ၽူႈၸၢႆး ၵူၼ်းၵျွၵ်ႉမႄး ဢၼ်တိတ်းၸပ်းတၢင်းပဵၼ်ၶူဝ်ႊဝိတ်ႉ 19 ၼၼ်ႉ ယၢမ်းလဵဝ်ပၢႆးယူႇလီၶႅမ်ႉလႅပ်ႈမႃးယဝ်ႉသေ ပေႃႈမႄႈပီႈၼွင်ႉမၼ်းၸၢႆး ၵူၼ်းလူင်ဝၢၼ်ႈဢိူင်ႇလႄႈၽူႈမီးပုၼ်ႈၽွၼ်းၸွႆႈထႅမ်တူၺ်းလူ လွင်ႈယူႇ လွင်ႈၵိၼ်ဝႆႉယူႇ ဝႃႈၼႆ။
ၸၢႆးထုၼ်းဝိၼ်း ၽူႈတႅၼ်းသၽႃး ၸႄႈမိူင်းၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်း ပဵၼ်ဢၼ်မီးတီႈႁူင်းယႃ လႃႈသဵဝ်ႈၼၼ်ႉ ငိၼ်းဝႃႈတႄႉ ငဝ်းလၢႆးမၼ်းၶႅမ်ႉလႅပ်ႈလီၶိုၼ်ႈမႃးယူႇ” ဝႃႈၼႆ။
ၽူႈၸၢႆး ဢႃယု 24 ပီၵူၼ်းဝၢၼ်ႈၼမ်ႉႁူး ၸႄႈဝဵင်းၵျွၵ်ႉမႄးၼႆႉ လုၵ်ႉမိူင်းထႆး ၵုင်းထဵပ်ႈပွၵ်ႈမႃး မိူဝ်ႈဝၼ်းတီႈ 25/3/2020 မႃးၼွၼ်းတီႈတႃႈၶီႈလဵၵ်း 2 ၶိုၼ်း၊ ထိုင်မႃး ဝၼ်းတီႈ 28/3/2020 ၶီႇၶိူင်ႈမိၼ်ၵႂႃႇလူင်းဝဵင်းလိူဝ်ႇသေ လုၵ်ႉဝဵင်းလိူဝ်ႇ ၶီႇၵႃးသုၼ်ႇတူဝ်ပွၵ်ႈၵျွၵ်ႉမႄး။ မၼ်းၸၢႆးဢမ်ႇယူႇလီလႄႈ သူင်ႇယူတ်းယႃတူဝ်တီႈႁူင်းယႃ ၵူတ်ႇထတ်းမႅင်း ၶူဝ်ႊဝိတ်ႉ-19။ လႆႈႁူႉၶေႃႈတွပ်ႇမိူဝ်ႈဝၼ်းတီႈ 30/3/2020 ဝႃႈ တိတ်းၸပ်းၸိူဝ်ႉမႅင်း ။ လႆႈသူင်ႇယူတ်းယႃတူဝ် တီႈႁူင်းယႃလူင်လႃႈသဵဝ်ႈ။
ယူႇတီႈၽူႈမီးပုၼ်ႈၽွၼ်းၵေႃႈ ႁၢမ်ႈပေႃႈမႄႈၵူၼ်းႁိူၼ်းမၼ်းၸၢႆး ပႃးၸဵမ်ၵူၼ်းၼႂ်း ဝၢၼ်ႈၼမ်ႉႁူး တင်းမူတ်း ဢွၵ်ႇၼွၵ်ႈ ႁိူၼ်း။
လုင်းၸၢႆးၵူး ၸုမ်းၼမ်ႉၶူင်း ၶႅၵ်ႇလီပၢင်ၸႃႉ ၵျွၵ်ႉမႄး ဢၼ်ၵႂႃႇပၼ်တၢင်းၸွႆႈထႅမ်တီႈဝၢၼ်ႈၼမ်ႉႁူးၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ ပီႈၼွင်ႉမၼ်းၸၢႆးလႄႈ ၵူၼ်းဝၢၼ်ႈ တီႈဝၢၼ်ႈၼမ်ႉႁူး ၸိူဝ်းၼၼ်ႉ ၽူႈမီးပုၼ်ႈၽွၼ်း ပႂ်ႉတူၺ်းပၼ်ဝႆႉယူႇၶႃႈ။ လွင်ႈၽိူမ်ႉထႅမ်ၶူဝ်းၵိၼ်ၶူဝ်းယမ်ႉ တႃႇၵူၼ်းၼႂ်းဝၢၼ်ႈၵေႃႈ ႁဝ်းၶႃႈ ၵႂႃႇၸွႆႈထႅမ်ဝႆႉယူႇ။ ၵူၼ်းႁိူၼ်းမၼ်းၸၢႆးတႄႉ ဢမ်ႇပၼ်ဢွၵ်ႇၵႂႃႇလႂ်ၶႃႈ။ ၼင်ႇႁိုဝ် တေဢမ်ႇတၢပ်ႈဢွၵ်ႇႁိူၼ်းၼၼ်ႉ ႁဝ်းၶႃႈပၼ်ဝႆႉ ႁူဝ်မီႇၼမ်ႉမၼ်းတၢင်းၵိၼ် ၶဝ်ႈသၢၼ် ၸိူဝ်းၼႆႉဝႆႉ” ဝႃႈၼႆ။
ဝၢၼ်ႈၼမ်ႉႁူးၼႆႉ တင်းမူတ်းမီးလင်ႁိူၼ်း 38 လင် ယူႇၼႂ်းဢိူင်ႇၶူဝ်မုင်း ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ။
တေႃႈလဵဝ် ၵူၼ်းၸိူဝ်းလုၵ်ႉတီႈၵႆ ၼွၵ်ႈမိူင်း မိူၼ်ၼင်ႇ မိူင်းထႆး၊ မိူင်းၶႄႇ ပွၵ်ႈမႃးၶိုၼ်းႁိူၼ်းၽႂ်မၼ်း တီႈၵျွၵ်ႉမႄးၼႆႉ မီး 270 ၵေႃႉယဝ်ႉ။ ၸိူဝ်းၶဝ်ထုၵ်ႇႁွင်ႉပႂ်ႉတူၺ်းငဝ်းလၢႆး တၢင်းပဵၼ် တီႈႁူင်းႁဵၼ်းၸၼ်ႉသုင် မၢႆ 1 တင်း မၢႆ 3 လႄႈ တီႈ ႁွင်ႈလဵၼ်ႈႁႅင်း ၸိူဝ်းၼႆႉ။
လုင်းၸၢႆးၵူး လၢတ်ႈဝႃႈ “ ၸဵမ်ၵူၼ်းမိူဝ်း ၵူၼ်းမႃး တေႃႇထိုင်မိူဝ်ႈဝႃးၼႆႉ တင်းမူတ်းမီးဝႆႉ 270 ၵေႃႉ။ ဢၼ်ၵိုတ်းဝႆႉယၢမ်းလဵဝ် ပဵၼ်ၵူၼ်းၸိူဝ်းယူႇၸွမ်းၼႂ်းၶႅပ်ႇဝဵင်းၼႆႉၵူၺ်း။ ၵူၼ်းတၢင်းၼွၵ်ႈ တႄႉ ၸဝ်ႈၼႃႈတီႈၶဝ်ၵူတ်ႇထတ်းပၼ်သေ ပေႃးဢမ်ႇမီးသၢႆငၢႆတေပဵၼ်ၶူဝ်ႊဝိတ်ႉ – 19 တႄႉ မိူဝ်းၵႂႃႇယူႇဝၢၼ်ႈၽႂ်မၼ်းၶိုၼ်းယဝ်ႉ ” ဝႃႈၼႆ။
တေႃႈလဵဝ် ၵူၼ်းၸပ်းတၢင်းပဵၼ်ၶူဝ်ႊဝိတ်ႉ – 19 ၼႂ်းမိူင်းႁူမ်ႈတုမ် တင်းမူတ်းမီး 22 ၵေႃႉ၊ လူႉတၢႆၵႂႃႇ 3 ၵေႃႉ ။ ၼႂ်းၵူၼ်း မီးၸိူဝ်ႉမႅင်းၼၼ်ႉ ပႃးၵူၼ်းၵျွၵ်ႉမႄး ဝႆႉၵေႃႉၼိုင်ႈ ။
