Friday, March 29, 2024

ၾႆးမႆႈဝတ်ႉဝိႁၢရ်မိူင်းလင်း သီႇပေႃႉ မႆႈပႃးၸဝ်ႈသၢင်ႇတူၼ်ၼိုင်ႈ

Must read

ၾႆးမႆႈတီႈဝတ်ႉဝိႁၢရ်လူင် ဝၢၼ်ႈမိူင်းလင်း ၸႄႈဝဵင်းသီႇပေႃႉ ႁၢဝ်ႈႁႅင်းသေ မႆႈပႃး ၸဝ်ႈသၢင်ႈဢွၼ်ႇတူၼ်ၼိုင်ႈလႄႈ မႆႈဝတ်ႉဝိႁၢရ်တင်းလင်။

Photo by – Shar Htat Paing/ ၾႆးမႆႈဝိႁၢရ်လူင် မိူင်းလင်း ၸႄႈဝဵင်းသီႇပေႃႉ မိူဝ်ႈဝ်းတီႈ 2/10/2019 ယၢမ်းၵၢင်ၶမ်ႈ

မိူဝ်ႈဝၼ်းတီႈ 2/10/2019 ယၢမ်းၵၢင်ၶမ်ႈ 9:45 မူင်းၼၼ်ႉ ၾႆးတႄႇမႆႈတီႈဝတ်ႉဝိႁၢရ်လူင် ဝၢၼ်ႈမိူင်းလင်း ၸႄႈဝဵင်း သီႇပေႃႉ ၸိုင်ႈတႆးပွတ်းႁွင်ႇ ႁၢဝ်ႈႁႅင်းသေ မႆႈပႃးၸဝ်ႈသၢင်ႇ ၸိုဝ်ႈႁွင်ႉ ၸဝ်ႈဢိင်ႇၵုရ ဢႃယု 9 ၶူပ်ႇ။

- Subscription -

ၸဝ်ႈၶူး ပၺ်ၺႃၸေႃးတ ၸဝ်ႈၵွၼ်းဝတ်ႉမိူင်းလင်း လၢတ်ႈတီႈၽူႈတွႆႇႁွၵ်ႈဝႃႈ “ ၵျွင်းၸဝ်ႈႁဝ်းၶဝ်ၼႆႉ ပဵၼ်ၵျွင်းဝၢၼ်ႈ ၼွၵ်ႈ ဢမ်ႇမီးၾႆးၾႃႉ၊ လႆႈၸႂ်ႉၾႆးသႅင်လႅတ်ႇသေတႆႈၵူၺ်း။ ၸဝ်ႈသၢင်ႇမၢင်ၸဝ်ႈသမ်ႉ တႆႈတဵၼ်း။ လွင်ႈၾႆးမႆႈ တႄႉ လုၵ်ႉတီႈလႂ်သေ မႆႈမႃးဢၼ်ဝႃႈၼၼ်ႉ ပႆႇႁူႉလီလီ။ ထႅင်ႈပိူင်ၼိုင်ႈၵေႃႈ ၵျွင်းၼႆႉ သမ်ႉပဵၼ်ၵျွင်းမႆႉပႅၼ်ႈ လႄႈ မႆႈဝႆးၼႃႇ ၸဝ်ႈသၢင်ႇဢွၼ်ႇတူၼ်ၼိုင်ႈ ပႃးၵႂႃႇၸွမ်းၾႆး။ ၸွႆႈၵၼ်ဢဝ်ဢမ်ႇတၼ်းၶိုတ်းဢိူဝ်ႈ တၵ်ႉၵႃႇ” ဝႃႈၼႆ။

ၵူဝ်ႇမဵဝ်း ၸုမ်းၸွႆႈထႅမ်ပရႁိတဢမ်ႇမီးၶွပ်ႇလႅၼ် သီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ ၾႆးမႆႈဝတ်ႉတင်းလင်ၶႃႈ ယဝ်ႉ။ ဢမ်ႇတၼ်းလႆႈၶူဝ်းၶွင်သင်ၶႃႈ။ မႆႈပႃးၸဝ်ႈသၢင်ႇဢွၼ်ႇတူၼ်ၼိုင်ႈၵႂႃႇၼႂ်းၾႆး။ တေႃႈလဵဝ် လႆႈဢဝ်ၶၢပ်ႈတူဝ်တၢႆ ၸဝ်ႈ သၢင်ႇၼၼ်ႉ ၵႂႃႇဝႆႉတီႈႁူင်းယႃ သီႇပေႃႉယဝ်ႉ” ဝႃႈၼႆ။

ဝတ်ႉမိူင်းလင်းၼႆႉ ယၢၼ်ၵႆဝဵင်းသီႇပေႃႉ မွၵ်ႈ 18 လၵ်း ပဵၼ်ဝတ်ႉၵဝ်ႇၵႄႇလင်ၼိုင်ႈ။

“ၸဝ်ႈသၢင်ႇဢွၼ်ႇဢၼ်လႆႈလူႉလွၼ်ႇၵႂႃႇၸွမ်းၾႆးၼၼ်ႉ မၼ်းၸဝ်ႈတႆႈတဵၼ်းသေ လူလိၵ်ႈယဝ်ႉ ဢဝ်ၼွၼ်းပႅတ်ႈ ၾႆး တဵၼ်းၼၼ်ႉ ၸင်ႇလၢမ်းမႆႈဝတ်ႉ/ ၵျွင်းပႃး” ၽူႈၸွႆႈထႅမ် ၸုမ်းတူင်ႇဝူင်းၵေႃႉၼိုင်ႈလၢတ်ႈၼႄၼင်ႇၼႆ။

ဝတ်ႉမိူင်းလင်းၼႆႉ မီးမုၼ်ၸၢင်း 8 တူၼ် လႄႈ ၸဝ်ႈသၢင်ႇ 7 တူၼ်၊ ၸဝ်ႈသၢင်ႇဢွၼ်ႇ ၸိုဝ်ႈႁွင်ႉ ဢိင်ႇၵုရ ဢႃယု 9 ၶူပ်ႇ ဢၼ်လႆႈလွၼ်ႇၵႂႃႇၸွမ်းၼႂ်းၾႆးၼၼ်ႉ တိုၵ်ႉၶိုၼ်ႈႁူင်းႁဵၼ်းလူင်ပွင်ၸိုင်ႈဝႆႉ ၸၼ်ႉငဝ်ႈ(သူငယ်တန်း) ဝႃႈၼႆ။

ၸဝ်ႈၶူး ပၺ်ၺႃၸေႃးတ လၢတ်ႈဝႃႈ “ ၵူႈပွၵ်ႈတႄႉ ႁဝ်းၸဝ်ႈၶဝ် ၵုမ်းတူၺ်းၸွမ်ႈၸဝ်ႈသၢင်ႇၶဝ်ယူႇ လႆႈတၵ်ႉၶဝ် ႁႂ်ႈၶဝ် မွတ်ႇၾႆးသေၸင်ႇၼွၼ်း။ ပွၵ်ႈၼႆႉ ၵမ်းၼိုင်ႈၵူၺ်း မႆႈဝႆးၼႃႇ ႁဝ်းၸဝ်ႈၵႂႃႇတူၺ်းၶဝ် ဢမ်ႇတၼ်းၶိုတ်း။ ၸဵမ်မုၼ်ၸၢင်း၊ ၸဝ်ႈသၢင်ႇ ဢွၼ်ၵၼ် ႁိပ်ႈၼႅတ်ႈၸွႆႈဢဝ်ၶူဝ်းၶွင်ဢွၵ်ႇဝႆးဝႆး” ဝႃႈၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း