ၸုမ်းၶျႄႇရီႇမဵတ်ႉတႃႇၾွင်ႊတေႊသျိၼ်ႊ လူင်းၵူတ်ႇထတ်းယူတ်းယႃတႃပၼ်ပီႈၼွင်ႉၵူၼ်းမိူင်းတႆး ပွတ်းၸၢၼ်း လၢႆၸႄႈ ဝဵင်း ၼႂ်းၶၢဝ်းတၢင်း 4 ဝၼ်းမႃးၼႆႉ တင်းမူတ်းယူတ်းယႃပၼ်ၵႂႃႇယဝ်ႉ တေမီးမွၵ်ႈ 3,000 ၵေႃႉ။
တႄႇဢဝ် ဝၼ်းတီႈ 1-6/10/2019 ယူႇတီႈ ၸုမ်းၶျႄႇရီႇမဵတ်ႉတႃႇၾွင်ႊတေႊသျိၼ်ႊ လူင်းပိုၼ်ႉတီႈၵူတ်ႇထတ်းယူတ်းယႃ တႃ ပၼ် ၵူၼ်းမိူင်းလၢႆးၶႃႈ၊ မိူင်းၵိုင်၊ ၵေးသီး၊ မိူင်းၼွင်လႄႈ မိူင်းၵၢဝ် ၸဵမ်ၸိူဝ်းၼႆႉ တီႈဝတ်ႉ/ ၵျွင်းပၢင်ႇ ၸႄႈဝဵင်းလၢႆးၶႃႈ ၸႄႈ တွၼ်ႈလွႆလႅမ် ၸိုင်ႈတႆးပွတ်းၸၢၼ်း။
ၸဝ်ႈတူၼ်ၶူး ပၼ်တဝ ၸဝ်ႈၵွၼ်းဝတ်ႉ/ ၵျွင်းပၢင်ႇ လၢတ်ႈတီႈၽူႈတွႆႇႁွၵ်ႈဝႃႈ “ တႄႇဢဝ် ဝၼ်းတီႈ 1 ထိုင်မႃး မိူဝ်ႈဝႃး ဝၼ်းတီႈ 3 ၼႆႉ သဵၼ်ႈမၢႆၵူၼ်းမိူင်းဢၼ်မႃးယူတ်းယႃတႃ တေမီး 2,476 ၵေႃႉယဝ်ႉ။ ပႆႇပႃးမိူဝ်ႈၼႆႉ ဝၼ်းတီႈ 4 ပေႃးႁူမ်ႈ ပႃး ၵၼ်တင်းမိူဝ်ႈၼႆႉ တေမီးႁိမ်း 3,000 ၵေႃႉယဝ်ႉ။ ၵူၼ်းမိူင်း ဢၼ်မႃးယူတ်းယႃတႃတႄႉ ၵမ်ႈၼမ် တေပဵၼ်ၵူၼ်းထဝ်ႈ ဢႃယုယႂ်ႇ။ လိူဝ်ၼၼ်ႉ ၸဝ်ႈသၢင်ႇဢွၼ်ႇ၊ လုၵ်ႈႁဵၼ်း ၸိူဝ်းၼႆႉ။ တီႈဝဵင်းလၢႆးၶႃႈၼႆႉတႄႉ ၶဝ်မႃးယႃပၼ်တႃၼႆႉ တေလႆႈ ဝႃႈ ပဵၼ်ပွၵ်ႈဢွၼ် တၢင်းသုတ်း” ဝႃႈၼႆ။
မၼ်းၸဝ်ႈသိုပ်ႇလၢတ်ႈဝႃႈ “ဝၼ်းတီႈ 1 ထိုင် 4 ၼႆႉ ၶဝ်ၵူတ်ႇထတ်းပၼ်သေ မိူဝ်ႈၽုၵ်ႈ ဝၼ်းတီႈ 5 တင်း 6 သမ်ႉ ဢၼ်လူဝ်ႇၽႃႇၼၼ်ႉ ၶဝ်တေၽႃႇပၼ် တီႈႁူင်းယႃ လၢႆးၶႃႈ။ ဢၼ်လႆႈႁူႉသဵၼ်ႈမၢႆဝႆႉ တႄႇဢဝ် ဝၼ်းတီႈ 1 ထိုင် 3 ၼႆႉ တင်းမူတ်းၽူႈတေၽႃႇတတ်းတေမီး 142 ၵေႃႉ။ မိူဝ်ႈၼႆႉ ဝၼ်းတီႈ 4 ပႃး” ဝႃႈၼႆ။
ၶျႄႇရီႇမဵတ်ႉတႃႇ ၾွင်ႊတေႊသျိၼ်ႊ လူင်းၵူတ်ႇထတ်းယူတ်းယႃပၼ် ႁူၺ်ႇတႃ၊ ပၼ်ယႃႈယႃ၊ ပၼ်မၢၼ်ႇတႃ လႄႈ ၽႃႇတတ်းပၼ်ၼႆႉတႄႉ ဢမ်ႇလႆႈသဵင်ႈၵႃႈၸႂ်ႉၸၢႆႇသင် ၼႆယဝ်ႉ။
“ မိူဝ်ႈၼႆႉ ဝၼ်းတီႈ 4 ၵေႃႉ ၵူၼ်းမိူင်းဢွၼ်ၵၼ်မႃး တေမီးမွၵ်ႈ 500-600 ၵေႃႉၼႆႉ။ ဢွၼ် တၢင်းတႄႉ ၶဝ်ယိူင်း ဢၢၼ်း ဝႆႉတီႈလၢႆးၶႃႈ တႃႇၵူၼ်း 600 ၵေႃႉ လူင်းတႂ်ႈ။ ၵူၺ်းၵႃႈ ပီႈၼွင်ႉတၢင်ႇဝၢၼ်ႈတၢင်ႇဝဵင်းၵေႃႈ ႁပ်ႉႁူႉၵၼ်သေ ဢွၼ်ၵၼ်မႃး ၵူတ်ႇထတ်းယူတ်းယႃ။ တႄႇဢဝ် ဝၼ်းတီႈ 1 ထိုင် 3 ၼႆႉ မေႃယႃ လႆႈၸႅၵ်ႇပၼ်မၢၼ်ႇတႃ ၵႂႃႇ ႁိမ်း 2,000 ဢၼ်” ၸဝ်ႈတူၼ်ၶူးပၼ်တဝလၢတ်ႈၼႄထႅင်ႈၼင်ႇၼႆ။
မိူဝ်ႈပီ 2018 ၼၼ်ႉၵေႃႈ ၶျႄႇရီႇမဵတ်ႉတႃႇၾွင်ႊတေႊသျိၼ်ႊ လႆႈလူင်းၵူတ်ႇထတ်းပၼ် ပီႈၼွင်ႉတၢင်း မိူင်းၼၢႆး၊ ၼမ်ႉ ၸၢင်။ လႆႈႁူႉဝႃႈ ၾွင်ႊတေႊသျိၼ်ႊၼႆႉ လူင်းၵူတ်ႇထတ်းတၢင်းပဵၼ်တႃပၼ်ၵူၼ်းမိူင်း ၼိုင်ႈပီ သွင်ပွၵ်ႈ ဝႃႈၼႆ။
