တႄႇဢဝ်ဝၼ်းမိူဝ်ႈၼႆႉၵႂႃႇ လိူဝ်သေၵူၼ်းမိူင်းထႆး – မိူင်းႁူမ်ႈတုမ်မၢၼ်ႈ ဢမ်ႇပၼ်ၵူၼ်းမိူင်းတီႈသၢမ်ၶဝ်ႈဢွၵ်ႇၵႂႃႇမႃး လတ်းၽၢၼ်ႇ ၶူဝ်ၽၵ်းတူမိူင်း ဝူင်ႈၵၢင်တႃႈၶီႈလဵၵ်း မႄႈသၢႆ။
တႄႇဢဝ်ဝၼ်းတီႈ 19/3/2020 ၸဝ်ႈၼႃႈတီႈသွင်ၸိုင်ႈမိူင်း မိူင်းထႆး၊ မိူင်းႁူမ်ႈတုမ်မၢၼ်ႈလႆႈၸႂ်တူၵ်းလူင်းဢမ်ႇပၼ် ၵူၼ်းမိူင်းတီႈသၢမ် ၶၢမ်ႈၵႂႃႇမႃး တီႈၶူဝ်မိုတ်ႈၵိုဝ်း လႅၼ်လိၼ် တႆး – ထႆး မၢႆ 1 ။ ပေႃးပဵၼ်ၵူၼ်းမိူင်းထႆး၊ မိူင်းႁူမ်ႈတုမ် မၢၼ်ႈၸိူဝ်းၼၼ်ႉ တေပၼ်ၵူၼ်းပိုၼ်ႉတီႈ ဢၼ်ယိပ်းဝႂ်ၸူဝ်ႈၶၢဝ်း 7 ဝၼ်းၼၼ်ႉတႄႉ ၶၢမ်ႈၵႂႃႇမႃးလႆႈယူႇ ဝႃႈၼႆ။
ၽူႈမီးပုၼ်ႈၽွၼ်း တီႈတႃႈၶီႈလဵၵ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “တႄႇဢဝ် မိူဝ်ႈၼႆႉ ဝၼ်းတီႈ 19 ၵႂႃႇ ၵူၼ်း တၢင်ႇမိူင်း (ၵူၼ်းၼွၵ်ႈမိူင်း) ဢၼ်ယွၼ်းဝႂ် EP (Entry Permit) သေ ၶဝ်ႈမႃးတၢင်းၾင်ႇတီႈတႃႈၶီႈလဵၵ်းၼႆႉ ဢမ်ႇပၼ် ၶႂၢင်ႉၶဝ်ႈ/ဢိုတ်းဝႆႉယဝ်ႉ။ တေပၼ်ၵူၼ်းၶဝ်ႈဢွၵ်ႇၵႂႃႇမႃးလႆႈ မိူၼ်ၼင်ႇၵူၼ်းပိုၼ်ႉတီႈ ဢၼ်ယိပ်းဝႆႉ BP(Border Pass)၊ TBP (Temporary Border Pass) ၶဝ်ႈဢွၵ်ႇၸိူဝ်းၼႆႉၵူၺ်း ၶဝ်ႈဢွၵ်ႇၵႂႃႇမႃးလႆႈ” ဝႃႈၼႆ။
ၼွၵ်ႈလိူဝ်ၼၼ်ႉ ဢမ်ႇၸႂ်ႈတီႈလႅၼ်လိၼ်တႆး – ထႆးၼႆႉၵူၺ်း မိူၼ်ၼင်ႇ လႅၼ်လိၼ်တႆး – လၢဝ်းၸိူဝ်းၼၼ်ႉၵေႃႈ ႁၢမ်ႈ ဢမ်ႇပၼ်ၶဝ်ႈမႃး မိူၼ်ၵၼ် ၼင်ႇၵဝ်ႇ ဝႃႈၼႆ။
မိူဝ်ႈဝၼ်းတီႈ 16/3/2020 ၼၼ်ႉ ယူႇတီႈၸဝ်ႈၼႃႈတီႈမိူင်းထႆး ႁၢမ်ႈၵူၼ်းမိူင်းၶႄႇ 500 ပၢႆ လုၵ်ႉတၢင်းမိူင်းထႆး ႁဵတ်းဝႂ် EP သေ ၶဝ်ႈမႃးဢႅဝ်ႇတၢင်းၾင်ႇတႃႈၶီႈလဵၵ်းၾၢႆႇထႆးဢမ်ႇပၼ်ၶဝ်ႈၶိုၼ်းမိူင်းယဝ်ႉလႄႈ ၵိုတ်းၶမ်ဝႆႉယူႇၼႂ်းတႃႈၶီႈလဵၵ်း ဝႃႈၼႆ။
မိူဝ်ႈၼႆႉ19/3/2020 တၢမ်းၶမ်ႈ 4 မူင်း ၵူၼ်းတင်းလုမ်ႈၾႃႉ ဢၼ်ၸပ်းတၢင်းပဵၼ်မီး 220877 ၵေႃႉ ယႃၶႅၼ်း 85,782 ၵေႃႉ ယႃဢမ်ႇလႆႈတၢႆ 8,988 ၵေႃႉ၊ ၼႂ်းၼၼ်ႉ မိူင်းၶႄႇ ပဵၼ်ငဝ်ႈတၢင်းပဵၼ်လႄႈ ပဵၼ်ၼမ်လိူဝ်ပိူၼ်ႈ တၢႆၼမ်လိူဝ် ပိူၼ်ႈ။ မိူင်းႁူမ်ႈတုမ်မၢၼ်ႈလူင် ပွင်ၸိုင်ႈပိုၼ်ၽၢဝ်ႇဝႃႈ ဢမ်ႇမီးၵူၼ်းၸပ်းသေၵေႃႉ၊ မိူင်းထႆးတႄႉ ၸပ်း 272 ၵေႃႉ တၢႆ 1 ၵေႃႉ ။ ယႃၶႅၼ်း 42 ၵေႃႉ တိုၵ်ႉ ယႃဝႆႉ 229 ၵေႃႉ ၶေႃႈမုလ်း Worldometers ။
