ၵႃးႁပ်ႉၸၢင်ႈတၢင်ႇၵူၼ်း လမ်းၼိုင်ႈ လုၵ်ႉတၢင်းမူႇၸေႊလူင်းမႃး ပဵၼ်ၽေးဢုပၢတ်ႈ လေႃႈတမ်ၽႃႇသႂ်ႇႁိူၼ်းၵူၼ်းဝၢၼ်ႈ လင်ၼိုင်ႈ ၵူၼ်းမႃးၸွမ်းၼႂ်းၵႃး လႆႈမၢတ်ႇၸဵပ်းၸွမ်းၵမ်ႈၽွင်ႈ။
ဝၼ်းတီႈ 16/2/2020 ယၢမ်းဝၢႆးဝၼ်း မွၵ်ႈ 4 မူင်း ရူတ်ႉတူႈ လမ်းၼိုင်ႈ ပရိၵ်ႈပွင်ႇသေ လေႃႈတမ်ၽႃႇသႂ်ႇႁိူၼ်း ၵူၼ်း ဝၢၼ်ႈမႂ်ႇ လင်ၼိုင်ႈ ၼိူဝ်သဵၼ်ႈတၢင်းလူင် ၵူတ်ႉၶၢႆ – သႅၼ်ဝီ ၼႂ်းၸႄႈဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆး ပွတ်း ႁွင်ႇ။
ၸၢႆးၾႃႉ ၽူႈဢွၼ်ႁူဝ်တူင်ႉၼိုင် ၼႂ်းၸုမ်းၸွႆႈထႅမ်တူင်ႇဝူင်းၵူၼ်း သႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ၵူၼ်း ပိုၼ်ႉတီႈ ၸႅင်ႈၸူးသေ ႁဝ်းၶႃႈလႆႈဢဝ်ၵႃးၵႂႃႇၸွႆႈ 2 လမ်း။ ၵႃးမၢၼ်ႇလူင်ႇၼၼ်ႉ လုၵ်ႉတၢင်းမူႇၸေႊ မႃးပရိၵ်ႇပွင်ႇသေ လေႃႇတမ်ၽႃႇသႂ်ႇႁိူၼ်းၵူၼ်းဝၢၼ်ႈ ဢၼ်မီးႁိမ်းၶၢင်ႈတၢင်းၼၼ်ႉ ၵတ်ႉၵႃႈ ၼႂ်းႁိူၼ်းၼၼ်ႉ ဢမ်ႇမီး ၵူၼ်းယူႇဝႆႉလႃႈ။ ႁိူၼ်းၼၼ်ႉၵေႃႈ ပဵၼ်ႁိူၼ်းမႂ်ႇ တိုၵ်ႉၵေႃႇသၢင်ႈဝႆႉယဝ်ႉၵူၺ်း” ဝႃႈၼႆ။
ယူႇတီႈၸုမ်းၸွႆႈထႅမ်တူင်ႇဝူင်းၵူၼ်းသႅၼ်ဝီ လႆႈတေႃႉဢဝ် ၵူၼ်းမၢတ်ႇၸဵပ်းၸိူဝ်းၼၼ်ႉ သူင်ႇႁူင်းယႃသႅၼ်ဝီ ဝႃႈၼႆ။
ၸၢႆးၾႃႉ သိုပ်ႇလၢတ်ႈဝႃႈ “ လွင်ႈလူႉတၢႆတႄႉ ဢမ်ႇမီးၶႃႈ။ မီးၵူၼ်းမႃးၸွမ်းၼႂ်းၵႃးၼၼ်ႉ မၢတ်ႇၸဵပ်းၵၼ်ၵမ်ႈၽွင်ႈ၊ ၵူၺ်း ဢမ်ႇထိုင်တီႈလႆႈမႆႈၸႂ်။ ၵူၼ်းမၢတ်ႇၸဵပ်းၸိူဝ်းၼၼ်ႉ ႁဝ်းၶႃႈလႆႈဢဝ်မႃးတေႃႉသူင်ႇဝႆႉ တီႈႁူင်းယႃ သႅၼ်ဝီၶႃႈ ” ဝႃႈၼႆ။
ၵူၼ်းၶီႇမႃးၸွမ်းၼႂ်းၵႃးၼၼ်ႉ ပဵၼ်ပီႈၼွင်ႉတၢင်းထုင်ႉလိၼ်ပဵင်း လုၵ်ႉတၢင်းမူႇၸေႊသေ ပွၵ်ႈမႃး တေတေႃႉသူင်ႇၵႂႃႇ တၢင်း ပွတ်းမိူင်းမၢၼ်ႈ။
