လူင်ပွင်ၸိုင်ႈမိူင်းတႆး ဢွၵ်ႇၶေႃႈပိုၼ်ၽၢဝ်ႇ သင်ႇဢိုတ်း/ပိၵ်ႉ ရူတ်ႉၵႃး ႁပ်ႉၸၢင်ႈ တၢင်ႇၵူၼ်း ၸူဝ်ႈၶၢဝ်း ၼႂ်းၶၢဝ်းတၢင်း သွၼ်းၼမ်ႉလိူၼ်ႁႃႈ တႃႇ 14 ဝၼ်း။
လူင်ပွင်ၸိုင်ႈ မိူင်းတႆး ဢွၵ်ႇလိၵ်ႈပိုၼ်ၽၢဝ်ႇ မိူဝ်ႈၼႆႉ ဝၼ်းတီႈ 6/4/2020 ဝႃႈ – တႃႇၵႅတ်ႇၶႄ ႁႄႉၵင်ႈ ၼင်ႇႁိုဝ် ၸိူဝ်ႉမႅင်း ၶူဝ်ႊဝိတ်ႉ 19 တေဢမ်ႇၽႄႈလၢမ်းၼႂ်းပိုၼ်ႉတီႈ တီႈလႂ်တီႈၼိုင်ႈ ဢမ်ႇၼၼ် ၼမ်လိူဝ်တီႈၼိုင်ႈ (ၽႄႈလၢမ်းၸွတ်ႇတူဝ်ႈ) ၼၼ်ႉ ယူႇတီႈလူင်ပွင်ၸိုင်ႈ သင်ႇႁၢမ်ႈ -(1) လူတ်းယွမ်းၵၢၼ်ဢွၵ်ႇၶၢဝ်းတၢင်း၊ (2) ၼင်ႇႁိုဝ် ၶူဝ်းၵိၼ်ၶူဝ်းယမ်ႉလႄႈ ယႃႈယႃ ၼမ်ႉမၼ်းၶိူင်ႈၸၢၵ်ႈ တေဢမ်ႇၶၢတ်ႇၼၼ်ႉ ၵၢၼ်တေႃႉသူင်ႇၶူဝ်းၵုၼ်ႇတႄႉ တေသိုပ်ႇႁဵတ်းယူႇဢမ်ႇထၢတ်ႇ၊ (3) ႁႂ်ႈပိၵ်ႉဢိုတ်းဝႆႉ ႁူင်းႁႅမ်း / ႁူင်းလိုဝ်ႈသဝ်း ၊ (4) ႁၢမ်ႈၵႂႃႇဢႅဝ်ႇယဵမ်ႈတီႈ သူၼ်မွၵ်ႇ၊ ပၢင်ႇလဵၼ်ႈႁႅင်း၊ ၼမ်ႉတူၵ်းတၢတ်ႇ လႄႈ တီႈၵူၼ်းဢႅဝ်ႇယဵမ်ႈၼမ်- ႁႂ်ႈႁဵတ်းၸွမ်းၶေႃႈသင်ႇ လူင်ပွင်ၸိုင်ႈ ဝႃႈၼႆ။
Dr. မဵဝ်းထုၼ်း ၽွင်းလူင်ၾၢႆႇတူင်ႇဝူင်းၵူၼ်း ၸုမ်းလူင်ပွင်ၸိုင်ႈမိူင်းတႆး လၢတ်ႈတီႈၽူႈတွႆႇႁွၵ်ႈဝႃႈ “ ၼင်ႇႁိုဝ် တေၵုမ်းၵမ်လႆႈ တၢင်းပဵၼ်ၶူဝ်ႊဝိတ်ႉ 19 ဢၼ်လၢမ်းၽႄႈယူႇၼၼ်ႉ တေလႆႈ ဢိုတ်း/ ပိၵ်ႉၵိုတ်းဝႆႉ ၵမ်းၼိုင်ႈယူႇ လွင်ႈရူတ်ႉၵႃးႁပ်ႉၸၢင်ႈတၢင်ႇၵူၼ်းလႄႈ လွင်ႈႁၢမ်ႈၵူၼ်းမိူင်း ဢွၵ်ႇၼွၵ်ႈႁိူၼ်းၼႆႉ” ဝႃႈၼႆ။
တီႈၼႂ်းလိၵ်ႈပိုၼ်ၽၢဝ်ႇလူင်ပွင်ၸိုင်ႈမိူင်းတႆးၼၼ်ႉ ယင်းသႂ်ႇဝႆႉပႃးဝႃႈ – ႁၢမ်ႈၵူၼ်းမိူင်း ဢွၵ်ႇၼွၵ်ႈႁိူၼ်း၊ ပေႃးမီးၵၢၼ်လမ်ႇလွင်ႈလိူဝ်ႁႅင်း ဢမ်ႇဢွၵ်ႇဢမ်ႇလႆႈ ၸင်ႇၵွႆႈဢွၵ်ႇ၊ ပေႃးဢွၵ်ႇၵေႃႈ တေလႆႈၽႃႈတူမ်းသူပ်းတူမ်းပၢၵ်ႇသေၸင်ႇဢွၵ်ႇ – ယိူင်းၸူးတႃႇႁႂ်ႈၵူၼ်းမိူင်းလႆႈလီသေ ၸင်ႇလႆႈပိုၼ်ၽၢဝ်ႇယွၼ်းတၢင်းႁူမ်ႈမိုဝ်း ၸူးၵူၼ်းမိူင်းၵူႈၵေႃႉ – ဝႃႈၼႆ။
Dr. ၼိၼ်းဢီးၽိဝ်ႇ ၵႅမ်ၽူႈၸီႉသင်ႇ ႁွင်ႈၵၢၼ်ပၢႆးယူႇလီ ၸႄႈမိူင်း လၢတ်ႈတီႈၽူႈတွႆႇႁွၵ်ႈဝႃႈ “ သင်ဝႃႈ ၵူၼ်းမိူင်းယူႇၼႂ်းႁိူၼ်းယေး ၽႂ်မၼ်းၸိုင် ၸိူဝ်ႉမႅင်းတၢင်းပဵၼ်ဢၼ်ၽႄႈလၢမ်းႁၢဝ်ႈႁႅင်းၼႆႉ တိုၼ်းတေ လူတ်းယွမ်းလူင်းၵမ်းလဵဝ်ယဝ်ႉ။ ယွၼ်ႉၼၼ်လႄႈ ၶႂ်ႈႁႂ်ႈၵူၼ်းမိူင်း ဢွၼ်ၵၼ်ယူႇဝႆႉၼႂ်းႁိူၼ်းယေးၽႂ်မၼ်းၶႃႈ” ဝႃႈၼႆ။
ယွၼ်ႉဝႃႈ ၸမ်ထိုင်မႃး လိူၼ်ႁႃႈသွၼ်းၼမ်ႉယဝ်ႉလႄႈ တေဢွၼ်ၵၼ်လိုဝ်ႈၵၢၼ်ၼမ်၊ ပေႃးလိုဝ်ႈၵၢၼ်သမ်ႉ တေဢွၼ်ၵၼ်ၵႂႃႇဝႆႈၽြႃး ဢႅဝ်ႇလႄႇတႂ်ႈတႂ်ႈၼိူဝ်ၼိူဝ်လႄႈ ယူႇတီႈလူင်ပွင်ၸိုင်ႈ မိူင်းတႆး ၸင်ႇလႆႈႁၢမ်ႈဝႆႉၵွၼ်ႇ – ဝႃႈၼႆ။
ယၢမ်းလဵဝ် ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ် ၶူဝ်ႊဝိတ်ႉ -19 ၼႂ်းမိူင်းႁူမ်ႈတုမ် မီး 21 ၵေႃႉ။ ၼႂ်းၸိုင်ႈတႆး မီး ၵေႃႉ ႞ ။
