Friday, March 29, 2024

သွင်ၽူဝ်မေးၵႂႃႇပိတ်းၼဵင်ႈသေ ယဵပ်ႇၺႃးမၢၵ်ႇ ၵေႃႉပဵၼ်မေးၼၢင်း လူႉတၢႆ

Must read

သွင်ၽူဝ်မေးၵႂႃႇပိတ်းၼဵင်ႈသေ ယဵပ်ႇၺႃးမၢၵ်ႇမႅင်း ၼႂ်းၵိင်ႇၸႄႈဝဵင်းမိူင်းငေႃႉ ၸိုင်ႈတႆး ပွတ်းႁွင်ႇ ၵေႃႉပဵၼ်မေးလူႉတၢႆ။

Photo by – Taifreedom/ ၵူၼ်းမိူင်းငေႃႉ ဢၼ်ယဵပ်ႇၺႃးမၢၵ်ႇမႅင်း

ဝၼ်းတီႈ 9/10/2019 ယၢမ်းဝၢႆးဝၼ်း 3 မူင်းၼၼ်ႉ သွင်ပူႇဢွၵ်ႇ/ ၽူဝ်မေး ဝၢၼ်ႈမႃႉမူဝ်ႉ ၵိင်ႇၸႄႈဝဵင်းမိူင်းငေႃႉ ၸႄႈဝဵင်း ၵျွၵ်ႉမႄး ၸိုင်ႈတႆးပွတ်းႁွင်ႇၼၼ်ႉ ၵႂႃႇပိတ်းၼဵင်ႈသေ ယဵပ်ႇၺႃးမၢၵ်ႇမႅင်းၾင်လိၼ် တင်းသွင်ၽူဝ်မေး၊ ၵေႃႉပဵၼ်မေး ၸိုဝ်ႈႁွင်ႉ ၼၢင်းငိုၼ်း လႆႈမၢတ်ႇၸဵပ်းႁၢဝ်ႈႁႅင်းလူႉတၢႆ။

- Subscription -

လုင်းၸၢႆး ၵူၼ်းမိူင်းငေႃႉ လၢတ်ႈတီႈၽူႈတွႆႇႁွၵ်ႈဝႃႈ “ၶဝ်သွင်ၽူဝ်မေးၼႆႉ ယူႇၼိူဝ်လွႆ ၵႂႃႇပိတ်းၼဵင်ႈ ယဵပ်ႇၺႃးမၢၵ်ႇမႅင်း။ ၽူဝ်မၼ်းၸၢႆးတဵင်းတႄႉ တိူဝ်ႉၺႃးတီႈမိုဝ်း။ ၼၢင်းငိုၼ်းသမ်ႉ တိူဝ်ႉၺႃးတီႈၶႃသေ မၢတ်ႇၸဵပ်း ႁၢဝ်ႈႁႅင်း။ သဵင်ႈၸႂ်ၵႂႃႇ ၽွင်းသူင်ႇႁူင်းယႃ” ဝႃႈၼႆ။

ၼႂ်းၵိင်ႇၸႄႈဝဵင်းမိူင်းငေႃႉၼႆႉ ၵူၼ်းမိူင်းၵႆႉယဵပ်ႇၺႃးမၢၵ်ႇမႅင်းၾင်လိၼ်။ ဢၼ်လႆႈလူႉတၢႆၵေႃႈမီး၊ ဢၼ်လႆႈ မၢတ်ႇၸဵပ်း ထိုင်တီႈဢမ်ႇၸၢင်ႈႁဵတ်းၵၢၼ် ႁႃၵိၼ်လဵင်ႉတွင်ႉၵေႃႈမီး။

လုင်းၸၢႆး လၢတ်ႈဝႃႈ “ ၼႂ်းဝူင်ႈဝၢင်ႈၼႆႉ ၵူၼ်းမိူင်းငေႃႉ ၵႆႉယဵပ်ႇၺႃးမၢၵ်ႇ ၽွင်းၵႂႃႇပိတ်းၼဵင်ႈ။ သင်ဝႃႈ ဢမ်ႇမီး သူၼ်ၼဵင်ႈ ၼႆ ၵူၼ်းမိူင်းႁဝ်း ဢမ်ႇႁူႉဝႃႈတေႁဵတ်းၵိၼ်ၵၢၼ်သင်။ မၢၵ်ႇမႅင်းဢၼ်ၾင်လိၼ်ဝႆႉၸိူဝ်းၼၼ်ႉ လႅပ်ႈ တိုၵ်ႉမီးထႅင်ႈ တင်း ၼမ်ယူႇ မႆႈၸႂ်တႃႇၵႂႃႇႁဵတ်းၵၢၼ်ႁႃၵိၼ်လဵင်ႉတွင်ႉ” ဝႃႈၼႆ။

ၼႂ်းၸႄႈဝဵင်းၵျွၵ်ႉမႄးၼႆႉ တပ်ႉသိုၵ်းလူင်ပွင်ၸိုင်ႈမၢၼ်ႈ၊ တပ်ႉသိုၵ်း တဢၢင်း TNLA လႄႈ တပ်ႉသိုၵ်း RCSS ၶဝ်တူင်ႉ ၼိုင်ၵႂႃႇမႃး။

ဢူးလႃႉမွင်ႇ ၵူၼ်းမိူင်း ၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ တွၼ်ႈတႃႇတေၽဵဝ်ႈမၢၵ်ႇမႅင်းၼႆႉ ၶႂ်ႈယၢပ်ႇဝႆႉ။ မၢၵ်ႇမႅင်း ၸိူဝ်းၾင်လိၼ်ဝႆႉၸိူဝ်းၼၼ်ႉ ဢၼ်ပႆႇလႆႈၽဵဝ်ႈ မီးဝႆႉထႅင်ႈတင်းၼမ်။ လိူဝ်ၼၼ်ႉ ဢၼ်ႁၢင်ႈၵၢင်ဝႆႉ တီႈမႂ်ႇထႅင်ႈၸိူဝ်းၼႆႉ ၵေႃႈမီး။ ဢၼ်ၶဝ်ႁၢင်ႈၵၢင်ဝႆႉၼၼ်ႉ ၸွမ်းသဵၼ်ႈတႃႈသၢႆတၢင်း ၵူၼ်းမိူင်းၵႂႃႇမႃး။ တေႃႈလဵဝ် ၵူၼ်းမိူင်း တေႁဵတ်းႁိုဝ် ႁႃ ၵိၼ်လဵင်ႉ တွင်ႉၵၼ်” ဝႃႈၼႆ။

မိူဝ်ႈဝၼ်းတီႈ 8/10/2019 ၼၼ်ႉၵေႃႈ သွင်ၽူဝ်မေး ၵူၼ်းဝၢၼ်ႈပၢင်သၢင် ၵႂႃႇပိတ်းၼဵင်ႈသေ ယဵပ်ႇၺႃးမၢၵ်ႇမႅင်း ၵေႃႉပဵၼ် မေးၼၢင်းလႆႈလူႉတၢႆထင်တီႈ ၼင်ႇၵဝ်ႇ။

ၼႂ်းၸႄႈဝဵင်းၵျွၵ်ႉမႄးၼႆႉ ၵူၼ်းမိူင်းယဵပ်ႇၺႃးမၢၵ်ႇမႅင်းၾင်လိၼ် ၼႂ်းလိူၼ်သႅပ်ႊထႅမ်ႊပိူဝ်ႊလႄႈ ႁူဝ်လိူၼ်ဢွၵ်ႊထူဝ်ႊ ပိူဝ်ႊမႃးၼႆႉ ဢမ်ႇယွမ်း 10 ၵေႃႉယဝ်ႉ ဝႃႈၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း