ပၢင်ပွႆးမႁႃသတိပထၢၼ်ႇ ပၢင်ၵုမ်လူင် ၺီႇလႃႇၶၢမ်ႇ သင်ၶၸဝ်ႈ ၼႂ်းၸိုင်ႈတႆး ၵမ်းထူၼ်ႈ 53 ၼႆႉ တေၸတ်းႁဵတ်းတီႈ ၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း။
ပေႃးထိုင်မႃး ဝၼ်းတီႈ 28/02/2019 – 02/03/2019 ယူႇတီႈၵေႃၵမ်ၵၢၼ် ပွင်ပဵၼ်ပၢင်ပွႆးၺီႇလႃႇၶၢမ်ႇ ၸႄႈဝဵင်းၵဵင်းတုင် တေၸတ်းႁဵတ်း ပၢင်ပွႆးမႁႃသတိပထၢၼ်ႇ ပၢင်ၵုမ်လူင် ၺီႇလႃႇၶၢမ်ႇ သင်ၶၸဝ်ႈ ပွၵ်ႈၵမ်း 3 တႃႇဝဵင်းၵဵင်းတုင် လႄႈ ၵမ်းထူၼ်ႈ 53 ပတ်းပိုၼ်ႉၸိုင်ႈတႆး။ ပၢင်ပွႆးၺီႇလႃႇၶၢမ်ႇတေႁဵတ်းတီႈတိူၵ်ႈ ၵမ်မထၢၼ်းၸွမ်ၸႅင်ႈ ၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း။
လုင်းၸၢႆးဝုၼ်း ၽူႈၼမ်းၼႂ်းၵေႃၵမ်ၵၢၼ် ပွင်ပဵၼ်ပၢင်ပွႆးၺီႇလႃႇၶၢမ်ႇ ၸႄႈဝဵင်းၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ “ တေႃႈလဵဝ် ႁဝ်းၶႃႈ ႁၢင်ႈႁႅၼ်း ယဝ်ႉတူဝ်ႈၵႂႃႇယဝ်ႉ 80 ပိူဝ်ႊသႅၼ်ႊ။ ဢၼ်လူဝ်ႇႁဵတ်းၼႆႉ ၵိုတ်းထႅင်ႈသုမ်ႉလဵင်ႉလူ ၵူၺ်းၶႃႈ၊ သုမ်ႉလဵင်ႉလူတႄႉ ၵွပ်ႈပိူဝ်ႈ ပဵၼ်သုမ်ႉလဵၵ်းလႄႈ ပႆႇႁတ်းဢွၵ်ႇမႃးတင်ႈတိူဝ်ႈ။ ပေႃးဝၼ်းတီႈ 24 ၸင်ႇဢဝ် မႃးတင်ႈ။ တေႃႈလဵဝ်တႄႉ ဢွင်ႈတီႈလိုဝ်ႈ/တီႈၼွၼ်ႈ တႃႇပီႈၼွင်ႉၶႅၵ်ႇတႄႉ ႁဝ်းၶႃႈ ႁၢင်ႈႁႅၼ်းဝႆႉမူတ်းယဝ်ႉၶႃႈ” ဝႃႈၼႆ။
ၸႄႈဝဵင်းဢၼ်မီး တိူၵ်ႈၵမ်မထၢၼ်း သတိပထၢၼ်ႇၼႂ်းၸိုင်ႈတႆး ပၼ်ႇပုတ်ႈၵၼ်သေ ၸတ်းႁဵတ်းပၢင်ၵုမ်လူင်ၺီႇ လႃႇၶၢမ်ႇသင်ၶၸဝ်ႈ မႃးၵူႈပီ။ ပဵၼ်ပၢင်ၵုမ် သင်ၶၸဝ်ႈမႃးဢုပ်ႇဢူဝ်းလႅၵ်ႈလၢႆႈ တၢင်ႇလၢတ်ႈၼႄၵၼ် လွင်ႈလီ လွင်ႈ ၸႃႉ လွင်ႈၶိုၼ်ႈယႂ်ႇမႂ်ႇသုင်၊ လွင်ႈယူပ်ႈယွမ်း တိူၵ်ႇၵမ်ႇမထၢၼ်းၽႂ်မၼ်း၊ ဢုပ်ႇဢူဝ်းဝၢင်းၽႅၼ် တမ်းဝၢင်း ၼႃႈၵၢၼ် တႃႇပၢင်တြႃး ဢၼ်တေပိုတ်ႇၼႂ်းပီတေမႃး ၸဵမ်ၸိူဝ်းၼႆႉ။
လုင်းၸၢႆးဝုၼ်း လၢတ်ႈဝႃႈ “ တီႈပၢင်ၵုမ်လူင် ၺီႇလႃႇၶၢမ်ႇၼႆႉ တင်းမူတ်း တိူၵ်ႈၵမ်မထၢၼ်း တေမႃးၶိုၼ်ႈႁွတ်ႈ 35 တိူၵ်ႈ။ ၼႂ်းဝၼ်းတီႈ 27/02/2019 ပဵၼ်ဝၼ်းသင်ၶၸဝ်ႈၶွၼ်ႈတုမ်ၵၼ်။ ဝၼ်းတီႈ 28/02/2019 ပဵၼ်ဝၼ်း ပၢင်ၵုမ်၊ ဝၼ်းတီႈ 01/03/2019 ပဵၼ်ဝၼ်းပၢင်ၵုမ် ဝၼ်းထူၼ်ႈသွင်။ ဝၼ်းတီႈ 02/03/2019 သမ်ႉ ပဵၼ်ဝၼ်း လူႇတၢၼ်းယၢတ်ႇ ၼမ်ႉ” ဝႃႈၼႆ။
သုၼ်ငဝ်ႈငုၼ်းတိုဝ်းၵမ် ၵမ်မထၢၼ်း မူႇလမိၼ်းၵုၼ်းၼႆႉ ၼႂ်းမိူင်းတႆးပတ်းပိုၼ်ႉ မီး 18 တီႈ (ၼႂ်း 18 ၸႄႈဝဵင်း)။ ၼႂ်းၼၼ်ႉ တိူၵ်ႈၵမ်မထၢၼ်းတီႈဝဵင်းလၢင်းၶိူဝ်း ပဵၼ်တိူၵ်ႈငဝ်ႈ၊ တီႈတႄႇပၢင်တိုဝ်းၵမ် ၵမ်မထၢၼ်းပွၵ်ႈဢွၼ်တၢင်းသုတ်း။
