ပၢင်ပွႆးဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈတဵမ် 73 ပီ ဢၼ်ၸတ်းႁဵတ်းတီႈငဝ်ႈၸိုင်ႈလွႆတႆးလႅင်းၼၼ်ႉ ၸွမ်သိုၵ်းလူင် မိၼ်း ဢွင်ႇလၢႆႇ သူင်ႇလိၵ်ႈၸူး RCSS ဝႃႈ ပေႃးၵတ်းယဵၼ်ၵွၼ်ႇ ၸင်ႇတေပူၵ်းပွင်ႁုၼ်ႈမုၼ်းၶိုၼ်ႈယႂ်ႇလႆႈလႄႈ ယိပ်းၵွင်ႈသေ ယွၼ်းၼၼ်ႉ ယွၼ်းၼႆႉယူႇတိၵ်းတိၵ်းတႄႉ ဢမ်ႇလႆႈ ဝႃႈၼႆ။
မိူဝ်ႈၼႆႉ ဝၼ်းတီႈ 7/2/2020 ယၢမ်းၵၢင်ၼႂ် ယူႇတီႈၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ၸတ်း ႁဵတ်းပၢင်ၵႅဝ်ႈ ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈတဵမ် 73 ပီ တီႈငဝ်ႈၸိုင်ႈလွႆတႆးလႅင်း။ ၼႂ်းပၢင်ၵႅဝ်ႈၼၼ်ႉ ၸွမ်းသိုၵ်းဢေး ဝိၼ်း ပဵၼ်တူဝ်တႅၼ်းတပ်ႉသိုၵ်းမၢၼ်ႈသေ ဢၢၼ်ႇၽိုၼ်လိၵ်ႈယိုၼ်ႈၸူး ဝၼ်းၸိူဝ်ႉၸၢတ်ႈၸိုင်ႈတႆးၼၼ်ႉ ယိူင်းၸူး RCSS ၵမ်းသိုဝ်ႈ။
ၸဝ်ႈၶိုၼ်းသႂ် ၸႂ်ယဵၼ် ၽူႈၵိူဝ်းၵုမ် PPST လၢတ်ႈၼႄၽူႈတွႆႇႁွၵ်ႈဝႃႈ “ ၼႂ်းပၢင်ၵႅဝ်ႈၼႆႉ ၾၢႆႇတပ်ႉသိုၵ်းမၢၼ်ႈၶဝ်တႄႉ ယူႇ တီႈၸွမ်သိုၵ်းဢေးဝိၼ်း တၢင်တူဝ်သေ လူဢၢၼ်ႇ ၽိုၼ်လိၵ်ႈ ဢၼ်ၽူႈၵွၼ်းသိုၵ်းသုင်သုတ်း မိၼ်းဢွင်ႇလၢႆႇသူင်ႇမႃး ၽိုၼ်လိၵ်ႈၼၼ်ႉ ယိူင်းၸူးတီႈ RCSS ၵမ်းသိုဝ်ႈ။ မၼ်းၸဝ်ႈတႄႉၵေႃႈဝႃႈ ပေႃးၵတ်းယဵၼ်ၵွၼ်ႇ ၸင်ႇတေပူၵ်းပွင်လႆႈ လွင်ႈႁုၼ်ႈမုၼ်းၶိုၼ်ႈယႂ်ႇ။ မိူၼ်ၸိူင်ႉၼင်ႇ ယိပ်းၵွင်ႈသေလႄႈ မႃးတုၵ်းယွၼ်း သုၼ်ႇလႆႈဢၼ်ၼႆႉ ဢၼ်ၼၼ်ႉ ယူႇတိၵ်း တိၵ်းတႄႉ မၼ်းၵေႃႈဢမ်ႇမႅၼ်ႈၸွမ်းလွၵ်းလၢႆးတီႊမူဝ်ႊၶရေႊသီႊယဝ်ႉ” ဝႃႈၼႆ။
တၢင်းၾၢႆႇလူင်ပွင်ၸိုင်ႈတႄႉ မိူၼ်ၵၼ်ၵူႈတီႈယဝ်ႉ ယူႇတီႈဢူးဝိၼ်းမိၼ်ႉ ၸွမ်ၸိုင်ႈမိူင်းႁူမ်ႈတုမ် သူင်ႇ ၸူးၵူႈမိူင်းၼၼ်ႉ ယဝ်ႉ ၸဝ်ႈၶိုၼ်းသႂ် ၸႂ်ယဵၼ်လၢတ်ႈၼႄၼင်ႇၼႆ။
ၸွမ်သိုၵ်းလူင် ယွတ်ႈသိုၵ်း ၽူႈၼမ်း RCSS/SSA မွၵ်ႈလၢတ်ႈၶေႃႈၵႂၢမ်းဝႃႈ “ လွတ်ႈလႅဝ်းၵွၼ်းၶေႃၼႆႉ မၼ်းလုၵ်ႉမႃးတီႈ ဝၼ်းတီႈ 4 လိူၼ်ၵျႅၼ်ႊၼိဝ်ႊရီႊ 1948။ မၼ်းၵေႃႈ လုၵ်ႉမႃးတီႈ မိူဝ်ႈဝၼ်းတီႈ 12 လိူၼ်ၾႅပ်ႊၿိဝ်ႊရီႊ 1947 ဝၼ်းလူင်း လၢႆးမိုဝ်း လိၵ်ႈႁူမ်ႈမၢႆပၢင်လူင်ၼၼ်ႉယဝ်ႉ။ ဝၼ်းမိူင်းႁူမ်ႈတုမ် ဝၼ်းတီႈ 12 ၼႆႉ သင်ၸိူဝ်ႈဝႃႈ ဢမ်ႇမီး ဝၼ်းတီႈ 7 လိူၼ် ၾႅပ်ႊၿိဝ်ႊရီႊ ဝၼ်းၸိူဝ်ႉၸၢတ်ႈၸိုင်ႈတႆးၸိုင် မၼ်းတိုၼ်းဝႃႈဢမ်ႇမီးမႃး။ တီႈပၢင်ၵုမ်လူင်ပၢင်လူင်မိူဝ်ႈၼၼ်ႉ တၢင်းၾၢႆႇ ၽူႈဢွၼ်ႁူဝ် မိူင်းတႆးၵေႃႈ ဢွၼ်ၵၼ်တႅပ်းတတ်းဝႃႈ ႁဝ်းတေဢမ်ႇယူႇတႂ်ႈဢင်းၵိတ်းယဝ်ႉ” ဝႃႈၼႆ။
“ၵွပ်ႈပိူဝ်ႈ ၽူႈဢွၼ်ႁူဝ်ၵူၼ်းမိူင်းတႆးႁဝ်း ဢွၼ်ၵၼ်တႅပ်းတတ်းဝႃႈ တေဢမ်ႇယူႇတႂ်ႈဢင်းၵိတ်းယဝ်ႉ တေဢဝ်လွတ်ႈ လႅဝ်း ၵွၼ်းၶေႃယဝ်ႉ ၸိူင်ႉၼၼ် ၸင်ႇလႆႈမႃးပဵၼ်ဝၼ်းတီႈ 12 ၼၼ်ႉၶႃႈဢိူဝ်ႈ ဢၼ်ၼႆႉသူၸဝ်ႈဢမ်ႇလီလႆႈလိုမ်း။ ပေႃးဝႃႈ ဢဝ်ၵုင်ႇ ဢဝ်မုၼ် ဝၼ်းတီႈ 12 ၵေႃႈ လီလႆႈဢဝ်ၵုင်ႇဢဝ်မုၼ်ဝၼ်းတီႈ 7 ၼႆႉပႃးဢိူဝ်ႈ” မၼ်းၸဝ်ႈတႄႉ သပ်း လႅင်း လၢတ်ႈၼႄၵႂႃႇၼင်ႇၼႆ။
ၼႂ်းပၢင်ၵႅဝ်ႈ တီႈငဝ်ႈၸိုင်ႈလွႆတႆးလႅင်းၼၼ်ႉ ၸုမ်းယိပ်းၵွင်ႈၵၢင်ႇ ဢၼ်ပႆႇလူင်းလၢႆးမိုဝ်း NCA ၵေႃႈ မႃးၶိုၼ်ႈႁွတ်ႈၸွမ်း မိူၼ်ၼင်ႇ တပ်ႉသိုၵ်း SSPP/SSA၊ သိုၵ်း UWSA၊ သိုၵ်း KNPP လႄႈ သိုၵ်း KIO ၸိူဝ်းၼႆႉ။ လိူဝ်ၼၼ်ႉ ၸုမ်းယိပ်းၵွင်ႈ ၵၢင်ႇ ၸိူဝ်းလူင်း လၢႆးမိုဝ်း NCA ၵေႃႈ မႃးၶဝ်ႈႁူမ်ႈပႃး။ ၽွင်းတၢင်လူင် ၼွၵ်ႈမိူင်း ဢၼ်ပၵ်းလုမ်းတီႈတႃႈၵုင်ႈ/ မိူင်းထႆး ၸဵမ်ၸိူဝ်းၼႆႉ ၶဝ်ႈႁူမ်ႈၸွမ်း။
ငဝ်ႈၸိုင်ႈၶွင်ႇသီႇဢဝ်ၶိုၼ်းၸိုင်ႈတႆး RCSS/SSA ၸတ်းႁဵတ်းပၢင်ပွႆးဝၼ်းၸိူဝ်ႉၸၢတ်ႈၸိုင်ႈတႆးမႃးၵူႈပီ၊ ပီၵၢႆ မီးၶႅၵ်ႇၶိုၵ်ႉ တွၼ်းၼွၵ်ႈမိူင်းၼႂ်းမိူင်း ၽွင်းတၢင်လၢႆလၢႆမိူင်းၶဝ်ႈႁူမ်ႈတင်းၼမ်။ ပီၼႆႉၵေႃႈ လႆႈႁူႉဝႃႈ မႃးၶဝ်ႈႁူမ်ႈဢမ်ႇယွမ်းပီၵၢႆ ဝႃႈၼႆ။
ဝၼ်းတီႈ 7 ၾႅပ်ႊၿိဝ်ႊရီႊၼႆႉ ပဵၼ်ဝၼ်းတႄႇသၼ်ႇထေႇမိူင်းႁူမ်ႈတုမ်။ ပေႃးဢမ်ႇမီးဝၼ်းတီႈ 7 ၾႅပ်ႊၿိဝ်ႊရီႊ၊ ဝၼ်းမိူင်း ႁူမ်ႈတုမ် 12 ၾႅပ်ႊၿိဝ်ႊရီႊၵေႃႈ တေဢမ်ႇပဵၼ်မႃးဝၼ်းလိၵ်ႈႁူမ်ႈမၢႆပၢင်လူင်လႆႈ။ ဝၼ်းတီႈ 7 ၾႅပ်ႊၿိဝ်ႊရီႊၼၼ်ႉ ၵူၼ်း မိူင်းတႆး မၵ်းမၼ်ႈ ပဵၼ်ဝၼ်းၸိူဝ်ႉၸၢတ်ႈ၊ ဝၼ်းဢၼ်မၵ်းမၼ်ႈ ၵႂၢမ်းတၢင်ႇတုင်း/ ၸွမ်ပိဝ် ၸိူဝ်ႉၸၢတ်ႈၵိုတ်းၵပ်းၸပ်း ၵၼ်မႃးတေႃႇထိုင်ဝၼ်းမိူဝ်ႈၼႆႉ။
