ၶၢဝ်းတၢင်း 3 လိူၼ်မႃးၼႆႉ ၵူၼ်းမိူင်းၸိုင်ႈတႆးပွတ်းႁွင်ႇ ထုၵ်ႇတဵၵ်းတဵင်ပေႉၵိၼ် ပူၼ်ႉပႅၼ်သုၼ်ႇလႆႈၵူၼ်း တင်းမူတ်း တေမီးမွၵ်ႈ 70 ၵေႃႉ ၸုမ်းတူင်ႇဝူင်းၵူၼ်းတဢၢင်းပိုၼ်ၽၢဝ်ဝႆႉ။
ဢိင်ၼိူဝ် တပ်ႉသိုၵ်းလူင်ပွင်ၸိုင်ႈမၢၼ်ႈတင်း တပ်ႉသိုၵ်းတဢၢင်း TNLA ပဵၼ်ပၢင်တိုၵ်းၵၼ် တၢင်းၸႄႈဝဵင်းၵျွၵ်ႉမႄး၊ သီႇ ပေႃႉ၊ မၢၼ်ႈတူင်ႈ၊ ၵူတ်ႉၶၢႆလႄႈ လႃႈသဵဝ်ႈ ၼႂ်းၸိုင်ႈတႆးပွတ်းႁွင်ႇ ၸဵမ်ၸိူဝ်းၼႆႉ။ ၵူၼ်းမိူင်းထုၵ်ႇၺႃးတဵၵ်းတဵင် ပူၼ်ႉပႅၼ် သုၼ်ႇလႆႈၵူၼ်း။
လူၺ်းၶီႉသငႃး ၽူႈၶၢၼ်ပၢၵ်ႇ ၸုမ်းၼၢင်းယိင်းတဢၢင်း TWO လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းမိူင်းဢၼ် ထုၵ်ႇၺႃးပူၼ်ႉပႅၼ်သမ်ႉ ၵူၼ်းၸၢႆး၊ ၼၢင်းယိင်း ၶႂ်ႈဝႃႈ ႁူဝ်ၵူၼ်း ပဵင်းၵၼ်ၶႃႈယဝ်ႉ။ ၼၢင်းယိင်းၵမ်ႈၼမ်တႄႉ ယဵပ်ႇၺႃး မၢၵ်ႇ။ ၽူႈၸၢႆးသမ်ႉ ၺႃးသိုၵ်းႁွင်ႉၵႂႃႇ ပေႃႉထုပ်ႉတဵၵ်းတဵင် ယဝ်ႉၵေႃႈ ႁၢပ်ႇၶျေႃး ၸိူဝ်းၼႆႉ” ဝႃႈၼႆ။
မၼ်းၼၢင်းသိုပ်ႇလၢတ်ႈဝႃႈ “ဢၼ်လႆႈၵဵပ်းသဵၼ်ႈသၢႆမၢႆဝႆႉတႄႉ ၵူၼ်းမိူင်းဢၼ်ထုၵ်ႇၺႃးပူၼ်ႉပႅၼ် ပေႉၵိၼ် ၸွမ်းတူဝ် ၵူၺ်း ပႆႇပႃးသဵၼ်ႈမၢႆ မၢၵ်ႇလူင်းတူၵ်းသႂ်ႇႁိူၼ်းယေး၊ ၶူဝ်းၶွင်ႁိူၼ်းယေးလႆႈထုၵ်ႇၺႃးလၵ်ႉ၊ လူႉႁၢႆ ၸိူဝ်းၼႆႉ။ ၼႂ်းမိူင်း တႆးပွတ်းႁွင်ႇၼႆႉ ဢမ်ႇၵႃးၵႃႈၼႆႉၵူၺ်း။ မၢင်တီႈ တီႈဢၼ်ဢမ်ႇယိုၼ်းမိုဝ်းထိုင်လႆႈၵေႃႈမီး။ လိူဝ်ၼၼ်ႉ လွင်ႈလူႉသုမ်း ၶူဝ်းၶွင်ႁိူၼ်းယေးလႄႈ လွင်ႈၼၢင်းယိင်းထုၵ်ႇၺႃးၵၼ်ႉၸၼ်ၸိူဝ်းၼႆႉ မၢင်လွင်ႈယင်းဢမ်ႇလႆႈပိုၼ်ၽၢဝ်ႇပႃးၵေႃႈမီး” ဝႃႈၼႆ။
မၢႆးမဵဝ်းဢွင်ႇ ၸုမ်းၵမ်ႉထႅမ်ၾၢႆႇမၢႆမီႈပၵ်းပိူင် ၸုမ်းတဢၢင်း လၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းၶၢဝ်းတၢင်း 3 လိူၼ်မႃးၼႆႉ ၵူၼ်းမိူင်းတႆး ပွတ်းႁွင်ႇ 70 ပၢႆ ထုၵ်ႇပူၼ်ႉပႅၼ်ၼမ်လိူဝ်မႃး။ တေႃႈလဵဝ် ဢၼ်လႆႈၵဵပ်းဝႆႉသဵၼ်ႈမၢႆၸွမ်းၼင်ႇယိုၼ်းထိုင် လႆႈၵူၺ်း” ဝႃႈၼႆ။
ယူႇတီႈၸုမ်းတူင်ႉၼိုင်တူင်ႇဝူင်းတဢၢင်း တုၵ်းယွၼ်းဝႃႈ ႁိူၼ်းယေး ဢၼ်ထုၵ်ႇၺႃးမၢၵ်ႇလူင်တူၵ်းသႂ်ႇသေ လူႉၵွႆၸိူဝ်း ၼၼ်ႉ ႁႂ်ႈလႆႈသၢႆႈတႅၼ်းပၼ်ၶိုၼ်း။ ယဝ်ႉၵေႃႈ လွင်ႈၵူၼ်းမိူင်းထုၵ်ႇၺႃးပူၼ်ႉပႅၼ်ၸိူဝ်းၼၼ်ႉၵေႃႈ ႁႂ်ႈလႆႈ ႁပ်ႉလွင်ႈ ပဵၼ်ထမ်းတြႃးမၢၼ်ႇမႅၼ်ႈ။ လိူဝ်ၼၼ်ႉ ၶႂ်ႈယွၼ်းပႃးထႅင်ႈဝႃႈ ယႃႇပေသိုပ်ႇႁဵတ်း/ ပဵၼ်ထႅင်ႈ လွင်ႈပူၼ်ႉပႅၼ် သုၼ်ႇလႆႈ ၵူၼ်း၊ ၼွၵ်ႈလိူဝ်ၼၼ်ႉ ယႃႇဢဝ်ၵူၼ်းမိူင်းဝႆႉပဵၼ်တီႈပဝ်ႉမၢႆသေ ႁဵတ်းပၢင်တိုၵ်းၼႆ ၸိူဝ်းၼႆႉ။
ၵူၼ်းမိူင်းတႆးပွတ်းႁွင်ႇ ဢၼ်ထုၵ်ႇပူၼ်ႉပႅၼ် ၼႂ်းၶၢဝ်းတၢင်း 3 လိူၼ် မိူၼ်ၼင်ႇ တင်ႈတႄႇလိူၼ်ၵျူႊလၢႆႊ၊ လိူၼ်ဢေႃႊ ၵတ်ႊသ် လႄႈ လိူၼ်သႅပ်ႊထႅမ်ႊပိူဝ်ႊမႃးၼႆႉ ဢၼ်ယဵပ်ႇၺႃးမၢၵ်ႇမႅင်း(ၾင်လိၼ်) 10 ၵေႃႉ၊ ဢၼ်ၺႃးသိုၵ်းႁွင်ႉၵႂႃႇၸွမ်း သၢႆသိုၵ်း 23 ၵေႃႉ၊ တီႉၺွပ်း 3 ၵေႃႉ၊ ၵဵပ်းသိုၵ်းမႂ်ႇ 10 ၵေႃႉလႄႈ တဵၵ်းတဵင်ပေႃႉထုပ်ႉ 1 ၵေႃႉ။
