ၾၢႆႇႁွင်ႈၵၢၼ်ၽွင်းလူင်ႁၵ်ႉသႃသိင်ႇဝႅတ်ႉလွမ်ႉ ပိုၼ်ၽၢဝ်ႇဝႃႈ ၼႂ်းပီ 2019 ၼႆႉ ယူႇတီႈႁွင်ႈၵၢၼ်ၽွင်းလူင် သိင်ႇဝႅတ်ႉ လွမ်ႉ လူင်ပွင်ၸိုင်ႈမိူင်းထႆး လႆႈႁူမ်ႈမိုဝ်းၵၼ်တင်း ၶွမ်ႊပၼီႊယႂ်ႇလူင်၊ ႁၢၼ်ႉၶၢႆၶူဝ်းယႂ်ႇလူင်ၼႂ်းမိူင်းထႆးႁူမ်ႈၵၼ်လူတ်း ယွမ်းၸႅၵ်ႇထူင်ပလၢတ်ႉသတိၵ်ႉလႄႈ လႆႈႁၼ်ၽွၼ်းပၢင်ႈမႃး ဝႃႈၼႆ။
ပၢင်ၵုမ်ၽွင်းလူင်ၾၢႆႇသိင်ႇဝႅတ်ႉလွမ်ႉလႄႈ ၶွမ်ႊပၼီႊၶၢႆၶူဝ်းမိူၼ်ၼင်ႇ Big C- Lotus- 7-11 –Makro ၶဝ် ၸတ်းႁဵတ်း ၼႂ်းလိူၼ် သႅပ်ႊထႅမ်ႊပိူဝ်ႊ ပူၼ်ႉမႃးသေ လႆႈႁူႉႁူဝ်ၼပ်ႉၵၢၼ်လူတ်းယွမ်းပလၢတ်ႉသတိၵ်ႉလႆႈ 2000 လၢၼ်ႉထူင်ၼႂ်း ၶၢဝ်းတၢင်း 9 လိူၼ်။
ၵွပ်ႈၼၼ်လႄႈ ဢဝ်ၼႆႉၵႂႃႇၼႃႈၵေႃႈ တေသိုပ်ႇလူတ်းယွမ်းတိၵ်းတိၵ်းသေ ၼႂ်းပီ 2021 ၼႆႉ တေဢၢၼ်းႁႂ်ႈပဵၼ်မိူင်း ဢၼ်ဢမ်ႇၸႂ်ႉထူင်ပလၢတ်ႉသတိၵ်ႉ ႁႂ်ႈလႆႈဝႃႈၼႆ။
ၾၢႆႇသိင်ႇဝႅတ်ႉလွမ်ႉထႆးလၢတ်ႈဝႃႈ – “မိူင်းထႆးၼႆႉ ယုၵ်းယၵ်းပလၢတ်ႉသတိၵ်ႉၼႂ်းၼမ်ႉပၢင်ႇလၢႆႇ ၼမ်ထီႉသုတ်း ပဵၼ်ထီႉ 6 ၼႂ်းလုမ်ႈၾႃႉ။ သတ်းၼမ်ႉပူပႃ ၵိၼ်ၺႃးသေတၢႆ ၼမ်လၢႆၼႃႇလႄႈ ၸင်ႇလႆႈမီး ၶူင်းၵၢၼ်လူတ်း ယွမ်းၸႂ်ႉထူင်ပလၢတ်ႉ သတိၵ်ႉ (ထူင်ၸေႈယၢင်) ”-ဝႃႈၼႆ။
တင်ႈဢဝ်ဝၼ်းတီႈ 1/1/2019 ၼႆႉမႃးႁၢၼ်ႉၶၢႆၶူဝ်း Big C ၊ Lotus ၊ 7-11 ဢမ်ႇပၼ်ထူင်ပလၢတ်ႉသတိၵ်ႉ ၵူၼ်းမႃးသိုဝ်ႉ ၶူဝ်း တႃႇၼိုင်ႈလိူၼ် ၼိုင်ႈဝၼ်း ။ ၸႅၵ်ႇပၼ်ၵွင်ႇၸေႈ တႅၼ်းတၢင်ထူင်ပလၢတ်ႉသတိၵ်ႉ။ တီႈႁၢၼ်ႉၶၢႆၶူဝ်း Makro တႄႉ တိုၼ်းဢမ်ႇပၼ်ထူင်ပလၢတ်ႉသတိၵ်ႉသေၵေႃႉ သေဝၼ်း။
ၽွင်းလူင်ၾၢႆႇသိင်ႇဝႅတ်ႉလွမ်ႉမိူင်းထႆးလၢတ်ႈဝႃႈ -“ ၼႂ်းပီ 2020 တင်ႈဢဝ်ဝၼ်းတီႈ 1 ၼႆႉၵႂႃႇ ႁဝ်းၶႃႈတေတိုၵ်းသူၼ်း ပႃး ၸဵမ်ၼႂ်းၵၢတ်ႇၼႂ်းသႃး ႁႂ်ႈလူတ်းယွမ်းၸႂ်ႉထူင်ပလၢတ်ႉသတိၵ်ႉ။ ၶႂ်ႈတိုၵ်းသူၼ်းၵူၼ်းမိူင်းထႆးၵူႈၵေႃႉ ပၼ်တၢင်းႁူမ်ႈမိုဝ်း ပေႃးတေသိုဝ်ႉၶဝ်ႈၽၵ်းႁႂ်ႈဢဝ်ၵွၵ်းၵႂႃႇသႂ်ႇ။ ပေႃးတေသိုဝ်ႉၽၵ်းယိူဝ်ႈၼၢင်းၶဵဝ် ႁႂ်ႈဢဝ်ထူင်ဢၼ်ပဵၼ်ၽႅၼ်ႇ ၵႂႃႇသႂ်ႇ။ ၾၢႆႇၼိုင်ႈၵေႃႈ တေၶတ်းၸႂ်ႁႂ်ႈမီးမၢႆမီႈမႃးပဵၼ်တၢင်းၵၢၼ်။ ယုမ်ႇယမ်ဝႃႈတေလူတ်းယွမ်းလႆႈၼင်ႇယိူင်းမၢႆဢၼ်တမ်း ဝၢင်းဝႆႉယူႇ”- ဝႃႈၼႆ။
ၾၢႆႇတၢင်းၶွမ်ႊမၼီႇၶၢႆၶူဝ်းၵေႃႈဝႃႈ – မိူဝ်ႈတႄႇၶူင်းၵၢၼ်ၼႆႉ ၵူၼ်းမႃးသိုဝ်ႉၶူဝ်းဢွၼ်ၵၼ်ပွင်ႉၶၢင်း လွင်ႈဢမ်ႇမီးထူင် သႂ်ႇၶူဝ်း၊ ဢဝ်မိူဝ်းယၢပ်ႇ။ ၵူၺ်းၵႃႈၽိူဝ်ႇၶဝ်ပွင်ႇၸႂ်ၵေႃႈ ဢမ်ႇပွင်ႉၶၢင်းသေဢမ်ႇၵႃး ပၼ်ၶဝ်ၵေႃႈယင်းဢမ်ႇဢဝ်ယဝ်ႉ – ဝႃႈၼႆ။
ၶေႃႈမုလ်း – Thai PBS
