ပီႈၼွင်ႉတၵ်ႉၵႃႇသတ်ႉထႃး ဢိူင်ႇၶိူဝ်းၼိမ်း ၸႄႈဝဵင်းလႃႈသဵဝ်ႈ တေလုမ်းလႃးၶၢပ်ႈတူဝ် ၸဝ်ႈသြႃႇ ပၺ်ၺႃၸေႃးတ ဝတ်ႉၶိူဝ်းၼိမ်း တႃႇၶၢဝ်းတၢင်း 5 ဝၼ်း။
ၵူၼ်းႁၢႆႉ/ ၸုမ်းဢမ်ႇႁူႉၾၢႆႇ 2 ၵေႃႉ ၶဝ်ႈယိုဝ်းၸဝ်ႈတူၼ်ၶူး ၸဝ်ႈသြႃႇပၺ်ၺႃၸေႃးတ ၸဝ်ႈၵွၼ်းဝတ်ႉၶိူဝ်းၼိမ်း ဢိူင်ႇၶိူဝ်း ၼိမ်း ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ လူႉလွၼ်ႇၵႂႃႇထင်တီႈ တီႈၼႂ်းဝၢင်းဝတ်ႉ မိူဝ်ႈဝၼ်းတီႈ 20/10/2019 ယၢမ်းႁူဝ်ၶမ်ႈ မွၵ်ႈ 6:45 မူင်း။
ၸၢႆးၶမ်းဢွင်ႇ ၽူႈၵွၼ်းဢိူင်ႇၶိူဝ်းၼိမ်း လၢတ်ႈတီႈၽူႈတွႆႇႁွၵ်ႈဝႃႈ “ တေႃႈလဵဝ် ၶၢပ်ႈတူဝ်ၸဝ်ႈသြႃႇႁဝ်းၶႃႈတႄႉ လႆႈဢဝ် မႃးလုမ်းလႃးဝႆႉတီႈဝတ်ႉၶိူဝ်းၼိမ်းၼႆႉယဝ်ႉ။ တေဝႆႉတႃႇၶၢဝ်းတၢင်း 5 ဝၼ်းၶႃႈဢေႃႈ။ ယဝ်ႉၵေႃႈ တေပူၼ်ႉၶၢပ်ႈတူဝ်ၵႂႃႇၶႃႈ ” ဝႃႈၼႆ။
ၸဝ်ႈတူၼ်ၶူး ပၺ်ၺႃၸေႃးတၼႆႉ ၺႃးယိုဝ်းၸွမ်းၵွၵ်းႁူဝ်၊ ၸွမ်းတႃ၊ ၸွမ်းတူဝ် 5 ၵမ်း လႆႈလွၼ်ႇၵႂႃႇၵမ်းလဵဝ်။
သိုပ်ႇလၢတ်ႈဝႃႈ “ ၵဵဝ်ႇၵပ်းလွင်ႈၼႆႉ ပဵၼ်ၼမ်ႉမိုဝ်းၽႂ် ႁဵတ်းဢၼ်ဝႃႈၼၼ်ႉ တေႃႈလဵဝ် ပလိၵ်ႈ ၶဝ်တိုၵ်ႉၵူတ်ႇထတ်း ယူႇ ၶႃႈ။ ႁဝ်းၶႃႈ လႆႈၵူတ်ႇထတ်းတူၺ်း တီႈၵွင်ႈ CCTV ၼၼ်ႉ လႆႈႁၼ်ၽူႈၸၢႆး 2 ၵေႃႉ ၶီႇရူတ်ႉၶိူင်ႈသေမႃး၊ သႂ်ႇမူၵ်ႇ ႁူဝ်ၽိူၵ်ႇ/ မူၵ်ႇႁူဝ်ငႅပ်း တင်းသွင်ၵေႃႉ၊ သႂ်ႇၶူဝ်းၵူၼ်းမိူင်းသေ ၶဝ်ႈမႃးယိုဝ်း” ဝႃႈၼႆ။
မိူဝ်ႈပူၼ်ႉမႃး ၶၢဝ်းတၢင်း 10 ဝၼ်းၼၼ်ႉၵေႃႈ မီးၵူၼ်းၵေႃႉၼိုင်ႈ ပဵၼ်ၽူႈၸၢႆး ၶဝ်ႈလၵ်ႉၾူၼ်း(ထႅပ်ႉလႅတ်ႉ) ဢၼ်ၸဝ်ႈ တူၼ်ၶူး ပၺ်ၺႃၸေႃးတၸႂ်ႉ။ တေႃႇထိုင်ယၢမ်းလဵဝ် ၽူႈလၵ်ႉၵေႃႉၼၼ်ႉၵေႃႈ ပႆႇတီႉၺွပ်းလႆႈ ဝႃႈၼႆ။
ၸၢႆးၶမ်းဢွင်ႇ လၢတ်ႈဝႃႈ “ ယူႇတီႈႁဝ်းၶႃႈ တၵ်ႉၵႃႉသတ်ႉထႃးသေ တုၵ်းယွၼ်းတႄႉ ၵူၼ်းတီႈဢၼ်မႃးႁဵတ်းႁၢႆႉတေႃႇ ၸဝ်ႈသြႃႇႁဝ်းၼႆႉ ၶႂ်ႈႁႂ်ႈၸဝ်ႈၼႃႈတီႈ ၸဵဝ်းၽေႃႇၼမ်ႉၼႄတူဝ် တီႉၺွပ်းပၼ်တူတ်ႈတၢမ်ႇ ၼင်ႇမၢႆမီႈဝၢၼ်ႈမိူင်းမီး ႁႂ်ႈလႆႈလွင်ႈၽဵင်ႇပဵင်း ပဵၼ်ထမ်း” ဝႃႈၼႆ။
ၸဝ်ႈတူၼ်ၶူး ပၺ်ၺႃၸေႃးတၼႆႉ တႄႇၼင်ႈဝတ်ႉၶိူဝ်းၼိမ်းၼႆႉမႃး တင်ႈတႄႇပီ 2003 မႃးတေႃႇထိုင်မိူဝ်ႈလဵဝ် တင်းမူတ်း မီး 16 ပီယဝ်ႉ။ ပဵၼ်ၸဝ်ႈတူၼ်ထီႉ 5 ဢၼ်ၼင်ႈဝတ်ႉၶိူဝ်းၼိမ်း။ ဝၢၼ်ႈၶိူဝ်းၼိမ်းၼႆႉ ပဵၼ်ၼႂ်းဢိူင်ႇၶိူဝ်းၼိမ်း ယၢၼ် ဝဵင်းလႃႈသဵဝ်ႈ မွၵ်ႈ 10 လၵ်း မီးၵႄႈ လႃႈသဵဝ်ႈ – သီႇပေႃႉ။
မိူဝ်ႈပီၵၢႆ 2018 လိူၼ်ဢွၵ်ႊထူဝ်ႊပိူဝ်ႊၼႆႉၼၼ်ႉၵဝ်ႇ ၸဝ်ႈတူၼ်ၶူးၵလျႃႇၼဝမ်ႇသ ဝတ်ႉၵျွင်းသူၺ်ႇၵျိၼ်ႇ ဝဵင်းၵျွၵ်ႉမႄး ၵေႃႈၺႃးၵူၼ်း 2 ၵေႃႉ ၶီႇရူတ်ႉၶိူင်ႈ မႃးယိုဝ်းတီႈဝတ်ႉၵျွင်း။ ၸဝ်ႈတူၼ်ၶူး လႆႈတိူဝ်ႉမၢၵ်ႇၵွင်ႈသေလူႉလွၼ်ႇ ထင်တီႈ မိူၼ် ၵၼ်။ တေႃႇထိုင်ဝၼ်းမိူဝ်ႈၼႆႉ ၸဝ်ႈၼႃႈတီႈယင်းပႆႇတီႉလႆႈၵူၼ်းယိုဝ်း။
