ၸဝ်ႈယွတ်ႈသိုၵ်းတူၵ်ႇလၢတ်ႈဝႃႈ တပ်ႉသိုၵ်းလူင်ပွင်ၸိုင်ႈ ၸွမ်းၵဝ်းႁူင်းႁဵၼ်းၸိူဝ်ႉၸၢတ်ႈတႆးၼႆႉ တုမ်ႉတိူဝ်ႉလွင်ႈယုမ်ႇယမ်ၵၼ်

ၾၢႆႇတပ်ႉသိုၵ်းမၢၼ်ႈ သွၵ်ႈတဝ်ၵူတ်ႇထတ်းႁူင်းႁဵၼ်းၸိူဝ်ႉၸၢတ်ႈ ၼႂ်းဢိူင်ႇထုင်ႉယိူင်း ၸႄႈဝဵင်းလၢႆးၶႃႈ၊ ၵူတ်ႇထတ်းထဵတ်ႈထၢမ်ပႃးမေႃသွၼ်။

သၢႆသိုၵ်းမၢၼ်ႈၼႂ်းတပ်ႉၵွင် ၶမရ 525 ၊ ႁႅင်းၵူၼ်းမွၵ်ႈ 30 ပၢႆဢိင်ဢၢင်ႈၶေႃႈၸီႉသင်ႇပႃႈၼိူဝ် တိူင်းသိုၵ်းဝၼ်းဢွၵ်ႇၵၢင် (ယလၶ) ၶူဝ်လမ်သေ ၶဝ်ႈၵႂႃႇၵူတ်ႇထတ်း တွင်ႈထၢမ်မေႃသွၼ် လွင်ႈႁူင်းႁဵၼ်းၸိူဝ်ႉၸၢတ်ႈ တီႈဝၢၼ်ႈၽြႃးလိူၼ်သီႇ ၼႂ်းဢိူင်ႇထုင်ႉယိူင်း ၸႄႈဝဵင်းလၢႆးၶႃႈ မိူဝ်ႈဝၼ်းတီႈ 11/01/2018 ။

ၵဵဝ်ႇၵပ်းလွင်ႈၼႆႉ ၸွမ်သိုၵ်းလူင်ယွတ်ႈသိုၵ်း ႁူဝ်ပဝ်ႈၶွင်ႇသီႇဢဝ်ၶိုၼ်းၸိုင်ႈတႆး (RCSS) ယၢမ်ႈလၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ- “မိူၼ်ၼင်ႇဝၼ်းမိူဝ်ႈၼႆႉ တပ်ႉမတေႃႇၸွမ်းၸွပ်ႇဝႃႈ ႁူင်းႁဵၼ်း RCSS မီးတီႈလႂ်၊ ႁူင်းယႃ RCSS မီးတီႈလႂ်ၼႆသေ ၵႂႃႇၸွမ်းယႃႉ၊ ဢၼ်ၼႆႉမၼ်းႁဵတ်းႁႂ်ႈလွင်ႈ ဢမ်ႇယုမ်ႇယမ်ၵၼ် ၵိူတ်ႇၶိုၼ်ႈမႃးတိၵ်းတိၵ်း၊ ၸိူဝ်းၼႆႉ ၾၢင်ႁၢင်ႈလွင်ႈငမ်းယဵၼ် မၼ်းဢမ်ႇဢွၵ်ႇယဝ်ႉ”- ဝႃႈၼႆ။

မၼ်းၸဝ်ႈသိုပ်ႇလၢတ်ႈၾၢင်ႉတိူၼ်ဝႃႈ- “ပေႃးႁူင်းႁဵၼ်းလူင်ပွင်ၸိုင်ႈမီးတီႈလႂ် ႁဝ်းၵႂႃႇႁႄႉႁၢမ်ႈပႅတ်ႈမူတ်း ၶဝ်ယိုင်ႈၶႅၼ်းတုမ်ႉတိူဝ်ႉႁႅင်း၊ ႁူင်းႁဵၼ်းလူင်ပွင်ၸိုင်ႈၼႆႉ ႁဝ်းဢမ်ႇပၼ်သွၼ်ၸွမ်းဝၢၼ်ႈၼွၵ်ႈၼႃးပၢင်ႇ၊ ႁဝ်းႁၢမ်ႈဢမ်ႇပၼ်သွၼ်ၼႂ်းဝဵင်းၵေႃလႆႈ၊ မိူင်းတႆးလူး ႁူင်းႁဵၼ်းလူင်ပွင်ၸိုင်ႈ ယႃႇႁႂ်ႈမီးသေတီႈ ႁဝ်းႁၢမ်ႈလႆႈ၊ ၶဝ်ၵႂႃႇဢဝ်ႁူမ်ႇလူမ်ႈၶူးသွၼ်တႃႇသေႇဢမ်ႇၸႂ်ႈ”- ၸဝ်ႈယွတ်ႈသိုၵ်း လၢတ်ႈၼႄၼင်ႇၼႆ။

ဝႅပ်ႊသၢႆႊ သႅၼ်ပၢႆး ဢွၵ်ႇၶၢဝ်ႇဝႆႉဝႃႈ မေႃသွၼ်ၼၢင်းၸၢမ်ႁွမ် ႁူင်းႁဵၼ်းၸိူဝ်ႉၸၢတ်ႈထုင်ႉယိူင်း လၢတ်ႈၼႄဝႃႈ- “သိုၵ်းမၢၼ်ႈၶဝ်မႃးယွၼ်းတူၺ်းမၢႆၾၢင် (ဝႂ်ၵိုၵ်းတူဝ်) ၵူၼ်းဝၢၼ်ႈလႄႈ မေႃသွၼ်ၶဝ်၊ တႅမ်ႈမၢႆၵႂႃႇမၢႆတူဝ်ၼႂ်းမၢႆၾၢင်၊ ထၢႆႇၶႅပ်းႁၢင်ႈလုၵ်ႈႁဵၼ်းလႄႈ ႁူင်းႁဵၼ်းၵႂႃႇ။ ထၢမ်ၶႃႈၼၢင်းဝႃႈ ႁူင်းႁဵၼ်းၼႆႉ ၶဝ်ႈတၢင်းၵၢၼ်ယူႇႁႃႉ၊ မေႃသွၼ်ၶဝ်လုၵ်ႉတီႈလႂ်မႃး၊ ယဝ်ႉၸၼ်ႉသိပ်းယဝ်ႉႁႃႉ၊ သိုၵ်းတႆးလူး မႃးတီႈၼႆႈယူႇႁႃႉၸိူဝ်းၼႆႉ”- ဝႃႈၼႆ။

ႁူင်းႁဵၼ်းၸိူဝ်ႉၸၢတ်ႈ ၼႂ်းဢိူင်ႇထုင်ႉယိူင်း ၸႄႈဝဵင်းလၢႆးၶႃႈၼႆႉ ၸဝ်ႈသင်ၶလႄႈၵူၼ်းဝၢၼ်ႈ ႁူမ်ႈၵၼ်တႄႇပူၵ်းတင်ႈမႃးမိူဝ်ႈၼႂ်းပီ 2015 ။ လုၵ်ႈႁဵၼ်းမီး 36 ၵေႃႉ၊ မေႃသွၼ်မီး 3 ၵေႃႉ။ ႁူင်းႁဵၼ်းၼႆႉ ပူင်သွၼ်ပၼ်မိူၼ်ၼင်ႇပၢႆးၼပ်ႉ၊ ပၢႆးပိုၼ်း၊ လိၵ်ႈဢိင်းၵလဵတ်ႈ၊ လိၵ်ႈတႆး၊ လိၵ်ႈမၢၼ်ႈ ၸိူဝ်းၼႆႉ။

မိူဝ်ႈၼႂ်းလိူၼ်ၻီႊသႅမ်ႊၿိူဝ်ႊ 2017 ပူၼ်ႉမႃး မီးၶၢဝ်ႇဢွၵ်ႇမႃးဝႃႈ ၽူႈၵွၼ်းတိူင်းသိုၵ်း (ယလၶ)ၶူဝ်လမ်၊ ၸွမ်ႁၢၼ်တၢၼ်းလၢႆႇ ၸီႉသင်ႇႁႂ်ႈၵူတ်ႇထတ်း ႁူင်းႁဵၼ်းလႄႈႁူင်းယႃ ၸိူဝ်းဢမ်ႇၶဝ်ႈတၢင်းၵၢၼ် ၼႂ်းပိုၼ်ႉတီႈၵုမ်းၵမ်တိူင်းသိုၵ်းၶူဝ်လမ် ၼႂ်းၸႄႈတွၼ်ႈလွႆလႅမ် ပႃးၸဵမ်ၼႂ်းၸႄႈတွၼ်ႈလၢင်းၶိူဝ်း ၸိူဝ်းၼႆႉ။