Friday, March 29, 2024

ၵူၼ်းလႅၵ်ႈငိုၼ်း တီႈမူႇၸေႊ ၵေႃႉၼိုင်ႈ ၺႃးၸူၼ် သုမ်းငိုၼ်း 100 သႅၼ်ပျႃးပၢႆ

Must read

မိူဝ်ႈၼႆႉ ဝၼ်းတီႈ 26/2/2020 ယၢမ်းၵၢင်ၼႂ် 6 မူင်းၶိုင်ႈ ၼၢင်းဢေမီး ၵူၼ်းလႅၵ်ႈငိုၼ်းၶႄႇ-မၢၼ်ႈ ဢွင်ႈတီႈလႅၵ်ႈ ငိုၼ်းၶႄႇ – မၢၼ်ႈ တီႈပွၵ်ႉၵၢတ်ႇ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇၼၼ်ႉ ၺႃးၽူႈၸၢႆး 4 ၵေႃႉ ဢဝ်မိတ်ႈငႃသေ ၸူၼ်ဢဝ် ငိုၼ်းၵႂႃႇ 100 သႅၼ်ပျႃးပၢႆ။

Photo by – ထုင်ႉႁူၺ်ႈလီ/ ဢွင်ႈတီႈလႅၵ်ႈငိုၼ်း တီႈၵၢတ်ႇမူႇၸေႊ ဢၼ်ၺႃးၸူၼ်ငိုၼ်း မိူဝ်ႈၼႆႉ 26/2/2020

ၼၢင်းၸိင်ႇဝုၼ်း ၵူၼ်းလႅၵ်ႈငိုၼ်း ၼႂ်းၵၢတ်ႇ ၵေႃႉဢၼ်ၺႃးပႃးၼႂ်းပိူင်ပဵၼ်ၼႆႉ လၢတ်ႈတီႈၽူႈတွႆႇႁွၵ်ႈဝႃႈ “ ထၢင်ႇဝႃႈ ၶဝ်တေမႃးလႅၵ်ႈငိုၼ်းဝႃႇ ပဵၼ်ၽူႈၸၢႆး 4 ၵေႃႉ ၶီႇၵႃးမႃးၸွမ်းၵၼ်။ တႃႇၵေႃႉၼိုင်ႈ ၼင်ႉပႂ်ႉဝႆႉၼႂ်းၵႃး။ တႃႇ 3 ၵေႃႉသမ်ႉ လူင်းၵႃးမႃးသေ ဢဝ်မိတ်ႈငႃသႂ်ႇ ၼၢင်းဢေမီး ဢၼ်ၼင်ႈႁိမ်းၶႃႈႁဝ်းၼႆႉ။ ယဝ်ႉၵေႃႈ ၸၵ်ႉဢဝ် ထူင်ငိုၼ်း ဢၼ်မၼ်း ပႃးဝႆႉ ၼၼ်ႉၵႂႃႇ။ ၵူၼ်းႁၢႆႉ 3 ၵေႃႉၼၼ်ႉ မႃးလၢၵ်ႈၸၼ်တီႈတူဝ်ၶႃႈယူႇ ၵူၺ်းၵႃႈ တီႈတူဝ်ၶႃႈတႄႉ ဢမ်ႇတၼ်းလႆႈ သင်ၵႂႃႇၶႃႈ” ဝႃႈၼႆ။

- Subscription -

ၵူၼ်းၸူၼ် 4 ၵေႃႉၼၼ်ႉ ၶီႇၵႃးသီၶၢဝ် မႃးၸူၼ်ဢဝ်ၵႂႃႇငိုၼ်းမၢၼ်ႈ တင်းမူတ်း 100 သႅၼ်ပျႃးသေ ႁေႃႈၵႃး လႅၼ်ႈပၢႆႈ ၵႂႃႇတၢင်း “ မင်္ဂလာမူဆယ်” ၼၼ်ႉ ဝႃႈၼႆ။

ၵဵဝ်ႇၵပ်းလွင်ႈၼႆႉ ပလိၵ်ႈၸႄႈဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ၼၢင်းယိင်းၵေႃႉၼိုင်ႈ မိူဝ်ႈၼႆႉ ၺႃးၸူၼ်၊ တေႃႈလဵဝ် ႁဝ်းၶႃႈ တိုၵ်ႉလမ်းသွၵ်ႈႁႃ ၵူၼ်းႁၢႆႉၼၼ်ႉယူႇ ပႆႇတီႉလႆႈတူဝ်ၵူၼ်းႁၢႆႉၼၼ်ႉၶႃႈ”ဝႃႈၼႆ။

Photo by – ထုင်ႉႁူၺ်ႈလီ/ ဢွင်ႈတီႈလႅၵ်ႈငိုၼ်း တီႈၵၢတ်ႇမူႇၸေႊ

ၼၢင်းၸိင်ႇဝုၼ်း လၢတ်ႈဝႃႈ “ မိူဝ်ႈၽွင်းၵူၼ်းႁၢႆႉ မႃးၸူၼ်းယူႇၼၼ်ႉ ၵူၼ်းႁေႃႈသၢမ်လေႃႉ၊ ၸဝ်ႈရူတ်ႉႁပ်ႉၸၢင်ႈလႄႈ ၵူၼ်းႁိမ်းႁွမ်း ၸိူဝ်းၼၼ်ႉ ႁၼ်ယူႇ ၵူၺ်းၵႃႈ ဢမ်ႇႁၼ်ၽႂ်မႃးၶဝ်ႈၸွႆႈ ” ဝႃႈၼႆ။

ငိုၼ်းမၢၼ်ႈ 100 သႅၼ်ပျႃးပၢႆ ဢၼ်ၺႃးၸူၼ်ၵႂႃႇၼၼ်ႉ ပႃးငိုၼ်းၶႄႇ 35,000 ယႂၼ်လႄႈ ငိုၼ်းမၢၼ်ႈ 2,800,000 သႅၼ်ပျႃးပၢႆ ဝႃႈၼႆ။

ၼႂ်းၸႄႈဝဵင်းမူႇၸေႊၼႆႉ ၵႆႉမီးၵူၼ်းဢဝ်မိတ်ႈငႃသေ ၸူၼ်ၵူၼ်းလႅၵ်ႈငိုၼ်းၸွမ်းၵၢတ်ႇ။ ၵဵဝ်ႇၵပ်းလွင်ႈၼႆႉ ပလိၵ်ႈ ဢမ်ႇတွၼ်ႉတီႉၺွပ်းလႆႈတူဝ်ၵူၼ်းႁၢႆႉမႃး သေပွၵ်ႈ ဝႃႈၼႆ။

ၼၢင်းသႃႇ ၵူၼ်းလႅၵ်ႈငိုၼ်း တီႈပွၵ်ႉၵၢတ်ႇ လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ ၼၢင်းယိင်း ဢၼ်လႅၵ်ႈငိုၼ်းၶႄႇ – မၢၼ်ႈ ၼႆႉ ႁဝ်ၶႃႈ လႆႈၵူဝ်ဝႆႉယူႇၵူႈလွင်ႈၶႃႈ။ ယွၼ်ႉဝႃႈ ႁဝ်းၶႃႈလႆႈဢဝ်ႁူမ်ႇလူမ်ႈတူဝ်ႁဝ်းၶႃႈႁင်းၵူၺ်း။ မိူဝ်ႈၼႆႉ 6 မူင်းၶိုင်ႈ ၺႃး ၸူၼ် ဢဝ်ငိုၼ်းၵႂႃႇၼႆ ပဵၼ်လွင်ႈဢၼ်လီၵူဝ်တႄႉၶႃႈ ဢမ်ႇမီးလွင်ႈႁူမ်ႇလူမ်ႈ တႃႇႁဝ်းၶႃႈသေဢိတ်းၶႃႈ” ဝႃႈၼႆ။

ၵူၼ်းလႅၵ်ႈငိုၼ်း ၼႂ်းၸႄႈဝဵင်းမူႇၸေႊၼႆႉ ႁူဝ်ပၢၵ်ႇလႂ် 90 ၼႆႉ ပဵၼ်ၼၢင်းယိင်း။

ၸႄႈဝဵင်းမူႇၸေႊၼႆႉ ပဵၼ်ဝဵင်းလႅၼ်လိၼ် တႆး – ၶႄႇသေ ၸုမ်းယိပ်းၵွင်ႈၵၢင်ႇၵေႃႈၼမ်၊ ၸုမ်းပျီႇတူႉၸိတ်ႉၵေႃႈမီး လိူဝ်ၼၼ်ႉ ပၢင်တေႃႇလွင်းၵေႃႈၼမ် လႄႈ လွင်ႈၵႃႉၶၢႆ ၵူၼ်းသူႇသမ်းၵိၼ်သိုဝ်ႉၶၢႆ ယႃႈလိူင်ႇၼမ်။ ၼွၵ်ႈလိူဝ်ၼၼ်ႉ ၵၢၼ်ၸူၼ် ၵၢၼ်လၵ်ႉ မီးယူႇတႃႇသေႇ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း