ၶွင်ႊသီႊၾႅတ်ႊၻရႄႊၸၢဝ်းၶိူဝ်းၽွမ်ႉႁူမ်ႈ (UNFC) တင်း ၸုမ်းႁူမ်ႈသၢင်ႈၶၵ်ႉၵၢၼ်ငမ်းယဵၼ် (PPST) ႁူပ်ႉၵၼ်ပွၵ်ႈၵမ်းႁႅၵ်ႈ ၼႂ်းၵဵင်းမႆႇ ၸိုင်ႈထႆး၊ ဢုပ်ႇဢူဝ်းဝၢင်းၽႅၼ်ႁႂ်ႈၵႆႉလႆႈႁူပ်ႉၵၼ် ပိူဝ်ႈတႃႇၵႄႈပၼ်ႁႃ ဝူင်ႈၵၢင်လူင်ပွင်ၸိုင်ႈ၊ တပ်ႉသိုၵ်းသိုၵ်းမၢၼ်ႈ။ ဢုပ်ႇဢူဝ်းလႅၵ်ႈလၢႆႈတၢင်းႁူႉၵၼ်လႄႈ တေတိုၵ်းသူၼ်းၸိူဝ်း ပႆႇလူင်းလၢႆးမိုဝ်း NCA ႁႂ်ႈလူင်းလၢႆးမိုဝ်း။
ဢိင်ၼိူဝ်ၶေႃႈတႅပ်းတတ်းပၢင်ၵုမ်ၶိုၵ်ႉၶၵ်ႉ ၸုမ်းဢွၼ်ႁူဝ် ၸုမ်းႁူမ်ႈသၢင်ႈၶၵ်ႉၵၢၼ်ငမ်းယဵၼ် (PPST) ဢၼ်ၸတ်းႁဵတ်းတီႈၼႂ်းၵဵင်းမႆႇ ၸိုင်ႈထႆး ဝၼ်းတီႈ 11-12/01/2018 ၶၢဝ်းတၢင်းသွင်ဝၼ်းသေ ထိုင်မႃးဝၼ်းတီႈ 13/01/2018 တင်ႈတႄႇပွတ်းၼႂ်ၶၢဝ်းယၢမ်း 9 မူင်းၵႂႃႇ ယူႇတီႈ ၶွင်ႊသီႊၾႅတ်ႊၻရႄႊ ၸၢဝ်းၶိူဝ်းၽွမ်ႉႁူမ်ႈ (UNFC) တင်း ၸုမ်းႁူမ်ႈသၢင်ႈၶၵ်ႉၵၢၼ်ငမ်းယဵၼ် (PPST) ႁူပ်ႉဢုပ်ႇဢူဝ်းၵၼ် တီႈၼႂ်းၵဵင်းမႆႇ မိူင်းထႆး။ ပၢင်ႁူပ်ႉဢုပ်ႇဢူဝ်းပွၵ်ႈၼႆႉ ပဵၼ်ပွၵ်ႈဢွၼ်တၢင်းသုတ်းၶွင်သွင်ၸုမ်း-ၼႆယဝ်ႉ။
တီႈပၢင်ၵုမ်ၼႆႉ ဢုပ်ႇဢူဝ်းလႅၵ်ႈလၢႆႈတၢင်းႁူႉတၢင်းႁၼ်ၵၼ်လႄႈ လၢႆၸိူဝ်ႉလၢႆလွင်ႈ။ လႆႈၸႂ်တူၵ်းလူင်းၵၼ် တႅပ်းတတ်းဝႃႈ- တေတိုၵ်းသူၼ်းၸုမ်းၸိူဝ်းဢမ်ႇလူင်းလၢႆးမိုဝ်းတင်းလၢႆ ႁႂ်ႈလႆႈလူင်းလၢႆးမိုဝ်း။ တေတိုၵ်းသူၼ်း ၸုမ်းၸိူဝ်းဢၼ်ၶႂ်ႈတႄႇတင်ႈပူၵ်းပွင် ၸိုင်ႈမိူင်းႁူမ်ႈတုမ် ဢၼ်ပဵၼ်ၾႅတ်ႊၻရႄႊလႄႈပဵၼ် ၻီႊမူဝ်ႊၶရေႊၸီႊၼၼ်ႉ ႁႂ်ႈလႆႈလူင်းလၢႆးမိုဝ်း-ၼႆယဝ်ႉ။
ၼွၵ်ႈသေၼၼ်ႉ ဢုပ်ႇဢူဝ်းၵၼ်ၵဵဝ်ႇၵပ်းလူၺ်ႈလွင်ႈ ၸုမ်းသိုဝ်ႇ Media ။ ၵဵဝ်ႇၵပ်းလူၺ်ႈလွင်ႈတွပ်ႇလၢတ်ႈ ပၼ်တီႈၸုမ်းသိုဝ်ႇၶၢဝ်ႇတင်းလၢႆၶဝ်ၼၼ်ႉ ၽူႈၶၢၼ်ပၢၵ်ႇမူႇၸုမ်းၵူၺ်း တေလႆႈလၢတ်ႈ၊ ပေႃးလၢတ်ႈၵေႃႈ တေလႆႈလၢတ်ႈလွင်ႈလွၵ်းၸုမ်း ဢၼ် 8 ၸုမ်းမီးႁူမ်ႈၵၼ်-ၼႆယဝ်ႉ။
ၽူႈၵွၼ်းလုမ်း PI ၵမ်ႉထႅမ်လွင်ႈငမ်းယဵၼ်ၼႂ်းမိူင်း ၸဝ်ႈၶိုၼ်းသႂ် ၸႂ်ယဵၼ် လၢတ်ႈဝႃႈ-” တီႈပၢင်ႁူပ်ႉထူပ်းၵၼ် ဝၼ်းတီႈ 13 ၼႆႉ ယူႇတီႈ UNFC လၢတ်ႈဝႃႈ- မိူဝ်ႈလဵဝ်ငဝ်းလၢႆးမၼ်းသုၵ်ႉယုင်ႈမႃးတိၵ်းတိၵ်း၊ UNFC ငူပ်ႉငီႉၵၼ်တင်းလူင်ပွင်ၸိုင်ႈၵေႃႈ ဢမ်ႇလႆႈလွင်ႈ။ ၵူၼ်းယၢင်းလႅင်ၵေႃႈထုၵ်ႇၶႃႈတၢႆ။ RCSS ၵေႃႈထုၵ်ႇႁၢမ်ႈတပ်ႉဢိုတ်းပၢင်ၵုမ်၊ ပွတ်းႁွင်ႇၵေႃႈပဵၼ်ပၢင်တိုၵ်းသိုၵ်းသိူဝ်ၵၼ်။ ၵွပ်ႈၼၼ် ႁဝ်းထုၵ်ႇလႆႈသၢင်ႈလွင်ႈၸမ်ၸႂ်ၵၼ်၊ ၵႆႉမႃးႁူပ်ႉထူပ်းဢုပ်ႇဢူဝ်းၵၼ်”- ဝႃႈၼႆ။
သိုပ်ႇလၢတ်ႈဝႃႈ- “လွင်ႈၼႆႉတၢင်းၾၢႆႇ PPST ၵေႃႈလၢတ်ႈဝႃႈႁၼ်လီၸွမ်း၊ ၵူၺ်းၵႃႈ တႃႇႁဝ်းတေႁူပ်ႉၵၼ် လႆႈတႃႇသေႇ ၼိုင်ႈလိူၼ်လႂ်ၼိုင်ႈပွၵ်ႈၸိူဝ်းၼႆႉ ႁဝ်းလူဝ်ႇလႆႈမီးပိူင်မၼ်း”- လၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈ ၼင်ႇၼႆ။
ဢွၼ်ၼႃႈၼႆႉ မိူဝ်ႈဝၼ်းတီႈ 11-12/01/2017 ၶၢဝ်းတၢင်းသွင်ဝၼ်း၊ ၸုမ်းႁူမ်ႈသၢင်ႈၶၵ်ႉၵၢၼ်ငမ်းယဵၼ် (PPST) ႁူပ်ႉဢုပ်ႇၵၼ် တီႈၼႂ်းၵဵင်းမႆႇၼင်ႇၵဝ်ႇ။ လႆႈႁူႉဝႃႈ ဢုပ်ႇဢူဝ်းၵၼ် လွင်ႈႁၢင်ႈႁႅၼ်းတႃႇပၢင်ၵုမ်လူင် လွင်ႈငမ်းယဵၼ် မိူင်းႁူမ်ႈတုမ် (ပွၵ်ႈၵမ်း 4) ႁိုဝ် ပၢင်ၵုမ်လူင်ႁူဝ်ပၢၵ်ႇပီ 21 ပၢင်လူင် ၵမ်းထူၼ်ႈ 3 ။ ယိူင်းဢၢၼ်းဝႃႈ ပေႃးၶဝ်ႈပၢင်ၵုမ်လူင်မႃး ႁႂ်ႈၸၢဝ်းၶိူဝ်းပဵၼ်ၼမ်ႉၼိုင်ႈၸႂ်လဵဝ်ၵၼ်၊ ဢွၵ်ႇသဵင်လဵဝ်ၵၼ်-ၼႆယဝ်ႉ။
တီႈပၢင်ၵုမ် ဢုပ်ႇဢူဝ်းပႃးလွင်ႈဢၼ် RCSS ဢွၼ်ႁူဝ် ၸတ်းႁဵတ်းပၢင်လူင်းႁူပ်ႉထူပ်းၵူၼ်းမိူင်းသေ လႆႈထုၵ်ႇသိုၵ်းမၢၼ်ႈဢဝ်ႁႅင်းသိုၵ်းၶဝ်ႈဝႅတ်ႉလွမ်ႉ ႁႄႉႁၢမ်ႈ မိူၼ်ၼင်ႇတီႈပၢင်လူင်လႄႈ လၢႆလၢႆၸႄႈဝဵင်းၸိူဝ်းၼႆႉ။
ဢိင်ၼိူဝ်ပၢင်ၵုမ်ၼႆႉသေ ဢွၵ်ႇလိၵ်ႈပိုၼ်ၽၢဝ်ႇတုၵ်းယွၼ်း တီႈလူင်ပွင်ၸိုင်ႈ ႁႂ်ႈလိူၼ်ၶၢႆႉဝၼ်း ပၢင်ၵုမ်လူင်ႁူဝ်ပၢၵ်ႇပီ 21 ပွၵ်ႈၵမ်း 3 ဢၼ်တေႁဵတ်းၽွင်းႁၢင်လိူၼ်ၵျႅၼ်ႊၼိဝ်ႊရီႊၼႆႉ ၵႂႃႇတၢင်းၼႃႈ။
ၵဵဝ်ႇၵပ်းလွင်ႈၼႆႉ လၢတ်ႈၼႄလွင်ႈတၢင်း 4 ၶေႃႈဝႃႈ- 1.တႃႇၸုမ်းၸၢဝ်းၶိူဝ်းၽႂ်မၼ်း ၸတ်းႁဵတ်း ပၢင်ၵုမ်ၵၢၼ်မိူင်း ၸၼ်ႉၸိူဝ်ႉၸၢတ်ႈ ND ၼၼ်ႉ ၶၢဝ်းယၢမ်းမၼ်းဢမ်ႇပဵင်းပေႃး။ 2.တႃႇႁဵတ်းပၢင်ႁူပ်ႉထူပ်း ၵူၼ်းမိူင်းၵေႃႈ ၶၢဝ်းယၢမ်းဢမ်ႇပဵင်းပေႃး၊ 3.တႃႇႁဵတ်းပၢင်ၵုမ် ၶွမ်ႊမတီႊႁဵတ်းၵၢၼ် (Working committee) ၵေႃႈၶၢဝ်းယၢမ်းမၼ်းဢမ်ႇပေႃး။ 4.ပၢင်ၵုမ်ၶွမ်ႊမတီႊၵေႃႈ လူဝ်ႇဢုပ်ႇဢူဝ်း 5 ႁူဝ်ၶေႃႈ၊ ၵၢၼ်မိူင်း၊ ၵၢၼ်ႁူမ်ႇလူမ်ႈ၊ ၵၢၼ်ပၢႆးမၢၵ်ႈမီး၊ ၵၢၼ်တူင်ႇဝူင်းၵူၼ်း၊ လွင်ႈတီႈလိၼ်လႄႈၶူဝ်းၶွင်သၽႃႇဝ ၸိူဝ်းၼႆႉ ၶၢဝ်းယၢမ်းမၼ်းဢမ်ႇပေႃး-ၼႆယဝ်ႉ။
လွင်ႈၸိူဝ်းၼႆႉ လႆႈၶေႃႈတႅပ်းတတ်းဝႃႈ- 1.တေဢုပ်ႇဢူဝ်းငူပ်ႉငီႉၵၼ်တင်း လူင်ပွင်ၸိုင်ႈ၊ ၽူႈၵွၼ်းသိုၵ်း သုင်သုတ်း ဢိၵ်ႇ ၽူႈၵိူဝ်းၵုမ်ၸိုင်ႈမိူင်း ၼၢင်းဢွင်ႇသၢၼ်းၸူႉၵျီႇ။ ပေႃးဝႃႈမီးလွင်ႈလူင်ႉလႅင်းလႆႈၸႂ်ၵၼ်ယဝ်ႉ ၸွမ်းၼင်ႇဢၼ်ဝၢင်းၽႅၼ်ဝႆႉ 4 ၶေႃႈၼၼ်ႉ တေသိုပ်ႇၶပ်းၶိုင်ၵႂႃႇၵမ်းလဵဝ်။ 2.UNFC တေႁူပ်ႉထူပ်းၵၼ်တင်း PPST -ၼႆယဝ်ႉ။
UNFC ၼႆႉ မီးၸုမ်းတူဝ်တႅၼ်းဢုပ်ႇဢူဝ်းၵၢၼ်မိူင်း DPN ။ ထႅင်ႈၾၢႆႇၼိုင်ႈတၢင်းၼိုင်ႈ ၸုမ်း PPST ၵေႃႈ မီးၸုမ်းတူဝ်တႅၼ်း PPWT ။ ၵႃႈပူၼ်ႉမႃးသွင်ၸုမ်း UNFC တင်း PPST ၼႆႉ ယၢမ်ႈႁူပ်ႉၵၼ်မႃးယဝ်ႉ 8 ပွၵ်ႈ၊ ၵူၺ်းၵႃႈ ပဵၼ်ၸုမ်းတူဝ်တႅၼ်း DPN တင်း PPWT ႁူပ်ႉၵၼ်ၵူၺ်း။ ယူႇတီႈ UNFC ၵမ်းသိုဝ်ႈသေ ႁူပ်ႉထူပ်းၵၼ်တင်း PPST ၼႆႉ ပွၵ်ႈၼႆႉပဵၼ်ပွၵ်ႈၵမ်းႁႅၵ်ႈ-ၼႆယဝ်ႉ။
ၸုမ်းၸၢဝ်းၶိူဝ်း EAOs ၸိူဝ်းလူင်းလၢႆးမိုဝ်း NCA ဝႆႉ 8 ၸုမ်းမီး ပဵၼ်ၶွင်ႊသီႊဢဝ်ၶိုၼ်းၸိုင်ႈတႆး/တပ်ႉသိုၵ်း ၸိုင်ႈတႆး (RCSS/SSA) ၊ ၸုမ်းပူတ်းပွႆႇၸိူဝ်ႉၸၢတ်ႈပဢူဝ်း (PNLO) ၊ တႅဝ်းႁူမ်ႈၸိူဝ်ႉၸၢတ်ႈၶျၢင်း (CNF) ၊ တႅဝ်းႁူမ်ႈၻီႊမူဝ်ႊၶရႅတ်ႊတိၵ်ႊ လုၵ်ႈႁဵၼ်းမိူင်းမၢၼ်ႈပတ်းပိုၼ်ႉ (ABSDF) ၊ ႁူမ်ႈတုမ်ၸိူဝ်ႉၸၢတ်ႈယၢင်းၽိူၵ်ႇ (KNU) ၊ တပ်ႉသိုၵ်းယၢင်းၵမ်ႉထႅမ်ၻီႊမူဝ်ႊၶရေႊၸီႊ (DKBA) ၊ တပ်ႉသိုၵ်းပူတ်းပွႆႇၸိူဝ်ႉၸၢတ်ႈယၢင်း-ၶွင်ႊသီႊငမ်းယဵၼ် (KNLA-PC) ၊ ပႃႊတီႊပူတ်းပွႆႇၸိူဝ်ႉၸၢတ်ႈရၶႅင်ႇ (ALP) ၸိူဝ်းၼႆႉ။
ၸိူင်ႉႁိုဝ်ၵေႃႈယဝ်ႉ ပၢင်ၵုမ်ၶၢဝ်းတၢင်းသွင်ဝၼ်း ဝၼ်းတီႈ 11-12 ၼၼ်ႉ ၸုမ်းပဢူဝ်းဢမ်ႇၶဝ်ႈႁူမ်ႈ၊ ၵွပ်ႈၼႂ်းမူႇၸုမ်းပဢူဝ်း မီးပၢင်ၵုမ်ၵၼ်ဝႆႉ- လႆႈႁူႉၸွမ်းၼင်ႇၼႆ။
