ယၢမ်းလဵဝ် သူင်ႇတူဝ်ၶဝ်သွင်ၵေႃႉဝႆႉတီႈႁူင်းယႃလူင်တႃႈၶီႈလဵၵ်းသေ လႆႈသူင်ႇၼမ်ႉမုၵ်ႈၼမ်ႉလၢႆးၵူတ်ႇထတ်းဝႆႉ ဝႃႈၼႆ။

Dr. သူၺ်ႇဝိၼ်း ၽူႈၵွၼ်းႁူင်းယႃ ဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းဢၼ်ထၢင်ႇထိူမ်သေ ၵူတ်ႇထတ်းပႂ်ႉ တူၺ်းဝႆႉတီႈႁူင်းယႃၼႆႉ တင်းမူတ်းမီး 3 ၵေႃႉ။ ၼႂ်းၼၼ်ႉ တႃႇၵေႃႉၼိုင်ႈ လႆႈၵႂၢမ်းတွပ်ႇမႃး ယဝ်ႉဝႃႈဢမ်ႇၸပ်းၸိူဝ်ႉ မႅင်း။ တႃႇသွင်ၵေႃႉၼႆႉတႄႉ တိုၵ်ႉသူင်ႇ ၵူတ်ႇထတ်းဝႆႉယူႇ” ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 25/3/2020 ၼၼ်ႉ ႁႅင်းၵၢၼ်ၽူႈၸၢႆးၵေႃႉၼိုင်ႈလုၵ်ႉၵုင်းထဵပ်ႈ မိူင်းထႆး ပွၵ်ႈၶိုၼ်းမိူင်းတႆး ၊ ပဵၼ် ၵူၼ်းၸႃႇတိ ၵျွၵ်ႉမႄး ၊ မၼ်းၸၢႆးဢမ်ႇယူႇလီလႄႈထုၵ်ႇၾၢႆႇယူႇလီၸႄႈဝဵင်းၵုမ်းတူဝ် ၵူတ်ႇထတ်းႁၼ်တိတ်းၸပ်းၸိူဝ်ႉ မႅင်းတၢင်းပဵၼ်လႄႈ ပဵၼ်ၵူၼ်းမိူင်းတႆးၵေႃႉႁႅၵ်ႈ ၵေႃႉမီးၸိူဝ်ႉမႅင်းဝႆးရတ်ႉသ် ၶူဝ်ႊဝိတ်ႉ 19 ။

မိူဝ်ႈဝႃး ဝၼ်းတီႈ 8/4/2020 ယူႇတီႈႁွင်ႈၵၢၼ်ပၢႆးယူႇလီလႄႈ ၾၢႆႇလဵၼ်ႈႁႅင်း ပိုၼ်ၽၢဝ်ႇဢွၵ်ႇဝႃႈ ၵူၼ်းၸပ်းတၢင်းပဵၼ် ၶူဝ်ႊဝိတ်ႉ 19 ၽူႈယိင်းဢႃယု 63 ပီ ဢၼ်ယူတ်းယႃတူဝ်ဝႆႉတီႈ ႁူင်းယႃဝေႇပႃႇၵီႇ ဝဵင်းတႃႈၵုင်ႈ လႄႈ ၽူႈၸၢႆး ဢႃယု 47 ပီ ဢၼ်ယူတ်းယႃတူဝ်ယူႇဝႆႉတီႈ ႁူင်းယႃလူင်ပျီႇ တိူင်းပႃႇၵိူဝ်ၼၼ်ႉ လူႉတၢႆ။

တေႃႈလဵဝ် ၵူၼ်းၸပ်းတၢင်းပဵၼ်ၶူဝ်ႊဝိတ်ႉ – 19 ၼႂ်းမိူင်းႁူမ်ႈတုမ် တင်းမူတ်းမီး 22 ၵေႃႉ၊ လူႉတၢႆၵႂႃႇ 3 ၵေႃႉ။

တေႃႈလဵဝ် ၵူၼ်းၸပ်းတၢင်းပဵၼ် ၶူဝ်ႊဝိတ်ႉ 19 တၢင်းလုမ်ႈၾႃႉၼႆႉ မီး 1,518,719 ၵေႃႉ၊ တၢႆ 88,502 ၵေႃႉလႄႈ ယႃ ၶႅၼ်း 330,589 ၵေႃႉ ယူႇတီႈႁွင်ႈၵၢၼ်ပၢႆးယူႇလီလုမ်ႈၾႃႉ worldometers ဢွၵ်ႇဝႆႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း