တေႃႈထိုင်ႁူဝ်လိူၼ်ဢေႊပရိူဝ်ႊၼႆႉမႃး ၵူၼ်းၸပ်းတၢင်းပဵၼ် ၶူဝ်ႊဝိတ်ႉ 19 တၢင်းလုမ်ႈၾႃႉ မီးၵႂႃႇ 1 လၢၼ်ႉပၢႆယဝ်ႉ ယူႇ တီႈႁွင်ႈၵၢၼ် ပႂ်ႉတူၺ်းတၢင်းပဵၼ်ၶူဝ်ႊဝိတ်ႉ 19 ၼႂ်းလုမ်ႈၾႃႉ ပိုၼ်ၽၢဝ်ႇဢွၵ်ႇဝႆႉ။
မိူဝ်ႈၼႆႉ ဝၼ်းတီႈ 3/4/2020 ယၢမ်းဝၢႆးဝၼ်း ယူႇတီႈႁွင်ႈၵၢၼ်ပႂ်ႉတူၺ်းတၢင်းပဵၼ်ၶူဝ်ႊဝိတ်ႉ 19 တင်းလုမ်ႈၾႃႉ worldometers ဢွၵ်ႇဝႆႉဝႃႈ တေႃႈလဵဝ် ၵူၼ်းၸပ်းတၢင်းပဵၼ်ၶူဝ်ႊဝိတ်ႉ 19 တင်းလုမ်ႈၾႃႉၼႆႉ မီးၵႂႃႇ 1,017,567 ၵေႃႉ၊ တၢႆ 53,249 ၵေႃႉ၊ ယူတ်းယႃဝႆႉ 751,101 ၵေႃႉလႄႈ ယႃၶႅၼ်းၶိုၼ်း 213,217 ၵေႃႉ ဝႃႈၼႆ။
ယၢမ်းလဵဝ် ၼႂ်းမိူင်းႁူမ်ႈတုမ်ၵေႃႈ မီးၵူၼ်းၸပ်းတၢင်ပဵၼ်ၶူဝ်ႊဝိတ်ႉ 19 ဝႆႉ တင်းမူတ်းမီးၵႂႃႇ 20 ၵေႃႉ။ ၼႂ်းၼၼ်ႉ တၢႆၵႂႃႇယဝ်ႉၵေႃႉၼိုင်ႈ။ ၼႂ်းမိူင်းတႆး မီးၵူၼ်းတိတ်းၸပ်းၵေႃႉၼိုင်ႈ ဝႃႈၼႆ။
ၼွၵ်ႈလိူဝ်ၼၼ်ႉ ၼႂ်းမိူင်းတႆးလၢႆလၢႆၸေႈဝဵင်း တၢမ်းပၵ်းပိူင် ၵူတ်ႇထတ်း ၵူၼ်းၶဝ်ႈဢွၵ်ႇၵႂႃႇမႃးႁၢဝ်ႈႁႅင်း။ တၢမ်းဝၢင်းႁဵတ်းဢွင်ႈတီႈဝႆႉပၼ် တႃႇၽူႈပႂ်ႉတူၺ်းငဝ်းလၢႆး 14 ဝၼ်း။ ပိူင်လူင်ပဵၼ်တႃႇၵူၼ်းလုၵ်ႉတီႈၵႆ ပႆတီႈယၢဝ်းမႃး။
ၸၢႆးၸၢမ်ႇမိူင်း ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းၵေးသီး လၢတ်ႈတီႈၽူႈတွႆႇႁွၵ်ႈ မိူဝ်ႈဝၼ်းတီႈ 31 လိူၼ်မၢတ်ႉၶျ်ၼၼ်ႉဝႃႈ “ ၼႂ်းတူင်ႇဝဵင်းၵေးသီးႁဝ်းၶႃႈတႄႉ တမ်းဝႆႉပိူင်မၼ်းၵူႈဢိူင်ႇ၊ ၵူႈဝၢၼ်ႈမူတ်းယဝ်ႉ။ သင်ဝႃႈ လုၵ်ႉ တၢင်းမိူင်းထႆး၊ မိူင်းၶႄႇမႃးၸိုင် တေလႆႈၵႂႃႇယူႇဝႆႉဢွင်ႈတီႈဢၼ်ႁဝ်းၶႃႈႁဵတ်းဝႆႉ တႃႇၶၢဝ်းတၢင်း 14 ဝၼ်း။ သင်ဝႃႈ ပေႃး ပဵၼ်ၵူၼ်းလုၵ်ႉတၢင်းမိူင်းမၢၼ်ႈ၊ ၼႂ်းမိူင်းမႃးၸိုင် တေလႆႈယူႇဝႆႉၼႂ်ႁိူၼ်းယေးၽႂ်မၼ်း တေဢမ်ႇလႆႈဢွၵ်ႇၵႂႃႇထုၵ်းထုၺ် ၸွမ်းၽႂ် တႃႇၶၢဝ်းတၢင်း 14 ဝၼ်း” ဝႃႈၼႆ။
ၼွၵ်ႈလိူဝ်သေၼၼ်ႉ တွၼ်ႈတႃႇတေႁႄႉၵၢင်ႈလႆႈ ၵူၼ်းပွၵ်ႈ တၢင်ႇဝၢၼ်ႈတၢင်ႇမိူင်း မိူၼ်ၼင်ႇ မိူင်းထႆး၊ မိူင်းၶႄႇ ပေႃး တေဢမ်ႇၸၢင်ႈလၵ်ႉၶဝ်ႈယူႇၼႂ်းဝၢၼ်ႈသေ ႁႂ်ႈယူႇဝႆႉၼွၵ်ႈဝၢၼ်ႈ တႃႇၶၢဝ်းတၢင်း 14 ဝၼ်းၼၼ်ႉ ၼႂ်းမိူင်းတႆးၵမ်ႈၼမ် ဢွၼ်ၵၼ်ႁဵတ်းႁူဝ်ႉ ႁၢမ်ႈၵူၼ်းတင်းၼွၵ်ႈၶဝ်ႈဝၢၼ်ႈ ၸဵမ်ၸိူဝ်းၼႆႉ။
ၸၢႆးဢွင်ႇၶမ်း ၽူႈၵွၼ်းဢိူင်ႇၼွင်လႅင် ဝဵင်းပၢင်လူင် လၢတ်ႈတီႈၽူႈတွႆႇႁွၵ်ႈ မိူဝ်ႈႁၢင်လိူၼ်မၢတ်ႉၶျ်ၼၼ်ႉဝႃႈ “ တီႈဢိူင်ႇ ၼွင်လႅင်ႁဝ်းၶႃႈၵေႃႈ ဢွၼ်ၵၼ်ႁဵတ်းႁူဝ်ႉလွမ်ႉဝႆႉယဝ်ႉ ၵူဝ်ၵူၼ်းလုၵ်ႉတၢင်းမိူင်းထႆးမႃးၼၼ်ႉ လၵ်ႉၶဝ်ႈမႃးယူႇ ၼႂ်းဝၢၼ်ႈ။ ၵူဝ်ဢမ်ႇႁဵတ်းၸွမ်းပၵ်းပိူင် ဢၼ်ႁဝ်းၶႃႈႁဵတ်းဝႆႉ ။ ပေႃးပဵၼ်မႃး ၵူဝ်မၼ်းယၢပ်ႇၶႃႈ။ ယွၼ်ႉဝႃႈ တီႈ ဢိူင်ႇၼွင်လႅင်ႁဝ်းၶႃႈၼႆႉ ၵူၼ်းၵႂႃႇႁဵတ်းၵၢၼ်တၢင်းမိူင်းထႆးသေ ပွၵ်ႈမႃးၼႆႉ ၶႂ်ႈဝႃႈမီးၼမ်ဝႆႉၶႃႈဢေႃႈ” ဝႃႈၼႆ။
ယွၼ်ႉၼၼ်လႄႈ ၼင်ႇႁိုဝ် တၢင်းပဵၼ်ၶူဝ်ႊဝိတ်ႉ 19 ၼႆႉ ပေႃးတေဢမ်ႇလၢမ်းၽႄႈၼႂ်းမိူင်းတႆးႁၢဝ်ႈႁႅင်းၼၼ်ႉ ယူႇတီႈ ႁွင်ႈၵၢၼ်လူင်ပွင်ၸိုင်ႈ၊ ၸုမ်းတူင်ႇဝူင်းၵူၼ်းပရႁိတ၊ ၽူႈတႅၼ်းသၽႃးလႄႈ ၸဝ်ႈၼႃႈတီႈ ၸုမ်းယိပ်းၵွင်ႈၵၢင်ႇ ၸဵမ် ၸိူဝ်းၼႆႉ ဢွၼ်ၵၼ်လူင်းပိုၼ်ႉတီႈပၼ်ပိုၼ်းႁူႉ ၵူတ်ႇထတ်းတႅၵ်ႈလူမ်းမႆႈ ၵူၼ်းမိူင်း ၸွမ်းၼႂ်းၼႃႈတီႈၽႂ်မၼ်းသေ ယဝ်ႉ ၵေႃႈပၼ်ပိုၼ်ႉႁူႉ လွင်ႈလွၵ်းလၢႆးႁႄႉၵင်ႈ တၢင်းပဵၼ်ၶူဝ်ႊဝိတ်ႉ 19 ၵႂႃႇ ။
လိူဝ်ၼၼ်ႉ ၵူၼ်းမိူင်းတႆး ၸုမ်းတူင်ႉၼိုင်တူင်ႇဝူင်းၵူၼ်းၸဵမ်ၼႂ်းမိူင်းတႆးလႄႈ ၸွမ်းလႅၼ်လိၼ်တႆးထႆး ယင်းတုၵ်းယွၼ်းဝႃႈ ဢမ်ႇၶႂ်ႈႁႂ်ႈ ႁႅင်းၵၢၼ်တႆးၼႂ်းမိူင်းထႆး ဢွၵ်ႇၶၢဝ်းတၢင်းၵႂႃႇမႃး၊ ပႃးၸဵမ်လွင်ႈပွၵ်ႈႁိူၼ်းၸိူဝ်းၼႆႉ။ ၵူဝ်ပႃးၵၼ်တိတ်းၸပ်းၸိူဝ်ႉမႅင်းၶူဝ်ႊဝိတ်ႉ-19 မူတ်း- ဝႃႈၼႆ။
