ၾႆးမႆႈ ႁွင်ႈလိုဝ်ႈသဝ်း ၵူၼ်းႁဵတ်းၵၢၼ်လူင်ပွင်ၸိုင်ႈ ၾၢႆႇၵဵပ်းၶွၼ်ႇ တီႈလႅၼ်လိၼ်တႆး – ၶႄႇ ဝဵင်းပၢင်ႇသၢႆး၊ ဢမ်ႇမီး လွင်ႈလူႉတၢႆ။
ဝၼ်းတီႈ 14/10/2019 ယၢမ်းၵၢင်ၶမ်ႈ မွၵ်ႈ 7 မူင်းၶိုင်ႈၼၼ်ႉ ၾႆးၾႃႉသျွတ်ႉသေ မႆႈႁွင်ႈလိုဝ်ႈသဝ်း ၵူၼ်းႁဵတ်းၵၢၼ်လူင် ပွင်ၸိုင်ႈၾၢႆႇၵဵပ်းၶွၼ်ႇ တႃႇ 6 ႁွင်ႈ တီႈဝဵင်းပၢင်ႇသၢႆး ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ။ မီးလွင်ႈလူႉသုမ်း ၶူဝ်းၶွင် မွၵ်ႈ 3 သႅၼ်ပျႃး။
ၽူႈမီးပုၼ်ႈၽွၼ်း ၾၢႆႇၶႄၾႆး ပၢင်ႇသၢႆး လၢတ်ႈဝႃႈ “ သၢႆၾႆးသျွတ်ႉၶႃႈဢေႃႈ။ ယွၼ်ႉႁွင်ႈၵႅပ်ႈသေ တိတ်းၸပ်းၵၼ်လႄႈ တၼ်းမႆႈၵႂႃႇ 6 ႁွင်ႈ။ ထိုင်ယၢမ်းၵၢင်ၶမ်ႈ မွၵ်ႈ 8 မူင်း ၾႆးၸင်ႇတေမွတ်ႇ။ ၶူဝ်းၶွင်ဢၼ်လႆႈမႆႈၸွမ်းၾႆးတႄႉ တေမီး မွၵ်ႈ 3 သႅၼ်ပျႃးၼႆႉ။ လွင်ႈၵူၼ်းမၢတ်ႇၸဵပ်းလူႉတၢႆတႄႉ ဢမ်ႇမီး” ဝႃႈၼႆ။
ဝဵင်းပၢင်ႇသၢႆးၼႆႉ ပဵၼ်ဝဵင်းလႅၼ်လိၼ်တႆး – ၶႄႇ ဢၼ်ၼိုင်ႈသေ ပဵၼ်ဝဵင်းၵႃႉၶၢႆ ၵူၼ်းၵိုၼ်းငိုၼ်းၶွၼ်ႈ။ ၵူၼ်းတၢင်ႇတီႈ တၢင်ႇလႅၼ်ၵေႃႈဢွၼ်ၵၼ်မႃးႁဵတ်းၵၢၼ်တီႈပၢင်ႇသၢႆးတင်းၼမ်။
