တပ်ႉသိုၵ်းလူင်ပွင်ၸိုင်ႈမၢၼ်ႈ တင်း တပ်ႉသိုၵ်းတဢၢင်း TNLA ပဵၼ်ပၢင်တိုၵ်းၵၼ် ၼႂ်းၸႄႈဝဵင်းၼမ်ႉၶမ်း ၸိုင်ႈတႆး ပွတ်းႁွင်ႇ။
မိူဝ်ႈၼႆႉ ဝၼ်းတီႈ 6/12/2019 ယၢမ်းၵၢင်ၼႂ် မွၵ်ႈ 7 မူင်းၶိုင်ႈ တပ်ႉသိုၵ်းလူင်ပွင်ၸိုင်ႈမၢၼ်ႈ တင်း တပ်ႉသိုၵ်းတဢၢင်း ပဵၼ်ပၢင်တိုၵ်းၵၼ် ႁိမ်းဝၢၼ်ႈၼမ်ႉၸင်ႈ ဢိူင်ႇတူၼ်ႈႁုင်း ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ။
ၸဝ်ႈႁၢၼ် တႃႉဢၢႆႈၵျေႃႇ ၽူႈၶၢၼ်ပၢၵ်ႇ TNLA လၢတ်ႈတီႈၽူႈတွႆႇႁွၵ်ႈဝႃႈ “ ပၢင်တိုၵ်းၼႆႉ တႄႇပဵၼ်ယၢမ်းၵၢင်ၼႂ် 7 မူင်း 40 မိၼိတ်ႉ ထိုင် 8 မူင်းပၢႆ 15 မိၼိတ်ႉ။ ဢွင်ႈတီႈပဵၼ်ပၢင်တိုၵ်းၵၼ်တႄႉ ၵႆယၢၼ်ဝၢၼ်ႈဝႆႉယူႇ တၢၼ်ႇတၢၼ်ႇ” ဝႃႈၼႆ။
ၾၢႆႇ TNLA မွၵ်ႇလၢတ်ႈပဵၼ်တၢင်းၵၢၼ်ဝႃႈ – ၼႂ်းလိူၼ်ၻီႊသႅမ်ႊၿိူဝ်ႊ 2019 ၼႆႉ သိုၵ်းမၢၼ်ႈတင်း သိုၵ်းတဢၢင်းႁဝ်း လႆႈ ပဵၼ်ပၢင်တိုၵ်းၵၼ် ပဵၼ်ပွၵ်ႈ ၵမ်းႁႅၵ်ႈ၊ ပဵၼ်ယွၼ်ႉႁိုၵ်ႉၸုၼ်ၽႃႇၺႃးၵၼ် – ဝႃႈၼႆ။
“ ပၢင်တိုၵ်းၼႆႉ ပဵၼ်မိူဝ်ႈၼႆႉ ၵၢင်ၼႂ်။ ယူႇမိူင်းဝီးၼႆႉသေ ယင်းလႆႈငိၼ်းသဵင်ၵွင်ႈၶဝ်ယူႇ။ ပၢင်တိုၵ်းတႄႉ ပဵၼ်ၵမ်ၼိုင်ႈ ၵူၺ်း ပဵၼ်ပွတ်းၼႂ်းထိူၼ်ႇ ၵႆဝၢၼ်ႈဝႆႉလႄႈ သဵၼ်ႈတႃႈသၢႆတၢင်းတႄႉ ဢမ်ႇဢိုတ်းၶႃႈ” ၵူၼ်းမိူင်းဝီး ၵေႃႉၼိုင်ႈလၢတ်ႈ ၼႄၽူႈတွႆႇႁွၵ်ႈၼင်ႇၼႆ။
ပူၼ်ႉမႃး မိူဝ်ႈလိူၼ်ၼူဝ်ႊဝႅမ်ႊၿိူဝ်ႊ 2019 ၼၼ်ႉ သိုၵ်းလူင်ပွင်ၸိုင်ႈမၢၼ်ႈ တင်း သိုၵ်းတဢၢင်းပဵၼ်ပၢင်တိုၵ်း ၶိူဝ်းယႂ်း ၼႂ်းၸႄႈဝဵင်းၼမ်ႉသၼ်ႇ၊ ၵျွၵ်ႉမႄးလႄႈ ၵူတ်ႉၶၢႆ ၸိူဝ်းၼႆႉ။
