Thursday, March 28, 2024

လူင်ပွင်ၸိုင်ႈ တပ်ႉသိုၵ်းလႄႈ ၸၢဝ်းၶိူဝ်းဢုပ်ႇၵုမ်ႁၢင်ႈႁႅၼ်းတႃႇပွင်ပဵၼ်ပင်ၵုမ်ပီႁူဝ်ပၢၵ်ႇ 21 ပၢင်လူင် လင်ဝၼ်းတပ်ႉသိုၵ်းၼႂ်းပီ 2020

Must read

ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸိူဝ်းလူင်းလၢႆးမိုဝ်း NCA 10 ၸုမ်းလႄႈ တူဝ်တႅၼ်းလူင်ပွင်ၸိုင်ႈ ဢုပ်ႇဢူဝ်းၵၼ် ၵႄႈလိတ်ႈဢၼ်လွင်ႈငမ်းယဵၼ်ၶွင်ႉၶမ်ယူႇၼၼ်ႉသေ တေဢၢၼ်းၸတ်းပၢင်ၵုမ်လူင် ပီႁူဝ်ပၢၵ်ႇ 21 ပၢင်လူင် (ၵမ်းသွင်) ဢမ်ႇၼၼ် ပၢင်ၵုမ်လူင်လွင်ႈငမ်းယဵၼ်မိူင်းႁူမ်ႈတုမ် (ပွၵ်ႈၵမ်းသီႇ)။

Photo SHAN- ဢူးၸေႃႇထေး (ၾၢႆႇလူင်ပွင်ၸိုင်ႈ)လႄႈၼၢႆႇဢွင်ႇမငေး (ၾၢႆႇၸၢဝ်းၶိူဝ်း) သပ်းၸႅင်ႈၶၢဝ်ႇ ဝၢႆးပင်ၵုမ်

ပၢင်ၵုမ်ၼႆႉၸတ်းႁဵတ်းၼႂ်းဝၼ်းတီႈ 20/11/2019 ယၢမ်းၵၢင်ၼႂ် 10 မူင်းထိုင် 12 မူင်းတီႈႁူင်းႁႅမ်းၶမ်းမွၼ်ႉလၢၼ်ႉၼႃး ၸေႈဝဵင်းသၼ်ၵမ်ႇပႅင်း ၸေႈတွၼ်ႈၵဵင်းမႆႇ ၸိုင်ႈထႆး။

- Subscription -

တူဝ်တႅၼ်းလူင်ပွင်ၸိုင်ႈမၢၼ်ႈပဵၼ်ၸွမ်သိုၵ်းၶိၼ်ႇၸေႃႇဢူးဢွၼ်ႁူဝ်၊ ၾၢႆႇၸုမ်းၸၢဝ်းၶိူဝ်း 10 ၸုမ်းသမ်ႉပဵၼ် ၸဝ်ႈသိုၵ်းလူင်ၸၢႆးငိုၼ်းဢွၼ်ႁူဝ် သေဢုပ်ႇၵုမ်ၵၼ်။

ဢူးၸေႃႇထေး ၽူႈၶၢၼ်ပၢၵ်ႇၸိုင်ႈမိူင်း မိူင်းႁူမ်ႈတုမ်မၢၼ်ႈလၢတ်ႈတီႈၽူႈတွႆႇႁွၵ်ႈ ဝၢႆးလင်ပၢင်ၵုမ်ဝႃႈ-  ႁဝ်းၶႃႈဢုပ်ႇၵုမ်ၵၼ်လႆႈပႃးၶၢဝ်းယၢမ်း Timeline တႃႇႁဵတ်းပၢင်ၵုမ်လူင်လွင်ႈငမ်းယဵၼ်မိူင်းႁူမ်ႈတုမ်။ လူင်ပွင်ၸိုင်ႈယိုၼ်ႈလဝ်ႈဝႆႉဝႃႈ ၶႂ်ႈႁဵတ်းဝၢႆးလင်ဝၼ်းတပ်ႉသိုၵ်း(တပ်ႉမတေႃႇၼေႉ) ႁၢင်လိူၼ်မၢတ်ႉၶျ် ပီတေမႃး။  ၵွပ်ႈၼၼ် ၼႂ်းၵႄႈၼႆႉႁဝ်းၶႃႈတေၵႆႉလႆႈႁူပ်ႈဢုပ်ႇၵၼ်ထႅင်ႈတႃႇပၢင်ၵုမ်လူင်လွင်ႈငမ်းယဵၼ်မိူင်းႁူမ်ႈတုမ် UPC ပၢင်ၵုမ်ၸိၵ်းၸွမ် JICM ။ – ဝႃႈၼႆ။

တီႈပၢင်ႁူပ်ႉထူပ်းၵၼ်တီႈႁူင်းႁႅမ်းၶမ်းမွၼ်ႉၼၼ်ႉ သွင်ၾၢႆႇလႆႈဢုပ်ႇၵၼ်ၼႂ်းႁူဝ်ၶေႃႈယႂ်ႇ 5 ၶေႃႈ။ 1- တႃႇၸတ်းပၢင်ၵုမ် JICM ဝႆးဝႆး ၼင်ႇလူင်ပွင်ၸိုင်ႈ တၢင်ႇယိုၼ်ႈဝႆႉ။ 2-တႃႇၸတ်းပၢင်ၵုမ်လူင်လွင်ႈငမ်းယဵၼ်မိူင်းႁူမ်ႈတုမ်။ 3- ဢုပ်ၵၼ်လွင်ႈၶၢဝ်းတၢင်းႁူဝ်ပဝ်ႈလူင် RCSS ဢၼ်လႆႈၵၢတ်ႈၵႂႃႇမိူဝ်ႈႁၢင်လိူၼ် ဢွၵ်ႇထူဝ်ႇပိူဝ်ႇ။ 4-ဢုပ်ႇၵၼ်လွင်ႈဢၼ်သွင်ၾၢႆႇလႆႈႁူပ်ႉထူပ်းပၼ်ႁႃ။ 5- ဢုပ်ႇၵၼ်လွင်ႈ ဢၼ်လူင်ပွင်ၸိုင်ႈမၢၼ်ႈလႄႈတပ်ႉသိုၵ်းႁူပ်ႉထူပ်းပၼ်ႁႃ လူၺ်ႈၵူႈမိူင်းမိူင်းယူႇယၢမ်းလဵဝ်  ၸဵမ်ၸိူဝ်းၼႆႉဝႃႈၼႆ။

ၼၢႆႇဢွင်ႇမငေး ပႃႇတီႇမိူင်းမွၼ်းမႂ်ႇ လၢတ်ႈဝႃႈ- “JICM ၼႆႉ တၵ်းလႆႈၸတ်းဝႆးဝႆး။ တေႁဵတ်းႁိုဝ်ၸတ်း။ ၸဵမ်မိူဝ်ႈလႂ်လႂ်လႆႈၶပ်းၶိုင်မႃး တႅပ်းတတ်းမႃးယဝ်ႉလႄႈ တိုၼ်းတေလႆႈသိုပ်ႇၵႂႃႇထႅင်ႈၵူၺ်း။  လိူဝ်ၼၼ်ႉ UPC တေၸတ်းမိူဝ်ႈလႂ်ၸိူဝ်းၼၼ်ႉၵေႃႈ တေလႆႈဢုပ်ႇၵၼ်ၼႂ်းပၢင်ၵုမ် JICM။ ၵွပ်ႈၼႆပၢင်ႁူပ်ႉထူပ်းၼႆႉတေလႆႈဝႃႈ  လႆႈၼမ်ႉတွၼ်းၽွၼ်းလီတႄႉတႄႉ ”- ဝႃႈၼႆ။

ဝၼ်းတီႈ 19/11/2019 တူဝ်တႅၼ်းတပ်ႉသိုၵ်း လူင်ပွင်ၸိုင်ႈႁူပ်ႉထူပ်း RCSS/SSA ၊ ဝၼ်းတီႈ 20/11/2019 ႁူပ်ႉတင်း NCA-S EAOs  သေ ဝၼ်းတီႈ 22 တေႁူပ်ႉတင်း KNU  ဝႃႈၼႆ။

 

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း